Lucas 20 - Porciones en Zapoteco de las Delicias

Yëla rnabe' kie' Jesús

¹ Tu dza, tzal Jesús zue' lu gdou' rseed'de bunach len rgixhji'de leke diidza kub dxia'a, guladxiine bënni'a tunabe'i'de pxuuz len bënni useed xhba kie' Dios, nadzaag'ke bënni guul tuzeajni'i'de,

² len gle'ke le': —¿Len bixh yëla rnabe' ruunu le ni? ¿Nuxh nunn kiu' yëla rnabe' ni?

³ Jesús bubi'e diidza: —Lekz'ka' neda unaab'da lbi'ili, gulubi'i kia' diidza:

⁴ ¿Nuxh psë'la le' Juan jkiile nis, Dios u bunach?

⁵ Larakz leke glun'ke diidza len tanáke: «Xhki gnaaru ki Dios psë'le'e le', gie'e ro'u: “¿Bixhkia' ti gyajle'li'ne?”

⁶ Len xhki gnaaru ki bunach gulusë'le'e le' bunach uludëëd'de ro'u tzka'ti'ga lulaadxi'ke ro'u giaj, koma nëëzi'kde ki Juan be'e diidza ulaaz kie' Dios.»

⁷ Lena'a gulubi'e diidza gle'ke le': ti nëëzi'tu nuxh psë'la le' Juan jkiile nis.

⁸ Na'ar Jesús gudxe leke: —Lekz'ka' neda ti kixhji'da lbi'ili len bixh yëla rnabe' ruuna le ni.

Diidza run lsaki'i kieke bënni xhe'e taaze uva

⁹ Gzulau'tie' Jesús blaabe kieke bunach tu diidza run lsaki'i: —Tue' bënni guuze uva layeel kie', len pka'ane lu naa'ke bënni luune dxin len gze'e ziije zitu.

¹⁰ Kati chi guluchiibe uva ni, psë'le'e ye tue' bënni wendxin kie' tzajnaabe le rala laaze ki le guluchiibe bënni'a glaaze uva ni; ati leke glutie' le' len gulusë'le'e le' kakz'ka.

¹¹ Na'ar bënni xaani layeel ni psë'le'e ye tue' bënni wendxin kie'; ati lekz'ka' gulutzag'yuudxe le' diidza len glutie' le' len gulusë'le'e le' kakz'ka.

¹² Psë'le'e bënni yubl, ati bënni'a glaaze uva ni lekz'ka' gluun'de le' zi' len gulubiije le' layeel'a.

¹³ »Na'ar bënni xaani layeel ni gne': “¿Bixh guuna?” Usë'la'ne bënni xi'ina nadxi'i'tzki'da'ne, naxhka lui'e le' yëla bala'an.

¹⁴ Len kati bënni'a glaaze uva ni gulale'i'de le', te' lza'a'ke: “Ni' ze'e bënni xi'ine bënni'a nake xaani layeel ni, guldá gdëëdi'ru'ne, naar gaki kieeru layeel kie' ni.”

¹⁵ Na' gulubiije le' layeel'a len guludëëd'de le'. »¿Ati bixh rsaka'ali lbi'ili guune bënni xaani layeel'a kieke?

¹⁶ Uyiije len gdëëd'de bënni'a glaaze uva ni len gnëëdzje layeel kie' lu naa'ke bënni yubl. Kati gulayëën'de le ni, gulanake: —¡Dios ti ksaane netu!

¹⁷ Ati Jesús byue' leke len gne': —¿Bixh re'e'ni gna' Diidza La'ay ni?: “Giaj'a ti gulayazlaadxi'ke bënni'a tuune yu'u na'a chi nak giaj blou.”

¹⁸ Nu'ti'teez nu gbixh lau'i giaj ni, watzj; len dëz kë' nu tzajbaaga ley giaj ni.

¹⁹ Bënni tunabe'i'de pxuuz len bënni useed xhba kie' Dios gle'en'de lazëëne Jesús na'teez, koma gulak'be'i'de ki len diidza run lsaki'i ni, gne' kieke. San glaadxi'de bunach nakua'k ni'.

Yëla rnaab ki laaz'sua'ke

²⁰ Gulusë'le'e bënni lauyuudxe Jesús, lun'ke lua' nak'ke bënni dxia'a, naar luune ga gne' Jesús diidza le ti layaazlaadxi'ke ki ludëëde le' lu ne'e bënni rnabe'i'de leke.

²¹ Bënni ni gulunaab'de Jesús: —Bënni Useed, nëëzi'tu ki le li' rnou' len le rseed'du nak dxia'a, len ti rbiaj'je'idu bunach. Li' rseed'du ka'teez nak nëëz kie' Dios.

