Marcos 9 - Porciones en Zapoteco de las Delicias

¹ Jesús lekz'ka' gudxe leke: —Le nak'te rea' lbi'ili ki la'ke bënni nakua'ke ni, ti lat'gake nakati lale'ir'de gdxin len gdu yëla wak yëla rnabe' kie' Dios.

Yëla rna' kie' Jesús ptza'

² Gdëëd xop dza, Jesús gyiije tu gia'a xhën len nuche'e Pedro, Santiago len Juan. Lau'ke bënni ni, yëla rna' kie' Jesús ptza'.

³ Laari nakue' gyep'yës'lni' len tzka'ti'ga naxhkich nutunu bënni, bënni re'e laari rzaki'de guune ga gna' ka'ti xhkich.

⁴ Ati gulale'i'de Elias len Moisés tui'leene diidza Jesús.

⁵ Pedro gudxe Jesús: —Bënni useed, ¡dxia'a'kza zuaaru ni! Gun'ru tson yu'u laari: tu kiu', tu kie' Moisés len ye tu kie' Elías.

⁶ Koma Pedro ti bdzëël'de bi gne' tzka'ti'ga glaadxi'de bënni useed kie' Jesús.

⁷ Na', broj tu buaj yajxua leke, len lu buaj ni byën chi'i le gna: «Bënni Xi'ina ni nadxi'i'tzki'da'ne: guluzenaag'de.»

⁸ Na'teez, kati guluyu'ke kuiti le'e'ke, nuturnu gulale'i'de, tuuze Jesús.

⁹ Tzal guludinie gia'a, Jesús gudxe leke ki nutunu lagixhji'de lea gulale'i'de, nakati gdxin'r dza Xi'ine Bënni ubaane lu yëla gut.

¹⁰ Lena'a nutunu gulagixhji'de lea gulale'i'de, zala tunaabi lza'a'ke bixh'kza uban'ru lu yëla gut.

¹¹ Gulunaab'de Jesús: —¿Bixhkia' bënni useed xhba kie' Dios tanáke ki Elias rala giide zia'a?

¹² Jesús bubi'e diidza: —Leel, Elías ze'e zia'a len le' ukua'be'e yugute'. San, ¿bixhkia' rna Diidza La'ay ki Xi'ine Bënni rala ktzaage len ti layaazlaadxi'ke Le'?

¹³ San neda rea' lbi'ili ki Elias chi biide len leke gulusake'e le' ka gna kieke, ka nayoj lu Diidza La'ay rala gak kie'.

Jesús ru'uune'bi tuubi bi kuidi yu'u lebi bë' xëwi

¹⁴ Kati guludxiine ga nakua'ke bënni useed kie' Jesús, yajxaka'ke bunach zian nakua'leen'ke leke, len la'ke bënni useed xhba kie' Dios tadil'e diidza len leke.

¹⁵ Kati gulale'i'de Jesús yugute'ke gulaxiti'ke yajtzaag'ke Le' len yëla rubaani.

¹⁶ Le' bnaab'de leke: —¿Bixh diidza rdil'li dzaagk'li'ne?

¹⁷ Tue' bënni zue' ni' bubi'e diidza: —Bënni Useed, ni nuche'a'bi bi kia', koma yu'u leebi tu bë' xëwi le ben ga tir gneebi.

¹⁸ Ga'ti'teez ga rdaabi, bë' xëwi'a rzën lebi, len rzal lebi lyu; len rbia bdxina ziidi rua'a'bi, rtil la'ya'bi len rzeera nia'a naa'bi. Chi guudx'ka'ne bënni useed kiu' lubiije bë' xëwi'a, san leke ti glake.

¹⁹ Jesús bubi'e diidza: —¡Lbi'ili bënni ti nayajle'! ¿Gaxhkz zua' ka'tekz sua'leena lbi'ili? ¿Gaxhkz zua' ka'tekz kxikji'da lbi'ili? Gultzajxi'bi ni bi'dau'a.

²⁰ Na' yajua'ke'bi bi'dau'a lau'e Jesús. San kati bë' xëwi'a ble'i Le' Jesús pxiiz leebi len brixh'ptul leebi lyu len rbia bdxina ziidi rua'a'bi.

²¹ Jesús bnaab'de xuuz'bi: —¿Batxh't rak ki kieebi? Xuuz'bi bubi'e diidza: —Ni nak'bi bi'dau' kati gzulau.

²² Len zian lzu bë' xëwi ni chi bzal leebi lgi' len lu nis naar gdëëdi leebi. San xhki wak bi guunu, buechilaadxi'i netu len guk'leen netu.

²³ Jesús gudxe le': —¿Nakxha', “xhki wak bi guuna”? ¡Gat'ga de le ku gak kie' bënni rajle'e!

²⁴ Na' xuuz'bi bi'dau'a bisku'e: —Rajle'a. ¡Guk'leen neda tzajle'a!

