Lucas 6 - Porciones en Zapoteco de las Delicias

Bënni useed kie' Jesús talje deu dza tu'ueak'laadxi'ke bënni Judea

¹ Dza tu'ueak'laadxi'ke bënni Judea, Jesús rde' ladj layeel. Bënni useed kie' talje deu ki xhua'xhtiil, taxhuube'e ley len ta'we.

² Na' la'ke bënni fariseo gulunaab'de leke: —¿Bixhkia' run'li le ti de lsenz gun'ru dza ru'ueak'laadxi'ru?

³ Jesús bubi'e diidza: —¿Naru ti rul'i'li le beene tu lyas David len bënni lze'e kati guladuune?

⁴ Gyaazie liidxe Dios len gxhi'e yët'xhtiil le chi nak La'ay lau'e Dios, gda'we len bnëëdzje kie' bënni lze'e, nak'te pxuuz'z de lsenz la'we yët'xhtiil'a.

⁵ Lekz'ka' re' leke: —Le' Xi'ine Bënni nape yëla rnabe' ki dza tu'ueak'laadxi'ke bënni Judea.

Jesús ru'uune tue' bënni re'i'de dza tu'ueak'laadxi'ke bënni Judea

⁶ Yubl dza tu'ueak'laadxi'ke bënni Judea, Jesús gyaazie yu'u useed len gzulau'e rseed'de bunach, zue' na' tue' bënni nat'zi ne'e yubeel.

⁷ Ati bënni useed ki xhba len bënni fariseo tauyuudxe Jesús naar lale'i'de xhki uune le' dza tu'ueak'laadxi'ke bënni Judea, naar gunn ludxie' le' xhgia'.

⁸ San Le', nëëz'de le rza' ikj'laadxi'dau'ke, len gudxe bënni'a nat'zi ne'e: —Gzui len gze' gatzj lau'i ni. Gzui'ti'de bënni ni,

⁹ ati Jesús gudxe bënni ye la'ke'a: —Gnaab'tzki'da lbi'ili: ¿Bixh de lsenz gun'ru dza ru'ueak'laadxi'ru: le nak dxia'a u le ku nak? ¿Usláaru tu yëla naban u gnit'lau'ru ley?

¹⁰ Na' byue' yugute'ke bënni'a nakua'ke'a, len gudxe bënni'a nat'zi ne'e: —Bli no'u. Bënni'a beene ka' len bueak'te ne'e.

¹¹ San ye la'ke bënni'a guladze'itzki'de len gulazulau'e tun'ke diidza bixh gunn lun'ke kie' Jesús.

Jesús rbëe' chin'nu'ke bënni lak'ke gbaaz kie'

¹² La dza niiz, Jesús gyiije gia'a yaje'leene diidza Dios, len gdu yeel be'leene Le' diidza.

¹³ Kati gyeni, bliidze bënni useed kie', len grë'e chin'nu'ke ki lak'ke bënni gbaaz kie'.

¹⁴ Bënni ni glake: Simón bënni'a bzue' le' Pedro; Andrés bënni bë'che'e Simón; Santiago, Juan, Felipe, Bartolomé,

¹⁵ Mateo, Tomás, Santiago bënni xi'ine Alfeo; Simón bënni'a nadxi'i'de yëdz kie',

¹⁶ Judas bënni xi'ine Santiago len Judas Iscariote, bënni ni bdëëde Jesús lu naa'ke bunach.

Jesús rseed'de bunach zian

¹⁷ Jesús budin'leene gbaaz kie' gia'a ga gyiije'a len gulabëëze ga nak la'chi. Chi nudzaag'ke ni' zian'ke bënni rajak'leene le' len zian bunach ki gdu gia'a yeego Judea, bënni yëdz Jerusalén len bënni yëdz dek ra nis xhën ki Tiro len Sidón.

¹⁸ Guladxiine ni' naar layëën'de le rne' Jesús len uune leke. Bënni'a tutzaage ki bë' xëwi lekz'ka' tu'ueake.

