Lucas 22 - Porciones en Zapoteco de las Delicias

Tuune diidza nakxh lazëëne Jesús

¹ Chi zua ga'la lni ga ta'we yët'xhtiil le ti yu'u le rzaaxh ley, nazi' lei' lni ki Pascua.

² Bënni tunabe'i'de pxuuz len bënni useed xhba kie' Dios tazu'tabë'e nakxh luune ludëëd'de Jesús, san taadx'de bunach'a.

³ Na' Bënni Xëwi gyaazie le' Judas, tue' kieke Chin'nu'ke bënni useed kie' Jesús, bënni'a te'ke le' Iscariote.

⁴ Le' yajyue bënni tunabe'i'de pxuuz len bënni nakua'ke lau'i ki gdou', naar luune diidza nakxh gdëëde Jesús lu naa'ke.

⁵ Leke guludziij'de len gulazi'lunaa'ke lunëëdzje dumi kie' Judas.

⁶ Len le' gxhi'lu'ne'e len gzulau'e rzu'rbë'e batxh gunn gdëëde Jesús lu naa'ke kati ti nakua'k bunach.

Jesús raagu'leene xhtzë' bënni useed kie'

⁷ Bdxin dza ki lni ga ta'we yët'xhtiil le ti yu'u le rzaaxh ley, kati tudëëd'de'ba bëku'xhiila ki Pascua.

⁸ Jesús psë'le'e Pedro len Juan, gudxe leke: —Gultzajpa'a kieeru xhtzë' ki Pascua.

⁹ Leke gulunaab'de le': —¿Gaxh re'en'du tzajpa'a'tu ley?

¹⁰ Jesús bubi'e diidza: —Kati tzaaz'li lu yëdz, udzaag'li'ne tue' bënni nue'e tu rë'ë nis gultziaj'leene naar gdxin'li yu'u ga tzaazie,

¹¹ len gie'li'ne bënni xaani yu'u ni: “Bënni Useed rnaabe: ¿Gaxh de latj ga gagu'leen'ka'ne bënni useed kia' xhtzë' ki Pascua?”

¹² Le' glui'de lbi'ili lu yu'u zua xhtza' tu latj xhën le chi naba'a naar tzu'u xhtzë'. Gulupa'a ni' le nayaadzji.

¹³ Leke yajake len yajxaka'ke ka'teez gudxe leke Jesús len gulupa'a'ke xhtzë' ki Pascua.

¹⁴ Kati chi rala tzu'u xhtzë', Jesús len bënni gbaaz kie' gulabë'ke ga rala la'we.

¹⁵ Jesús gudxe leke: —¡Chi gze'tzka'laadxa'a zua'leena lbi'ili lu xhtzë' ki Pascua ni, chi nak'r ka si'a yëla gut!

¹⁶ Koma rgixhji'da lbi'ili ki tir guuna lni ni, nakati gak'r lu yëla rnabe' kie' Dios.

¹⁷ Na'ar gde'le'e lu ne'e xhiiga len gdëëd be'e yëla dexhken Dios, gne': —Gulgia'aj len Gulunëëdzj ki lza'a'li;

¹⁸ koma rgixhji'da lbi'ili ki tir gi'i'ja nup uva ni, nakati giid'r yëla rnabe' kie' Dios.

¹⁹ Gdëëd ni gde'le'e yët'xhtiil, len gdëëd be'e yëla dexhken Dios bxhuuxhje len bnëëdzje kieke, gne': —Le ni nak xhpeela'a, le rnëëdzja lu yëla gut nia'a kieeli. Gulgun ki naar tzajnei'li neda.

²⁰ Lekz'ka' beene len xhiiga'a, gdëëd gla'we xhtzë', gne': —Xhiiga ni nak diidza kub le rxënalaadxi'li ati len rën kia' rzi'luna'a, le glaalja nia'a kieeli.

²¹ Ati na'a bënni'a rala gdëëde neda lu naa'ke bunach, zue' ni ga rbë'ru raag'ru.

²² Koma Le' Xi'ine Bënni chi nak ka rala gak kie', san ¡bayechi nake bënni'a gdëëde le' lu naa'ke bunach!

²³ Na' gulazulau'ke tunaabi lza'a'ke nuxh'lke ludëëde le' lu naak bunach.

¿Nuxh nak'r blou?

²⁴ Bënni useed guladil'e diidza ki nuxh'lke rala gak're bënni blou.

²⁵ Jesús gudxe leke: «Ladj'ke bënni yëdz yubl, bënni tunabe'ke tusaka'zi'ke bënni laadz'ke ka tanaaz kieke, len zala tusaka'ke ka' leke, rzi' lake bënni rak'len bunach.

