Marcos 5 - Porciones en Zapoteco de las Delicias

Bënni Gerasa yu'u le' bë' xëwi

¹ Guladxiine tzala'a nis lu xhyu'ke bënni Gerasa.

² Ka bëtj'ze Jesús lu barku gbiige'e kuiti le'e tue' bënni yu'u le' bë' xëwi. Bënni ni brooje ladj ba,

³ koma na' zue'. Nutunu rak sën le' zala luuge'e le' len du gia.

⁴ Len zala zian lzu bunach gluuge'e ni'a' ne'e len du gia, ka'tekz pchuuge ley ati nutunu rzaki'i'kz sën le'.

⁵ Dza len reel rde' gia'a len lu ba rusku'e len ruun'de zi' kuine len giaj.

⁶ San kati ble'i zitu'ze Jesús, pxiti'e len yajzechu xhiibe lau'e.

⁷ Ruskua'tzke gudxe le': —¡Bixh rala'a kiu', Jesús, Xi'ine Dios xhën'te! ¡Ratayui'da li' ti ksaka'zi'u neda!

⁸ Gne' ki, koma Jesús chi gudxe bë' xëwi'a: —¡Bë' xëwi, buroj le' bënni ni!

⁹ Jesús bnaab'de le': —¿Bixh leu'? Bë' xëwi'a gna': —Zian'te lea', koma zian'tu nak'tu.

¹⁰ Gutayui'tzki'de Jesús ti ksë'le'e bë' xëwi'a ga yubl ki gia'a yeego'a.

¹¹ Ga'la'z na' kuiti gia'a ni nakua'ba ziank'ba kuch taag'ba,

¹² ati bë' xëwi'a glatayui Le': —Psë'la netu len kuch ni len benn lsenz tzaaz'tu le'ek'ba.

¹³ Jesús bnëëdzje lsenz len bë' xëwi'a guluroj le' bënni'a len gulayaaz le'ek'ba kuch'a bua' nak'kba ka chop mil'ba ati bua' ni gulaxhunj'ba le'gia'a dxi'it ga de nis xhën, len ni' gulaye'pi'ba nis.

¹⁴ Bënni tun'chi'ke'ba kuch ni guluxhunj'ke len yajdixhjë'ke lu yëdz len nup nakua' tunn dxin gixi ati bunach'a yajyu'ke bixh guk.

¹⁵ Len kati guladxiine ga zue' Jesús, gulale'i'de bënni'a guluroj le' bë' xëwi rë'e, chi nakue' xhe' len chi zue' dxia'a. Bunach glaadxi'tzki'de,

¹⁶ ati bënni'a gulale'i'de lea guk kie' bënni'a guluroj le' bë' xëwi len ka guk kiek'ba kuch'a gulagixhji'de ye la' bunach.

¹⁷ Na' gulazulau'ke glatayui'de Jesús tziije ga yubl.

¹⁸ Kati budxiine Jesús lu barku, bënni'a guluroj le' bë' xëwi gutayui'de Le' gnëëdzje latj tziaj'leene Le'

¹⁹ Ati Jesús ti gu'un'de, len gudxe le': —Buaj liidxu len bënni bë'chi' lzo'u, len gdixhji'kde yugute' le Dios chi beene kiu' len ka beene buechilaadxe'e li'.

²⁰ Bënni ni bëëje, len gzulau'e rgixhjë'e lu yëdz ki Decápolis le Jesús beene kie', len yugute'ke gulubaan'de.

Nguul we' len bi nguul'du kie' Jairo

²¹ Kati Jesús budxiine lu barku zuze'e tzala'a nis, bënni zian guludzaage, ati rui'iz nis'a bga'ane.

²² Na' bdxiine Jairo tue' bënni rnabe'e ki yu'u useed, ati kati ble'i'de Jesús gyechue' xhni'e

²³ len gutayui'de Le', gne': —Bi'i kia' raki'kz gat'bi; dia' kxua'no'u'bi naar ueak'bi len ti gat'bi.