²⁵ Kati Jesús guk'be'i'de ki chi tadzaag'ra bunach, gdil'leene bë' xëwi'a, gne': —Li' bë' xëwi ruunu ga ti gui'bi diidza len ti gyëëni'bi bi'i ni rnabe'i'da li' ki yurooju'bi len tir yune'u'bi.

²⁶ Bë' xëwi'a biskua', len ben ga yubl gbixh'ktul'bi. Chi nak ka buroj len pka'an lebi ka bi'i nat, lena'a bënni zian tanáke ki leel nat'bi.

²⁷ Ati Jesús, gde'le'e naa'bi, pchise'bi; len bi'i ni gzui'bi.

²⁸ Chi nak ka Jesús gyaazie tu yu'u, len bënni useed kie' kiizi gulunaab'de le': —¿Bixhkia' netu ti guk'tu yubiaj'tu bë' xëwi'a?

²⁹ Ati Jesús bubi'e kieke diidza: —Bë' xëwi nak'k ki, turoj'z kati rui'leen'ru'ne diidza Dios.

Jesús rgixhjë'e burop lzu ki yëla gut kie'

³⁰ Kati guluza'ke, guladëëde Galilea. San Le' Jesús ti gu'un'de nu gnëëzi,

³¹ koma zia'a rseed'de bënni useed kie'. Re' leke: —Le' Xi'ine Bënni uludëëde Le' lu naa'ke bunach len uludëëd'de Le'; san na' gak tson dza ubaane lu yëla gut.

³² Leke tibi gulayajni'i'kz'de le re' leke, len taadx'de lunaab'de Le'.

¿Nuxh nak'r blou?

³³ Guladxiine yëdz Cafarnaúm. Kati chi nakua'ke nu'yu'u, Jesús bnaab'de leke: —¿Bixh rdili'li diidza na' yu'u'ru nëëz?

³⁴ Ati ti gulane', koma tzal dzë'ë'ke nëëz guladil'e diidza ki nuxh'lke rala gak're bënni blou.

³⁵ Na' Jesús grë'e, len bliidze bënni chin'nu'ke'a ati gudxe leke: —Xhki nu re'e'ni gak bënni blou, rala gake bënni we'en kieke yugute'ke len gak'leene yugute' bunach.

³⁶ Chi nak ka' gatzj'lau'i bze'bi tuubi bi'dau' ati bniide'bi na' gne':

³⁷ —Len bënni'a rzi'e'bi lu la' tuubi bi'dau' ka bi'dau' ni, neda rzi'e; len bënni rzi'e neda, keg neda'z rzi'e lekz'ka' rzi'e nu psë'la neda.

Bënni tibi ruune kieeru, rak'leen're ro'u

³⁸ Juan gudxe Le': —Bënni Useed, ble'i'tu'ne tue' bënni rubiije bë' xëwi lu lou' len bzaaga'tu'ne, koma ti za'leene ro'u.

³⁹ Jesús bubi'e diidza: —Ti gzaaga'li'ne, koma nutunu bënni, bënni chi beene yëla wak lu la' gunn gne' kia' le ku nak.

⁴⁰ Bënni'a tibi ruune kieeru, rak'leen're ro'u.

⁴¹ Nu'ti'teez bënni, bënni gunne kieeli zala tu xhiiga'z nis, uzi'e xhbei lea guune'a, koma lbi'ili naki'li kie' Cristo.

Banaadx le nuche' gbixh'ru lu dula

⁴² »Nu'ti'teez bënni, bënni guune ga labixe lu dula bënni'du tayajle'ke neda wak'l kie' dxia'a luuge'e yeene tu giaj gich len luzal'e le' lu nis xhën.

⁴³ Xhki no'u run ga guunu dula, pchuug ley; nakr'ru dxia'a kchuugu ley len waaziu lu yëla naban tzalzu ka len grop'te no'u tzajtzu'u lu gi'gabil, ga rë' gi' le ti uulkz.

⁴⁴ [Ga bzuuga ti tat'ba len gi'a ti ru'uulkz.]

⁴⁵ Len xhki ni'u run ga guunu dula, pchuug ley; nakr'ru dxia'a kchuugu ley len waaziu lu yëla naban tzalzu ka len grop'te ni'u tzajtzu'u lu gi'gabil.

⁴⁶ [Ga bzuuga ti tat'ba len gi'a ti ru'uulkz.]

⁴⁷ Len xhki lau'u run ga guunu dula, gliaj ley; nakr'ru dxia'a kuiiju ley len waaziu lu yëla naban tzalzu ka tzajtzu'u lu gi'gabil len grop'te lau'u,

⁴⁸ ga bzuuga ti tat'ba len gi'a ti ru'uulkz.

⁴⁹ »Koma yugute'ke laxhi'de zëdi' len gi'.

⁵⁰ Le dxia'a zëdi'a; san xhki tir nak sna'a, ¿Nakxh wak uxhi'? Gulgak ka zëdi'a len gulsua lu yëla rë'dxi len yugute' bunach.