Marcos 3 - Porciones en Zapoteco de las Delicias

Jesús ru'uune tue' bënni re'i'de dza tu'ueak'laadxi'ke bënni Judea

¹ Jesús gyaazie le yubl lu yu'u useed; ati ni' zue' tue' bënni nat'zi tu ne'e.

² Len tauyuudxe Jesús naar lale'i'de xhki uune le' dza tu'ueak'laadxi'ke bënni Judea, naar gunn ludxia'ke le' xhgia'.

³ Na' Jesús gudxe bënni'a nat'zi ne'e: —Gzui len gze' gatzj'lau'i ni.

⁴ Chi nak ka bnaab'de bënni'a ye la'ke'a: —¿Bixh de lsenz gun'ru dza ru'ueak'laadxi'ru: le nak dxia'a u le ku nak? ¿Usláaru tu yëla naban u gnit'lau'ru ley? San leke ti gulane'.

⁵ Jesús rdza'a'tzka ikje byue' bënni'a nakua'ke'a, ati ben'yechi le' tzka nak tzutzu laadxi'dau'ke, len gudxe bënni'a nat'zi ne'e: —Bli no'u. Bënni'a blie' ley, len bueak'te ne'a.

⁶ Guluroj'ze na' bënni fariseo gulazulau'ke tun'ke diidza len bënni da'ke Herodes nakxh luune ludëëd'de Jesús.

Zian bunach nakua'k ra nis xhën

⁷ Jesús ziije len bënni useed kie' ra nis xhën len zian bunach ki yëdz Galilea zjake kuudze'e.

⁸ Bënni zian ki yu Judea, ki Jerusalén, ki Idumea, len ki tzala'a yeego Jordán len ki yu Tiro len Sidón, dujyu'ke le' kati gulanëëz'de yëla wak xhën le ruune.

⁹ Lena'a Jesús bzue' lu naa'ke bënni useed kie' lukëëze kie' tu barku, naar bunach ti lu'ki lutzutzje Le'.

¹⁰ Koma bënni zian chi buune ati yugute'ke bënni we'a tabia'niidi'de Le' naar lagaane Le'.

¹¹ Len kati bë' xëwi tale'i le' tuzechu'xhiibi lau'e len tuskua': —¡Li' naku Le' Xi'ine Dios!

¹² Ati Jesús gdil'leene ley ki ti lui' diidza kie' ga rë' bunach.

Jesús rbëe' chin'nu'ke bënni lak'ke gbaaz kie'

¹³ Gdëëd'a Jesús greene tu gia'a len bliidze bënni'a gyaazlaadxe'e, kati chi guludzaage,

¹⁴ grëe' ladj'ke'a chin'nu'ke naar tzjak'leene le' len naar ksë'le'e leke lagixhjë'ke diidza ni. Bënni ni be'e lake bënni gbaaz kie',

¹⁵ len bnëëdzje kieke yëla rnabe' naar lubiije bë' xëwi.

¹⁶ Bënni ni nak'ke bënni chin'nu'ke grëe': Simón bënni'a bzue' le' Pedro;

¹⁷ Santiago len Juan bënni xi'ine Zebedeo, bënni bzue' kieke Boanerges (le re'e'ni gna, «Xi'in Gziu'»);

¹⁸ Andrés, Felipe, Bartolomé, Mateo, Tomás, Santiago bënni xi'ine Alfeo; Tadeo, Simón bënni'a nadxi'i'de yëdz kie',

¹⁹ len Judas Iscariote, bënni ni bdëëde Jesús lu naa'ke bunach.

Tuspaage'e xhgia' Jesús

²⁰ Gdëëd le ni Jesús gyaazie tu yu'u len ti benn'kz bi ga'we len bënni useed kie', koma yubl guludzaag'tzka bunach zian.

²¹ Kati bënni dia'dza kie' Jesús gulanëëz'de, yajxi'ke le' koma tanáke ki tir zua dxia'a kie'.

²² Lekz'ka' la'ke bënni useed xhba kie' Dios bënni guludxiine yajake Jerusalén tanáke: «Beelzebú, bënni xaani bë' xëwi nake bënni rnëëdzje kie' bënni ni yëla wak ki ubiije bë' xëwi'a.»

²³ Jesús bliidze len gudxe leke diidza le run lsaki'i: «¿Nakxh guune Bënni Xëwi ubiije larakz Bënni Xëwi?

²⁴ Tu yëdz xhën le naroj chop'l len tadil ti runn sua tzutzu;

²⁵ len nu'ti'teez bënni dzë'ë'ke tuuz yu'u len tadil'e ti runn lakua'ke tzutzu.

²⁶ Lekz'ka' xhki Bënni Xëwi grooje chop'l len til'e len larakz leeze, ti gun sue' tzutzu; ni buudx kie'.

²⁷ »Nutunu gunn tzaaz liidxe bënni naal len kuan le de kie', de ki guuge'e le' zia'a naar gunn kuaane le de kie'.

²⁸ »Le nak'te rea' lbi'ili ki Dios uzi'xhëëne bunach ki yugute' xhtu'la'ke, len diidza ku nak le lui'ke:

²⁹ san bënni bi gne' kie' Bë' La'ay kie' Dios ti si'kze yëla rzi'xhën len tzalzu gbaage'e xhgia'.»

³⁰ Le ni gne' Jesús koma leke gulakuaara'ke tanáke ki Le' yu'e bë' xëwi.

Xhne'e len bënni bë'che'e Jesús

³¹ Tzal'za bdxin'nu xhne'e len bënni bë'che'e Jesús san rayu'uz gulaga'ane, len gluune ga gululiidze Jesús.

³² Bunach nakua'k kuiti le'e Jesús gle'ke Le': —Xhno'u len bënni bë'chu'u nakua'ke rayu'u, len te'en'de lale'i'de li'.

³³ Le bubi'e kieke diidza: —¿Nuxh rak xhna'a len bënni bë'cha'a?

³⁴ Chi nak ka byue' bunach nakua'k kuiti le'e, len gne': —Bënni ni nak'ke xhna'a len bënni bë'cha'a.

³⁵ Koma nu'ti'teez nu run le ryaazlaadxe'e Dios, rak bënni bë'cha'a, nguul zaana len xhna'a.