Lucas 24 - Porciones en Zapoteco de las Delicias

¹ Bayën ziil kati rugie'la' seman yajak'nu nguul ni ga de ba kie' Jesús, len nuak'nu le rla' xhixh lea chi nukëëzk'nu.

² Kati guladxin'nu gulale'i'nu ki giaj'a nusiaj ra baa chi na'dua;

³ len gulayaaz'nu, san ti guludzëëli'nu'ne Xan'ru Jesús.

⁴ Na' nakua'nu tubaani'nu kati gulale'i'nu'ne chope' bënni rep'yës'lni' xha'ke nakua'ke kuiti le'ek'nu.

⁵ Glaadxi'tzki'nu len guluzechu lyu't ikjk'nu; ati bënni'a gle'ke'nu: —¿Bixhkia' rugiilj'li'ne bënni ban ladj'ke bënni nat?

⁶ Ti zue' ni, chi bubaane lu yëla gut. Gultzajnei le gudxe lbi'ili kati ni zue' lu yëdz Galilea,

⁷ ki Le' Xi'ine Bënni rala ludëëde le' lu naa'ke bënni dula len lude'e le' lu yaag kruuz, len kati gak tson dza ubaane lu yëla gut.

⁸ Na'ar lek'nu gyajneik'nu diidza be'e Jesús,

⁹ len kati guludxin'nu yajak'nu ra baa, dera lea gulale'i'nu gulagixhji'nu'ne bënni chi'niaj'ke gbaaz kie' Jesús len bënni'a ye la'ke.

¹⁰ Nguul'a gulagixhji'nu'ne diidza kub ni bënni gbaaz'a nak'knu María Magdalena, Juana, María xhne'e Santiago len ye la'knu nguul.

¹¹ Len bënni gbaaz ni glaki'de ki chi tui'nu diidza chëxh len ti gulayajle'ke'nu.

¹² Ati Pedro rxiti'ze gyiije ra baa; len kati byue' le'i, ble'i'de laari na'z nakua'. Na' bëëje liidxe rubaan'de ki lea guk'a.

Lu nëëz Emaús

¹³ La dza na'z, chop'ke bënni useed zjake tu yëdz nazi' lei' Emaús le de zitu ki Jerusalén.

¹⁴ Zjake tui'ke diidza ki yugute' le chi guk.

¹⁵ Tzal tui'ke diidza len tunaabi lza'a'ke, kuin'kze Jesús gbiige'e ga'la len gzulau'e yu'u'leene leke nëëz.

¹⁶ Len zala tale'i'de le', ti benn lumbe'ke nuxha'.

¹⁷ Jesús bnaab'de leke: —¿Bixhkz diidza rui'li tzal yu'u'li nëëz? —Bayechi'da yajsua'ke

¹⁸ len tue' bënni le' Cleofás bubi'e diidza: —¿Naru tuuzu li' bënni yëdz zitu nadxiinu Jerusalén len ti nëëz'du le guk ni' nas niij ni?

¹⁹ Le' bnaabe: —¿Bixh guk? —Gle'ke le': —Ka guk kie' Jesús bënni Nazaret, guke bënni be'e diidza ulaaz kie' Dios, len yëla wak xhën beene dxin len be'e diidza lau'e Dios len lau'ke yugute'ke bënni;

²⁰ len ka gluune bënni pxuuz len bënni tunabe'i'de netu gulunëëdzje le' naar guluchuug'be'e ki gatie' len lude'e le' lu yaag kruuz.

²¹ Netu nun'tu lëëz le' gake bënni usle' gdu yëdz Israel, san na'a guk tson dza glak yugute' le ni.

²² Ati ba'ay bayën la'knu nguul lza'a'tu guluspaani'nu netu koma yajak'nu ra ba kie'

²³ len ti guludzëëli'nu'ne, guludxin'nu nu'yu'u tanaanu ki gulale'i'nu'ne gbaaz la'ay kie' Dios len gle'ke'nu ki Jesús yu'u yëla naban kie'.

²⁴ Gdëëd ni lez la'ke bënni lza'a'tu yajake ra ba len yajxaka'ke ka'teez gulanaanu nguul'a, san ti gulale'i'de Jesús.

²⁵ Na'ar Jesús gudxe leke: —¡Nayaadzji'tzki'li yëla nayajni'i len kann'z rajle'li yugute' le gulanake bënni glui'ke diidza ulaaz kie' Dios!

²⁶ ¿Naru ku ben bayuudx ktzaage le' Cristo yugute' le ni, na'ar si'e yëla ba?

