Marcos 6 - Porciones en Zapoteco de las Delicias

Jesús lu yëdz Nazaret

¹ Jesús buze'e ni' len zuwëëje laadze, len bënni useed kie' zjak'leene Le'.

² Kati bdxin dza tu'ueak'laadxi'ke bënni Judea, gzulau'e rseed'de lu yu'u useed. Len bënni zian gulayëën'de Le' len tubaan'de ati tunaabi lza'a'ke: —¿Gaxh pseede yugute' le ni? ¿Gaxhkz yajxi'e yëla nayajni'i kie' len yëla wak le ruune?

³ ¿Naru keg Le' bënni'a rbagu'e yaag, bënni xi'in'nu María len bënni bë'che'e Santiago, José, Judas len Simón? ¿Naru keg nguul zaane'a nakua'leen'nu ro'u ni? Len ti tayajle'ke Le'.

⁴ Ati Jesús gudxe leke: —Laadz'ze ga nakua'ke bënni bë'chi' lze'e len bënni nakua'leene Le' liidxe ku tui'ke le' bala'an bënni rue'e diidza ulaaz kie' Dios san ga yubl tui'ke le' bala'an

⁵ Ati ti benn guune ni' yëla wak, lati'iz'ke bënni we' pxua'ne'e len buune leke.

⁶ Len rubaan'de koma bunach'a ti tayajle'ke Le'. Jesús rde' rseed'de yugu yëdz nakua' ga'la.

Jesús rsë'le'e bënni useed kie' tzajtixhjë'ke yëla rnabe' kie' Dios

⁷ Ati butzaage chin'nu'ke bënni useed kie', len psë'le'e leke chop ueaj'ke ati bnëëdzje kieke yëla rnabe' naar lubiije yugute' bë' xëwi.

⁸ Gnabe'i'de leke tibi lua'ke tzal layu'u'ke nëëz tuuz xuyaag lazëëne. Keg yët'xhtiil, keg le lia'aj'la'we, keg dumi rala lua'ke.

⁹ Gunn luda'ke lëël'ke san ti gunn lua'ke ye tu kë' xha'ke.

¹⁰ Gudxe leke: —Kati tzaaz'li tu yu'u na'z guluga'an tzal gdxin dza uza'li latj'a.

¹¹ Ati xhki tu latj ti lazi'ke lbi'ili len ti le'en'de luzenaage lbi'ili, guluroj len gulkuib bexhtë bia' ni'a'li, naar lak'be'i'de ki Dios ti ryaazlaadxe'e le tuune.

¹² Na' gularooje bënni useed kie' yajëëdx'ke bunach'a ki lubi'i'laadxi'ke len Dios.

¹³ Lekz'ka' gulubiije le zian bë' xëwi len gulu'un'ke bënni we' len tagieeb'de leke za.

Yëla gut kie' Juan bënni rkiile nis bunach

¹⁴ Herodes bënni rnabe' yëdz xhën byëën'de kie' Jesús koma gdu yëdz'lyu chi gze diidza kie'. Koma la'ke tanáke: «Juan bënni rkiile nis bunach chi bubaane lu yëla gut, lena'a nape yëla wak.»

¹⁵ Ye la'ke tanáke: «Le' nake Elías bënni be'e diidza ulaaz kie' Dios.» Len ye la'ke tanáke: «Le' nake bënni rue'e diidza ulaaz kie' Dios ka glake bënni'a glui'ke diidza ulaaz kie' Dios zia'at.»

¹⁶ Kati byëën'de le ni Herodes gne': —Bënni'a nake Juan, Kuin'kza gnabe'i'da luchuuge ikje len na'a chi bubaane lu yëla gut.

¹⁷ Koma nia'a kieenu Herodías, Herodes gnabe'e lazëëne Juan len beene ga luuge'e le' liidx'gia. Herodías guk'nu nguul kie' Filipo bënni bë'che'e Herodes, san Herodes gzua'leene'nu nguul ni.

¹⁸ Ati Juan chi gudxe Herodes: «Ti rala sua'leenu'nu nguul kie' bënni bë'chu'u.»

¹⁹ Lena'a Herodías ti rle'i'nu'ne dxia'a Juan ati re'eni'nu gdëëdi'nu'ne; san ti rzaki'nu,

²⁰ koma Herodes raadxi'de le' len run'chi'e le', koma nëëz'de ki nake bënni dxia'a len bënni la'ay. Herodes gdu laadxe'e ryëën'de le rne' Juan zala ti rdzëël'de bixh guune len lea ryëën'de'a,

²¹ San Herodías gxhi'nu latj kati Herodes guli'i'de iz ati beene tu gwi'i'waagu xhën kieke bënni tunabe'ke kie', bënni xan'ke bënni rajake gdil len bënni blou ki Galilea.

²² Bi nguul kieenu Herodías gyaaz'bi ga rak gwi'i'waagu xhën len bya'a'bi ati Herodes len bënni nakua'ke taagu'leene le' xhtzë' guladaani'tzki'de ka bya'a'bi, na' bënni rnabe' ni gudxe'bi bi'i ni: —Le re'enz'du bnaab len neda gunna.

²³ Len laya'ladxiini gxhi'lu'ne'e ki bi'ti'teez le gnaab'bi unëëdzje, zala nak'tza gatzj yëdz lea rnabe'a.

²⁴ Leebi broj'bi len bnaabi'bi'nu xhna'bi: —¿Bixhkz gnaaba? Leenu bubi'i'nu diidza: —Bnaab ikje Juan bënni rkiile nis bunach.

²⁵ Bi nguul raban ni bune'te'bi ga rë'e bënni rnabe'a len guudx'bi'ne: —Ka'teez zuaaru re'en'da gdxiu' ikje Juan bënni rkiile nis bunach lu xhiiga.