²⁴ Jesús gyaj'leene le' len bënni zian zjake kuudze'e tu'ki tutzutzje Le'.

²⁵ Ladj bunach zian ni ziaj'nu tuunu nguul chi guk chin'nu iz re'i'nu, ti ruwi'i'nu rën.

²⁶ Chi ptzaag'tzka'nu lu naa'ke bënni tu'un'ke bënni we', len chi ben'ditji'nu gdu le de kieenu, len gat'ga gzua ga ben le ni. Ziaj'tekz ryali'i'nu.

²⁷ Kati byëëni'nu rye' diidza kie' Jesús, nguul ni bdxin'nu kuudzu'le, ladj bunach'a, len gdan'nu laari xhua kuudze'e.

²⁸ Koma guudx'nu ikj'laadxi'dau'nu: «Zala kan'za laari xhua kuudze'e, ueaka.»

²⁹ Na'teez bui'i rën'a, len guk'be'i'nu ki chi bueak'nu.

³⁰ Jesús guk'be'i'de broj Le' yëla wak, len bueikje byue' bunach'a, ati bnaabe: —¿Nuxh gdan xha'?

³¹ Bënni useed kie' gle'ke Le': —Ryu'kzu bunach ni tu'ki tutzutzje Li' len rnaabu “¿Nuxh gdan neda?”

³² Ati Jesús ryu'tekze kuiti le'e naar gle'i'de nuxha' gdan le'.

³³ Nguul ni, rxhiz'nu yëla raadxi le nëëzi'nu bixha guk kieenu na' gyaj'nu len bzechu xhiib'nu xhni'e Jesús len gdixhji'nu'ne ka'teez guk.

³⁴ Jesús gudxe'nu: —Xi'ina yëla rajle' kiu' ben ga bueaku. Chi nu'ueaku buaj len yëla rë'dxi.

³⁵ Ni zue' rue'e diidza Jesús, kati guladxiine bënni za'ke liidxe bënni rnabe'e ki yu'u useed zdujëëdx'ke xuuz'bi bi'i ni: —Bi'i nguul kiu' chi gut'bi; ¿Bixhkz wen gzu'ne bagi'i Bënni Useed?.

³⁶ Ati Jesús, ti bzenaage lea tanáke'a, ati gudxe bënni'a rnabe'e yu'u useed: —Ti gaadx'du; gyajle'z.

³⁷ Len ti bnëëdzje latj nuul tziaj'leen Le', tuuze Pedro, Santiago len Juan bënni bë'che'e Santiago.

³⁸ Kati bdxiine liidxe bënni'a rnabe'e yu'u useed len ble'i'de rak'tzka ruzbë' ati bunach tabëëdxe len tuskua'ke,

³⁹ gyaazie len gudxe leke: —¿Bixhkia' run'tzka'li ruzbë' len rbëëdx'tzka'li? Bi'dau' ni ti nat'bi, ras'zbi.

⁴⁰ Bunach'a gulaxhiidx'de Jesús, san Le' beene ga yugute'ke gulurooje ati pche'e xuuz'xhna'bi len bënni'a zjak'leene Le' na' gyaazie ga deebi bi'dau'a.

⁴¹ Jesús gde'le'e naa'bi len gudxe'bi: —Talitá, cum (le re'e'ni gna': «Bi'i nguul'du, li' rea', gyas»).

⁴² Na'teez bi'i nguul'du ni gyas'bi len gze'i ni'a'bi koma chi yu'u'bi chin'nu iz ati bunach'a gulubaani'tzki'de.

⁴³ Ati Jesús gnabe'i'de leke nutunu lagixhji'de lea guk'a, len chi nak ka gnabe'i'de leke lui'ke'bi bi'i nguul'du ni le gaag'bi.