Lucas 19 - Porciones en Zapoteco de las Delicias

Jesús len Zaqueo

¹ Jesús gyaazie yëdz Jericó len gzulau'e rde' lu yëdz ni.

² Na' gzue' tue' bënni le' Zaqueo len de'tzka kie' dumi, le' nake xan'ke bënni tukiixhj'ke laaz'sua'ke ki Roma.

³ Zaqueo re'en'de umbe'e Jesús len ti rde'li'de gle'i'de le' koma rë'tzka bunach, len le' nake bënni we'en'du.

⁴ Lena'a kxiti'e gnëëre, na' greene tu yaag xhën, ga'la'z ga rala tëëde Jesús, naar gde'li'de gle'i'de le'.

⁵ Kati Jesús gdëëde ni', byue' zga ra'al len gudxe le': —Zaqueo ziuub'zu bëtj, koma na'dza rala jga'ana liidxu.

⁶ Zaqueo ziuub'ze bëtje len gdu laadxe'e gxhi'e Jesús.

⁷ Kati gulale'i'de le guk ni, yugute'ke gulazulau'ke tanéke kie' Jesús, le zajga'ane liidxe tue' bënni dula.

⁸ Zaqueo gzui'de gudxe Xan'ru: —Xan, gatzj le de kia' gnëëdzja kieke bënni yechi len xhki nu bënni glaana le de kie', neda unëëdzja kie' ye tap ka.

⁹ Jesús gudxe le': —Na'dza bdxin yëla ruslá nu'yu'u ni, koma bënni ni lekz'ka' nake xi'in'xhzue' Abraham.

¹⁰ Koma Le' Xi'ine Bënni biide dudiilje len dusle' le chi na'nit.

Diidza le run lsaki'i ki dumi

¹¹ Bunach tayëën'de le rne' Jesús len blaabe tu diidza le run lsaki'i, le chi zue' ga'la'z ga de yëdz Jerusalén len leke taki'de ki yëla rnabe' kie' Dios chi zua'te glui' lau'i.

¹² Gudxe leke: «Gzue' tue' bënni blou, ziije zitu tu yëdz yubl, naar lui'e le' yëla rnabe' len chi nak ka wëëde.

¹³ Kati chi zua tziije bliidze chi'ke bënni wendxin kie', len be'e leke tu tue' zxhëni dumi len gudxe leke: “Gulugun dxin len dumi ni tzal neda wëëda”.

¹⁴ San bunach laadze'a talei'de le', len gulusë'la'ke gbaaz kieke ga ziije ki lanáke: “Ti re'eni'tu ki bënni ni gnabe'i'de netu”.

¹⁵ »Kati chi gxhi'lu'ne'e yëla rnabe' ni, budxiine laadze. Kati budxiine, psë'le'e nu tzajliidz leke bënni wendxin kie' bënni'a bnëëdzje kieke dumi, naar gnëëz'de gaka chi gluune ikji tu tue'.

¹⁶ Bënni zia'al bdxiine lau'e len gne': “Xan, dumi kiu' ni chi ben ikji ye chi kë' ka'”

¹⁷ Xaane'a bubi'e diidza: “Dxia'a'te beenu, naku tue' bënni wendxin tzawi, zala lati'iz gxhi'u naku kxënilaadxa'a li', lena'a guuna ga gnabe'u chi yëdz”.

¹⁸ Bdxiine lau'e ye tue' bënni wendxin kie' len re' le': “Xan, dumi kiu' ni chi ben ikji ye ga'yu' kë' ka'.”

¹⁹ Len lekz'ka' gudxe bënni ni: “Li gnabe'u ga'yu' yëdz”.

²⁰ »Ati bdxiine lau'e ye tue' len re' le': “Xan, ni de dumi kiu'. Ben'chi'a, ptul'da ley laari;

²¹ beena ki le guudxi'da li', koma naku tue' bënni bixhj, ki ruzi'u le ti nunëëdzju len rla'pu ga ti guuzu.”

²² Na'ar Xaane'a re' le': “Ti naku bënni wendxin dxia'a, nia'a ki diidza le buudx be'u ka' ksaka'a li'. Xhki nëëz'du ki naka bënni bixhj, ki ruzi'a le ti bnëëdzja len rla'pa ga ti guuza,

²³ ¿Bixhkia' ti yajlu'u dumi kia' ga rak'chi'i dumi, na'ar kati udxiina uzi'a ley gdu len ikji?”

²⁴ Len gudxe bënni'a nakua'ke na': “Gulkua dumi'a len gulunëëdzj kie' bënni'a beene ikji ye chi kë' ka dumi.”

