Lucas 1 - Porciones en Zapoteco de las Delicias

Diidza bzooje Lucas kie' Teófilo

¹ Ziaane chi gulazu'gulabë'e luzooje ka'teez guk le Dios chi beene len ro'u,

² ka'teez gulagixhji'de ro'u bënni gulale'i'de ka guk kati gzulau len guluzua'ke lu naa'ke lagixhjë'ke diidza ni.

³ Lekz'ka' neda chi bubë'bugiilja gaazludzë' ka gzulau len ben bayuudx bukua'a ba'a na'ar gzooja kiu' Teófilo le naku bënni blou,

⁴ na'ar gnëëz'du dxia'a yëla li le chi guluseed'de li'.

Gbaaz La'ay kie' Dios rgixhjë'e ki gaalje Juan

⁵ Dza kati gnabe'e Herodes lu yëdz kieke bënni Judea, gzue' tue' pxuuz gxhi' le' Zacarías, le' nake tza'xhën len pxuuz bënni za'ke dia'dza kie' Abías. Nguul kie' le'nu Elisabet, za'nu dia'dza kie' Aarón.

⁶ Grop'te'ke glake bënni dxia'a lau'e Dios len guluzenaag'ke ka'teez rna xhba kie' Xan'ru, ti benn nu bi gna kieke.

⁷ San ti nakua'bi bi kieke koma Elisabet guk'nu nguul wëëdx len grop'te'ke chi nak'ke bënni guul.

⁸ Tu dza bënni nak'ke tza'xhën len pxuuz Zacarías, gla'la'ke lakua'ke lau'e Dios,

⁹ len ka chi gulaleeb'de tuune pxuuz ni, gula laaze Zacarías tzaazie latj la'ay ki gdou' kie' Xan'ru na'ar gzegie yaal.

¹⁰ Tzal ryeegi yaal ni, gdu yëdz nakua'ke rayu'u tui'leene diidza Dios.

¹¹ Len ni' blui'lau'e gbaaz La'ay kie' Xan'ru ga zue' Zacarías, latj yubeel ki pkuugu ki yaal.

¹² Kati ble'i'de gbaaz La'ay ni, Zacarías bubaan'de len guudxi'tzki'de.

¹³ Ati Gbaaz La'ay ni gne': —Zacarías, ti gaadx'du, koma Dios chi byëën'de le rnaab'du'ne ati nguul kiu' Elisabet gunn'nu'bi kiu' tuubi bi'dau', bi gzu laabi Juan.

¹⁴ Gdze'iz li' yëla ruzakalaadxi'i, len zian'ke ludziij'de le gaalj'bi,

¹⁵ koma bi kiu' ni wak'bi xhën lau'e Xan'ru. Ti gia'aj'bi nup uva lekz'ka' ti gia'aj'bi le rzuudxi bunach len kati zia'a gaalj'bi udze'iz leebi Bë' La'ay kie' Dios.

¹⁶ Guune ga bunach zian ki yëdz Israel lubi'i'laadxi'ke len Xan'ke Dios.

¹⁷ Le' Juan ni tziije lau'e Xan'ru su'këëze ka glëëze Elías len gape yëla wak ka gdape Elias, bënni be'e diidza ulaaz kie' Dios, naar ludzaag'ke dxia'a xuuz'ke len bi kieke, ati nu ku tabëëz dxia'a luseed luzenaag. Ki' guune upe'e yëdz na'ar lazi'ke Xan'ru.

¹⁸ —Zacarías bnaab'de gbaaz La'ay ni: —¿Nakxh guuna gnëëz'da ki wak'z le ni? Koma neda len nguul kia' chi nak'tu bënni guul.

¹⁹ Gbaaz La'ay ni bubi'e diidza: —Neda naka Gabriel, len ruuna xhchiine Dios; le' psë'le'e neda gui'leena li' diidza len kixhji'da li' diidza dxia'a ni.

²⁰ San na'a, le ti gyajle'u le chi guudxa li', tir gak gui'u diidza nakati gdxin'r dza gak yugute' le ni.

²¹ Tzal rue'e diidza gbaaz La'ay len Zacarías, bunach nakua'ke rayu'u tabëëze le' len tunaabi lza'a'ke bixhkia' rdzei'tzki'de urooje lu latj la'ay.

²² Kati brooje, ti rak gui'e diidza; na' gulak'be'ide ki lu latj la'ay blui'de le' Dios le rala gak, run'z ni'a' ne'e rui'leene leke diidza, ki' gzue' ti guk gui'e diidza.

²³ Kati buudx beene dxin lu gdou', Zacarías zuwëëje liidxe.