²⁷ Na'ar gzulau'e rgixhji'de leke yugute' diidza le nayooj'gak kie' lu Diidza La'ay, gzulau'e len gich le bzooje Moisés len bdxin'tie' len gich le guluzooje bënni glui'ke diidza ulaaz kie' Dios.

²⁸ Kati guladxiine lu yëdz ga zjake, Jesús beene lua' ziaj're zitu.

²⁹ San leke guludayë'li'de le' jga'ane, tanáke: —Bga'an len netu, koma chi nadzë', chi za' rchul. Jesús gyaazie nu'yu'u len bga'an'leene leke.

³⁰ Kati chi rë'ke ga rala la'we gde'le'e yët'xhtiil len buudx be'e yëla dexhken Dios, bxhuuxhje len bnëëdzje kieke.

³¹ Na'teez buaalj lau'ke len gulumbe'e Jesús, san Le' bunit'ze ka' lau'ke.

³² Len gle' lza'a'ke: —¿Naru lena'a buzaka'laadxi'ru tzal rui'leene ro'u diidza len rseedx'la'a'ne Diidza La'ay'a?

³³ Len tirbi gulabëëze, gulugie'le'e nëëz zawake Jerusalén ga nakua'ke bënni chi'niaj'ke gbaaz kie' Jesús len ye la'ke bënni nakua'ke len leke.

³⁴ Bënni ni gle'ke leke: —Blii, leel bubaane lu yëla gut Xan'ru, len chi blui' lau'e ble'i'de le' Pedro.

³⁵ Na'ar bënni chop'ke ni gulagixhjë'ke le guk kieke la nëëz len ka guk gulumbe'e Jesús kati bxhuuxhje yët'xhtiil'a.

Jesús blui' lau'e len bënni useed kie'

³⁶ Ni nakua'ke tui'ke diidza ni kati Jesús dusue gatzj'lau'i ga nakua'ke len bliidz'tzawi'e leke, gne': —Yëla rë'dxi sua len lbi'ili.

³⁷ Leke glaadxi'tzki'de len taki'de ki pxin'a tale'i'de.

³⁸ Ati Jesús gudxe leke: —¿Bixhkia' rungaadxi kuin'li? ¿Bixhkia' ti rajle'li gdu ikj'laadxi'dau'li?

³⁹ Guluyu' ni'a' na'a, needa'a, gulukan' neda len guluyu' dxia'a, tu pxin ti nua' beela' len ti yu'u dxit, ka rle'i'li nak kia' neda.

⁴⁰ Kati gne' ka', blui'de leke ni'a' ne'e.

⁴¹ Ati le ti ru'uudx layajle'ke tzka tudziij'de len tubaan'de, Jesús bnaab'de leke: —¿Ba de kieeli le gaag'ru?

⁴² Len gulunëëdzje'ba kie' lati'ba bël neegi',

⁴³ len le' gxhi'e len lau'ke ka gda'we.

⁴⁴ Gdëëd ni gudxe leke: —Le ni guk kia' ni, nak le gdixhjë'a kati ni zua'leena lbi'ili: ki rala gak kia' ka'teez nayoj lu gich le bzooje Moisés, le nayoj lu gich kieke bënni glui'ke diidza ulaaz kie' Dios len le nayoj lu gich la'ay ki Salmos.

⁴⁵ Na'ar buseedx'la'a'ne kieke Diidza La'ay'a.

⁴⁶ Len gudxe leke: —Nayoj ki le' Cristo rala gatie' len kati gak tson dza ubaane lu yëla gut.

⁴⁷ Len lu le' Le' rala gnëëzi yugute' yëdz ki rala lubi'i'laadxi'ke len Dios naar si'xhëëne xhtu'la'ke. Jerusalén sulau'li

⁴⁸ lbi'ili tzajxaka'lau'li le ni.

⁴⁹ Len neda ksë'la'a kieeli le Xuuza pxënelaadxi'li. San lbi'ili guluga'an yëdz Jerusalén niiz, tzal gdxin kieeli yëla wak za' yewayuba.

Jesús Rubeene yewayuba

⁵⁰ Gdëëd ni Jesús pche'e leke yajake yëdz Betania len pchise ne'e len ben'la'aye leke.

⁵¹ Len tzal run'la'aye leke gzulau'tie' rubeene yewayuba

⁵² Leke buudx gulayiijilaadxi'ke Le' ye'wake Jerusalén len yëla rudziiji.

⁵³ Len nakua'tekze lu gdou' tagu'e ba Dios.