Lucas 12 - Porciones en Zapoteco de las Delicias

Jesús rseed'de kieke bënni'a nak'ke ka bënni nuda' blo'u

¹ Tzal'za guladzaag zian gayua' bunach, tzka'ti'ga bunach zian nak'ke tarëli'z lza'a'ke. Jesús gzulau'e gudxe zia'a bënni useed kie': «Gulun'chi'i kuin'li ki le rzaaxh leke bënni fariseo, le ni re'e'ni gna le nak'ke ka bënni nuda' blo'u.

² Gat'ga de le rak baga'chi'z ku gnëëz, len gat'ga de le naga'chi' ku gdxin glui' lau'i.

³ Lena'a yugute' le chi gnaali ga nak chul, uyën lau'i dza; len le gnaali ga naga'chi'tzka len ga nak yu'u yeij, udu'kz yëdz'lyu gnëëzi.

Nuxh rala gaadxi'ru

⁴ »Lbi'ili, bënni rdzaaga dxia'a, rgixhji'da lbi'ili ki ti rala gaadxi'li nu tudëëdi bunach, ati tëëd'a tirbi rak lun'ke

⁵ Neda kixhji'da lbi'ili nuxha' rala gaadxi'li: Gulgaadxi'de bënni'a uudx kue' yëla naban kieeli, nape yëla wak ku'e lbi'ili lu gi'gabil. Le' rala gaadxi'li'ne

⁶ »¿Naru keg ga'yu'ba bginn tuti'i'ke'ba ki chop dumi las'du? San keg tuuba nal'laadxe'e'ba Dios.

⁷ Le rak lbi'ili lekz'ka' tu tu gitza ikj'li le' nulaabe. Lena'a ti rala gaadxi'li: Lbi'ili zaki'i'rli ka ziank'ba bginn'du.

Si'lunaa'ru naki'ru kie' Cristo lau'k bunach

⁸ »Rea' lbi'ili ki xhki nu rzi'lu'ne'i neda lau'k bunach, lekz'ka' le' Xi'ine Bënni uzi'lu'ne'e le' lau'ke gbaaz la'ay kie' Dios;

⁹ Ati bënni ti si'lu'ne'e neda lau'k bunach, lekz'ka' ti si'luna'a'ne lau'ke gbaaz la'ay kie' Dios.

¹⁰ »Dios uzi'xhëëne zala bënni bi gne' kie' le' Xi'ine Bënni; san ti si'xhëëne bënni bi gne' kie' Bë' la'ay kie'.

¹¹ »Kati luche'ke lbi'ili lu yu'u useed, lau'ke bënni tuchuug'be'e len lau'ke bënni tunabe'ke, ti suáli bagi'i nakxh gun'li uzi'li kuin'li u bixh gnaali,

¹² Koma kati gdxin dza rala gneeli, le' Bë' La'ay kie' Dios gzeajni'i'de lbi'ili le gnaali.»

Banaadx le nuche' yëla tzawi ki yëdz'lyu ni

¹³ Tue' bënni ze' ladj bunach'a gudxe Jesús: —Bënni useed, gudxe bënni bë'cha'a gunne laaza le rala gaki kia'.

¹⁴ Ati Jesús bubi'e diidza: —Bë'cha'a, ¿Nuxh bzua neda kchuug'be'a len gun'gatzj'a le de kieeli?

¹⁵ Lekz'ka' gne': —Gulun'chi'i kuin'li ki yëla rzelaadxi'i dumi; koma ti ya'awi'ru yëla naban kieeru.

¹⁶ Na' blaabe kieke tu diidza run lsaki'i: «Gzue' tue' bënni de'tzka yëla tzawi kie', len zxhëni buzi'tzke lu xhyue'a.

¹⁷ Bënni ni gudxe ikj'laadxi'dau'e: “¿Bixh guuna? Ti zua ga gun'chi'a lea buzi'a lu xhyua' ni.”

¹⁸ Len gudxe kuine: “Chi nëëz'da bixh guuna. Jkin'jka liidx yëëz kia' len un'ka ley le xhën, naar gun'chi'a gdu lea buzi'a len gdu le de kia'.

¹⁹ Chi nak ka gie'a ikj'laadxi'dau'a: ki zian iz chi nun'chi'tzku; bueak'laadxu'u, gwi'i, gdaagu, buzi'xhbei yëla naban kiu'.”

