Marcos 7 - Porciones en Zapoteco de las Delicias

Le run leke bëzj bunach

¹ Bënni fariseo dzaag'ke bënni useed xhba kie' Dios, bënni guludxiine ki Jerusalén gulabiige'e ga ze' Jesús.

² Bënni ni, kati gulale'i'de ki la'ke bënni useed kie' Jesús ta'we ka nak bëzj naa'ke, ati ti gulagiibe ley ka chi naleebi rala luune, gulazi'kiidze'e le'ke;

³ (Koma yugute'ke bënni fariseo len bënni Judea ni tuune ka naleeb'kde gluune xuuz'xhtau'ke guul, ti la'we xhki ti nagiib naa'ke ka rala tzaar

⁴ len kati tudxiine raja'ke ye'i ti ta'we xhki ti tagiib naa'ke, len le zian ni naleeb'kde tuune: ni tagiibe xhiiga ti'ij'de nis, rë'ë, xhiiga gia len ga tas'ke.)

⁵ Lena'a, bënni fariseo len bënni useed xhba kie' Dios gulunaab'de le': —¿Bixhkia' bënni useed kiu' ti tuune ka gluune xuuz'xhtau'ru guul, ati ka nak bëzj naa'ke ta'we?

⁶ Jesús bubi'e kieke diidza: —Gna'kze ka Isaías bënni be'e diidza ulaaz kie' Dios kati bzooje kieeli le nak'li ka bënni nuda' blo'u: “Yëdz ni tun'ze lua' tui'ke neda bala'an, san laadxi'dau'ke ga yubl rda.

⁷ Gat'ga dekz run tayiijilaadxi'ke neda, le tuseed'de nak le tayaazlaadxi'ke bunach.”

⁸ Koma rka'an'li le gnabe'i'de lbi'ili Dios naar run'li le chi naleeb'kde tuune bunach.

⁹ Lekz'ka' gudxe leke: —Lbi'ili rka'an'li ka'az le rnabe'e Dios naar run'chi'li le naleeb'kde tuune bunach.

¹⁰ Koma Moisés gne': “Be'ke bala'an xuuz'xhno'u”, ati “Bënni gdxie' dë' xuuz'xhne'e, si'e yëla gut.”

¹¹ San lbi'ili rnaali ki bënni gunn gie'e xuuz'xhne'e: “Ti gunn gak'leena li', koma yugute' le de kia' nak corbán” (le ni re'e'ni gna': «chi nudëëda lau'e Dios»);

¹² ati tir ruik'li'ne latj lak'leene xuuz'xhna'ke.

¹³ Len lea naleebi'li run'li len rseedik'li'ne bënni yubl luune rka'an'li tzala'al xhtiidze'e Dios. Ati le zian le ki naleebi'li run'li.

¹⁴ Chi nak ka Jesús bliidze bunach, len gne': —Guluzenaag yugute'li, len gultzajni'i:

¹⁵ Keg le ryaaz nule'e'le bënni run le' bëzj. Le r'roj laadxi'dau'e lena'a run le' bëzj.

¹⁶ [Tzka'li zua naag'li guluzenaag.]

¹⁷ Kati Jesús pka'ane bunach'a len gyaazie nu'yu'u, bënni useed kie' gulunaab'de Le' bixh re'e'ni gna diidza'a.

¹⁸ Le' gudxe leke: —¿Naru lekz'ka' lbi'ili ti rajni'i'li diidza ni? ¿Ti rajni'i'li ki keg le ryaaz nule'e'le bënni run le' bëzj,

¹⁹ koma ti ryaaz lu laadxi'dau'e, le'e ryaaz, chi nak ka rudëëd? Len le ni gu'un'de gne' ki yugute' la'wa'gu nakgak dxia'a.

²⁰ Lekz'ka' gne': —Le r'roj lu laadxi'dau'e bënni, lea run le' bëzj.

²¹ Koma lu laadxi'dau'e bënni r'roj: yugute' le ku nak, yëla rajtzu'u'leen nu ku zua'leen'li, yëla gban, yëla rdëëdi bunach,

²² yëla rgitzj xhba ki utzag'na', yëla zelaadxi, yëla xhe'e, yëla rzi'ye', le rusnit le' bënni, yëla rdi'i, yëla usa' diidza, yëla run xhën kuin'li, yëla ti nayajni'i.

²³ Yugute' le ku nak dxia'a ni taroj laadxi'dau'e bënni len run le' bëzj.

Yëla rajle' kieenu nguul Sirofenicia

²⁴ Na' Jesús gde'le'e nëëz ziije gia'a yeego ki Tiro. Gyaazie tu yu'u len ti gu'un'de nu gnëëzi; san ti guk jkachi'lau'e.

²⁵ Gnëëzi'ti'nu kie' Jesús xhna'bi bi'i nguul'du bi'i yu'u leebi bë' xëwi len yajzechu xhiib'nu xhni'e.

²⁶ Nguul ni ti nak'nu nguul Judea, nak'nu nguul Sirofenicia. Yajëtayui'nu'ne Jesús ki ubiije bë' xëwi'a yu'u leebi bi'i kieenu.

²⁷ Ati Jesús gudxe'nu: —Tue' bënni zia'a bi'i kie' rga'we'bi, koma ti nak dxia'a kue' yët'xhtiil'a rala laag'bi bi'i kie' len gnëëdzje kiek'ba bëku'.

²⁸ Leenu bubi'i'nu kie' diidza: —Xan, nak'te bëku' len lez taag'ba bixhj yët'xhtiil le rëxhj xhani ga taag'bi bi'dau'a.

²⁹ Jesús gudxe'nu: —Buaj len yëla rë'dxi ka nak diidza'a be'u ni, chi buroj'bi bë' xëwi'a bi'i nguul kiu'.

³⁰ Kati nguul ni budxin'nu liidx'nu, budzëëli'nu'bi bi'i kieenu ga ras'bi ati bë' xëwi'a chi buroj lebi.

Jesús ru'uune bënni nakëëdzue len rat rue'e

³¹ Jesús burooje yu ki Tiro, gdëëde Sidón, bdxiine nis ki Galilea, lu yu ki Decápolis.

³² Na' guluche'ke lau'e Jesús tue' bënni nakëëdzue len rat rue'e ati gulunaab'de Le' kxua'ne'e le'.

³³ Jesús pche'e le' ga yubl, ga ti rë' bunach, bne'e xhbënni'ne'e gid'naage ati len xhëëna gdaane luudxe'e.

³⁴ Chi nak ka, byue' xhba, gxi'laadxe'e len gudxe bënni'a: «¡Efatá!» (Le ni re'e'ni gna: «¡Byaalj!»)

³⁵ Na'teez, gid'naage bënni ni guluwaalj len luudxe'e buli ati bui'e dxia'a diidza.

³⁶ Jesús gnabe'i'de le' ki nutunu kixhji'de le ni; san ka dip rnabe'i'de leke tibi lanáke, leke tayali'il'de.

³⁷ Gulubaani'tzki'de, len tanáke: «Bënni tzawi nak'tzke. ¡Ruune ga bënni këëdzu layëën'de len bënni ti rak lui'ke diidza, lui'ke diidza!»