Lucas 9 - Porciones en Zapoteco de las Delicias

Jesús rsë'le'e bënni useed kie' tzajtixhjë'ke yëla rnabe' kie' Dios

¹ Jesús butzaage chin'nu'ke bënni useed kie', len bnëëdzje kieke yëla wak len yëla rnabe' naar lubiije yugute' bë' xëwi len lu'un'ke baya'.

² Psë'le'e leke tzajtixhjë'ke yëla rnabe' kie' Dios len lu'un'ke bënni we'.

³ Gudxe leke: —Kati tzu'uli nëëz tibi gua'li, keg xuyaag, keg bzuud, keg yët'xhtiil, keg dumi len ti gua'li ye tu kë' xha'li.

⁴ Biti'i yu'u ga gdxin'li, na'z suáli na' gdxin'r dza uza'li.

⁵ Len xhki tu yëdz ti le'en'de lazi'ke lbi'ili guluroj na', len gulkuib bexhtë nua' ni'a'li, le ni glui' ki ti gulazi'ke lbi'ili.

⁶ Gularooje leke, len yajake yugute' yëdz we'en'du, yajtixhjë'ke diidza kub dxia'a len gulu'un'ke bënni te'i'de.

Ti nëëz'de Herodes nuxh nake Jesús

⁷ Herodes bënni rnabe' yëdz xhën byëën'de diidza ki yugute' le ruune Jesús, ati gukgan'de, koma la'ke tanáke ki Juan chi bubaane lu yëla gut,

⁸ ye la'ke tanáke Elías chi bului'lau'e, ye la'ke tanáke nuxh'lke bënni'a glui'ke diidza ulaaz kie' Dios zia'at chi bubaane lu yëla gut.

⁹ Ati Herodes gne': —Kuin'kza gnabe'i'da ki luchuuge ikje Juan. ¿Nuxhkz nake bënni ni, biiz ryëën'da ka tanáke kie'? Lena'a Herodes rzu'rbë'e gle'i'de Jesús.

Jesús rga'we bunach zian

¹⁰ Kati bënni gbaaz kie' guludxiine, gulagixhji'de Jesús le gluune. Le' pche'e leke ga yubl tu yëdz nazi' lei' Betsaida.

¹¹ Ati kati bunach gulanëëz'de, yajak'leene le'; len Jesús gxhi'e leke len be'leene leke diidza ki yëla rnabe' kie' Dios len buune bënni we'.

¹² Kati chi za rdzë', yajake ga zue' Jesús Chin'nu'ke bënni useed kie' len gle'ke le': —Busë'la bunach ni, naar lu'ueak'laadxi'ke len tzajtiilj'ke le la'we yëdz ga'la ni, koma ga zuaaru ni nutunu nakua'.

¹³ Jesús gudxe leke: —Gulunëëdzj lbi'ili le la'we. Leke gulubi'e diidza: —Ga'yu'z yët'xhtiil len chop'ba bël de'ba kietu, keg la tzajë'u'tu le la'we.

¹⁴ Koma ga'yu' mil'ke bënni nak'ke. Ati Jesús gudxe bënni useed kie': —Gulgun ga labë'ke chi'un ueaj'ke.

¹⁵ Leke guluzenaage na' gluune ga labë'ke yugute'ke.

¹⁶ Na' Jesús gxhi'e ga'yu' yët'xhtiil len chop'ba bël ni, byue' lu xhba len ben'la'aye ley, bxhuuxhje len bnëëdzje kieke bënni useed kie' naar lagis'ke kiegak bunach'a.

¹⁷ Bunach gla'we tzka glëëlj'de, len ye chin'nu bdë'ë guk tzka le buga'an.

Pedro gne' ki Jesús nake Cristo

¹⁸ Tu dza kati Jesús zue' tuuze rui'leene diidza Dios, len bënni useed kie' nakua'leene le', bnaab'de leke: —¿Bixh taná bunach nuxh naka neda?

¹⁹ Leke gulubi'e diidza: —La'ke tanáke naku Juan bënni pkiile nis bunach, ye la'ke tanáke naku Elías, len ye la'ke tanáke nuxh'lke bënni'a glui'ke diidza ulaaz kie' Dios zia'at chi bubaane lu yëla gut.