²⁶ Bënni rnabe' ni gzua'yechi'tzke; san le gxhi'lu'ne'e lau'ke bënni'a nuliidze'a, ti gu'un'de udabaage'e lea bnaab'bi.

²⁷ Lena'a ziuub'ze gnabe'i'de bënni riije gdil ki dujue'e ikje Juan. Bënni riije gdil ni gyiije liidx'gia'a len pchuuge ikje Juan

²⁸ len yajue'e ley lu xhiiga, len bunëëdzje len bi nguul ni ati leebi bui'bi'nu xhna'bi.

²⁹ Kati bënni useed kie' Juan gulanëëz'de le ni, guluzi'e le' len yajka'chi'ke le'.

Jesús rga'we bunach zian

³⁰ Gdëëd le ni bënni gbaaz kie' Jesús guludzaage len Le' ati gulagixhji'de Le' yugute' le gluune len le guluseed'de.

³¹ Jesús gudxe leke: —Gultza', ro'uz tziaj'ru ueak'laadxi'ru tu latj ga rë'dxi. Koma bunach zian tadxiine len tuza'ke ati leke ti talatj'ke la'we.

³² Lena'a Jesús len bënni useed kie' gulagie'le'e tu barku len yajake ga yubl.

³³ San bënni zian gulale'i'de leke len gulumbe'ke leke; na' bunach ki yugute' yëdz gulaxiti'ke yajake ni' len guladxiine zia'al ka leke.

³⁴ Kati Jesús bëtje lu barku, ble'i'de bunach zian'a len buechilaadxe'e leke koma nakua'ke ka bëku'xhiila bua'a ti zua' nu gun'chi'i lek'ba; ati le zian gzulau'e rseed'de leke.

³⁵ Kati chi za' rdzë', bënni useed kie' gulabiige'e ga'la ga ze' len gle'ke le': —Chi nadzë', len latj ni nutunu nakua'.

³⁶ Busë'la bunach ni, yëdz de ga'la ni naar tzajë'u'ke le la'we.

³⁷ Ati Jesús bubi'e kieke diidza: —Gulunëëdzj lbi'ili le la'we. Leke gulubi'ke diidza: —¿Re'en'du tzajë'u'tu yët'xhtiil ki tzka laaxhj'ru ki chop'gayua' dza, naar gnëëdzj'tu le la'we?

³⁸ Jesús gudxe leke: —¿Balxh yët'xhtiil de kieeli? Gultzajyu. Kati chi nëëzi'kde, gle'ke le': —Ga'yu' yët'xhtiil len chop'ba bël.

³⁹ Na' gnabe'i'de leke labekie bunach'a ki kieke lau'gixi ya'a;

⁴⁰ len gulabë'ke tu'gayua' ueaj'ke len chi'un ueaj'ke.

⁴¹ Gdëëd'a Jesús gxhi'e lu ne'e ga'yu' yët'xhtiil len chop'ba bël ni, byue' lu xhba len ben'la'aye ley, bxhuuxhje yët'xhtiil'a len bnëëdzje kieke bënni useed kie' naar lagis'ke kiegak bunach'a. Lekz'ka' gdisie'ba bël'a kieke yugute'ke.

⁴² Yugute' bunach'a gla'we tzka glëëlj'de;

⁴³ ati ye tzka buga'an ki yët'xhtiil'a len bël'a chin'nu bdë'ë guladza'.

⁴⁴ Len nak'ke ga'yu' mil'ke bënni gla'we yët'xhtiil'a.

Jesús rze'e lu nis

⁴⁵ Gdëëd le ni, Jesús beene ga bënni useed kie' labeene lu barku naar lanëëre tzjake tzala'a nis, zga ga de Betsaida, tzal Le' ruse'e bunach'a.

⁴⁶ Len kati buudx buse'e bunach'a, gyiije gia'a yaje'leene diidza Dios.

⁴⁷ Kati chi kchul, barku'a chi bdxin gatzj'lau'i nis. Ati Jesús tuuze naga'ane ga nak yu,

⁴⁸ len ble'i'de tayui'i'tzki'de dxin tuse'e barku, koma rak'tzka bë' zga ga leke zjake. Ziil'bal'a Jesús rze'i ni'e lu nis'a ziije ga nakua'ke'a, len chi zua' tëëde kuiti le'e'ke.

⁴⁹ Kati gulale'i'de rde' lu nis'a glaki'de pxin'a, len guluskua'ke;

⁵⁰ koma yugute'ke gulale'i'de Le' len glaadxi'de. San Le' bliidz'tie' leke, ati gne': —¡Dxiiz! ¡Needa'a: ti gaadxi'li!

⁵¹ Greene lu barku, len bë'a grë'dxi; ati leke gulubaani'tzki'de,

⁵² koma ti tayajni'i'ni'kde yëla wak le guk len yët'xhtiil'a, koma na'chul yëla nayajni'i kieke.

Jesús ru'uune bënni we' ki Genesaret

⁵³ Yajake tzala'a nis len guladxiine yu ki Genesaret, na' gluuge'e barku rui'i nis'a.

⁵⁴ Ka glëtj'ze lu barku, bunach'a gulumbe'ke Jesús.

⁵⁵ Ki gdu gia'a yeego'a gularoj'ke len rajua'ke bënni we' lu da'a, ga tayëën'de zue' Jesús.

⁵⁶ Len ga'ti'teez ga Le' riije, tziaj'tze yëdz we'en u yëdz xhën u tziaj'tze lau'gixi tukua'ke bënni we' la nëëz len tatayui'de Le' gnëëdzje lsenz lagaane zala rui'iz laari xhua kuudze'e; len yugute'ke bënni tagaane ley tu'ueake.