Marcos 16 - Porciones en Zapoteco de las Delicias

Jesús rubaane lu yëla gut

¹ Gdëëd dza tu'ueak'laadxi'ke bënni Judea, Salomé len María xhne'e Santiago gla'u'nu le rla' xhixh naar lagu'u'nu xhpeele'e Jesús.

² Bayën ziil'a kati rugie'la' seman yajak'nu ga de ba kie' Jesús, kati zia'a r'roj'z gbiidz,

³ te' lza'a'nu: —¿Nuxh kua kieeru giaj'a nusiaj ra ba ni?

⁴ San, kati guluyuunu, gulale'i'nu ki giaj'a tir da' xhlatji. Giaj ni le xhën nak'tzka.

⁵ Kati gulane'nu lu baa, gulale'i'nu'bi tuubi bi'i kuidi naku'bi laari xhkich le tunn rë'bi kuiti'le'elk'nu yubeel. Nguul ni glaadxi'nu,

⁶ San leebi guudx'kbi'nu: —Ti gaadxi'li. Lbi'ili rugiilj'li'ne Jesús ki Nazaret, bënni'a gulude'e lu yaag kruuz. Ti zue' ni chi bubaane lu yëla gut. Guluyu'tzka ga guluxue' Le'.

⁷ Gultzajëëdxe Pedro len ye la'ke bënni useed kie': “Galilea ziije naar utzaage lbi'ili yubl; ni' gle'i'li'ne, ka'teez gudxe lbi'ili Le'.”

⁸ Na' nguul ni gulaxhunj'nu ra baa koma taxhiiz'nu tzka'ti'ga taadxi'nu. Len nutunu gulagixhji'nu koma taadxi'nu. [

Jesús rlui'lau'e len María Magdalena

⁹ Bayën ziil'a rugie'la' seman gdëëd bubaane Jesús lu yëla gut, yajlui'lau'e zia'a len María Magdalena, nguul'a bubiije'nu gaadx bë' xëwi.

¹⁰ Leenu yajtixhjik'nu'ne bënni'a guladáke len Jesús koma zua'yechi'ke len tabëëdxe.

¹¹ Kati gulayëën'de ki Jesús yu'u yëla naban kie' ati leenu ble'i'nu'ne, ti gulayajle'ke.

Jesús rlui'lau'e len chope' bënni useed kie'

¹² Gdëëd le ni Jesús blui'lau'e len chope' bënni dzë'ë'ke nëëz zjake lau'gixi.

¹³ Bënni ni yajtixhji'kde ye la'ke bënni useed; san lekz'ka' ti gulayajle'ke leke.

Jesús rka'ane le luune bënni useed kie'

¹⁴ Gdëëd'a, Jesús blui'lau'e len chi'niaj'ke bënni useed kie' tzal leke ta'we. Gdil'leene leke koma ti nap'ke yëla rajle' len laadxi'dau'ke nak tzutzu, koma ti gulayajle'ke bënni'a chi gulale'i'de Le' bubaane lu yëla gut.

¹⁵ Len gudxe leke: «Gultziaj gdu gabi'i yëdz'lyu len gultzajtixhji'kde yugute'ke diidza kub dxia'a.

¹⁶ Bënni tzajle'e len udiile nis, ule'; san bënni ti tzajle'e ubaage'e xhgia'.

¹⁷ Ati bënni layajle'ke le runn'be' yëla wak ni tzjak'leen leke: lu La' lubiije bë' xëwi; lui'ke diidza kub;

¹⁸ lazëëne'ba bel'; len ka nak'tza li'aj'ke le nak bach gdëëdi leke tibi gun kieke; len lekz'ka' luxua'naa'ke bënni we' len leke lu'ueake.»

Jesús rubeene yewayuba

¹⁹ Gdëëd be'leene leke diidza, Jesús bubeene yewayuba len grë'e kuiti'le'e yubeel kie' Dios.

²⁰ Bënni useed kie' Jesús gularooje len gaaz yajtixhjë'ke ka diidza'a; len Xan'ru rda'kuudze'e leke len rlui'e yëla wak xhën.]