²⁰ —Jesús bnaab'de leke: —Ati lbi'ili, ¿Bixh rnaali nuxh naka neda?. Len Pedro bubi'e diidza: —Naku le' Cristo kie' Dios.

Jesús rgixhjë'e ki yëla gut kie'

²¹ Ati Jesús gudxe leke ki nutunu lagixhji'de le ni.

²² Len gudxe leke: —Le' Xi'ine bënni rala ktzaag'tzke, len ti layaazlaadxi'ke le' bënni guul tuzeajni'i'de bënni Judea, bënni tunabe'i'de pxuuz len bënni useed xhba kie' Dios. Uludëëd'de le', san na' gak tson dza ubaane lu yëla gut.

²³ Gdëëd ni gudxe yugute'ke: —Xhki nu bënni re'en'de gake bënni useed kia', rala gzal'laadxe'e kuine, gue'e yaag kruuz kie' tu tu dza len giid'leene neda.

²⁴ Koma bënni re'en'de usle' yëla naban kie', unitie' ley; san bënni gatie' nia'a kia' neda, usle' yëla naban kie'.

²⁵ ¿Gaxh de gun kie' bënni gaki kie' gdu yëdz'lyu xhki nitie' u gunditji kuine?

²⁶ Xhki nu rutui'i neda len rutui'i xhtiidza'a, lekz'ka' le' Xi'ine bënni utui'i'de le' kati wëëde lu yëla ba kie' len lu yëla ba kie' Xuuze len kieke bënni gbaaz la'ay kie'.

²⁷ Le nak'te rnia' la'ke bënni nakua'ke ni, ti lat'gake xhki ku lale'i'de zia'a yëla rnabe' kie' Dios

Lau'rue'e Jesús ptza'

²⁸ Gdëëd ka xuunu dza be'e diidza ni, Jesús greene tu gia'a zaje'leene diidza Dios, zjak'leene le' Pedro, Santiago len Juan.

²⁹ Tzal rui'leene diidza Dios, lau'rue'e ptza' len laari nakue' guk xhiila'z len rep'yës'lni';

³⁰ Len gulului'lau'ke chope' bënni tui'leene le' diidza. Nak'ke Moisés len Elías,

³¹ nuli'iji leke yeni xhën'te len tui'ke diidza ka uze'e Jesús lu yëdz'lyu ni, le rala gak Jerusalén.

³² Zala Pedro len bënni'a dzaage'a rak'tzka chigas'ke, gulana'se len gulale'i'de yëla ba kie' Jesús len grope' bënni'a nakua'ke len le'.

³³ Kati bënni'a guluza'ke ga zue' Jesús, Pedro gudxe le': —Bënni useed, ¡dxia'a'kza zuaaru ni! Gun'ru tson yu'u we'en'du: tu kiu', tu kie' Moisés len ye tu kie' Elías. Ati Pedro ti nëëz'de bixh diidza rue'e.

³⁴ Tzal rue'e diidza tu buaj yajxua leke, len kati chi dzë'ë'ke le'i buaj'a glaadxi'de.

³⁵ Na' lu buaj'a byën chi'i le gna: «Bënni Xi'ina ni rdzag'laadxa'ne: guluzenaag'de.»

³⁶ Kati byën chi'i ni, Jesús bga'ane tuuze. Ati leke guluka'chi'tzka'ke le ni len nutunu gulagixhji'de le gulale'i'de.

Jesús ru'uune'bi tuubi bi kuidi yu'u lebi bë' xëwi

³⁷ Bueikj dza'a, kati guludinie lu gia'a, bënni zian gularooje yajtzaag'ke le' Jesús.

³⁸ Len ladj bunach'a tue' bënni pchis chi'e gudxe le': —Bënni useed, guk'leemi bi kia' ni, lazdui'bi zuaabi kia';

³⁹ tu bë' xëwi rzën leebi, len run ga guskua'bi len rxiiz leebi len rbia bdxina ziidi rua'a'bi, rsaka'zi' leebi len ti re'e'ni ksan leebi.

⁴⁰ Chi gutayui'kda'ne bënni useed kiu' lubiije bë' xëwi'a, ati leke ti glake.

⁴¹ Jesús bubi'e diidza: —¡Lbi'ili bënni ti nayajle' len ti run'li le dxia'a! ¿Gaxhkz sua' ka'tekz sua'leena lbi'ili len kxikji'da lbi'ili? Yajxi'bi ni bi kiu'a.