²² ¿Ba nak dxia'a kiixhj'tu laaz'sua'tu kie' César u ti nak?

²³ Jesús, guk'be'i'de ki yu'u xhe'e ikj'lau'ke len gudxe leke:

²⁴ —Gulului'i'tzki neda tu dumi kieeli. ¿Nuxh lau'rui'i da' ni len nuxh lei' nayoj ni? Leke gle'ke le': —Kie' César.

²⁵ Jesús re' leke: —Gulunëëdzj kie' César le nak kie' César, len gulunëëdzj kie' Dios le nak kie' Dios.

²⁶ Len ki dera le gne' Jesús ti guladzëël'de diidza ku layaazlaadxi'ke ki lazëëne le', na' gulubaan'de ka rubi'e diidza len tirbi gle'ke le'.

Tunaabe xhki bënni nat tubaane yëla gut

²⁷ Gdëëd'a la'ke bënni saduceos yajyu'ke Jesús. Bënni saduceos ni ti tayajle'ke ki bënni nat uluban'ke, lena'a gle'ke ki Jesús:

²⁸ —Bënni Useed, Moisés bzooje lu gich ki xhki nu bënni nutzag'ne'e gatie' len ti gulakua'bi bi kie' len nguul kie', bënni bë'chi' guulje rala si'e'nu ka nguul kie' nguul'a bugan'n uzeeb'nu naar gnëëdzje'bi bi kie', kie' bënni bë'che'e chi gutie'.

²⁹ Guk ki, gulakua'ke gaadx bë'chi'ke, bënni naguul ptzag'ne'e, ati gutie' len ti gulakua'bi bi kie'.

³⁰ Bënni burop

³¹ len bënni bunn gulakua'leene'nu len lekz'ka' bënni'a ye la'ke, ati gaadx'ke ka glatie' len nutunu bi kieke gulakua'bi.

³² Buudx'r na' gut'nu lekz'ka' nguul'a.

³³ Na' kati bënni nat lubaane lu yëla gut dza zia'a za', ¿Nuxh'lke gak nguul kie' nguul ni xhki gaadx'ke ka gulakua'leene'nu?

³⁴ Jesús bubi'e diidza: —Dza ni zuaaru na'a, bënni len nguul tutzag'naa'ke;

³⁵ san bënni'a kueki'xhbei'de kieke Dios ki luzi'ke xhbei yëla naban zia'a za' len lubaane, bënni u nguul tir lutzag'naa'ke,

³⁶ koma tir gunn lat'gake. Len ulak'ke ka gbaaz la'ay kie' Dios len lak'ke xi'ine Dios le chi gulubaane lu yëla gut.

³⁷ Kuin'kze Moisés, ga nayoj lu gich ki bezka raaxh gi', rlui'de ro'u ki bënni nat tuban'ke lu yëla gut. Na' rna ki Xan'ru nake Dios kie' Abraham kie' Isaac len kie' Jacob.

³⁸ ¡Len le' ti nake Dios kieke bënni nat, nake Dios kieke bënni ban, lau'e Le' yugute' bunach naban'gak!

³⁹ La'ke bënni useed xhba kie' Dios gle'ke le': —Ka'teez nak gnou', Bënni Useed.

⁴⁰ Len tirbi guluwaaxhj'de bi lunaab'de le'.

¿Nuxh xi'ini nake le' Cristo?

⁴¹ Jesús bnaab'de leke: —¿Bixhkia' rnaali ki le' Cristo nake xi'ine David?

⁴² Xhki kuin'kze David lu gich la'ay ki Salmo gne': “Xan'ru gudxe Xaana: Gri'i kuiti le'a yubeel,

⁴³ tzal Neda guuna ki bënni'a ti tale'i'de li' dxia'a lakua'ke xhni'u.”

⁴⁴ ¿Nakxh gunn gake le' Cristo xi'ine David, xhki kuin'kze David re' le' Xan?

Jesús ti ryaazlaadxe'e le tuune bënni useed xhba kie' Dios

⁴⁵ Yugute'ke bunach nakua'ke tuzenaage, len Jesús gudxe bënni useed kie':

⁴⁶ «Gulun'chi'i kuin'li kieke bënni useed xhba kie' Dios, koma tadaan'de ladáke len xha'ke tun len te'en'de nu ktzaag'lau leke len lazi'ke bala'an lu ye'i. Tagiilje labë'ke lau'it yu'u useed len labë'ke latj dxia'a'te ga ryu'u gwi'i'waagu;

⁴⁷ len taguáke le de kiek'nu nguul uzeeb, len xhtzei takua'ke tui'leene diidza Dios naar nutunu gak'be'i le tun'ke. Leke ulazi'ke yëla rsaka'zi'.»