SAN JUAN 6 - Porciones en Zapoteco de las Delicias

Jesús rga'we bunach zian

¹ Gdëëd le ni, Jesús gyiije tzala'a nis Galilea, larakz ley nak nis ki Tiberias.

² Bunach zian zjak'leene le' koma le zian le runn'be' yëla wak xhën chi gulale'i'de beene kati ru'uune bënni we'.

³ Na' Jesús greene tu gia'a len grë'leene bënni useed kie'.

⁴ Chi za' ga'la lni ki Pascua, lni kieke bënni Judea.

⁵ Kati Jesús byue' ble'i'de bunach zian zjak'leene le', gudxe Felipe: —¿Gaxh tzajë'u'ru yët'xhtiil kieke yugute' bunach ni?

⁶ San gudxe ka' le' naar gnëëz'de bixh ubi'e diidza Felipe, koma Jesús chik'z nëëz'de bixh guune.

⁷ Felipe bubi'e diidza: —Ti gaki laaxhj'ru ki chop gayua' dza ga'awi'ru yajlí yët'xhtiil naar tu tu'ke la'la'ke tzarua'a ueaj.

⁸ Na' Andrés bënni bë'che'e Simón Pedro tue' bënni useed kie' Jesús, gudxe le':

⁹ —Ni zuaabi tuubi bi'dau' bi de kieebi ga'yu' yët'xhtiil len chop'ba bël; san, ¿Gaxhkz nak le ni tzka'ti'ga bunach zian ni?

¹⁰ Jesús bubi'e diidza: —Guudx'ke yugute'ke labë'ke. Rë'tzka gixi lu latj'a len gulabë'ke. Ka ga'yu' mil'ke bënni nak'ke.

¹¹ Jesús gde'le'e lu ne'e yët'xhtiil'a len buudx be'e yëla dexhken Dios, gulagis'ke kieke bënni'a rë'ke'a. Lekz'ka' beene len bël'a, bnëëdzje tzka te'en'de.

¹² Kati chi glëëlj'de, Jesús gudxe bënni useed kie': —Guluzi' tzka buga'an, naar tibi gak'ditji.

¹³ Leke guluzi'e ley len chin'nu bdë'ë guk tzka le buga'an ki ga'yu' yët'xhtiil'a.

¹⁴ Bunach'a kati gulale'i le runn'be' yëla wak le beene Jesús, gulanake: —Leel bënni ni nake bënni'a rue'e diidza ulaaz kie' Dios len rala giide yëdz'lyu ni.

¹⁵ Ati Jesús guk'be'i'de ki te'en'de luche'ke le' naar gnabe'i'de leke, buze'e yubl zuwëëje lu gia'a naar sue' tuuze.

Jesús rze'e lu nis

¹⁶ Kati chi kchul, bënni useed kie' Jesús guladinie lu nis,

¹⁷ gulabeene lu barku len guladëëde lu nis naar ladxiine Cafarnaúm. Chul'biaj chi nak len Jesús ti rudxin'de.

¹⁸ Tzal'za, nis ni rbixh'rtul nia'a ki tu bë' xhën le gyas na'.

¹⁹ Kati chi gulayu'u'ke ka tu ur nëëz, gulale'i'de Jesús ze'e ga'la ra barku rze'e lu nis'a len glaadxi'de.

²⁰ Jesús gudxe leke: —¡Needa'a, ti gaadxi'li!

²¹ Gdu laadxi'ke gulazi'e le' lu barku len guladxin'te'ke yëdz ga zjake.

Bunach tugiilje Jesús

²² Bueikj dza'a, bunach nakua'ke tzala'a nis gulak'be'i'de ki bënni useed kie' Jesús zawake lu lazdui barku le rë'a, ati Jesús ti ziaj'leene leke.

²³ Tzal'za, ye la' barku guladxin Tiberias ga'la ga gla'we yët'xhtiil'a gdëëd be'e yëla dexhken Xan'ru.

²⁴ Lena'a, kati gulale'i'de ki Jesús len bënni useed kie' ti nakua'ke na', bunach'a gulabeene lu barku len zjake Cafarnaúm, zajdiilj'ke le'.

Jesús nake yët'xhtiil ki yëla naban

²⁵ Kati guladxiine leke tzala'a nis, guludzëël'de Jesús len gulunaab'de Le': Bënni Useed, ¿Batxh bdxiinu niil?