²⁴ Na' buudx'a, nguul kie' Elisabet gzeenu zi'i, gdu ga'yu' beu' ti broj'nu liidx'nu, len gnaanu:

²⁵ «Na'a, Xan'ru beene ki' kia' naar bunach tir labiaj'je'i'de neda.»

Tue' Gbaaz La'ay rgixhjë'e gaalj'bi bi Jesús

²⁶ Kati guk xop beu' zeenu zi'i Elisabet, Dios psë'le'e Gbaaz La'ay Gabriel tu yëdz ki Galilea nazi' lei' Nazaret,

²⁷ ga zuaabi tuubi bi nguul raban'dou leebi María, chi nazi' lu naa'bi sua'leemi'ne tue' bënni le' José, xi'in'xhzue' David bënni gnabe'e.

²⁸ Gbaaz la'ay gyaazie ga zuaabi bi María len re'bi: —¡Padiuxh, Dios nudze'iz'de li' yëla rak'len kie'! Len Xan'ru zue' len li'.

²⁹ Bi'i María bubaani'bi ki diidza ni, len rnaabi'bi kuimi bixh re'e'ni gna' diidza ni.

³⁰ Le' Gbaaz la'ay gudxe'bi: —María, ti gaadx'du, chi bde'li'i li' yëla rak'len kie' Dios.

³¹ Na'a uze'u zi'i len suabi kiu' tuubi bi'dau' len gzu laabi Jesús.

³² Gake tue' bënni xhën len le'e le' Xi'ine Dios Xhën'te, len Xan'ru Dios guune ga gnabe'e ka beene kie' xuuz'xhtau'bi guul David,

³³ na'ar gnabe'e tzalzu yëdz kie' Jacob. Yëla rnabe' kie' ti tzu'u lu'uudx ki.

³⁴ María bnaabi'bi'ne gbaaz La'ay'a: —¿Nakxh'kz gak le ni xhki neda ti zui'leen'da'ne bënni?

³⁵ Le' Gbaaz La'ay bubi'e diidza: —Bë' La'ay kie' Dios dusue' len li', len yëla wak kie' Dios Xhën'te duxua li'. Lena'a, bi'dau'a gaalj'bi si' laabi Xi'ine Dios len gak'bi La'ay.

³⁶ Lekz'ka' nguul xhiil'u Elisabet uzuabi kieenu tuubi bi'dau', zala chi ziiji'nu iz, nguul'a tanáke ti rak lakua'bi bi kieenu, na'a chi ziaj xop beu' zeenu zi'i.

³⁷ Gat'ga de le ku saki'de Dios guune.

³⁸ Ati María gnaanu: —Neda naka nguul wendxin kie' Xan'ru, Dios gunne len neda ka chi gnou'. Chi nak ka, gbaaz la'ay ni zuwëëje.

María rayuunu Elisabet

³⁹ Larakz dza niiz ziubz'nu María gyaj'nu tu yëdz ki gia'a ki Judea,

⁴⁰ gyaaz'nu liidxe Zacarías len gnaanu: ¡Padiuxh Elisabet!

⁴¹ Kati Elisabet byëëni'nu María, bi we'en'du yu'u'bi le'e'nu pxiti'bi yëla rudziiji len bdze'iz leenu le' Bë' La'ay kie' Dios.

⁴² Len zidzj gnaanu: —¡Dios ben'la'ay're' li' ka yugute'nu nguul len ben'la'aye'bi bi kiu'!

⁴³ ¿Nuxh naka neda, giid'nu kia' xhne'e Xaana?

⁴⁴ Kati byëën'da gneu', bi kia' yu'u'bi le'a pxiti'bi tzka'ti'ga budziiji'bi.

⁴⁵ ¡Bixhgabou' li' gyajle'u ki ulak yugute' le gudxe li' Xan'ru!

⁴⁶ María gnaanu: «Laadxa'a rgu'u ba yëla xhën kie' Xan'ru;

⁴⁷ ruzakalaadxa'a len Dios, nu ruslá neda.

⁴⁸ Dios byue' neda, nguul wendxin nëxhj'laadxi kie' len na'a lazulau'ke lanáke kia', bixhgaba'nu nguul ni;

⁴⁹ koma xhën'te nak le chi beene kia', Bënni Nape Gdu Yëla Wak. ¡La'ay nake Le'!

⁵⁰ Dios ruwechilaadxi'tekze nu riijilaadxi'i Le'.

⁵¹ Yëla wak xhën chi beene: pkin'je le zjake tuune bënni tanëëzi kuin'ke xhën,

⁵² gdue' yëla rnabe' kieke bënni tunabe'ke, len bzue' ga xhën bënni nëxhj'laadxi.

