Marcos 12 - Porciones en Zapoteco de las Delicias

Diidza run lsaki'i kieke bënni xhe'e taaze uva

¹ Jesús gzulau'e rlaabe kieke diidza run lsaki'i: Gudxe leke: —«Tue' bënni guuze uva layeel kie' ati glu'e ley li'aj; bpe'e ga guune nup uva len pchise yu'u sib ki gyue' yugute' le rak lu xhyue'a. Chi nak ka pka'ane lu naa'ke bënni luune dxin len gze'e ziije zitu.

² Kati chi guluchiibe uva ni, psë'le'e tue' bënni wendxin kie' tzajnaabe le rala laaze ki le guluchiibe bënni'a glaaze uva ni.

³ San leke glutie' le' len gulusë'le'e le' kakz'ka.

⁴ Na'ar bënni xaani layeel ni psë'le'e ye tue' bënni wendxin kie'; ati gluun'de zi' ikje len gulutzag'yuudxe le' diidza.

⁵ Psë'le'e bënni yubl len guludëëd'de le'. Chi nak ka psë'le'e ye la'ke bënni wendxin kie'; ati bënni'a glaaze uva ni, la'ke gluun'de zi' len la'ke guludëëd'de.

⁶ »Ni zuaare tue' bënni ti rsë'li'de: bënni xi'ine nadxi'i'tzki'de. Na' bënni xaani layeel ni psë'le'e le' ati gne' lu ikj'laadxi'dau'e: “Ului'kze le' bala'an.”

⁷ Len bënni'a glaaze uva ni te' lza'a'ke: “Ni' ze'e bënni xi'ine bënni'a nake xaani layeel ni, guldá gdëëdi'ru'ne, len gaki kieeru layeel kie' ni.”

⁸ Gulazëëne le' len guludëëd'de le' ati gulubiije le' layeel'a.

⁹ »¿Ati bixh rsaka'ali lbi'ili guune bënni xaani layeel'a? Uyiije len gdëëd'de bënni'a glaaze uva ni len gnëëdzje layeel kie' lu naa'ke bënni yubl.

¹⁰ »¿Naru ti rul'i'li Diidza La'ay? Rna: “Giaj'a ti gulayazlaadxi'ke bënni'a tuune yu'u na'a chi nak giaj blou.

¹¹ Xan'ru beene le ni, len ro'u rubaani'ru.”»

¹² Gle'en'de lazëëne Jesús, koma gulak'be'i'de ki len diidza run lsaki'i ni, gne' kieke. San koma taadx'de bunach nakua'k ni', gulusan'ke le' len zawake.

Yëla rnaab ki laaz'sua'ke

¹³ Gulusë'le'e la'ke bënni fariseo len bënni da'ke Herodes ga zue' Jesús, naar luune ga Jesús gne' diidza le gunn ludxie' le' xhgia'.

¹⁴ Bënni ni yajëëdx'ke le': —Bënni useed, nëëzi'tu ki Li' bliidu, ti rki'i Li' le taná bunach, koma ti rbiaj'je'idu lau'rui'i bunach. Li' rseed'du ka'teez nak nëëz kie' Dios. ¿Ba nak dxia'a kiixhj'tu laaz'sua'tu kie' César u ti nak? ¿Rala u ti rala kiixhj'tu laaz'sua'tu?

¹⁵ Ati Jesús nëëz'de ki nak'ke ka bënni nuda' blo'u, len gudxe leke: —¿Bixhkia' re'eni'li si'be'li neda? Gultzajxi' tu dumi kieeli naar gle'i'da ley.

¹⁶ Yajua'ke ley, ati Jesús gudxe leke: —¿Nuxh lau'rui'i da' ni len nuxh lei' nayoj ni? Leke gle'ke le': —Kie' César.

¹⁷ Na' Jesús gudxe leke: —Gulunëëdzj kie' César le nak kie' César, len gulunëëdzj kie' Dios le nak kie' Dios. Len gulubaani'tzki'de ka bubi'e diidza Jesús.

Tunaabe xhki bënni nat tubaane yëla gut

¹⁸ Na' la'ke bënni saduceos yajyu'ke Jesús. Bënni saduceos ni tanáke ki bënni nat ti tubaane lu yëla gut; lena'a gle'ke ki Jesús:

¹⁹ —Bënni Useed, Moisés bzooje lu gich ki xhki nu bënni nutzag'ne'e gatie' len ti gulakua'bi bi kie' len nguul kie', bënni bë'chi' guulje rala si'e'nu ka nguul kie' nguul'a bugan'n uzeeb'nu naar gnëëdzje'bi bi kie', kie' bënni bë'che'a chi gutie'.

²⁰ Guk ki, gulakua'ke gaadx bë'chi'ke, bënni naguul ptzag'ne'e, ati gutie' len ti gulakua'bi bi kie'.

²¹ Na' bënni burop gzua'leene'nu nguul uzeeb'a san lekz'ka' le' gutie' len ti gulakua'bi bi kie' len nguul'a. Lekz'ka' guk len bënni bunn,

²² len lekz'ka' bënni'a ye la'ke'a glatie' len nutunu bi kieke gulakua'bi. Buudx'r na' gut'nu lekz'ka' nguul'a.

