Lucas 15 - Porciones en Zapoteco de las Delicias

Diidza run lsaki'i kieeba bëku'xhiila gnit'ba

¹ Yugute'ke bënni tukiixhj'ke laz sua'ke ki Roma len bënni ze xhtiidza'ke tuune le ku nak tabiiga'ke ga zue' Jesús, naar layëën'de le'

² Lena'a bënni Fariseos len bënni useed xhba kie' Dios tazi'kiidze'e le', gulanake: —Le' rzi'e bënni dula len raagu'leene leke.

³ Na' Jesús gudxe leke tu diidza run lsaki'i:

⁴ «¿Nuxh bënni, xhki nakua'ba kie' tu gayua'ba bëku'xhiila len rnit'ba tuuba, ti rka'ane'ba bua' tap'lalj'yu'chenu'ba lau'gixi len radiilje'ba bua'a gnit'ba, nakati udzëëlr'de'ba?

⁵ Len kati rudzëël'de'ba, rudziiji'tzki'de rxue'ba ye'xhikj'e,

⁶ len kati rudxiine liidxe rliidze bënni rdzaage dxia'a len bënni nakua'ke ga'la ga zue' len re' leke: “Guludziiji len neda, koma chi budzëël'da'ba bëku'xhiila kia' bua'a gnit'ba.”

⁷ Rea' lbi'ili ki lekz'ka' zua yëla rudziiji xhën yewayuba kati tue' bënni dula rubi'i'laadxe'e, ka kieke tap'lalj'yu'chenu'ke bënni tuune le nak dxia'a, len ti nayaadzji'kde lubi'i'laadxi'ke.

Diidza run lsaki'i kieenu nguul gnit xhdumi'nu

⁸ »¿U nuxh nguul xhki de kieenu chi dumi laz ati ruznit'nu tu, ti rkie'la'nu tu gi' len rlua'nu liidx'nu na' rugiilj'nu gaaz'ludzë' nakati udzëëlr?

⁹ Len kati chi budzëëli'nu ley rliidz'nu nguul rdzaag'nu dxia'a len nguul nakua'nu ga'la ga zuaanu, na' re'nu le'knu: “Guludziiji len neda, koma chi budzëël'da xhdumia' lea buznitia.”

¹⁰ Rea' lbi'ili lekz'ka' zua yëla rudziiji xhën ladj'ke gbaaz la'ay kie' Dios, kati tue' bënni dula rubi'i'laadxe'e.»

Diidza run lsaki'i kie' bënni'a gnit'bi bi kie'

¹¹ Jesús blaabe lekz'ka' le ni: «Tue' bënni nakua'bi chop'bi bi kie',

¹² len bi kuidi'l re'bi'ne xuuz'bi: “Xuuza, ben laaza le rala gaki kia'.” Na' xuuz'bi ben'gatzj'e le de kie' len be'ke'bi le rala laaz'kbi.

¹³ Gdëëd chop tson dza bi kuidi'l ni beti'i'bi le gula laaz'bi, len dumi ni gyaj'bi zitu, ye tu yëdz, ga ben'ditjiiz'bi ka xhdumi'bi len pche'bi tu yëla naban ku'kz nak.

¹⁴ San kati chi budu ben'ditjiiz'bi ka xhdumi'bi, gyu'u tu gbin xhën ki la'wa'gu lu yëdz ga rdaabi'a len gzulau'bi rdëëd'bi yëla rdun.

¹⁵ Yajnaab'bi dxin len tue' bënni zue' ga rdaabi'a, bënni ni psë'le'bi layeel kie' ga gun'chi'bi'ba kuch.

¹⁶ Len rze'tzka'laadxi'bi gaag'bi le taag'ba kuch ni ati nutunu rnëëdzj kieebi.

¹⁷ Na' bunni'bi ati gna'bi: “¡Balti'ke bënni wendxin nakua'ke liidxe xuuza nu gia'aj'gaagu nuune kieke, tzal neda ratia' yëla rdun!

¹⁸ Wëëja liidxe xuuza len gie'a'ne: Xuuza, chi beena dula lau'e Dios len lekz'ka' lau'u li';

¹⁹ neda tir naka bach si' la' bi kiu'; psaka neda ka tue' bënni wendxin kiu'.”

²⁰ Na' bugie'la'bi nëëz zuwaj'bi liidxe xuuz'bi. »Kati zia'a za'bi zitu, xuuz'bi ble'i'de'bi len buechilaadxe'bi. Pxiti'e yajdzaage'bi, buzi'e'bi, bniide'bi na' gda'we'bi bxhidu.

²¹ Bi'i ni re'bi'ne: “Xuuza, chi beena dula lau'e Dios len lekz'ka' lau'u li; neda tir naka bach si' la' bi kiu'”

²² San xuuz'bi gudxe bënni wendxin kie': “Gulkuiaj ka'teez zuaali laari dxia'a'te len gulugaku'bi ley; lekz'ka' gulku'u breegi gia xhbënni'na'bi len guluda' lëël'bi.

²³ Gultzajxi'ba beedx baadx'a len guludëëdi'ba. ¡Gun'ru lni len ku'u'ru gwi'i'waagu xhën!

²⁴ Koma bi kia' ni chik'z nat'bi len na'a chi bubaami; gnit'bi len na'a chi budzëëli'ru'bi.” Gulazulau'ke lni ni.

²⁵ »Tzal'za, bi bënni naguul yu'u'bi dxin gixi. Kati budxiimi ga'la ga zua liidx'bi, byëëni'bi yu'u'tzka wil len wa'a.

²⁶ Na' bliidz'bi'ne tue' bënni wendxin len bnaab'bi bixha rak.

²⁷ Bënni wendxin ni re'bi: “Bi bë'chu'u bula'bi; len xuuzu bnaabe gat'ba beedx baadx, koma budeli'de'bi dxia'a tzawi.”

²⁸ Ati tzka'ti'ga bdza'a'bi bi bënni naguul ni, ti gu'uni'bi yune'bi, lena'a xuuz'bi de ki brooje dujëtayui'de'bi naar yune'bi.

²⁹ Re'bi'ne xuuz'bi'a: “Li nëëz'du balti'i iz chi beena kiu' dxin, chi bzenaag'tekza, len gat'ga runn'du'ba kia' tuuba bëku'xhiila naar guuna tu xhwë len bënni rdzaag'ka'ne dxia'a.

³⁰ Len na'a budxiimi bi'i kiu' ni, bi'a chi ben'ditjiiz'bi ka' xhdumiu' len nguul gda'dzaag, len li' rdëëd'du'ba kieebi beedx baadx'a.”

³¹ »Xuuz'bi bubi'e diidza: “Xi'ina, li' zua'leen'tekzu neda, len yugute' le de kia' nak kiu'.

³² San rala gun'ru lni len gwi'i'waagu xhën len yudziiji'ru, koma bi bë'chu'u, chi nat'bi len bubaami; na'nit'bi len na'a chi budzëëli'ru'bi.”»