Marcos 14 - Porciones en Zapoteco de las Delicias

Tuune diidza nakxh lazëëne Jesús

¹ Ryaadzji chop dza gdxin lni ki Pascua, kati ta'we yët'xhtiil le ti yu'u le rzaaxh ley. Bënni tunabe'i'de pxuuz len bënni useed xhba kie' Dios tazu'tabë'e nakxh lazi'ye'i'de Jesús ki lazëëne Le' len ludëëd'de Le'.

² San la'ke tanáke: —Ti sën'ru'ne tzal yu'u lni ni, naar ku lakua'ke ruzbë' bunach'a.

Tuunu nguul rlaalj'nu'ne le rla' xhixh Jesús

³ Jesús gyiije Betania, liidxe Simón bënni'a gui'i'de we' nuudzu. Tzal rë'e ga ta'we bdxin'nu tuunu nguul nua'nu tu rë'ë giaj le yuudz le rla' xhixh naki yaj tu'sen nardo len zaki'i'tzki. Bla'a'nu rë'ë ni len blaalj'nu le xhixh'a ikje Jesús.

⁴ La'ke bënni nakua'ke na' guladze'i'de, len gle' lza'a'ke: —¡Bixhkia' ben'ditji'nu le rla' xhixh ni?

⁵ Gula'l to'u le ni, lunne ki' tzka laaxhj'ru ki tson gayua' dza naar gak'leen'ru'ne bënni yechi. Len tazi'kiidze'nu nguul ni.

⁶ Ati Jesús gne': —Gulgui'nu latj; ¿Bixhkia' rtza'a'li ikj'nu? Lea ben'nu kia' nak le dxia'a.

⁷ Koma bënni yechi ulakua'tekze ladj'li, len gunn gak'leen'li'ne kati gie'eni'li; san neda ti sua'leen'tekza lbi'ili.

⁸ Nguul ni ben'nu le gxha'ki'nu gun'nu: chi glu'u'nu neda le rla' xhixh naar chi naba'a kia' na' jga'cha'a.

⁹ Le nak'te rea' lbi'ili ki ga'ti'teez ga lagixhjë'ke diidza kub dxia'a lekz'ka' ulagixhjë'ke le ben'nu nguul ni ati ka' tzajnei'kde'nu.

Judas rdëëde Jesús lu naa'ke bunach

¹⁰ Judas Iscariote tue' kieke Chin'nu'ke bënni useed kie' Jesús, yajyue bënni tunabe'i'de pxuuz len bënni nakua'ke lau'i gdou', naar gdëëde Jesús lu naa'ke.

¹¹ Kati gulayëën'de le' guludziij'de len gulazi'lunaa'ke lunëëdzje dumi kie' Judas, len gzulau'e rzu'rbë'e batxh gunn gdëëde Jesús lu naa'ke.

Jesús raagu'leene xhtzë' bënni useed kie'

¹² Dza'a rgie'la' lni'a kati ta'we yët'xhtiil le ti yu'u le rzaaxh ley, kati tudëëd'de'ba bëku'xhiila ki Pascua, bënni useed kie' gulunaab'de Le': —¿Gaxh re'en'du tzajpa'a'tu xhtzë' ki Pascua?

¹³ Na' psë'le'e chop'ke bënni useed kie' len gudxe leke: —Gultziaj la yëdz. Ni' udzëëli'li'ne tue' bënni nue'e rë'ë nis; gultziaj'leene,

¹⁴ Len ga tzaazie gie'li'ne bënni xaani yu'u ni: “Bënni Useed rnaabe: ¿Gaxh de latj ga gagu'leen'ka'ne bënni useed kia' xhtzë' ki Pascua?”

¹⁵ Le' glui'de lbi'ili lu yu'u zua xhtza' tu latj xhën le chi naba'a naar tzu'u xhtzë'. Gulupa'a ni' le nayaadzji.

