SAN JUAN 4 - Porciones en Zapoteco de las Delicias

Jesús len nguul Samaria

¹ Bënni fariseo gulanëëz'de ki Jesús rtuub'tekze bënni useed kie' len rkiil're nis bunach ka Juan

² (zala keg Jesús rkiile nis bunach'a, bënni useed kie'a tukiile nis bunach).

³ Kati Jesús gnëëz'de le ni burooje Judea naar wëëje Galilea.

⁴ Len run bayuudx tëëde gia'a yeego ki Samaria.

⁵ Bdxiine tu yëdz ki Samaria nazi' lei' Sicar, ga'la ga de tu yu pka'ane Jacob kie' bënni xi'ine le' José.

⁶ Na' zua' yeru nis le nuchë'ë'ne Jacob. Jesús tzka chi rajxaki'de yu'e nëëz grë'e rui'i yeru nis'a. Lau'i dza nak,

^7-8 ati bënni useed kie' zajë'u'ke le la'we lu yëdz'a. Tzal'za tuunu nguul Samaria bdxin'nu ni' zduliaj'nu nis, ati Jesús gudxe'nu: —Ben kia' tzarua'a nis.

⁹ San bënni Judea len bënni Samaria ti tadzaage, ati nguul ni guudx'nu'ne —¿Bixhkia' li' rnaab'du neda nis xhki naku bënni Judea ati neda naka nguul Samaria?

¹⁰ Jesús bubi'e kieenu diidza: —Nar'la nëëz'du bixh'le nak le ruzalaadxe'e Dios len nuxha' rnaabi li' nis, li'l gnaab'du'ne ati le' gunne kiu' nis ban.

¹¹ Nguul ni guudx'nu'ne: —Xan, keg de bixh kuij'du nis ni len yeru nis ni ga're' narë'ën'tzka: ¿Gaxhkz tzajxi'u nis ban gunnu kia'?

¹² Xuuz'xhtau'tu guul Jacob pka'ane kietu yeru nis ni, ni gli'aj'ke nis le', bi kie' len bua' gixi kieke. ¿Naru nakr'ru li' xhën ka le'?

¹³ Jesús bubi'e kieenu diidza: —Yugute'ke bënni li'aj'ke nis ni, ulabiidxe yubl;

¹⁴ san bënni gi'i'je nis le neda gnëëdzja, tzalzu udua yëla rbiidx kie'. Koma nis le neda gnëëdzja kie' ueaki tu nis le raalj len gnëëdzj kie' yëla naban tzalzu.

¹⁵ Nguul ni guudx'nu'ne: —Xan, benn kia' nis'a, naar tzalzu udua yëla rbiidx kia' ati tir giida ni' duliija nis.

¹⁶ Jesús gudxe'nu: —Yajliidze bënni kiu' len chi nak ka wëëdu ni.

¹⁷ Nguul ni bubi'i'nu kie' diidza: —Ti zue' bënni kia'. Jesús gudxe'nu: —Bliidu rnou' ka, nutunu bënni kiu' zue';

¹⁸ koma ga'yu'e bënni chi gzua'leen'ku'ne ati bënni'a zua'leenu'ne na'a keg bënni kiu'a. Bliidu ka rnou'a.

¹⁹ Kati nguul ni byëëni'nu le ni, guudx'nu'ne: —Xan, leel naku bënni rue'e diidza ulaaz kie' Dios.

²⁰ Xuuz'xhtau'tu guul bënni Samaria gulayiijilaadxi'ke Dios lu gia'a ni; san lbi'ili bënni Judea rnaali ki Jerusalén nak ga rala tziijilaadxi'ru'ne Dios.

²¹ Jesús bubi'e kieenu diidza: —Nguul gyajle' le gie'a li', rdxin dza kati ti guuni bayuudx giid'li gia'a ni u tziaj'li Jerusalén ki tziijilaadxi'li'ne Xuuz'ru Dios.

²² Lbi'ili ti nëëzi'li nuxha' riijilaadxi'li; san netu nëëzi'tu nuxha' riijilaadxi'tu koma yëla ruslá za' lu naa'ke bënni Judea.

²³ San za' dza, len na'a nak dza'a, kati bënni tayiijilaadxi'ke Dios luune ley gdu laadxi'ke, ka ryaazlaadxe'e Bë' La'ay kie' Dios. Koma bunach ka'a rgiilje Xuuz'ru layiijilaadxi'ke Le'.

²⁴ Dios nake Bë', len bënni tayiijilaadxi'ke le' luune ley gdu laadxi'ke ka ryaazlaadxe'e Bë' La'ay kie' Dios.

²⁵ Nguul ni guudx'nu'ne: —Nëëz'da ki rala giide Cristo; len kati le' giide useedx'la'a'ne kietu yugute' le ni.

²⁶ Jesús gudxe'nu: —Neda naka bënni'a, kuin'kze rui'leena li' diidza.