²⁶ San lbi'ili ti rala gak'li bënni ka', bënni nake blou ladj'li rala guune kuine ka bënni ti nake blou len bënni rnabe'e rala guune kuine ka bënni ruune dxin ki lze'e.

²⁷ ¿Nuxh nak'r blou, bënni rbë'e ga raag'ru u bënni rge'e la'wa'gu ni? ¿Naru keg bënni'a rbë'e ra'we nak're blou? San neda zua'leena lbi'ili ka bënni'a rge'e la'wa'gu.

²⁸ »Lbi'ili chi gzua'tekz'li len neda lu bagi'i kia' le gdëëda.

²⁹ Lena'a lbi'ili wap'li tu latj ga gnabe'li lu yëla rnabe' kia', ka Xuuza beene len neda,

³⁰ len lbi'ili gia'aj'gagu'leen'li neda lu yëla rnabe' kia' len kë'li xhlatj'li blou ki kchuug'be'li ki chin'nu kë'ke xi'in'xhzue' Israel.»

Jesús rgixhjë'e ki Pedro ti si'lu'ne'e ki numbe'e Le'

³¹ Gne' lekz'ka' Xan'ru: —Simón, Simón, Bënni Xëwi chi bnaabe lbi'ili ki kuiibe lbi'ili ka tabiibe xhua'xhtiil;

³² san neda chi gutayua' kiu', naar ti gnitiu' yëla rajle' kiu'. Len kati chi bubi'ilaadxu'u, guk'leen'ke bunach tayajle'ke lakua'ke tzutzu.

³³ Simón gudxe le': —Xan, neda zua si'na sa'leena li' liidx'gia, len lekz'ka' gat'leena li'.

³⁴ Jesús bubi'e diidza: —Pedro, rea' li' ki na'dza kati zia'a këëdx'ba xi'in'druuz, tson lzu ti si'luno'u ki numbe'u neda.

Za' ga'la gdxin dza ba'zi'

³⁵ Jesús bnaab'de leke: —Kati psë'la'a lbi'ili len ti bia'li dumi, ti bia'li le gia'aj'gaag'li, ti bia'li ye tu kë' lëël'li, ¿Ba byaadzji bi byaadzji kieeli? Leke gulubi'i'ke diidza: —Tibi byaadzji.

³⁶ Na' gudxe leke: —Na'a, bënni de kie' dumi rala tzajxhi'e, lekz'ka' le gia'aj'gaag'li; len bënni ti de kie' gia'tuchi, tzajweti'e xhe' len si'e kie' tu.

³⁷ Koma rgixhji'da lbi'ili ki rala gak kia' ka'teez nayoj lu Diidza La'ay: “Gulusake'e le' ka tusaka'ke bënni dula” Koma yugute' le nayoj kia' de ki lakgak.

³⁸ Leke gulanake: —Xan, ni de chop gia'tuchi. Len le' bubi'e diidza: —Guluzuadxi tir gui'li diidza.

Jesús rui'leene diidza Dios

³⁹ Gdëëd ni Jesús gze'e ka chi naleeb'de ziije Gia'a ki Olivos; len bënni useed kie' zjak'leene le'.

⁴⁰ Kati guladxiine ni', gudxe leke: —Gulgui'leene diidza Dios, naar ku gbixh'li lu dula.

⁴¹ Le' gze'e ye lati ga nakua'ke'a ka tzka rdxin tu giaj kati taru'u'ne len bzechu xhiibe naar gui'leene diidza Dios.

⁴² Gne': «Xuuza, xhki re'en'du buslá neda lu yëla rsaka'zi' ni; san ti gak ka ryaazlaadxa'a neda gak ka ryaazlaadxu'u li'.»

⁴³ Na' blui' lau'e tue' gbaaz la'ay ki yewayuba, naar ktipe'laadxe'e.

⁴⁴ Lu yëla rsaka'zi' kie', Jesús rui'leene diidza Dios gdu ikj'laadxi'dau'e, len nis yës kie' le glëxhj lyu gulana' ka rna' rën.

⁴⁵ Kati buudx be'leene diidza Dios, gyiije ga nakua'ke bënni useed kie' len budzëël'de leke tas'ke, tzka yëla ruwi'i'ni kieke.

⁴⁶ Gudxe leke: —¿Bixhkia' ras'li? Gultzas len gulgui'leene diidza Dios naar ku gbixh'li lu dula.