¹⁶ Bënni useed yajake la yëdz'a. Yajxaka'ke yugute' ka'teez gudxe leke Jesús len gulupe'e xhtzë' ki Pascua.

¹⁷ Jesús len chin'nu'ke bënni useed kie' guladxiine kati chi za' ral.

¹⁸ Tzal rë'ke ta'we, Jesús gudxe leke: —Le nak'te rea' lbi'ili, ki tuuli lbi'ili raagu'leen'li neda udëëd'li neda lu naa'ke bunach.

¹⁹ Leke gulakua'yechi'ke len tu tu'ke gulazulau'ke tunaabe: —¿Ku nak'tza neda?

²⁰ Jesús bubi'e diidza: —Tue' kieeli chin'nu'li ka', bënni'a rla'pe'e yët'xhtiil kie' ga rla'pa'a ley neda.

²¹ Le' Xi'ine Bënni chi nak ka rala gak kie', ka rna Diidza La'ay; san ¡bayechi nake bënni'a gdëëde le' lu naa'ke bunach! Wak'l kie' dxia nar'la ti gzua'kze yëdz'lyu.

²² Tzal ta'we, Jesús gde'le'e yët'xhtiil, len buudx ben'la'aye ley bxhuuxhje len bnëëdzje kieke, gne': —Gulsi le ni nak xhpeela'a.

²³ Chi nak ka gde'le'e xhiiga len be'e yëla dexhken Dios, bdëëde kieke len yugute'ke gli'aj'ke.

²⁴ Gudxe leke: —Le ni nak xhchëëna len ley nak diidza kub le rxënalaadxi'li, xhchëëna ni rlaalja ley nia'a ki zian bunach.

²⁵ Le nak'te rea' lbi'ili ki tir gi'i'ja nup uva ni, nakati gdxin'r dza gi'i'ja nup uva kub lu yëla rnabe' kie' Dios.

Jesús rgixhjë'e ki Pedro ti si'lu'ne'e ki numbe'e Jesús

²⁶ Gdëëd gulagu'ke ba Dios, yajake Gia'a ki Olivos.

²⁷ Jesús gudxe leke: —Yugute'li uka'an'li neda tuuza. Ka rna Diidza La'ay: “Udëëd'da'ne bënni'a run'chi'e'ba bëku'xhiila len bëku'xhiila'a ulas'laz'ba.”

²⁸ San kati neda ubaana lu yëla gut, yubl utzaaga lbi'ili Galilea.

²⁹ Pedro gudxe Le': —Zala yugute'ke luka'ane Li' tuuzu, neda ti jka'ana Li' tuuzu.

³⁰ Jesús bubi'e kie' diidza: —Le nak'te rea' li' ki nadzë', kati zia'a këëdx'ba xi'in'druuz burop lzu, tson lzu ti si'luno'u ki numbe'u neda

³¹ Pedro rne': —Zala gun'tza bayuudx gat'leena li', ti gna ku si'luna'a ki numbe'a Li'. Len yugute'ke tuuz ka gulanake.

Jesús rui'leene diidza Dios Getsemaní

³² Gdëëd ni yajake tu latj nazi' lei' Getsemaní. Jesús gudxe bënni useed kie': —Ni gulki'i tzal tzaje'leena'ne diidza Dios.

³³ Ati pche'e Pedro, Santiago len Juan len gzulau'e rnëëz'de kuine bayechi len bui'i'ni'de.

³⁴ Gudxe leke: —Rnëëzi'tzki'da kuina bayechi len chi rnëëz'da yëla gut kia'. Niiz guluga'an ati gulsua si'na len gulgui'laadxi.

³⁵ Chi nak ka Jesús gze'e ye lati, bzechu ikje lyu't len bnaab'de Dios ki xhki gunn ti tëëde lea rala tëëde'a.

