Mateo 1 - Porciones en Zapoteco de las Delicias

Xuuz'xhne'e Jesucristo

¹ Ni nayoj lake xuuz'xhne'e Jesucristo, bënni guke xi'in'xhzue' David len Abraham:

² Abraham guke xuuze Isaac, Isaac guke xuuze Jacob, Jacob guke xuuze Judá len yugu bënni bë'che'e.

³ Judá guke xuuze Fares len lekz'ka' xuuze Zérah len xhne'e guk'nu Tamar. Fares guke xuuze Hersón len Hersón guke xuuze Aram.

⁴ Aram guke xuuze Aminadab, Aminadab guke xuuze Nahasón len lekz'ka' xuuze Salmón.

⁵ Salmón guke xuuze Booz len xhne'e guk'nu Rahab. Booz guke xuuze Obed len xhne'e guk'nu Rut. Obed guke xuuze Jesé,

⁶ len Jesé guke xuuze David bënni gnabe'e. David bënni gnabe'e guke xuuze Salomón len xhne'e guk'nu nguul'a gzua'leen'nu'ne Urías.

⁷ Salomón guke xuuze Roboam, Roboam guke xuuze Abías len Abías guke xuuze Asá.

⁸ Asá guke xuuze Josafat, Josafat guke xuuze Joram len Joram guke xuuze Ozías.

⁹ Ozías guke xuuze Jotam, Jotam guke xuuze Acaz len Acaz guke xuuze Ezequías.

¹⁰ Ezequías guke xuuze Manasés, Manasés guke xuuze Amón len Amón guke xuuze Josías.

¹¹ Josías guke xuuze Jeconías len yugu bënni bë'che'e, dza kati gulazën'ke bunach Israel len guluche'ke leke yëdz Babilonia.

¹² Gdëëd le ni, Jeconías guke xuuze Salatiel, Salatiel guke xuuze Zorobabel.

¹³ Zorobabel guke xuuze Abihud, Abihud guke xuuze Eliaquim len Eliaquim guke xuuze Azor.

¹⁴ Azor guke xuuze Sadoc, Sadoc guke xuuze Aquim len Aquim guke xuuze Eliud.

¹⁵ Eliud guke xuuze Eleazar, Eleazar guke xuuze Matán len Matán guke xuuze Jacob.

¹⁶ Jacob guke xuuze José, José guke bënni kieenu María, ati lenu guk'nu xhne'e Jesús, bënni'a re'ru'ne Cristo.

¹⁷ Ka guk, chi'da' dia'dza guladëëd le rgie'la' len Abraham na' bdxin'te len David, na' ye chi'da' dia'dza ka guladëëd rgie'la' len David bdxin'te dza kati gulazën'ke bënni yëdz Israel na' guluche'ke leke yëdz Babilonia, len ye chi'da' dia'dza ka guladëëd le rgie'la' dza'a kati gulazën'ke bënni yëdz Israel len rdxin'te dza gzue' le' Cristo.

Ka guk guulje Jesucristo

¹⁸ Ki' guk guulje Jesucristo: María, xhna'bi bi Jesús, chi nazi' lu naa'bi ktzag'naa'bi len bi'i José, ati kati ti nakui'len lzaak'bi gzeebi zi'i len yëla wak kie' Dios.

¹⁹ José bënni kieenu nake bënni dxia'a len ti gu'un'de gze' xhtiidza'nu, lena'a baga'chi'z gu'un'de jka'ane'nu.

²⁰ Ki' chi nuune gunne, kati tue' Gbaaz La'ay kie' Xan'ru blui' lau'e lu yeel len gudxe le': «José, xi'in'xhzue' David, ti gaadx'du sua'leenu'bi bi'i María, koma leebi gzeebi zi'i len yëla wak kie' Bë' La'ay kie' Dios.

²¹ María suabi kieenu tuubi bi'dau', len gzu laabi Jesús. Ka' si' laabi koma usláabi bënni yëdz kieebi ki xhtu'la'ke.»

²² Yugute' le ni glakgak naar guk ka'teez gne' Xan'ru lu ne'e bënni be'e diidza ulaaz kie':

²³ «Bi nguul raban'dou se'bi zi'i len suabi kieenu tuubi bi'dau', len gzua'li laabi Emanuel» (Le re'e'ni gna': «Dios zue' len ro'u»).

²⁴ Kati José bubaane lu yeel'a, beene ka gudxe le' Gbaaz La'ay kie' Xan'ru len gzua'leene'bi bi'i María.

²⁵ Len ti guxh'leene'nu, na' bdxin'r dza guulj'bi bi kieenu María, len José bzue' laabi Jesús.