²⁵ Gle'ke le': “Xan, ¡bënni'a chi de kie' chi kë' ka dumi!”

²⁶ Len Bënni rnabe' ni bubi'e diidza len gne': “Rgixhji'da lbi'ili ki bënni'a de kie', uzi're zxhëni; len bënni'a ti de kie', zala lati'du'z le de kie' ulaguáke.

²⁷ Ati bënni'a ti tale'i'de neda dxia'a len ti gle'en'de ki neda gnabe'a, gultzajxi'ke ni len guludëëd'de lau'a ni.”»

Jesús ryaazie Jerusalén

²⁸ Kati buudx gne' ki Jesús, bugie'le'e nëëz ziije yëdz Jerusalén.

²⁹ Kati chi bdxiine ga'la ga de yëdz Betfagé len Betania, kuiti Gia'a Ki Olivos, Jesús psë'le'e chope' bënni useed kie',

³⁰ len gudxe leke: —Gultziaj yëdz'du de ni', len kati gdxin'li ni' tzajxaka'li'ba tuuba burru naaga'ba, bua' ni nutunu rbii'ni leeba. Guluseedx'ba len gultzajxi'ba ni.

³¹ Len xhki nu gnaabi lbi'ili bixhkia' rseedx'li'ba, giek'li'ne ki Xan'ru ryaadzj'de'ba.

³² Bënni useed kie' yajake len yajxaka'ke ka'teez gudxe leke Jesús.

³³ Tzal tuseedxe'ba burru ni, bënni xama gulunaab'de leke: —¿Bixhkia' rseedx'li'ba?

³⁴ Leke gulanake: —Xan'ru nayaadzj'de'ba.

³⁵ Len guluxua'ke xha'ke kuudzu'ba, guluche'ke'ba ga zue' Jesús len gluune ga gdxie'ba.

³⁶ Ka ziije rdëëde Jesús, bunach tuchiilj'ke xha'ke la nëëz ga rala tëëde.

³⁷ Kati chi bdxiine ga'la ga zua ldinn ki Gia'a Ki Olivos, yugute'ke bënni zjak'leene le' gulazulau'ke tuskua'ke yëla rudziiji len tagu'e ba Dios ki dera yëla wak xhën le chi gulale'i'de.

³⁸ Len tanáke: —¡La'ay nake bënni rnabe' ni ze'e ulaaz kie' Xan'ru! ¡Yëla rë'dxi zua lu xhba len yëla ba yewayuba!

³⁹ Na' la'ke bënni fariseo nu'tza'ke ladj bunach zian'a gle'ke le': —Bënni Useed, gdil'leen'ke bënni'a zak'leene li'.

⁴⁰ Len Jesús re' leke: —Rgixhji'da lbi'ili ki xhki leke luzuadxi'ke lagu'e neda ba, yugu giaj uluskua'.

⁴¹ Kati bdxiine ga'la Jerusalén, len ble'i'de yëdz ni, Jesús grëëdxe ki,

⁴² len gne': «¡Nar'la na'dza li' tzajni'i'du le gun gunn kiu' yëla rë'dxi! San na'a nuka'chi' lau'i li' len ti runn gle'i'du.

⁴³ Len uladxin kiu' dza ti nakgak dxia'a, len bënni ti tale'i'de lbi'ili dxia'a ulun'ke tu zë'ë gdu ga zelau zuaali, ulagu'e lbi'ili li'aj, uladil'e len lbi'ili gati'il zua latj,

⁴⁴ len ulukin'je li' gdu ka naku. Uludëëd'de bënni yëdz kiu', len ti luka'ane tu giaj lau'i ye tu giaj, le ni gak koma ti guk'be'i'li kati Dios biide duyue' lbi'ili.»

Jesús rpe'e yu'u gdou'

⁴⁵ Gdëëd le ni, Jesús gyaazie lu gdou' len gzulau'e rubiije bënni'a tuti'i'ke ni,

⁴⁶ len gudxe leke: —Lu Diidza La'ay rna ki: “Liidxa gak tu yu'u ga bunach lui'leene diidza Dios”, ati lbi'ili chi nun'li ley tu latj ga tuka'chi' lau'ke bënni gban.

⁴⁷ Yugu dza Jesús rseed'de bunach lu gdou', len bënni nakua'ke lau'i kieke pxuuz, bënni useed xhba kie' Dios len lekz'ka' bënni nakua'ke lau'i yëdz tadáke tugiilje nakxh luune ludëëd'de le'.

⁴⁸ Ati ti tadzëël'de nakxh luune, koma yugute' bunach nakua'ke tuzenaage xhtiidze'e.