²⁰ Ati Dios gudxe le': “Bënni ti nayajni'i, na'dzë' gatiu' len yugute' le chi nun'chi'u, ¿Nuxh ki gaki?”

²¹ Ka rak kie' bënni'a rkudi'i'ze kie' yëla tzawi, san lau'e Dios ti lzaki'de.»

Dios run'chi'e bënni xi'ine

²² Buudx'a gudxe bënni useed kie': «Le ni rea' lbi'ili: Ti suáli bagi'i bixh gia'aj'gaag'li tzal suáli yëdz'lyu, ti suáli bagi'i bixh laari gaku'li.

²³ Yëla naban kieeli zaki'i'r ka le gia'aj'gaag'li len zaki'i'r xhpeela'li ka laari raku'li.

²⁴ Guluyu'tzka'ba beikj: ti taaz'ba len ti talap'ba, tibi liidx yëëz len keg bi da'a xhua zua kiek'ba, san Dios rga'we'ba. ¡Gakati zaki'i'rli lbi'ili ka yugu bua' tazuuba!

²⁵ Len zala gakati kë'li bagi'i, ¿Naru gunn kxhën'li ye tu dza tzka za'li yëdz'lyu?

²⁶ Len xhki ti runn gun'li le ni, nak'te lati'iz, ¿Bixhkia' rbë'li bagi'i ki le ti nak lzaka'?

²⁷ »Guluyu' ka taxhën yaj: ti tunn dxin len ti taab yeel. San, rea' lbi'ili ki Salomón nak'te gu'ta'tzka bi gu'ta kie', ti benn'kz gne'e ka tana' yugu yaj'a.

²⁸ Xhki Dios ruune ga tana' ka' yaj'a rë' lau'gixi len ru'ueikj dza'a ryeegi, ¡naxh'gaar guune kieeli, lbi'ili bënni nayaadzji'li yëla rajle'!

²⁹ Len ti suáli bagi'i, kiilj'tekz'li le gia'aj'gaag'li.

³⁰ Koma yugute' le ni tabë'ke bagi'i bënni yëdz'lyu ni, san lbi'ili zue' Xuuz'li chi nëëz'de ki nayaadzji'li ley.

³¹ Gulugi'i le nak ki yëla rnabe' kie' Dios, len le' gdxia'gbeedxe kieeli yugute' le ni.

Yëla tzawi ki yewayuba

³² »Ti gaadxi'li bëku'xhiila'du kia', lati'iz'li nak'li, san Le' Xuuz'li lu yëla rak'len kie' bdzag'laadxe'e gunne kieeli yëla rnabe' kie'.

³³ Gulgu'ti' le de kieeli len gulunëëdzj kieke bënni nayaadzji'kde; gulgun bayuudx ga ga'ta kieeli yëla tzawi ki yewayuba le ti yu'u lu'uudx ki, len gulun'chi'i ga ti gak'ditji'kz, ga bënni gban ti gunn tzaazie len ga ti kë'ba be.

³⁴ Koma ga zua yëla tzawi kieeli, na' sua lekz'ka' laadxi'dau'li.

Rala suáru si'na

^35-36 »Gulgak ka bënni wendxin tabëëze yudxiine bënni xan'ke ziije gwi'i'waagu ki utzag'na', nakua'ke si'na len nugala'az'ke gi' ati nakua'kuase lusaalje yu'u ka yudxin'ze bënni ni.

³⁷ Bixhgaba'ke bënni wendxin'a bënni'a kati udxiine bënni xan'ke udzëël'de leke tana'ze. Le nak'te rea' lbi'ili ki bënni xan'ke ni guune ga labë'ke len sulau'e ke'e lindu'ke.

³⁸ Bixhgaba'ke, xhki yudzëël'de leke tana'ze zala yudxiine laadxi'yeel u ziil'bal.

³⁹ Le ni rala gnëëzi'li: nar'la bënni xaani yu'u nëëz'de batxh'tek giide bënni gban, ti gui'e latj nu tzaaz liidxe kuan le de kie'.

⁴⁰ Lbi'ili lekz'ka' gulsua si'na; koma kati nutunu nun'kz le' lëëz le' Xi'ine Bënni wëëde.»

