Lucas 10 - Porciones en Zapoteco de las Delicias

Jesús psë'le'e tson'lalj yu chin'nu'ke bënni

¹ Gdëëd le ni, le' Xan'ru grëe' lekz'ka' ye tson'lalj yu chin'nu'ke bënni len buznëëre leke chop ueaj'ke, yugute' yëdz len latj ga rala tziije.

² Gudxe leke: «Le nak'te rea' lbi'ili, zxhëni nak le rala uzi'ru ati lati'ize bënni wendxin nakua'ke. Lena'a, gulgatayue' bënni Xaani layeel'a, ksë'le'e bënni wendxin luzi'ke.

³ Gultziaj lbi'ili; guluyu'tzka rsë'la'a lbi'ili ka bëku'xhiila ladj'kba bëku'zuuga.

⁴ Ti gua'li dumi, ti gua'li le gia'aj'gaag'li ti gua'li ye tu kë' lëël'li; len ti se'teeli nu gui'leen'li diidza la nëëz.

⁵ Kati tzaaz'li tu yu'u gululiidz'ke zia'a, gnaali: “Yëla rë'dxi zua len lbi'ili.”

⁶ Len xhki ni' nakua'ke bënni nap'ke yëla rë'dxi, yëla rë'dxi rzelaadxi'li'a sua len leke; ati xhki ti nakua'ke, lbi'ili tibi gnit'li.

⁷ Na'z Guluga'an, len gulgia'aj'gaagu ledu deez kieke, koma bënni ruune dxin rala'kz si'e laaxhje. Ti taali yu'u yu'u.

⁸ Kati gdxin'li tu yëdz ga lazi'ke lbi'ili, gulgaagu le lunne kieeli;

⁹ Gulu'uune bënni we' nakua'ke ni', len gie'li'ne: “Yëla rnabe' kie' Dios chi bdxin len lbi'ili.”

¹⁰ Ati xhki gdxin'li tu yëdz len ti lazi'ke lbi'ili, guluroj la nëëz len gnaali:

¹¹ “¡Lekz'ka' bexhtë ki yëdz kieeli, le bia' ni'a'tu rbiib'tu, naar gak'be'i'li ki Dios ti ryaazlaadxe'e le run'li! San rala gnëëzi'li ki yëla rnabe' kie' Dios chi bdxin len lbi'ili.”

¹² Rea' lbi'ili ki uyali'ir yëla rsaka'zi' le lazi' yëdz ni, ka le lazi'ke bënni yëdz Sodoma.

Le lutzag yëdz ku tayajle'

¹³ »¡Bayechi nak kiu', yëdz Corazín! ¡Bayechi nak kiu', yëdz Betsaida! Nar'la lu yëdz Tiro len yëdz Sidón glakgak yëla wak le glak len lbi'ili, bat'te chi gulubi'i'laadxi'ke len Dios, lakue' ban'guch len labë'ke lu dë.

¹⁴ San kati gdxin dza kchuug'be'e Dios, yëla rsaka'zi' zi' kieeli uyali'ir ka kieke bënni yëdz Tiro len yëdz Sidón.

¹⁵ Len li' Cafarnaúm, ¿Ruuni li' ki chi bdxiinu yewayuba? ¡La zia'a tziaj'teezu lu gi'gabil!

¹⁶ »Bënni gzenaage lbi'ili, neda gzenaage; len bënni ti ryaazlaadxe'e lbi'ili neda ti ryaazlaadxe'e len bënni ti ryaazlaadxe'e neda, ti ryaazlaadxe'e nu nusë'la neda.»

Guludxiine bënni tson'lalj yu chin'nu'ke

¹⁷ Bënni tson'lalj yu chin'nu'ke tudziij'de kati guludxiine, tanáke: —¡Xan, bë' xëwi tuzenaagi netu lu lou' li'!

¹⁸ Jesús gudxe leke: —Ka nak, neda ble'i'da'ne bënni xëwi rëxhje ka tu yës lu xhba.

¹⁹ Neda chi benna kieeli yëla rnabe' naar gliaj'gliib'li'ba bel' len xhajnë', len naar kxikji'li yëla rnabe' kie' bënni xëwi, len tibi gak kieeli.

²⁰ Ati ti udziiji'li ki bë' xëwi tuzenaagi lbi'ili, guludziiji ki laali nayoj yewayuba.

Tuuze Xi'ine nëëz'de nuxh nak Xuuze

²¹ Na'teez, Jesús, nadze'iz'de yëla rudziiji kie' Bë' La'ay kie' Dios, gne': «Rgu'a li' ba Xuuza, Xaani yëdz'lyu len yewayuba, koma blui'kdu'ne bënni nëxhj'laadxi le pka'chu'u kieke bënni nayajni'i. Ka nak Xuuza, koma ka gyaazlaadxu'u li'.

