Lucas 17 - Porciones en Zapoteco de las Delicias

Banaadx le nuche' gbixh'ru lu dula

¹ Jesús gudxe bënni useed kie': «Ulakua'tekz le grixh le' bënni lu dula; san ¡bayechi nake bënni guune ga gbixe lu dula bënni yubl!

² Wak'l kie' dxia'a luuge'e yeene tu giaj gich len luzal'e le' lu nis xhën, ka guune ga labixe lu dula bënni'du ni.

³ ¡Gulun'chi'i kuin'li! »Xhki bënni bë'chu'u ruune dula, gdil'leene; ati xhki ktze'e ka këëze, gxhi'xhëëne.

⁴ Zala guune dula lau'u gaadx lzu tu dza, ati gaadx lzu ka gie' li': “tir gun'kza ka'”, gxhi'xhëëne.»

Yëla wak le nap yëla rajle'

⁵ Bënni gbaaz kie' Xan'ru gulunaab'de le': —Pxhën yëla rajle' kietu

⁶ Xan'ru bubi'e diidza: —Nar'la yëla rajle' kieeli nak ka tzka nak tu xhsei mostaza, gunn gie'li yaag ni; “Bleikj kuinu len yajzua kuinu lu nis xhën” len uzenaagi lbi'ili.

Le rala guune bënni wendxin

⁷ »Xhki lbi'ili zue' tue' bënni wendxin kieeli len kati rule'e gyiije gixi buudx bga'ane'ba beedx u buudx ben'chi'e'ba beedx, ¿Ba re'li'ne: “Gdëëd, gri'i gaagu”?

⁸ Ti nak ka', len re'li'ne: “Ben xhtzë' kia' len sua'kuasu ko'u lindu'a, na' uudx'a gunn gia'aj gaagu li'.”

⁹ Len keg rnëëdzje yëla dexhken kie' bënni wendxin kie'a le beene lea gnabe'i'de le'.

¹⁰ Lekz'ka' lbi'ili, kati chi uudx gun'li lea gnabe'i'de lbi'ili Dios, rala gnaali: “Nak'tu bënni wendxin ti zaki'i, koma le rala'z gun'tu ben'tu.”

Jesús ru'uune chi'ke bënni te'i'de we' nuudzu

¹¹ Tzal yu'e nëëz ziije Jerusalén, gdëëde Jesús ladj Samaria len Galilea.

¹² Len kati bdxiine tu yëdz'du, gularooje zajtzaag'ke le' chi'ke bënni te'i'de we' nuudzu, bënni ni zitu'z gulakua'ke

¹³ Len guluskua'ke: —¡Jesús, Bënni Useed, buechilaadxi'i netu!

¹⁴ Kati Jesús ble'i'de leke, gudxe leke: —Gultziaj lau'ke pxuuz blou. Len tzal zjake, buroj leke baya' ni.

¹⁵ Tue' bënni ni, kati ble'i'de chi bueake, bubi'e len zidzj këëdzu rgu'u'tzke ba Dios,

¹⁶ Len bzechu'xhiibe lau'e Jesús len bzechu lyu't ikje rue'e yëla dexhken. Bënni ni nake bënni Samaria.

¹⁷ Jesús gne': —¿Naru keg chi'ke bënni'a buroj leke baya' ni? ¿Gaxh nakua'ke bënni'a ye ga'ke'a?

¹⁸ ¿Bixhkia' tuuze bënni zitu ni bubi'e rgu'e ba Dios?

¹⁹ Len gudxe bënni ni: —Gzui len buaj; koma yëla rajle' kiu' ben ga ueaku.

Nakxh gdxin yëla rnabe' kie' Dios

²⁰ Bënni fariseo gulunaab'de Jesús batxh gdxin yëla rnabe' kie' Dios, len le' bubi'e diidza: —Yëla rnabe' kie' Dios ti nak bach gle'i ley gdu yëdz'lyu.

²¹ Ti lanáke: “Ni zua”, u “Ni' zua”; koma yëla rnabe' kie' Dios chi zua len lbi'ili.

²² Len gudxe bënni useed kie': —Udxin dza kati lbi'ili gie'eni'li suáli zala tu dza'z len Xi'ine Bënni len ti gunn

²³ La'ke lanáke: “Ni zue'”, u “Ni' zue'”; san ti tziaj'li, len lekz'ka' ti tziaj'leenk'li'ne.

²⁴ Koma ka rak kati rep'yës le rgu'u yeni lu xhba le rgie'la' yeego len rëxhj'te gia'al, ka gak kati le' Xi'ine Bënni wëëde.

²⁵ San zia'a run bayuudx ktzaag'tzke len ti layaazlaadxi'ke le' bënni nakua'ke dza zuaaru na'a

²⁶ Ka guk dza kati gzue' Noé, lekz'ka' gak dza kati le' Xi'ine Bënni wëëde.

²⁷ Bunach glia'aj gla'we len gulutzag'naa'ke, nakati bdxin'r dza Noé gyaazie lu arka len bdxin giaj ziil ati yugute'ke glatie'.

²⁸ Lekz'ka' guk dza kati gzue' Lot: bunach glia'aj gla'we, gla'awe len gluti'e, glaaze len gluune yu'u;

²⁹ San kati Lot brooje lu yëdz Sodoma, glëxhj gi' lu xhba len yugute'ke glatie'.

³⁰ Ka gak dza kati le' Xi'ine Bënni wëëde.

³¹ »Kati gdxin dza'a, bënni ze' ikju'ul len le de kie' dzë'ë nu'yu'ul, ti wëtje tzajliije ley; len bënni yu'e dxin gixi ti wëëde liidxe.

³² Gultzajnei'nu nguul kie' Lot.

³³ Koma bënni re'en'de usle' yëla naban kie', unitie' ley; san bënni gun'gu'un'de yëla naban kie', usle' ley.

³⁴ »Rea' lbi'ili ki chi'dzë'ël'a, kieke chope' bënni dzë'ë'kë tasie', tue' yude'le'e ati tue' jga'ane.

³⁵ Ki chopk'nu nguul dzë'ë'nu wetu, tuunu yude'la'nu ati tuunu jga'an'nu.»

³⁶ Kieke chop'ke bënni dzë'ë'ke dxin gixi; tue' yude'le'e ati tue' jga'ane.

³⁷ Na'ar gulunaab'de le' —¿Xan, gaxh lak le ni? Len le' bubi'e kieke diidza: —Ga de' bënni nat'a, na' luduub'ba laab.