³⁶ Ki rui'leene diidza Dios: «Daad, Xuuza, Li' gat'ga de le ku raku guunu: buslá neda ki yëla rzi'be' ni; san ti gak le ryaazlaadxa'a neda, gak le ryaazlaadxu'u Li'.»

³⁷ Chi nak ka' bëëje ga nakua'ke bënni useed kie' len bënni ni tas'ke. Gudxe Pedro: Simón ¿Naru rasiu'? ¿Naru tikz'bi pxhikj'du gna'leenu neda yeel?

³⁸ Gulgui'laadxi len gulgui'leene diidza Dios naar ku gbixh'li lu dula. Lbi'ili rzelaadxi'li gun'li le nak dxia'a san ti rxikji'li.

³⁹ Yubl bëëje len larakz diidza'a bui'leene Dios.

⁴⁰ Kati bule'e, yubl budzëël'de bënni useed kie' tas'ke, koma chik'z rdzuudi lau'ke tzka rak chigas'ke. Len ti nëëzi'kde bixh lubi'e diidza.

⁴¹ Bunn lzu bule'e len gudxe leke: —¿Naru ni ras'li len ni ru'ueak'laadxi'li? Gulgas len gulu'ueak'laadxi'li, chi bdxin dza kati Xi'ine bënni ludëëde Le' lu naa'ke bënni dula.

⁴² Gultzas, gultza'; chi za' ga'le'e bënni'a gdëëde neda lu naa'ke bunach.

Tazëëne Jesús

⁴³ Ni zue' rue'e diidza Jesús, kati Judas tue' kieke chin'nu'ke bënni useed kie' Jesús, bdxiine len zak'leene bunach zian nua'ke gia tuchi len yaag. Bënni tunabe'i'de pxuuz, bënni useed xhba kie' Dios len bënni guul tuzeajni'i'de bënni Judea nusë'la'ke leke.

⁴⁴ Judas bënni'a rala gdëëde Jesús lu naa'ke bunach, chi nagixhji'de leke ka guune: «Bënni'a ga'wa'ne bxhidu, bënni'a sën'li'ne len dxia'a guuga'li'ne kati kche'li'ne.»

⁴⁵ Lena'a gbiige'e ga ze' Jesús len gudxe Le': —¡Bënni useed! Na' gda'we Le' bxhidu.

⁴⁶ Na' gulazëëne Jesús.

⁴⁷ Len tue' bënni useed kie' gliije gia tuchi kie' len pchuuge gid'naage bënni wendxin kie' pxuuz blou.

⁴⁸ Ati Jesús bnaab'de bunach'a: —¿Bixhkia' za'li nua'li gia tuchi len yaag, zdujxhën'li neda, ka'kz ka naka bënni gban run'li kia'?

⁴⁹ Yugu dza chi gzua' rseed'da lbi'ili lu gdou' len ti gxhën'li neda. San le ni rak naar gak le nayoj lu Diidza La'ay.

⁵⁰ Yugute'ke bënni useed kie' guluka'ane Le' tuuze len gulaxhunj'ke.

⁵¹ San tuubi bi'i kuidi ziaj'leemi Le', tu laari'z nuchë'li'bi kuimi ati gulazëëne'bi,

⁵² san leebi psami laari'a len xhgiidz'bi bxhunj'bi.

Jesús rdxiine lau'i dxin'lau'i blou

⁵³ Guluche'ke Jesús lau'e pxuuz blou len guludzaage yugute'ke bënni tunabe'i'de pxuuz, bënni guul tuzeajni'i'de len bënni useed xhba kie' Dios.

⁵⁴ Pedro zitu zitu ziaj'leene Le' len bdxin'tie' la'chi rayu'u ki liidxe pxuuz blou, ati grë'leene bënni'a tun'chi'ke gdou', butze'i kuine ra gi'a.