²² »Xuuza chi bdëëde lu na'a yugute'. Len nutunu numbe' Le' Xi'ine Dios tuuze Le' Xuuze; len nutunu numbe' Le' Xuuze tuuze Le' Xi'ine Dios, len lekz'ka' bënni'a Le' Xi'ine Dios re'en'de lumbe'ke Le' Xuuze.»

²³ Bueikje ga zeke bënni useed kie', len gudxe leke: «Bixhgaba'ke bënni lale'i'de le rle'i'li lbi'ili;

²⁴ koma rea' lbi'ili ki zian'ke bënni glui'ke diidza ulaaz kie' Dios len bënni gulunabe'ke gle'en'de lale'i'de le lbi'ili rle'i'li len ti gulale'i'de; gle'en'de layëën'de le ryëëni'li lbi'ili len ti gulayëën'de.»

Diidza le run lsaki'i kie' bënni yëdz Samaria

²⁵ Tue' bënni useed xhba kie' Dios yaje'leene diidza Jesús, tzal gunn si'be'e le' bnaabe: —Bënni useed, ¿Bixh rala guuna ki gde'li'da yëla naban tzalzu?

²⁶ Jesús bubi'e diidza: —¿Bixh nayoj lu xhba kie' Dios? ¿Nakxh rajni'i'du?

²⁷ Bënni useed xhba kie' Dios bubi'e diidza: —“Bdxi'i'de Xaanu Dios gdu laadxi'dau'u, gdu laadxu'u, gdu gan kiu', gdu ikj'lau'u”; “len bdxi'i'de bënni bë'chi' lzo'u ka nadxi'i'du kuinu.”

²⁸ Jesús gudxe le': —Ka nak bubi'u diidza. Xhki li' guunu ki wa'ta kiu' yëla naban tzalzu.

²⁹ Ati bënni useed xhba kie' Dios gu'un'de jga'ane dxia'a lau'e Jesús, len gudxe le': —¿Ati nuxh rak bë'chi' lza'a?

³⁰ Jesús bubi'e kie' diidza: —Tue' bënni yu'e nëëz Jerusalén le ziaj Jericó, len bënni gban gulazëëne le', gulaguáke xhe'; gluun'de le' zi' len guluze'e, raki'kz gatie' kati guluka'ane le'.

³¹ Leka'al, tue' pxuuz gdëëde larakz nëëz'a; kati ble'i'de le' ga yubl yajtëëde.

³² Lekz'ka' tue' bënni xi'in'xhzue' Leví bënni ruune dxin lu gdou' bdxiine ni, len kati ble'i'de le' ga yubl yajtëëde.

³³ San tue' bënni yëdz Samaria ziije larakz nëëz'a, kati ble'i'de le', buechilaadxe'e le'.

³⁴ Gbiige'e ga de' glu'e lu we' za len nup uva, len pchël'de ley laari. Na' breene le' kuudzu'ba xhpue'e, len pche'e le' yu'u ga taga'ane bënni dzë'ë'ke nëëz len ben'chi'e le'.

³⁵ Bueikj dza'a bënni yëdz Samaria ni gliije tzka nak laaxhje ki chop dza len bnëëdzje len bënni xaani yu'u ni len gudxe le': “Ben'chi'e bënni ni, len xhki ktë'u ye lati na' kati yudëëda kiixhja kiu'.”

³⁶ ¿Nuxh'lke bënni tsone' ni guke bënni bë'chi' lze'e kie' bënni'a gulabaane le'?

³⁷ Bënni useed ki xhba kie' Dios bubi'e diidza: —Bënni'a buechilaadxe'e le'. Jesús gudxe le': —Gyaj len lekz'ka' yajen li'.

Jesús riije liidx'nu Marta len María

³⁸ Jesús bugie'le'e nëëz len bdxiine tu yëdz we'en, ga tuunu nguul lenu Marta bnëëdzj'nu ga gasie'.

³⁹ Marta zuaanu nguul xhiil'nu lenu María, nguul ni grë'nu xhni'e Jesús naar gyëëni'nu xhtiidze'e.

⁴⁰ Ati Marta, nugi'i'tzki'nu len ye lak dxin, gbiiga'nu ga zue' Jesús len re'nu'ne: —Xan ¿Naru tibi ruuni li' ki nguul xhiil'a ni rka'an'nu neda tuuza ruuna dxin? Guudx'nu gak'leen'nu neda.

⁴¹ Ati Jesús bubi'e diidza: —Marta, Marta, ru'ubi'rugi'i'tzki'du ki dxin'a,

⁴² san tuuz nak le run'r bayuudx. María gxhi'nu kieenu le nak'r dxia'a, len nutunu gunn kua.