²³ Na' kati bënni nat lubaane lu yëla gut dza zia'a za', ¿Nuxh'lke gak nguul kie' nguul ni xhki gaadx'ke ka gulakua'leene'nu?

²⁴ Jesús bubi'e diidza: —Nak'chixi'li, koma ti numbe'li Diidza La'ay len yëla rnabe' kie' Dios.

²⁵ Kati bënni nat lubaane lu yëla gut, bënni u nguul tir lutzag'naa'ke koma ulak'ke ka gbaaz la'ay kie' Dios nakua'ke yewayuba.

²⁶ Ati le rak kieke bënni lubaane lu yëla gut, ¿Naru ti rul'i'li gich kie' Moisés ga nayoj ki bezka raaxh gi'? Dios gudxe Moisés: “Neda naka Dios kie' Abraham kie' Isaac len kie' Jacob.”

²⁷ ¡Len le' ti nake Dios kieke bënni nat, nake Dios kieke bënni ban! Nak'chixi'tzki'li.

Xhba kie' Dios le nak'r blou

²⁸ Tue' bënni useed xhba kie' Dios bënni byëën'de kati guladil'e diidza len bzenaage ki Jesús bubi'e dxia'a diidza, gbiige'e ga zue' len bnaab'de Le': —¿Bil'le xhba kie' Dios nak'r blou?

²⁹ Jesús bubi'e diidza: —Xhba kie' Dios le nak'r blou nak: “Bzenaag Israel: Xan'ru Dios lazdui'de Le' nake Xan'ru.

³⁰ Bdxi'i'de Xaanu Dios gdu laadxi'dau'u, gdu laadxu'u, gdu gan kiu', gdu ikj'lau'u.”

³¹ Ati le burop nak: “Bdxi'i'de bënni bë'chi' lzo'u ka nadxi'i'du kuinu.” Tirbi xhba kie' Dios nak'r blou ka le ni.

³² Bënni useed xhba kie' Dios gudxe Le': —Bënni useed bliidu ka rnou'a: tuuze Dios yu'e len ti yu'e ye tue' ka Le'.

³³ Len gdxi'i'ru'ne Dios gdu laadxi'dau'ru, gdu laadxi'ru, gdu gan kieeru, gdu ikj'lau'ru len gdxi'i'ru'ne bënni bë'chi' lza'a'ru ka nadxi'i'ru kuin'ru, zaki'i'r ka yugute'ba bua'a rdëëdi'ru'ba len tayeegi'ba lu pkuugu lau'e Dios.

³⁴ Kati byëën'de Jesús ki bënni useed xhba kie' Dios bubi'e dxia'a diidza, gudxe le': —Ti rdou' zitu ki yëla rnabe' kie' Dios. Len nuturnu buaaxhji bi gnaabi le'.

¿Nuxh xi'ini nake le' Cristo?

³⁵ Jesús rseed'de lu gdou' len bnaabe: —¿Bixhkia' bënni useed xhba kie' Dios tanáke ki Le' Cristo nake xi'ine David?

³⁶ Xhki kuin'kze David be'e diidza ulaaz kie' Bë' La'ay kie' Dios ati gne': “Xan'ru gudxe Xaana: Gri'i kuiti le'a yubeel, tzal neda guuna ga bënni'a ti tale'i'de li' dxia'a lakua'ke xhni'u.”

³⁷ ¿Ati nakxh gunn gake le' Cristo xi'ine David, xhki kuin'kze David re' le' Xan? Bënni zian'a nak'ke bënni'a gdu laadxi'ke tuzenaage Jesús.

Jesús rdil'leene bënni useed xhba kie' Dios

³⁸ Ki gne' Jesús kati rseed'de: «Gulun'chi'i kuin'li kieke bënni useed xhba kie' Dios, koma tadaan'de ladáke len xha'ke tunn len te'en'de nu ktzaag'lau leke len lazi'ke bala'an lu ye'i.

³⁹ Tagiilje labë'ke lau'it yu'u useed len labë'ke latj dxia'a'te ga ryu'u gwi'i'waagu;

⁴⁰ Len taguáke le de kiek'nu nguul uzeeb, len xhtzei takua'ke tui'leene diidza Dios naar nutunu gak'be'i le tun'ke. Leke ulazi'ke yëla rsaka'zi'.»

Gun kieenu nguul uzeeb

⁴¹ Tu lyas Jesús rë'e ga'la ga nakua'k gi'in ki gun ki gdou', tzal ryue' bunach tagu'e dumi le'i, bënni zian bënni de'tzka xhdumi'ke tagu'e zxhëni dumi.

⁴² Na' bdxin'nu tuunu nguul uzeeb nak'nu nguul yechi glu'u'nu chop dumi las'du le ti zaki'i zxhëni.

⁴³ Na' Jesús bliidze bënni useed kie' len gudxe leke: —Le nak'te rea' lbi'ili ki nguul uzeeb ni bnëëdzjr'nu zxhëni ka yugute'ke bënni'a tagu'e dumi lu gi'in ni;

⁴⁴ koma yugute'ke tunëëdzje le ruga'an kieke, san nguul ni, lu yëla yechi kieenu, bnëëdzj'nu lazdui le rala ga'wi'nu.