¹⁹ Lena'a yugute' bunach te'en'de lagaane Jesús, koma yugute' bunach ru'uune len yëla wak kie'.

Le nak lzaka' lau'e Dios

²⁰ Jesús byue' bënni useed kie', len gudxe leke: «Bixhgaba'li lbi'ili bënni yechi, koma kieeli naki yëla rnabe' kie' Dios.

²¹ »Bixhgaba'li lbi'ili rdun'li, koma wëlji'li. »Bixhgaba'li lbi'ili rbëëdx'li, koma udziiji'li.

²² »Bixhgaba'li kati bunach lalei' lbi'ili, kati labiaj'je'i'de lbi'ili, kati lutzag'yuudxe lbi'ili diidza len kati ti layaazlaadxi'ke lbi'ili nia'a kie' Xi'ine Bënni.

²³ Guludziiji'tzki len guluzakalaadxi'li na' gdxin dza'a, koma xhën'te nak le uzi'li xhbei yewayuba; koma lekz'ka' xuuz'xhtau'ke guul bënni ni ka' gulusaka'ke bënni'a glui'ke diidza ulaaz kie' Dios.

²⁴ »San ¡Bayechi nak'tzka'li lbi'ili de'tzka kieeli yëla tzawi, koma chi buzi'li xhbei!

²⁵ »¡Bayechi nak'tzka'li lbi'ili chi nëlji'li, koma udun'li! »¡Bayechi nak'tzka'li lbi'ili rxhidx'li, koma ubëëdx'li yëla ruwi'i'ni!

²⁶ »¡Bayechi nak'tzka'li lbi'ili kati gdu yëdz'lyu gle'i lbi'ili dxia'a, koma ka gluune xuuz'xhtau'ke guul bënni ni kieke bënni'a gluune lsaki'i nak'ke bënni tui'ke diidza ulaaz kie' Dios!

Rala gdxi'i'ru'ne bënni'a ti rle'i'de ro'u dxia'a

²⁷ »Tzka'li rzenaag'li, rea' lbi'ili: bdxi'ik'de bënni'a ti tale'i'de li' dxia'a, ben le nak dxia'a kieke bënni'a talei'de li',

²⁸ Ben'la'ay'ke bënni'a tudxia'ke li' dë', kati rliidzu'ne Dios bnaab kieke bënni'a tutzag'yuudxe li' diidza.

²⁹ Xhki nu ka'pa xagu'u, bze lekz'ka' le ye tzala'a; len xhki nu kua laari nuxu' kuudzu'u, be'e latj gue'e lekz'ka' xhou'.

³⁰ Nu'ti'teez nu gnaab le de kiu', bnëëdzj, len xhki nu kua le nak kiu', ti yunaabu.

³¹ Ati ka re'eni'li luune kieeli bunach, ka gulgun kieke.

³² »Xhki nadxi'iz'li nu nadxi'i lbi'ili, ¿Bixh nadëëdi be'i run'li? La lez ka'az'a tabëëze bënni dula.

³³ Ati xhki run'li le nak dxia'a kie'z'ke bënni'a tun'ke le nak dxia'a kieeli, ¿Bixh nadëëdi be'i run'li? Lekz'ka' tabëëze bënni dula.

³⁴ Len xhki rnëëdzj'gaarz'li'ne bënni'a run'li lëëz bi lunne kieeli, ¿Bixh nadëëdi be'i run'li? Lekz'ka' bënni dula tunëëdzj'giir lza'a'ke, len tuune lëëz bi lazi'ke ki lza'a'ke.

³⁵ Lbi'ili rala gdxi'i'li'ne bënni'a ti tadzaage lbi'ili dxia'a, len gun'li le nak dxia'a, ti këëz'li bi lunne kieeli kati bi rnëëdzj'gaar'li. Na'ar gak xhën le uzi'li xhbei, len gak'li xi'ine Dios xhën'te, koma lekz'ka' le' ruune le dxia'a kieke bënni'a tibi tadzag'laadxi'ke len lekz'ka' kieke bënni xhe'e.

