Marcos 15 - Porciones en Zapoteco de las Delicias

Jesús rdxiine lau'e Pilato

¹ Kati gyeni ziil'a, guludzaage bënni tunabe'i'de pxuuz len bënni guul tuzeajni'i'de len bënni useed xhba kie' Dios: yugute'ke bënni tabeki'xhbei'de lu gdou'. Gluuga'ke Jesús len guluche'e Le' lau'e Pilato.

² Pilato bnaab'de Le': —¿Ati Li' naku Bënni Rnabe' kieke bënni Judea? —Li' buudx gnou' —bubi'e diidza Jesús

³ Koma bënni tunabe'i'de pxuuz le zian tudxie' le' xhgia'.

⁴ Pilato yubl bnaab'de Le': —¿Bixhkia' ti rubi'u diidza? Le zian tudxie' Li' xhgia'.

⁵ Ati Jesús ti bubi'e diidza; Lena'a Pilato bubaani'tzki'de.

Tuchuug'be'e ki gatie' Jesús

⁶ Lu lni ni, Pilato rsaane tue' bënni nadzuune liidx'gia, bënni'a lunaabe bunach ksaane.

⁷ Nadzuune liidx'gia tue' bënni le' Barrabás dzaage ye la'ke bënni guludëëd'de bunach kati guludabaaga'ke yëdz.

⁸ Guladxiine bunach'a na' gulazulau'e tunaab'de Pilato ki guune le naleeb'de ruune.

⁹ Pilato bubi'e kieke diidza: —¿Re'eni'li ksaana'ne Bënni Rnabe' kieke bënni Judea?

¹⁰ Koma guk'be'i'de ki pxuuz'a lu yëla rdi'i kieke Le' guludëëde Le' lu ne'e.

¹¹ San bënni tunabe'i'de pxuuz gulutzatze bunach'a naar lunaabe lusane Barrabás.

¹² Pilato bnaab'de leke: —¿Bixh re'eni'li guuna len bënni'a rnaali kie' Bënni Rnabe' kieke bënni Judea?

¹³ Guluskua'ke gulubi'e diidza: —¡Bde'e lu yaag kruuz!

¹⁴ Pilato gudxe leke ¿Bixh dula nuune? San leke yubl guluskua'ke: —¡Bde'e lu yaag kruuz!

¹⁵ Ati koma Pilato re'en'de jga'ane dxia'a lau'ke bunach, psaane Barrabás; len gdëëd gnabe'e lagiine Jesús, bdëëde Le' lu naa'ke naar lude'e Le' lu yaag kruuz.

¹⁶ Bënni raja'ke gdil guluche'ke Jesús la'chi rayu'u ki yulau'i le nazi' lei' pretorio, len gulutzaage yugute'ke bënni rajake gdil.

¹⁷ Guluxua'ke kuudze'e tu laari gach le zaki'i'tzki, gluune tu breegi yëtzi len guludxie' ikje.

¹⁸ Chi nak ka guluskua'ke: —¡Xhën'te nake Bënni Rnabe' kieke bënni Judea!

¹⁹ Ati tagiine ikje len tu gba'ay, tuchiije Le' xhëëna len tuzechu xhiib'ke tuune lua' tui'ke Le' bala'an.

²⁰ Buudx gulutitj'de Le' guluguáke laari gach'a guluxua'ke kuudze'e, gulugakue' Le' xha'kze len guluche'ke Le' naar lude'e Le' lu yaag kruuz.

Tude'e Jesús lu yaag kruuz

²¹ Tue' bënni yëdz Cirene le' Simón nake xuuze Alejandro len Rufo, zuze'e dxin gixi. Len kati gdëëde na' guludayë'li'de le' gue'e yaag kruuz kie' Jesús.

²² Guluche'ke Jesús tu latj nazi' lei' Gólgota (le ni re'e'ni gna': «Latj ki Dxit Ikji bunach»);

²³ len gulunëëdzje kie' nup uva nuchixhi'kde mirra, ati Jesús ti gui'e ley.

²⁴ Na' gulude'e Le' lu yaag kruuz. Len bënni raja'ke gdil gulukitj'ke le gunn'be' nuxh'lke la'la'ke xhe' Jesús ati ka' lanëëz'de bixh la'la'ke tu tu'ke.

²⁵ Gdu rdëëd xhsiil gulude'e Le' lu yaag kruuz.

