Marcos 11 - Porciones en Zapoteco de las Delicias

Jesús ryaazie Jerusalén

¹ Kati chi nakua'ke ga'la yëdz Jerusalén, chi zjake ga'la yëdz Betfagé len Betania, zga Gia'a ki Olivos, Jesús psë'le'e chope' bënni useed kie',

² len gudxe leke: —Gultziaj yëdz'du de ni', len kati tzaaz'li ley tzajxaka'li'ba tuuba burru we'en'du naaga'ba, bua' nutunu rbii'ni leeba. Guluseedx'ba len gultzajxi'ba ni.

³ Len xhki nu gnaabi lbi'ili bixhkia' rseedx'li'ba, giek'li'ne ki Xan'ru ryaadzj'de'ba, len uduwa'tie'ba.

⁴ Yajake len yajxaka'ke'ba burru naaga'ba la nëëz kuiti tu puert len guluseedxe'ba.

⁵ La'ke bënni nakua'ke na' gulunaab'de leke: —¿Bi run'li? ¿Bixhkia' rseedx'li'ba burru ni?

⁶ Leke gulanake le gudxe leke Jesús; len glui'ke leke latj tzawake.

⁷ Guluxua'ke xha'ke kuudzu'ba, guluche'ke'ba ga zue' Jesús. Len Le' gdxie'ba.

⁸ Bunach zian tuchiilj'ke xha'ke la nëëz len ye la'ke tuchiilj'ke xhuuzi'i yaag le guluchuuge lau'gixi.

⁹ Ley bunach nanëër'ke ley bunach zjake kuudzi'il, tuskua'ke: —¡Hosanna! ¡La'ay nake bënni ze'e ulaaz kie' Xan'ru!

¹⁰ ¡La'ay nak yëla rnabe' le za', yëla rnabe' kie' xuuz'ru David! ¡Hosanna lu yewayuba!

¹¹ Jesús gyaazie Jerusalén len gyiije lu gdou'. Gdu byue' dxia'a'tit len chi nak ka zuwëëje Betania len chin'nu'ke bënni useed kie', koma chi za' rchul.

Jesús rdxie' dë' yaag higuera ti rbia

¹² Bueikj dza'a kati gulurooje Betania, Jesús gduune.

¹³ Zitu'z ble'i'de tu yaag higuera dxia xhlaagi'i len yajyue xhki ba dxia xhlu'li'i, san xhlaagi'z dxia koma ti nak beu' kuia xhlu'li'i.

¹⁴ Na' gudxe yaag ni: —¡Tzalzu'kz nuturnu gaagu le kuiu'! Bënni useed kie' gulayëën'de Le'.

Jesús rpe'e yu'u gdou'

¹⁵ Gdëëd guladxiine Jerusalén, Jesús gyaazie lu gdou' len gzulau'e rubiije bënni'a tuti'i'ke len ta'awe. Brixe ga nudxia'ke xhdumi'ke bënni'a tutza'ke dumi len ga nudxia'ke'ba palom bua'a tuti'i'ke'ba;

¹⁶ len ti rnëëdzje latj nu tzaaz lu gdou'a xhki bi nua'ke.

¹⁷ Len gzulau'e rseed'de, gne': —Lu Diidza La'ay rna ki: “Liidxa gak tu yu'u ga bunach ki yugute' yëdz lui'leene diidza Dios”, ati lbi'ili chi nun'li ley tu latj ga tuka'chi' lau'ke bënni gban.

¹⁸ Kati gulayëën'de le ni bënni tunabe'i'de pxuuz, bënni useed xhba kie' Dios len lekz'ka' bënni nakua'ke lau'i yëdz gulazulau'ke tugiilje nakxh luune ludëëd'de Le', san taadx'de Le' koma bunach tubaani'tzki'de ka nak le rseed'de.

¹⁹ San kati chi gul, Jesús len bënni useed kie' gulurooje ki yëdz'a.

Rseed'de ki yëla rajle'

²⁰ Bueikj dza'a guladëëde kuiti yaag higuera len gulale'i'de ki lu luit gbiidx.

²¹ Na' Pedro gyajnei'de lea guk'a, len gudxe Jesús: —Bënni Useed, byu'tzka yaag higuera lea bdxiu' dë' chi gbiidx.

²² Jesús bubi'e diidza: Gultzajle'e Dios.

²³ Le nak'te rea' lbi'ili, ki xhki nu gie' gia'a ni: “¡Pkuit ni len bzal kuinu lu nis xhën!”, le ni wak xhki tzajle'e gdu laadxe'e lea rnaabe'a.

²⁴ Lena'a rea' lbi'ili ki yugute' le gnaabi'li'ne Dios gultzajle' ki chi gxhi'li ley len uzi'li ley.

²⁵ Len kati gui'leen'li'ne diidza Dios gulsi'xhën bi nap'li len bë'chi' lza'a'li naar Xuuz'li zue' yewayuba lekz'ka' si'xhëëne xhtu'la'li.

²⁶ [Koma xhki lbi'ili ti si'xhëën'li, lekz'ka' Xuuz'li zue' yewayuba ti si'xhëëne xhtu'la'li.]

Yëla rnabe' kie' Jesús

²⁷ Gdëëd le ni ye'wake Jerusalén. Tzal Jesús rde' lu gdou', gulabiige'e kuiti le'e bënni'a tunabe'i'de pxuuz len bënni useed xhba kie' Dios, len bënni guul tuzeajni'i'de,

²⁸ ati gulunaab'de Le' —¿Len bixh yëla rnabe' ruunu le ni? ¿Nuxh nunn kiu' yëla rnabe' guunu le ni?

^29-30 Jesús bubi'e diidza: —Lekz'ka' neda unaab'da lbi'ili, ¿Nuxh psë'la le' Juan jkiile nis, Dios u bunach? Gulubi'i kia' diidza len neda kixhji'da lbi'ili len bixh yëla rnabe' ruuna le ni.

³¹ Leke gluune diidza dzaag len tanáke: «Xhki gnaaru ki Dios psë'le'e le', gie'e ro'u: “¿Bixhkia' ti gyajle'li'ne?”

³² Len ti gunn gnaaru ki bunach gulusë'le'e le'.» Koma tadxiide bunach le nëëzi'kde ki Juan be'e diidza ulaaz kie' Dios.

³³ Lena'a gulubi'ke diidza kie' Jesús: —Ti nëëzi'tu nuxh psë'la Le'. Na'ar Jesús gudxe leke: —Lekz'ka' neda ti kixhji'da lbi'ili len bixh yëla rnabe' ruuna le ni.