⁵⁵ Bënni tunabe'i'de pxuuz blou len yugute'ke bënni dxin'lau'i blou tagiilje nu gdxia Le' xhgia' Jesús naar luchuug'be'e ki gatie'; san ti rdzëël nakxh luune.

⁵⁶ Koma zala bënni zian tazi'ye'ke le rdujxaka'lau'ke kie', larakz leke ti tabë'xhbei'de le tanáke.

⁵⁷ La'ke gulazui'de len guludxie' Le xhgia' le ku nak, gulane':

⁵⁸ —Netu chi byëëni'tu'ne rne': “Neda ukin'ja gdou' ni le nun'ke bunach, len na' gak tson dza kchisa le yubl le ti lun'ke bunach.”

⁵⁹ San ti tabë'xhbei'kz'de diidza'a tui'ke.

⁶⁰ Na' pxuuz blou gzui'de gatzj'lau'i kieke yugute'ke len bnaab'de Jesús: —¿Bixhkia' ti rubi'u diidza? ¿Chi byëën'du ka'ti'ga nak le tanáke kiu'?

⁶¹ Ati Jesús ti gne', len ti bubi'e diidza. Pxuuz blou yubl bunaab'de Le': —¿Li' naku Le' Cristo, Xi'ine Dios La'ay?

⁶² Jesús gudxe le': Ja', needa'a. Ati lbi'ili ule'i'li'ne Xi'ine Bënni rë'e kuiti le'e yubeel kie' Dios nape gdu yëla wak len zuze'e lu buaj ki xhba.

⁶³ Na' bënni pxuuz blou pchëëze'e xhe', le benn'be' ki rdza'a ikje len gne': —Tir nayaadzji'ru nu bi gna

⁶⁴ Kuin'kz'li chi byëëni'li gne' diidza ku nak lau'e Dios. ¿Bixh rnaali lbi'ili? Yugute'ke gulanake ki dxie' xhgia' len rala gatie'.

⁶⁵ La'ke gulazulau'ke tuchiije Le' xhëëna, len tu laari gulusiaj'ke lau'e, glutie' Le', len gle'ke Le': ¡Gneya'atzka nuxha' bet li'! Len bënni'a tun'chi'ke gdou' gulaga'pe'e xage'e

Pedro ti rzi'lu'ne'e ki numbe'e Jesús

⁶⁶ Pedro rë'e zga dxi'il, la'chi rayu'u. Na' bdximi tuubi bi'i nguul wendxin kie' pxuuz blou;

⁶⁷ len kati ble'i'bi'ne Pedro rë'e ra gi'a, byu'tzkabi'ne len guudx'bi'ne: —Lekz'ka' li' bdzaagu'ne Jesús, bënni Nazaret.

⁶⁸ Pedro ti gxhi'lu'ne'e, len gne': —Neda ti numbe'a'ne bënni'a, len ti nëëz'da bixh diidza'a rui'u. Ati brooje rayu'ul, na' grëëdx'ba xi'in'druuz.

⁶⁹ Bi'i nguul wendxin ni yubl ble'i'bi'ne Pedro len gzulau'bi re'bi'ne ye la'ke bunach: —Bënni ni lekz'ka' bdzaage Jesús.

⁷⁰ Pedro yubl ti gxhi'lu'ne'e. Gdëëd tuchi'i bënni nakua'ke na' yubl gulunaab'de Pedro: Keg nu rzi'ye'z, lekz'ka' li' bdzaagu'ne Jesús Koma naku bënni Galilea.

⁷¹ Na' Pedro gzulau'e rdiidza'le'e len gne': blikz'da'ne Dios —¡Ti numbe'a'ne bënni'a rui'li kie' diidza!

⁷² Na'teez grëëdx'ba xi'in'druuz burop lzu, na' Pedro gyajnei'de ki Jesús gudxe le': «Kati zia'a këëdx'ba xi'in'druuz burop lzu, tson lzu ti si' lu no'u ki numbe'u neda.» Len Pedro grëëdxe.