³⁶ Ka' ruwechilaadxe'e lbi'ili Xuuz'li rala wechilaadxi'i lza'a'li.

Ti kchuug'be'li ki lza'a'li

³⁷ »Ti kchuug'be'li kieke bënni yubl, naar Dios ti kchuug'be'e kieeli. Ti guspaaga'li'ne xhgia' bënni yubl, na'ar Dios ti guspaage'e lbi'ili xhgia'. Gulsi'xhën, len Dios si'xhëëne lbi'ili.

³⁸ Gulunëëdzj kie' bënni yubl, len ka' lunne kieeli. Dxia'a lurixhe', lukie', luyuy'je, len ras'rdxia lunne kieeli. Xhguunz lea gri'xhi'li len guik'li'ne bënni yubl xhguunz'a gri'xhi'de Dios unne kieeli.»

³⁹ Jesús beene lsaki'i len gudxe leke: «¿Naru wake tue' bënni lau'chul kche'e ye tue' bënni lau'chul? ¿Naru ti labixe grop'te'ke lu yeru'yu?

⁴⁰ Gat'ga zue' bënni useed nak're xhën ka bënni pseed'de le' san kati uudx kseede udxiine gake ka bënni'a pseed'de le'.

⁴¹ »¿Bixhkia' ryu' bëta'yaag'a yu'u lau'e bënni bë'chu'u len ti ryu' bguugu'a yu'u lau'u?

⁴² Len xhki ti rak'be'i'du yu'u bguugu'a lau'u ¿Nakxh'kz ruunu ruwaaxhj'du reu'ne bënni bë'chu'u: “Bë'cha'a, benn latj ubiija bëta'yaag'a yu'u lau'u”? ¡Naku ka bënni nuda' blo'u! Bubiaj zia'a bguugu'a yu'u lau'u, naar gunn gle'i'du dxia'a ubiiju bëta'yaag'a yu'u lau'e bënni bë'chu'u.

Len xhlu'li'i le rbia rak'be'i'ru bixh yaag'a

⁴³ »Gat'ga zua yaag dxia'a le rbia xhlu'li'i ku nak, len tibi yaag ku nak rbia xhlu'li'i dxia'a.

⁴⁴ Len xhlu'li'i le rbia tu tu yaag rak'be'i'ru bixh yaag'a: ti rchiib'ru higo lu yaag yëtzi, lekz'ka' ti rchiib'ru uva lu yëtzi bezka.

⁴⁵ Bënni dxia'a rue'e diidza dxia'a koma lu laadxi'dau'e zua le dxia'a, len bënni xhe'e rue'e diidza le ku nak koma lu laadxi'dau'e zua yëla xhe'e. Koma le rza'z ikj'laadxi'dau'e rue'e diidza.

Chop xhliibi yu'u dzë'ë

⁴⁶ »¿Bixhkia' re'li neda, “Xan, Xan”, ati ti run'li le rea' lbi'ili?

⁴⁷ Bënni riid'leene neda, ryëën'de len ruune le rea'ne, kixhji'da lbi'ili nuxh ruune lsaki'i:

⁴⁸ nake lsaki'i ka bënni'a kati ruune tu yu'u, ga're' rchë'ëne len rgu'e xhliibi lu giaj. Kati gxhën yeego, nis'a yajtzu'u yu'a, san ti gxha'ki'i grixh ley, koma gulabekie dxia'a xhliibi yu'a.

⁴⁹ San bënni'a ryëën'de neda ati ti ruune le rea'ne, nake lsaki'i ka bënni'a beene liidxe lu yu len ti rgu'e xhliibi, ati kati gxhën yeego, len yajtzu'u yu'a, gbixh len budu bgin'j.»