²⁶ Jesús gudxe leke: —Le nak'te, lbi'ili ti rugiilj'li neda koma gyajni'i'li le runn'be' yëla wak, rugiilj'li neda koma gdaag'li tzka bdza' le'e'li.

²⁷ Ti gun'li dxin ki la'wa'gu le rak'ditji, gulgun dxin ki la'wa'gu le ti rak'ditji len runn yëla naban tzalzu. La'wa'gu ni gunne kieeli Xi'ine Bënni, koma Xuuz'ru Dios, chi nuun'de Le' kie'.

²⁸ Gulunaab'de le': —¿Bixh nayaadzji'tu naar gunn gun'tu xhchiine Dios?

²⁹ Jesús bubi'e kieke Diidza: —Le re'enz'de Dios nak ki tzajle'li'ne bënni'a Le' nusë'le'e

³⁰ Na' gulunaab'de le': —¿Bixh le runn'be' gunn guunu kietu naar kati gle'i'tu ley gun tzajle'tu li'? ¿Bixh nak le ruunu li'?

³¹ Xuuz'xhtau'tu guul gla'we maná lu yu biidx, ka rna Diidza La'ay: “Bnëëdzje yët'xhtiil za' yewayuba gla'we.”

³² Jesús bubi'e kieke diidza: —Le nak'te rea' lbi'ili, keg Moisés benne kieeli yët'xhtiil le za' yewayuba, Xuuza runne yët'xhtiil'a le za' yewayuba.

³³ Koma yët'xhtiil'a lea Dios runne nak le za' yewayuba len rnëëdzj yëla naban ki yëdz'lyu.

³⁴ Leke gulunaab'kde Le': —Xan, benn'tekz kietu yët'xhtiil'a.

³⁵ Ati Jesús gudxe leke: —Neda naka yët'xhtiil le runn yëla naban. Bënni riid'leene neda, tir tëëde yëla rdun; len bënni rajle'e neda, tir tëëde yëla rbiidx.

³⁶ San ka chi guudx'kza lbi'ili, zala chi ble'i'li neda lbi'ili ti rajle'li.

³⁷ Yugute'ke bënni'a Xuuza benne kia' tiid'leene neda; ati bënni tiid'leene neda, ti yulaag'ka'ne.

³⁸ Koma neda ti za'a yewayuba ki guuna le ryaazlaadxa'a, Xuuza psë'le'e neda len guuna le ryaazlaadxe'e le'.

³⁹ Le' nusë'le'e neda len le ryaazlaadxe'e le' nak ki ti lanitie' bënni'a nunne kia' san yuspan'ka'ne lu yëla gut dza zia'a za'.

⁴⁰ Koma le ryaazlaadxe'e Xuuza nak ki yugute'ke bënni tuyu'ke Xi'ine Dios len layajle'ke le', lape yëla naban tzalzu; len neda yuspan'ka'ne lu yëla gut dza zia'a za.

⁴¹ Lena'a bënni Judea gulazulau'ke tanéke kie' Jesús: Koma gne': «Neda naka yët'xhtiil'a le za' yewayuba.»

⁴² Ati gulane': —¿Naru keg Jesús bënni ni, bënni xi'ine José? Ro'u numbe'ru'ne xuuz'xhne'e. ¿Bixhkia' rne' na'a ki ze'e yewayuba?

⁴³ Na' Jesús gudxe leke: —Ka'az gneeli kia'.

⁴⁴ Xuuza nusë'le'e neda len nutunu bënni gunn giid'leene neda xhki Le' ti kche'e le'; len neda yuspaana'ne lu yëla gut dza zia'a za'.

⁴⁵ Lu diidza la'ay le guluzooje bënni glui'ke diidza ulaaz kie' Dios rna: “Dios gzeajni'i'de yugute'ke.” Lena'a yugute'ke bënni layëën'de Xuuz'ru len luseede kie', tiid'leene neda.

⁴⁶ «Nutunu bënni nale'i'de Dios; tuuze bënni chi ble'i'de Le' nake bënni ze'e ga zue' Dios.

⁴⁷ Le nak'te rea' lbi'ili ki bënni rajle'e, nape yëla naban tzalzu.

⁴⁸ Neda naka yët'xhtiil le runn yëla naban.

