Marcos 1 - Porciones en Zapoteco de las Delicias

Juan bënni rkiile nis rde' latj yu biidx

¹ Ka rzulau diidza kub dxia'a kie' Jesús Le' Cristo, Le' Xi'ine Dios.

² Nayoj lu gich le bzooje bënni rue'e diidza ulaaz kie' Dios le' Isaías: ne'e «Rsë'la'ne gbaaz kia' lau'u, naar kpe'e kiu' nëëz.

³ Chi'e bënni ruskua' zidzj lu yu biidx: “Gulupa'a nëëz kie' Xan'ru; Gulusaalj kie' nëëz li.”»

⁴ Len ka blui'lau'e Juan bënni rkiile nis bunach lu latj yu biidx; re' yugute' bunach lubi'i'laadxi'ke len Dios len ludiile nis, naar Dios si'xhëëne xhtu'la'ke.

⁵ Yugute'ke bënni yu Judea len yëdz Jerusalén tarooje naar layëën'de le'. Tuxua'le'pe xhtu'la'ke ati Juan rkiile leke nis lu yeego Jordán.

⁶ Laari nakue' Juan naki li'tza'ba kameyo, ati ruugi'de ley len pan giid lsiine'e; ati buchuwa' len bdxindu gda'we.

⁷ Kati rue'e diidza rne': «Kuudza'a ze'e tue' bënni nap're yëla wak ka neda, len ti nak'kza bach gzechu xhiiba len kseedxa xhtui lëële'.

⁸ Neda chi pkiila lbi'ili len nis san le' jkiile lbi'ili len Bë' La'ay.»

Jesús rdiile nis

⁹ Larakz dza niiz, Jesús brooje Nazaret, yëdz zua Galilea ati Juan pkiile le' nis lu yeego Jordán.

¹⁰ Buudx'z burooje lu nis'a, Jesús ble'i'de brëëza xhba len Bë' La'ay kie' Dios rëtje ka tuuba palom ga zue'.

¹¹ Len byën tu chi'i za' yewayuba le rna: «Li' naku Xi'ina nu nadxi'i'tzki'da len rdzag'laadxa'a.»

Jesús lu latj yu biidx

¹² Buudx'z le ni, le' Bë' La'ay kie' Dios pche'e Jesús lu latj yu biidx.

¹³ Chua' dza gzue' ni', ladj bua'gixi znia' len gxhi'be'e le' Bënni Xëwi; len gbaaz la'ay tun'chi'ke le'.

Jesús rzulau'e xhchiine Galilea

¹⁴ Gdëëd gulagu'e liidx'gia Juan, Jesús gyiije Galilea yajtixhjë'e diidza kub dxia'a ulaaz kie' Dios.

¹⁵ Gne': «Chi bdxin dza, len yëla rnabe' kie' Dios chi za' ga'la. Gulubi'i'laadxi'li len Dios len gultzajle' diidza dxia'a ni.»

Jesús rliidze tap'ke bënni tazëëne'ba bël

¹⁶ Jesús rdëëde ra nis ki Galilea, kati ble'i'de Simón len bënni bë'che'e Andrés. Bënni ni tazëëne'ba bël, ati nakua'ke tuzal'ke yëxhj kieke lu nis,

¹⁷ Jesús gudxe leke: gultza' len neda ati neda guuna ga lbi'ili kche'li kia' bunach.

¹⁸ Na'teez guluka'ane yëxhj kieke'a len yajak'leene Le'.

¹⁹ Lati'iz guladëëde kati Jesús ble'i'de bënni xi'ine Zebedeo le' Santiago len bënni bë'che'e le' Juan dzë'ë'ke lu barku tu'uune yëxhj.

²⁰ Bliidz'tie' leke, ati leke guluka'ane xuuz'ke lu barku len bënni'a tak'leene leke len yajak'leene Jesús.

Bënni yu'e bë' xëwi

²¹ Guladxin'tie' Cafarnaúm, ati Jesús gyaazie yu'u useed dza tu'ueak'laadxi'ke bënni Judea len gzulau'e rseed'de bunach.