⁴² Kati chi za'bi ga'la, bë' xëwi'a bzal leebi lyu len gzulau rxiiz leebi yubl ka; ati Jesús gdil'leene bë' xëwi'a, buune'bi bi ni len bunëëdzje'bi len xuuz'bi.

⁴³ Len yugute'ke gulubaan'de ki yëla xhën kie' Dios. Tzal yugute'ke tubaan'de le ruune Jesús, le' gudxe bënni useed kie':

Jesús rgixhjë'e burop lzu ki yëla gut kie'

⁴⁴ —Guluzenaag dxia'a le ni len ti gal'laadxi'li: Le' Xi'ine Bënni uludëëde le' lu naa'ke bunach.

⁴⁵ Ati leke ti gulayajni'i'de le rne', koma ti nayaalji ikj'lau'ke naar layajni'i'de, lekz'ka' taadx'de lunaab'de Jesús gsaalj'la'a'ne ley kieke.

¿Nuxh nak'r blou?

⁴⁶ Na' bënni useed kie' gulazulau'ke tadil'e diidza nuxh'lke lakgake bënni blou.

⁴⁷ Kati guk'be'i'de Jesús le rza' ikj'laadxi'dau'ke, gde'le'e'bi tuubi bi'dau' bze'bi kuiti le'e

⁴⁸ Len gudxe leke: —Bënni rzi'e'bi bi'dau' ni, neda rzi'e; len bënni rzi'e neda, rzi'e lekz'ka' nu nusë'la neda. Lena'a bënni'a ti ryaazlaadxi'li'ne, bënni'a nak're blou.

Bënni tibi ruune kieeru, rak'leen're ro'u

⁴⁹ Juan gudxe le': —Bënni useed, ble'i'tu'ne tue' bënni rubiije bë' xëwi lu lou'; len gu'uni'tu gzaaga'tu'ne, koma ti za'leene ro'u.

⁵⁰ Jesús bubi'e diidza: —Ti gzaaga'li'ne, koma bënni'a tibi ruune kieeru, rak'leen're ro'u.

Jesús rdil'leene Santiago len Juan

⁵¹ Kati chi zua ga'la gdxin dza Jesús rala ubeene yewayuba, beene tzutzu laadxe'e len glu'e nëëz ziije Jerusalén.

⁵² Psë'le'e bënni gbaaz lanëëre, tzjake tu yëdz we'en ki Samaria naar tzajtiilj'ke ga jga'ane;

⁵³ ati bënni yëdz Samaria ti gle'en'de lazi'ke le', koma gulak'be'i'de ki ziije Jerusalén.

⁵⁴ Kati bënni useed kie', Santiago len Juan gulale'i'de le ni, gle'ke le': —Xan, ¿Re'en'du gnabe'tu wëtj gi' za' yewayuba, len gnit'lau leke?

⁵⁵ Ati Jesús bueikje len gdil'leene leke.

⁵⁶ Na' yajake ye tu yëdz we'en.

Bënni te'en'de tzjak'leene Jesús

⁵⁷ Tzal dzë'ë'ke nëëz tue' bënni gudxe Jesús: —Xan, rzelaadxa'a sa'leena li' ga'ti'teez tziiju.

⁵⁸ Jesús bubi'e diidza: —Bëëza zua bloj giaj kiek'ba, len bua' tazuuba zua liidx'kba; san le' Xi'ine Bënni ti de tu latj ga gasie'.

⁵⁹ Jesús gudxe ye tue': —Dia' len neda. Ati le' bubi'e diidza: —Xan, ben latj zia'a xuuza jka'cha'a'ne.

⁶⁰ Jesús bubi'e diidza: —Be'ke latj bënni nat'a luka'chi'ke bënni nat kieke; li' yajtixhjë yëla rnabe' kie' Dios:

⁶¹ Ye tue' gudxe le': —Xan, re'en'da sa'leena li', ben'z latj tzajzei'kdane diidza bënni nakua'ke liidxa.

⁶² Jesús bubi'e diidza: —Bënni rga'ane'ba beedx len ryue' zga kuudzu'le, ti nake bach tzaazie lu yëla rnabe' kie' Dios