⁴⁹ Xuuz'xhtau'li guul gla'we maná lu yu biidx, len zala gla'we ley, glat'kze;

⁵⁰ san neda rui'a diidza ki yët'xhtiil za' yewayuba; bënni ra'we ley, ti ratie'.

⁵¹ Neda naka yët'xhtiil'a za' yewayuba; bënni ra'we yët'xhtiil ni, tzalzu sue'. Yët'xhtiil'a lea neda rnëëdzja nak xhpeela'kza. Rnëëdzja ley nia'a ki yëla naban ki yëdz'lyu.»

⁵² Bënni Judea gulazulau'ke tadil'e diidza: —¿Nakxh guune bënni ni gunne xhpeele'e gaag'ru?

⁵³ Jesús gudxe leke: —Le nak'te rnia' ki xhki lbi'ili ti gaag'li xhpeele'e Xi'ine Bënni len gia'aj'li xhchëëne, ti gap'li yëla naban len lbi'ili.

⁵⁴ Bënni ra'we xhpeela'a len ri'i'je xhchëëna, nape yëla naban tzalzu; len neda yuspaana'ne lu yëla gut dza zia'a za'.

⁵⁵ Koma xhpeela'a nak la'wa'gu dxia'a len xhchëëna nak le rdui'i dxia'a.

⁵⁶ Bënni ra'we xhpeela'a len ri'i'je xhchëëna, nak'leene neda tuuz len neda nak'leena'ne tuuz Le'.

⁵⁷ Xuuza psë'le'e neda, Le' nape yëla naban ati neda yu'u yëla naban kia' nia'a kie' Le'; lekz'ka' nak, bënni ra'we xhpeela'a yu'u yëla naban kie' nia'a kia'.

⁵⁸ Rui'a diidza ki yët'xhtiil'a le za' yewayuba. Yët'xhtiil ni ti nak ka nak maná le gla'we xuuz'xhtau'li guul, koma zala gla'we glatie'; bënni ra'we yët'xhtiil ni, tzalzu sue'.

⁵⁹ Jesús pseed'de le ni lu yu'u useed ki yëdz Cafarnaúm.

Diidza nua' yëla naban tzalzu

⁶⁰ Kati gulayëën'de diidza ni, zian'ke bënni zjak'leene Jesús gulanake: —Nak'tzka baniig si'ru xhtiidze'e ni; ¿nuxh bënni saki'de guune ley?

⁶¹ Jesús guk'be'i'de ki tanéke kie', ati bnaab'de leke: —¿Naru ruuni lbi'ili zi' diidza ni?

⁶² ¿Bixh'gaar gun'li ka nak gle'i'li'ne Le' Xi'ine Bënni ubeene ga zue' zia'a?

⁶³ Bë'a nak le runn yëla naban; le nak ki yëdz'lyu ni gat'ga zuakz ga run. Ati diidza le chi be'leena lbi'ili nakgak bë' len yëla naban.

⁶⁴ San ni zuaar'li la'li' ti rajle'li. Koma Jesús chik'z nëëz'de zia'a nuxh bënni'a ti tayajle'ke, ati nëëz'de nuxh bënni'a rala gdëëde le' lu naa'ke bunach.

⁶⁵ Ati gne': —Lena'a chi guudxa lbi'ili ki nutunu bënni gunn giid'leene neda xhki Xuuz'ru ti gue'e le' latj.

⁶⁶ Ni' gde'la', zian'ke bënni zjak'leene Jesús guluka'ane Le' len tir yajak'leene Le'.

⁶⁷ Jesús bnaab'de chin'nu'ke bënni useed kie': —¿Ba re'eni'li waj'li lbi'ili lekz'ka'?

⁶⁸ Simón Pedro bubi'e diidza: —Xan, ¿Nuxhkz tziaj'leen'tu? Le Li' rnou' nak yëla naban tzalzu.

⁶⁹ Netu chi gyajle'tu len nëëzi'tu ki Li' naku Bënni La'ay kie' Dios.

⁷⁰ Jesús bubi'e kieke diidza: —Neda grëa' lbi'ili chin'nu'li, san tuuli lbi'ili nak'li bënni xëwi.

⁷¹ Jesús rue'e diidza kie' Judas bënni xi'ine Simón Iscariote, koma Judas rala gdëëde le' lu naa'ke bunach zala nake tue' kieke chin'nu'ke bënni useed kie' Jesús.