²⁷ Tzal'za guludxin'te'ke bënni useed kie' len gulubaan'de koma Jesús rui'leene'nu diidza tuunu nguul. San nutunu buaaxhji gnaabi le' bixh rnaab'de'nu u bixh diidza rui'leene'nu.

²⁸ Nguul ni pka'an'nu na' rë'ë kieenu len zuwaj'nu lu yëdz len guudx'nu bunach'a:

²⁹ —Gultza' ki gle'i'li'ne tue' bënni chi gudxe neda yugute' le chi beena. ¿Keg'tza le' nake Cristo?

³⁰ Na' gularooje ki yëdz'a len yajake ga zue' Jesús.

³¹ Tzal'za bënni useed kie' tatayui'de le': —Bënni Useed, gdaagu'tza tzarua'a.

³² San le' gudxe leke: —Lbi'ili ti nëëzi'li le rala ga'wa neda

³³ Bënni useed kie' gulazulau'e tunaabi lza'a'ke: —¿Ku nu dujua'tza le ga'we?

³⁴ Ati Jesús gudxe leke: —Xuuza nusë'le'e neda ati la'wa'gu kia' nak guuna le ryaazlaadxe'e Le' len ksiuudxa xhchiine.

³⁵ Lbi'ili rnaali: “Ryaadzj'r tap beu' naar tzajlap'ru”; san neda rea' lbi'ili ki gyuuli gap naduuz, chi nak tzajlap'ru.

³⁶ Bënni rlape rzi'e laaxhje, len lea rlape'a nak ki yëla naban tzalzu, naar bënni'a raaze len bënni'a rlape tudziij'de.

³⁷ Koma dekz xhtiidzi'i, ki “La'ke taaze len bënni yubl talap'ke.”

³⁸ Len neda psë'la'a lbi'ili dulap'li le ti gyui'i'li dxin guuz'li; bënni yubl gluune dxin'a ati lbi'ili ruzi'li xhbei xhchin'ke'a.

³⁹ Zian'ke bënni yëdz ki Samaria gulayajle'ke Jesús ka nak diidza be'nu nguul'a: «Chi gudxe neda yugute' le chi beena.»

⁴⁰ Kati bënni Samaria guladxiine, glatayui'de Jesús jga'an'leene leke ati bga'ane na' chop dza,

⁴¹ len bënni zian gulayajle'ke ka nak le be'e diidza

⁴² Ati gle'ke'nu nguul ni: «Na'a rajle'tu, keg ki le guudx'zu netu li', rajle'tu lekz'ka' koma kuin'kz'tu chi byëëni'tu'ne len nëëzi'tu ki leel le' nake Bënni Usle' yëdz'lyu.»

Jesús ru'uune'bi bi kie' bënni riije gdil ki Roma

⁴³ Guladëëd chop dza'a, Jesús burooje ki Samaria len bugie'le'e xhnëëze zga Galilea.

⁴⁴ Koma kuin'kze gne', tue' bënni rue'e diidza ulaaz kie' Dios ti tui'ke le' bala'an laadze.

⁴⁵ Kati bdxiine Galilea, bënni yëdz'a gulazi'ke le' dxia'a koma lekz'ka' yajake lni ki Pascua le gyu'u Jerusalén len gulale'i'de le beene.

⁴⁶ Jesús zuwëëje Caná yëdz ki Galilea ga beene ki nis ueaki nup uva. Ati tue' bënni rnabe'e bënni raja'ke gdil ki Roma zue' Cafarnaúm len bi kie' re'i'bi.

⁴⁷ Kati gnëëz'de ki Jesús gze'e Judea ati bdxiine Galilea, yajyue le' len gutayui'de le' ki tziije liidxe len uune'bi bi kie'a chik'z re'e'ni gat'bi.

⁴⁸ Jesús bubi'e kie' diidza: —Lbi'ili ti rajle'li xhki ti rle'i'li le tunn'be' len yëla wak xhën.

⁴⁹ San bënni rnabe' ni gudxe le'; —Xan, dia'te, ka gna gat'bi bi kia'.

⁵⁰ Na' Jesús gudxe le': —Buaj liidxu: bi kiu' yu'u yëla naban kieebi. Bënni ni gyajle'e le gne' Jesús len zuwëëje.

⁵¹ Tzal zuwëëje liidxe, bënni wendxin kie' yajtzaag'ke le' len gle' le': —¡Bi kiu' yu'u yëla naban kieebi!

⁵² Le' bnaab'de leke batxh gzulau'bi rnëëzi kuimi dxia'a, ati gulubi'ke diidza: —Niij lau'i dza buroj'bi tuxhla.

⁵³ Xuuz'bi bi'i ni guk'be'i'de ki le ni guk larakz ur'a kati Jesús gudxe le': «Bi kiu' yu'u yëla naban kieebi»; ati le' len yugute'ke bënni nakua'ke liidxe gulayajle'ke Jesús.

⁵⁴ Le ni guk le burop beene Jesús ki runn'be' yëla wak xhën, kati gze'e Judea ati bdxiine Galilea.