²⁶ Lu blaag guluzooje bixhkia' gbaage'e xhgia': «Bënni Rnabe' kieke bënni Judea.»

²⁷ Lekz'ka' gulude'e lu yaag kruuz chope' bënni gban, tue' gulude'e le' kuiti'le'e yubeel len ye tue' gulude'e le' kuiti'le'e yëëgl.

²⁸ [Ati ka' guk ka'teez nayoj lu Diidza La'ay, le rna: “Gulusake'e le' ka tusaka'ke bënni dula”.]

²⁹ Bënni tadëëde na' tu'ta'ke ikj'ke len gulutzag'yuudxe Le' diidza, tanáke: —¡Li', bënni'a rkin'je gdou', len na' rak tson dza rulisu ley,

³⁰ buslá kuinu len bëtj lu yaag kruuz'a!

³¹ Lekz'ka' bënni tunabe'i'de pxuuz len bënni useed xhba kie' Dios tutitj'de Le'. Tanáke: —Bënni yubl busle', san ti rake usle' kuine

³² ¡Utzajle'ru'ne ka nak gle'i'ru'ne Cristo bënni rnabe' Israel wëtje lu yaag kruuz'a! Ati lekz'ka' bënni'a da'ke kuiti'le'e lu yaag kruuz'a gulutzag'yuudxe Le' diidza.

Jesús ratie'

³³ Ka gyu'u wagbiidz bdxin'te gdu rdëëd xhwë kchul gdu yëdz'lyu.

³⁴ Larakz ur'a, zidzj bisku'e Jesús: «Eloí, Eloí, ¿lemá sabactani?» (Le ni re'e'ni gna': «Dios kia', Dios kia', ¿Bixhkia' psanlaadxu'u neda?»)

³⁵ La'ke bënni nakua'ke na' gulayëën'de Le' len gulanake: Guluzenaag'tzka, Elias bënni'a be'e diidza ulaaz kie' Dios rliidze.

³⁶ Na' tue' kieke bënni'a rxiti'ze yajspise tu laari lu nup uva zi, beege'e ley lu yaag gy len bze' kie' Jesús naar gi'i'je ley, gne': —Gulkëëz'gaar, gyu'tzka'ru xhki wiide Elias duzëtje Le' lu yaag kruuz'a.

³⁷ Ati Jesús bisku'e zidzj len gutie'.

³⁸ Len laari nuga'la'ke lu gdou' chop'di'il brëëza, le gde'la' ra'al bdxin'te dxi'it.

³⁹ Bënni'a rnabe'i'de bënni raja'ke gdil ze' lau'e Jesús, kati ble'i'de ki Jesús chi gutie', gne': —Leel nake bënni ni Xi'ine Dios.

⁴⁰ Lekz'ka' nakua'knu la'knu nguul tuyuunu zitu'z: na' nutza'knu María Magdalena, Salomé len María xhne'e Santiago bënni zelau len José.

⁴¹ Nguul ni zak'leen'nu'ne Jesús len glak'leen'nu'ne kati le' gzue' Galilea. Lekz'ka' nakua'nu na' ziank'nu nguul yajak'leen'nu'ne Jerusalén.

Tuka'che'e Jesús

⁴² Chi rdzë' len nak dza'a tupa'a'ke kieke, ki kie'la dza tu'ueak'laadxi'ke bënni Judea,

⁴³ lena'a José bënni yëdz Arimatea len nabaabe lu dxin'lau'i blou kieke bënni Judea, bënni ni lekz'ka' rbëëze yëla rnabe' kie' Dios, pchuug'laadxe'e yaje'leene diidza Pilato len bnaabe ue'e Jesús.

⁴⁴ Pilato bubaan'de ki chi gutie' Jesús, bliidze bënni'a rnabe'i'de bënni raja'ke gdil naar gnaab'de le' gaka chi guk gutie'.

⁴⁵ Kati bënni'a rnabe'i'de bënni raja'ke gdil gdixhji'de le', Pilato bunëëdzje Jesús len José.

⁴⁶ Na' José gu'uwe tu laari dxia'a'te le zaki'i'tzki, bzëtje Jesús len pchël'de Le' lu laari'a. Chi nak ka glu'e Le' lu ba narë'ën le'e giaj, len psiije baa len giaj.

⁴⁷ María Magdalena len María xhne'e José tuyuunu gaxh tagu'e Le'.