²² Bunach tubaani ka rseed'de leke, koma len yëla rnabe' rseed'de keg ka tuseed'de bënni useed xhba kie' Dios.

²³ Na'teez, lu yu'u useed'a zue' tue' bënni yu'e bë' xëwi, bënni ni bisku'e:

²⁴ ¿Bixh rala'tu kiu' Jesús ki Nazaret? ¿Naru zo'u zdunit'lau'u netu? Neda numbe'a li', len nëëz'da ki li' naku Bënni Xi'ine Dios.

²⁵ Jesús gdil'leene bë' xëwi'a, gudxe ley: ¡Pseeyj ru'u len buroj le bënni ni!

²⁶ Bë' xëwi'a ben ga bënni ni gbixh'ktule, len zidzj biskua'tzka kati buroj le'.

²⁷ Yugute'ke glaadxi'de len gulunaabi lza'a'ke: —¿Bixh'kza chi rak? ¡Na'dza'lkz ka rseed'de, ati len gdu yëla rnabe'! ¡Rnabe'i'de bë' xëwi len ley tuzenaagi le'!

²⁸ Len gdu gia'a yeego ki Galilea gus'te diidza le ruune Jesús.

Jesús ru'uune'nu tau'e Simón

²⁹ Guluroj'tie' lu yu'u useed'a, ati Jesús dzaage Santiago len Juan yajake liidxe Simón len Andrés,

³⁰ ka gulayaaz'ze liidxe'a gulagixhji'de Jesús ki tau'e Simón deenu yu'u'nu tuxhla,

³¹ le' gbiige'e len gde'le'e na'nu ati pchise'nu: na'teez buroj lenu tuxhla'a len gzulau'nu ben'nu le gla'we.

Jesús ru'uune zian'ke bënni te'i'de

³² Kati chi gbia gbiidz len za' ral, yajua'ke lau'e Jesús yugute'ke bënni we' len bënni yu'u leke bë' xëwi,

³³ len gdu yëdz guludzaag'ke rayu'u kie' Simón.

³⁴ Jesús buune bunach zian ki baya' gza'a, len bubiije le zian bë' xëwi, san ti rnëëdzje latj lané bë' xëwi'a, koma ley numbe'k le'.

Jesús rgixhjë'e diidza lu yu'u useed

³⁵ Ziil'bal kati ni na'chul, Jesús gyase len brooje lu yëdz'a naar tzaje'leene diidza Dios lu latj ga nutunu tadá.

³⁶ Simón len bënni lze'e yajdiilj'ke Jesús,

³⁷ ati kati guludzëël'de gle' le': —Yugute'ke tugiilje li'.

³⁸ San Le' bubi'e kieke diidza: —Gultza' yëdz'du le nakua'k ga'la; lekz'ka' ni' rala tzajtixhjë'a xhtiidze'e Dios, koma lena'a za'a.

³⁹ Ka' gde' Jesús gdu Galilea, rgixhjë'e xhtiidze'e Dios lu yu'u useed ki tu tu yëdz len rubiije bë' xëwi.

Jesús ru'uune tue' bënni re'i'de we' nuudzu

⁴⁰ Tue' bënni re'i'de we' nuudzu gbiige'e ga ze' Jesús, ati bzechu xhiibe len gudxe le': —Wak uunu neda xhki ba re'en'du.

⁴¹ Jesús buechilaadxe'e le' ati pxua ne'e le' len gne': —Rna kia'. ¡Bueak dxia'a!

⁴² Na'teez buroj le' baya'a len bueak'tie'.

⁴³ Jesús busa'tie' le' len gudxe le':

⁴⁴ —Nutunu kixhji'du le guk; gyaj'z lau'e pxuuz len ka chi naleebi'li kati rupa'a kuin'li, bia' gun le gnabe'e Moisés, naar lale'i'de ley pxuuz'a.

⁴⁵ San bënni ni kati zuwëëje gzulau'e rlaabe kieke yugute'ke le guk. Lena'a Jesús tir benn tzaazie yaalj yugute' yëdz gap rde', len rayu'ul'z rga'ane, latj ga nutunu tadá; san gaaz za'ke ka' bënni rduyu'ke le'.