Bënni wendxin nake kxënilaadxi'ru'ne len bënni ti nake kxënilaadxi'ru'ne

⁴¹ Pedro bnaab'de le': —Xan, ¿Diidza run lsaki'i ni gnou' kietu'z, u lekz'ka' kieke yugute'ke?

⁴² Gne' Xan'ru: «¿Gaxh zue' bënni'a run'chi'e yëla tzawi len nake nu kxënilaadxi'i le' len rui'laadxe'e kati bënni xaane rka'ane lu ne'e bënni nakua'ke liidxe, naar gnëëdzje le la'we kati rala la'we?

⁴³ Bixhgabe' bënni wendxin'a kati yudxiine bënni xaane len udzëël'de le' ruune yugute' le rala guune.

⁴⁴ Blikz'da rnia' ka' ki bënni xaane'a uzue' le' gun'chi'e zura yëla tzawi kie'.

⁴⁵ San xhki bënni wendxin ni, guuni le' ki bënni xaane'a rdzeir'de yudxiine len sulau'e ksaka'dë'e ye la'ke bënni wendxin'a len rbë'e ria'aj'ra'we len rsuudxi kuine,

⁴⁶ dza kati ti nun'kze le' lëëz len kati ti nëëz'de, udxiine bënni xaane'a len ksaka'zi'e le', kchuug'be'e kie' ktzaage ka tutzaage bënni dula.

⁴⁷ »Bënni wendxin bënni'a nëëz'de bixha re'en'de bënni xaane, san ti zue' si'na len ti rzenaage ulusaka'zi'e le' len ulagiine zian lzu.

⁴⁸ San bënni wendxin bënni'a ti nëëz'de ruune le nak bach si'e yëla rsaka'zi', lati'iz lagiine le'. Bënni'a tui'ke le' zxhëni lez zxhëni ka' lunaab'de le', len bënni'a tuxëni'laadxe'e le' le nak zxhëni, zxhëni ka' luki'i'de le'.

Jesús ruune ga lu'la'a bunach

⁴⁹ »Neda za'a jkie'la'a gi' yëdz'lyu ni; len ¡Labi'ki'da chi raaxh gi' ni!

⁵⁰ Tu le barsaki rala si'be' neda, len ¡rtzaag'tzka tzal gdxin!

⁵¹ ¿Rsaka'ali lbi'ili za'a nua'a yëla rë'dxi ki yëdz'lyu ni? Rea' lbi'ili ti nak ka', za'a zdu'la'a lbi'ili.

⁵² Len na'a kie'la', koma ki tu yu'u, ga'yu'e lu'la'a lza'a'ke, tsone' ladil'e len ye chope', ati chope' ladil'e len ye tsone'.

⁵³ Bënni til'e len bi kie', len bi kie' til'bi len le', xhna'bi til'nu len bi nguul kieenu, len bi kieenu ni til'bi len lenu, nguul nutzag'na'nu til'nu len tau'nu, len tau'nu til'nu len lenu.»

Le runn'be' bixh gun tu tu dza

⁵⁴ Jesús lekz'ka' gudxe bunach: «kati lbi'ili rle'i'li tula' buaj zga ga rbia gbiidz rnaali waal giaj len raal giaj.

⁵⁵ Len kati rluub bë' za' dxi'il, rnaali ki wak tuxhla len rak tuxhla.

⁵⁶ ¡Nak'li ka bënni nuda' blo'u! Xhki rak'be'i'li nakxh rna' lu xhba len yëdz'lyu, ¿Koma ti rak'be'i'li bixh dza zuaali na'a?

Rala suáru lu yëla rë'dxi len bënni ku tale'i'de ro'u dxia'a

⁵⁷ »¿Bixhkia' ti rchuug'be'u kuin'kzu le nak dxia'a?

⁵⁸ Xhki nu bënni rajzue' li' yulau'i len riaj'leenu'ne lau'ke bënni tunabe'ke, ben lu bayuudx ga kueki'xhbei'li le ni tzal ni de latj, naar ti kche'e li' len bënni rchuug'be'e, xhki na'a, bënni'a rchuug'be'e ni udëëde li' lu naa'ke bënni tun'chi'ke liidx'gia, len bënni ni lagu'e li' liidx'gia.

⁵⁹ Rea' li' ki ti yurooju liidx'gia'a nakati kiixhjr'u zura dumi'a tzka rala gdxiu'.»