SAN JUAN 3 - Porciones en Zapoteco de las Delicias

Jesús len Nicodemo

¹ Gzue' tue' bënni gxhi' le Nicodemo, le' nake bënni blou ladj'ke bënni Judea.

² Bënni ni yajyue Jesús chi'dzë'ël, len gudxe le': —Bënni Useed, nëëzi'tu ki Dios nusë'le'e li' naar kseed'du netu, koma nutunu gak gun yëla wak le ruunu li', nar'la Dios ti zue' len le'.

³ Jesús gudxe le': —Le nak'te rea' li' ki bënni ti gaalje le yubl ka, ti gunn gle'i'de yëla rnabe' kie' Dios.

⁴ Nicodemo bnaab'de le': —¿Nakxh guune bënni gaalje le yubl kati chi nake bënni guul? ¿Naru gunn waazie le'e'nu xhne'e naar gaalje le yubl?

⁵ Jesús bubi'e kie' diidza: —Le nak'te rea' li' ki bënni ti gaalje ki nis len ki Bë', ti gunn ne'e lu yëla rnabe' kie' Dios.

⁶ Bënni taalje ki bunach, bunach nak'ke; bënni naalj'ke ki Bë', bë' nak'ke.

⁷ Ti yubaan'du le rea' li': “Yugute' bunach rala laalj'ke le yubl.”

⁸ Ka bë' rluub ga rna ki, len zala ryëën'du ley, ti nëëz'du gaxh za' len ti nëëz'du gaxh ziaj, lekz'ka' nak kieke yugute'ke bënni taalje ki Bë'.

⁹ Nicodemo bnaab'de le' yubl: —¿Nakxh'kz gak le ni?

¹⁰ Jesús bubi'e kie' diidza: —¿Li' naku bënni rseed'de Israel, ati ti nëëz'du le ni?

¹¹ Le nak'te rea' li' ki nëëzi'tu bixh diidza'a rui'tu ati rdujxaka'lau'tu le nale'i'tu; san lbi'ili ti rajle'li le rnátu.

¹² Xhki ti rajle'li kati rui'leena lbi'ili diidza ki le rak ki yëdz'lyu, ¿Nakxh gunn tzajle'li xhki rui'leena lbi'ili diidza ki le rak yewayuba?

¹³ »Nutunu rbeeni yewayuba tuuze bënni'a ze'e yewayuba; Le' Xi'ine Bënni.

¹⁴ Ati ka beene Moisés blise'ba bel' lu yu biidx, lekz'ka' run bayuudx luchise Le' Xi'ine Bënni

¹⁵ Naar yugute'ke bënni layajle'ke le' lazi'ke yëla naban tzalzu.

Yëla nadxi'i kie' Dios ki yëdz'lyu

¹⁶ »Dios bdxi'i'tzki'de yëdz'lyu lena'a psë'le'e Xi'ine lazdui naar yugute'ke bënni layajle'ke Le' ti lanitie' san lape yëla naban tzalzu.

¹⁷ Koma Dios ti psë'le'e Xi'ine ki guspaage'e xhgia' yëdz'lyu, psë'le'e le' naar nia'a kie' usle' yëdz'lyu

¹⁸ »Bënni rajle'e len Xi'ine Dios, ti nabaage'e xhgia'; san bënni ti rajle'e, chik'z nabaage'e xhgia', koma ti rajle'e len Xi'ine lazdui kie' Dios.

¹⁹ Bënni ti tayajle'ke chi nabaaga'ke xhgia', le tuune le ku nak koma kati yëla yeni biid yëdz'lyu ni guladxi'ir'de yëla chul ka yeni ni.

²⁰ Yugute'ke bënni tuune le ku nak dxia'a ti tadaan'de yëla yeni, len ti tabiige'e ga'la ga zua naar ti glui' lau'i le tuune.

²¹ San bënni nakua'ke lu yëla li, tabiiga'ke ga zua yëla yeni naar glui' lau'i ki yugute' le tuune nak ka'teez ryaazlaadxe'e Dios.»

Juan bënni rkiile nis bunach yubl rue'e diidza kie' Jesús

²² Gdëëd le ni, Jesús dzaage bënni useed kie' yajake gia'a yeego ki Judea, ni' bga'an'leene leke tukiile nis bunach.

²³ Lekz'ka' Juan rkiile nis bunach yëdz Enón ga'la yëdz Salim koma ni' rë'tzka nis; ati bunach raja'ke len tudiile nis.

²⁴ Yugute' le ni glak kati ti tagui'i'de liidx'gia Juan.

²⁵ Ati la'ke bënni useed kie' Juan gulazulau'e tadil'e diidza len tue' bënni Judea ki le naleeb'kde tuune kati tupa'a kuin'ke,

²⁶ len yajëëdx'ke Juan: —Bënni Useed, bënni'a dzaage li kati zu' tzala'a yeego Jordán, len yajxaka'lau'u kie', na'a rkiile nis bunach ati bënni zian zjak'leene le'.

²⁷ Juan gudxe leke: —Nutunu bënni de bi de kie' xhki Dios ti rnëëdzje ley.

²⁸ Byëëni'kz'li lbi'ili gnia' ki neda ti naka Le' Cristo, nak'za tue' bënni nusë'la'ke lau'e.

²⁹ Kati nu bënni rtzag'ne'e, bënni'a rdzaage le dxia'a rudziij'de ryëën'de chi'e, koma rtzag'ne'e len nguul'a nadxi'i'de. Lekz'ka' rak kia' neda na'a yëla rudziiji kia' xhën'te nak,

³⁰ Le' uyaj'leen'tekze gak're blou len neda wechi'la.

Bënni ze'e yewayuba

³¹ »Bënni ze'e yewayuba nuxua'lau're ka yugute'ke bënni. Bënni nake ki yëdz'lyu ki yëdz'lyu nake len rue'e diidza le rak ki yëdz'lyu ni. San bënni ze'e ki yewayuba nuxua'lau're ka yugute'ke bënni,

³² len rdujxaka'lau'e le chi ble'i'de len chi byëën'de; ati nutunu rsi' lea rdujxaka'lau'e'a.

³³ San xhki nu bënni si'e diidza ni, re'e'ni gna ki le rne' Dios nak li;

³⁴ koma bënni'a Dios nusë'le'e, rue'e xhtiidze'e Dios, koma Dios ti rdxie'gbe'i ki Bë' La'ay kie' tzka rnëëdzje.

³⁵ Xuuze nadxi'i'de Xi'ine len yugute' nudëëde lu ne'e.

³⁶ Bënni rajle'e Xi'ine Dios de kie' yëla naban tzalzu; san bënni ti re'en'de tzajle'e Xi'ine Dios ti ga'ta kie' yëla naban'a, le si'e nak yëla rsaka'zi' xhën'te kie' Dios.