Marcos 10 - Porciones en Zapoteco de las Delicias

Jesús rseed'de kieke bënni tusanlaadxi lza'a'ke

¹ Jesús burooje Cafarnaúm len gyiije gia'a yeego ki Judea len yu de tzala'a Jordán. Ni' guludzaag yubl bunach len Le' gzulau'e rseed'de ka chi naleeb'de ruune.

² La'ke bënni fariseo gulabiige'e ga ze' Jesús len tzal gunn lazi'be'e Le' gulunaab'de Le' xhki bënni nutzag'ne'e gunn ksanlaadxe'nu nguul kie'.

³ Le' bubi'e kieke diidza —¿Bixh gnabe'i'de lbi'ili Moisés?

⁴ Gulanake: —Moisés benne lsenz ksanlaadxi'tu'nu nguul kietu ati gnëëdzj'tu gich ki chi nusanlaadxi lza'a'tu.

⁵ Na' Jesús gudxe leke: —Moisés benne lsenz ksanlaadxi lza'a'li koma lbi'ili nak'tzka'li bënni xhziid.

⁶ San kati gu'ta'grë' yëdz'lyu, “Dios beene tue' bënni len tuunu nguul.

⁷ Lena'a bënni uka'ane xuuz'xhne'e len sua'leene'nu nguul kie',

⁸ ati grop'te'ke lake ka tuuz bunach.” Ati tir nak'ke chope', tuuz bunach lake.

⁹ Lena'a le Dios nuune tuuz, bënni ti rala yule'e.

¹⁰ Kati chi nakua'ke nu'yu'a, bënni useed kie' yubl gulunaab'de le' ki le ni.

¹¹ Jesús gudxe leke: —Bënni rsanlaadxe'nu nguul kie' len rzua'leene'nu nguul yubl, rgitzje' xhba ki utzag'na' len nguul kie' zia'al;

¹² Len xhki nguul rsanlaadxi'nu'ne bënni kieenu len rzua'leen'nu'ne bënni yubl, lekz'ka' rgitzj'nu xhba ki utzag'na'.

Jesús run'la'aye'bi bi'dau'

¹³ Yajua'ke'bi bi'dau' lau'e Jesús naar kxua'naa'ke'bi; san bënni useed kie' gulazulau'ke tadil'leene bënni ni.

¹⁴ Kati Jesús ble'i'de le ni bdza'a ikje len gudxe leke: —Gulgui'bi latj bi'dau'a dujak'bi ga zua' ti gzaagak'li'bi, koma yëla rnabe' kie' Dios nak kieke bënni nak'ke ka nak'kbi bi'dau'.

¹⁵ Le nak'te rea' lbi'ili ki bënni ti si'e yëla rnabe' kie' Dios ka rzi'bi ley tuubi bi'dau', ti tzaazie lu yëla rnabe' kie' Dios.

¹⁶ Ati bniida'ke'bi bi'dau'a, pxua'naa'ke'bi len ben'la'ay'ke'bi.

Tue' bënni de'tzka xhdumie' rui'leene diidza Jesús

¹⁷ Kati Jesús bugie'le'e nëëz, rxiti'ze tue' bënni bdxiine len bzechu xhiibe lau'e ati bnaab'de Le' —Bënni useed tzawi, ¿Bixh rala guuna naar gde'li'da yëla naban tzalzu?

¹⁸ Jesús bubi'e kie' diidza: —¿Bixhkia' reu' neda bënni tzawi? Tuuze Dios nake tzawi.

¹⁹ Chi nëëz'du xhba kie' Dios: “Ti gdëëd'du bunach, ti kitzju' xhba ki utzag'na', ti kuaanu, ti kiilju xhtiidze'e bënni bë'chi' lzo'u, ti siye'u; be'ke bala'an xuuz'xhno'u.”

²⁰ Bënni'a gudxe Le': —Bënni useed, kuidi'iz'da zura le ni ruuna.

²¹ Jesús byue' le' len yëla nadxi'i len bubi'e kie' diidza: —Ni ryaadzj'r kiu' tu le guunu: beti'i dera le de kiu' len bnëëdzj kieke bënni yechi. Ka gunn ga'ta'tzka bi ga'ta kiu' lu yewayuba. Chi nak ka sa'leenu neda.

²² Bënni ni bui'i'ni'de kati byëën'de le ni, ati bayechi'da zuwëëje koma de'tzka bi de kie'.

²³ Na' Jesús byue' kuiti'le'e len gudxe bënni useed kie': —¡Baniig nak'tzka kieke bënni de'tzka bi de kieke layaazie lu yëla rnabe' kie' Dios!

²⁴ Lea gnia' ben ga bënni useed kie' gulubaani'tzki'de, ati Jesús yubl gudxe leke: —Xi'in, ¡Baniig nak'tzka tzaaz'ru lu yëla rnabe' kie' Dios!

²⁵ Udëëdr'ba weez tuuba kameyo lu naagi yëtzi, ka tue' bënni de'tzka bi de kie' tzaazie lu yëla rnabe' kie' Dios.

²⁶ Kati gulayëën'de le' gulubaanr'de, len tunaabi lza'a'ke: —¿Ati nuxh bënni gunn yule'?

²⁷ Jesús byue' leke len bubi'e kieke diidza: —Ki bunach nak baniig san kie' Dios ti nak baniig, koma gat'ga de le nak baniig kie' Dios.

²⁸ Pedro gzulau'e re' Le': —Netu nuka'an'tu yugute' le de kietu len za'leen'tu li'.