⁵³ Bënni yechi beene ga ga'ta bi ga'ta kieke ati bënni de'tzka xhdumi'ke, busa'ze ka leke.

⁵⁴ Guk'leene yëdz Israel, bënni wendxin kie', len ti gul'laadxe'e wechilaadxe'e leke.

⁵⁵ Ka' pxënelaadxi'ke xuuz'xhtau'ru guul, le' Abraham len xi'in'xhzue'.»

⁵⁶ María bga'an'nu len Elisabet ka tson beu', na' buudx'a zuwaj'nu liidx'nu.

Guulje Juan bënni rkiile nis bunach

⁵⁷ Kati bdxin dza gdza'nu Elisabet, gzua'bi kieenu tuubi bi bënni'du.

⁵⁸ Bënni nakua'ke ga'la'z ga zuaanu len lekz'ka' bënni bë'chi' lza'a'nu yajyu'ke'nu len guludziij'de len leenu kati gulanëëz'de ki Xan'ru buechilaadxe'nu.

⁵⁹ Kati guk xuunu dza, guluche'ke'bi bi'dau' ni ki luchuuge rui'i ga'ldia' kieebi ka naleeb'kde tuune bënni Judea len gle'en'de luzua'ke laabi Zacarías, ka le' xuuz'bi.

⁶⁰ San xhna'bi gnaanu: —Ti gak. Juan rala si' laabi.

⁶¹ Na' gulubi'e diidza gulanake: —Nutunu zua kieeli le' Juan.

⁶² Na' tun'z ni'a' naa'ke gulunaab'de xuuz'bi bi'dau' ni, nakxh re'en'de gzue' laabi.

⁶³ Xuuz'bi bnaabe tu blaag ki gzooje, na' bzooje: “Juan leebi.” Len yugute'ke gulubaan'de.

⁶⁴ Na'teez Zacarías bui'e diidza, len gzulau'e rgu'e ba Dios.

⁶⁵ Yugute'ke bënni nakua'ke ga'la'z gulubaan'de, len gdu'te gia'a yeego ki yëdz Judea gulagixhjë'e le guk.

⁶⁶ Yugute'ke bënni'a tayëën'de, tunaabi lza'a'ke: «¿Nuxh gak'bi bi'dau' ni?» Koma le nak'te, Xan'ru rlui'e yëla wak kie' len leebi.

Zacarías rgu'e ba Dios

⁶⁷ Zacarías, xuuz'bi bi'dau' ni, le' Bë' La'ay kie' Dios nudze'iz'de le' len be'e diidza ulaaz kie' Dios, gne':

⁶⁸ «¡La'ay nake Xan'ru, Dios ki yëdz Israel, koma bdxiine usle' yëdz kie'!

⁶⁹ Psë'le'e kieeru bënni nape yëla wak usle' ro'u, tue' xi'in'xhzue' David, bënni wendxin kie'.

⁷⁰ Le ni nak le pxënelaadxi'ru zia'at ka'teez gulanake bënni glui'ke diidza ulaaz kie' Dios:

⁷¹ ki Le' usle' ro'u lu naa'ke bënni'a ti tadzaage ro'u dxia'a len ki dera'ke bënni talei'de ro'u,

⁷² len wechilaadxe'e xuuz'xhtau'ru guul len ti gal'laadxe'e diidza pxënelaadxi'ke.

⁷³ Diidza ni nak le pxënelaadxe'e guune kie' xuuz'ru Abraham: gunne kieeru lsenz

⁷⁴ ti suáru len yëla raadxi, usle' ro'u lu naa'ke bënni'a ti tadzaage ro'u dxia'a, naar gun'ru xhchiine

⁷⁵ len yëla rbëëz dxia'a len yëla rbë'xhbei dxia'a, len suáru lau'e gdu yëla naban kieeru.

⁷⁶ Ati li', xi'ina'du, bunach le'ke li', bënni rue'e diidza ulaaz kie' Dios Xhën'te, koma li', nëëru lau'e Xan'ru ki gpo'u xhnëëze,

⁷⁷ len guunu ga gnëëzi yëdz kie' ki Dios rnit'lau'e xhtu'la'ke len rusle' leke.

⁷⁸ Koma Dios lu yëla ruwechilaadxi'i xhën kie' rsë'le'e kieeru gbiidz ki ye tu dza kub,

⁷⁹ naar gnëëdzj lni' kieke bënni nakua'ke ga nak'tzka chul, len kche' ro'u lu nëëz ki yëla rë'dxi.»

⁸⁰ Bi'dau' ni gxhë'mi len rak'bi tzutzu len Dios, gzua'bi lu latj yu biidx, kati bdxin'r dza blui' lau'bi lau'ke bunach yëdz Israel.