Tazëëne Jesús

⁴⁷ Ni zue' rue'e diidza Jesús, kati guladxiine bunach zian, ati Judas, tue' kieke chin'nu'ke bënni useed kie' Jesús, ziije na'nëëre lau'ke, le' gbiige'e ga zue' Jesús len gda'we bxhidu xage'e,

⁴⁸ ati Jesús gudxe le': —Judas, ¿Naru len tu bxhidu rdëëdu'ne Xi'ine Bënni lu naa'ke bunach?

⁴⁹ Bënni nakua'ke len Jesús kati gulale'i'de le rak gulunaab'de le': —Xan, ¿Udia'tu len gia'tuchi?

⁵⁰ Len tue' bënni useed beende zi' bënni wendxin kie' pxuuz blou, pchuuge gid'naage

⁵¹ Jesús gne': —Gulusan'ke; chi guk. Len gdaane gid'naage bënni wendxin'a len buune le'.

⁵² Gdëëd ni gudxe bënni tunabe'i'de pxuuz len bënni nakua'ke lau'i gdou' len bënni guul tuzeajni'i'de, bënni'a za'ke zduxi'ke le': —¿Bixhkia' za'li nua'li gia'tuchi len yaag, ka'kz ka naka bënni gban run'li kia'?

⁵³ Yugu dza chi gzua' len lbi'ili lu gdou' len ti gxhën'li neda. San na'a nak dza kieeli, dza kati rnabe' le nak kie' bënni xëwi.

Pedro ti rzi'lu'ne'e ki numbe'e Jesús

⁵⁴ Gulazëëne Jesús len guluche'e le' liidxe pxuuz blou. Pedro ziaj'leene le' zitu zitu.

⁵⁵ Ni', gatzj'lau'i lachi'a gulabekie gi' len gulabë'ke ra gi'; len Pedro grë'e lekz'ka' ladj'ke'a.

⁵⁶ Na' tuubi bi nguul wendxin, kati ble'i'bi'ne rë'e ra gi'a, byu'tzkabi'ne len gna'bi: —Bënni ni lekz'ka' bdzaage Jesús.

⁵⁷ Ati Pedro ti gxhi'lu'ne'e len gne': Nguul, neda ti numbe'a'ne bënni'a.

⁵⁸ Guk tuchi'i bënni yubl ble'i'de le' len gne': —Li' lekz'ka' naku bënni lza'a'ke. Pedro bubi'e diidza: —Bënni ti nak ka.

⁵⁹ Ye tuchi'i ka gdëëd len ye tue' gne': —Le nak'te bënni ni lekz'ka' bdzaage Jesús. Koma nake bënni yëdz Galilea.

⁶⁰ Pedro gne': —Bënni, ti nëëz'da bixh diidza ru'u. Na'teez, tzal ni rue'e diidza Pedro grëëdx'ba xi'in'druuz.

⁶¹ Na' Xan'ru bueikje len byue' Pedro, len Pedro gyajnei'de le gudxe le' Xan'ru: «Na'dza kati zia'a këëdx'ba xi'in'druuz, tson lzu ti si' lu no'u ki numbe'u neda.»

⁶² Len Pedro burooje ni' len rënkz grëëdxe.

Tutitj'de Jesús

⁶³ Bënni nakua'ke tun'chi'ke Jesús tutitj'de le' len tagiine le'.

⁶⁴ Gulusiaj'ke lau'e len tunaab'de le': —¡Gneya'atzka nuxha' bet li'!

⁶⁵ Len guluza'guludxie diidza gle' le'.

Jesús rdxiine lau'ke bënni blou

⁶⁶ Kati chi gyeni, guludzaage bënni guul tuzeajni'i'de, bënni tunabe'i'de pxuuz len bënni useed xhba kie' Dios len guluche'e Jesús lau'ke bënni tabeki'xhbei'de lu gdou'. Ni' gulunaab'de le'.

⁶⁷ —Xhki li' naku le' Cristo gdixhji'i netu. —Le' bubi'e diidza: —Xhki si' lu na'a ti tzajle'li neda.

⁶⁸ Len xhki bi gnaab'da lbi'ili ti ubi'i'li diidza.

⁶⁹ Ati na'a sulau'e le' Xi'ine Bënni kë'e kuiti le'e yubeel kie' Dios nape gdu yëla wak.

⁷⁰ Chi nak ka gulunaab'de le': —¿Ati li'a naku le' Xi'ine Dios? Jesús bubi'e diidza: Kuin'kz'li chi gnaali ki leel naka.

⁷¹ Na' leke gulanake: —Tir nayaadzji'ru nu bi gna, kuin'kz'ru chi byëëni'ru diidza broj rue'e.