²⁹ Jesús bubi'e diidza: —Le nak'te rea' lbi'ili ki bënni nuka'ane liidxe u bënni bë'che'e u nguul zaane u xhne'e u xuuze u bi kie' u xhyue', nia'a kia' len nia'a ki Diidza kub,

³⁰ zala lulaag'ke le' uzi'e lu yëla naban zuaaru na'a ye tu gayua' ka' liidxe, bënni bë'che'e, nguul zaane, xhne'e, bi kie' len xhyue'; len lu yëla naban zia'a za' si'e yëla naban tzalzu.

³¹ Ati bënni'a na'a nak'ke zia'al, ulak'ke bënni zelau; len bënni'a na'a nak'ke zelau, ulak'ke bënni zia'al.

Jesús rgixhjë'e bunn lzu ki yëla gut kie'

³² Jesús na'nëëre lau'ke bënni useed kie' tzal dzë'ë'ke nëëz zjake Jerusalén. Leke tubaani'tzki'de len bënni zjake kuudzu'ke taadx'de. Jesús bliidze kiizi chin'nu'ke bënni useed kie' len gzulau'e rgixhji'de leke le rala gak:

³³ «Rak'be'i'kz'li na'a ziaj'ru Jerusalén, ga ludëëde Xi'ine Bënni lu naa'ke bënni tunabe'i'de pxuuz len bënni useed xhba kie' Dios, bënni ni luchuug'be'e ki rala gatie' len ludëëde Le' lu naa'ke bënni zitu.

³⁴ Lutitj'de Le', luchiije Le' xhëëna, ulagiine Le' len uludëëd'de Le'; san na' gak tson dza ubaane lu yëla gut.»

Jesús rubi'e diidza kie' Santiago len Juan

³⁵ Santiago len Juan bënni xi'ine Zebedeo, gulabiige'e ga zue' Jesús len gle'ke Le': —Bënni Useed, re'eni'tu gak'leenu netu len le gnaabi'tu Li'.

³⁶ Le' bnaab'de leke: —¿Bixh re'eni'li guuna kieeli?

³⁷ Gle'ke Le': —Lu yëla rnabe' xhën'te kiu' benn lsenz tu'tu kë'tu kuiti'le'u yubeel len ye tu'tu kë'tu kuiti'le'u yëëgl.

³⁸ Jesús bubi'e kieke diidza: —Ti nëëzi'li bixha rnaab'li. ¿Naru uxikji'li tëëd'li yëla rzi'be' le rala tëëda neda len ktzaag'li ka ktzaaga neda?

³⁹ Leke gulubi'ke diidza: —Uxikji'tu. Jesús gudxe leke: —Uxikji'li tëëd'li yëla rzi'be' ni len utzaag'li ka ktzaaga neda;

⁴⁰ san lea kë'li kuiti'le'a yubeel len kuiti'le'a yëëgl ti zua lu na'a gunna, Dios chi nuune nu rala labë' na'.

⁴¹ Kati bënni ye chi'ke'a gulayëën'de le ni, guladza'a'ke Santiago len Juan.

⁴² Ati Jesús bliidze leke len gudxe leke: —Lbi'ili chik'z nëëzi'li, ladj'ke bënni yëdz yubl nakua'ke bënni tunabe'ke ati ruuni leke nap'ke lsenz lusaka'zi'ke bënni laadz'ke ka tanaaz kieke, len bënni nakr'ke blou tunabe'i'de ye la' bunach ka te'enz'de.

⁴³ San ladj'li lbi'ili ti rala gak ka. San bënni re'en'de gake bënni xhën, rala guune dxin kie' bënni lze'e,

⁴⁴ ati bënni re'en'de gake bënni zia'al rala gake bënni wendxin nado'u'e kieeli.

⁴⁵ Koma nak'te Le' Xi'ine Bënni ti ze'e ki luune kie' dxin san ze'e guune dxin len gdëëde yëla naban kie' naar usle' bunach zian.

Jesús ru'uune Bartimeo bënni lau'chul

⁴⁶ Guladxiine Jericó. Len kati Jesús chi zuakz urooje lu yëdz'a, bënni useed kie' len bënni zian zjak'leene Le', ati tue' bënni lau'chul le' Bartimeo, bënni xi'ine Timeo, rë'e kuiti nëëz.

⁴⁷ Kati byëën'de ki Jesús ki Nazaret ziije'a, le' gzulau'e rusku'e: —¡Jesús, Xi'ine David, buechilaadxi'i neda!

⁴⁸ Bënni zian tadil'leene le' naar tir ze' ruzbë', san le' pchis're chi'e: —¡Xi'ine David, buechilaadxi'i neda!

⁴⁹ Na' Jesús glëëze len gne': Gultzajliidze. Yajliidz'ke bënni lau'chul, gle'ke le': —Ptip'laadxu'u, gyas; rliidze li' Jesús.

⁵⁰ Bënni lau'chul ni gru'u'ne laari xhua kuudze'e, len tu pxiti'ze gyiije ga zue' Jesús,

⁵¹ Jesús bnaab'de le': —¿Bixh re'en'du guuna kiu'? Bënni lau'chul ni bubi'e diidza: —Bënni useed, re'en'da ule'i'da.

⁵² Jesús gudxe le': —Wak wëëju; yëla rajle' kiu' chi ben ga ueaku. Na'teez bënni lau'chul ni bule'i'de len gyaj'leene Jesús la nëëz.