SAN JUAN 21 - Porciones en Zapoteco de las Delicias

Jesús rlui'lau'e len gaadx'ke bënni useed kie'

¹ Gdëëd le ni, Jesús yubl yajlui'lau'e len bënni useed kie', rui'i nis ki Tiberias. Ki guk:

² Tuuz nakua'ke Simón Pedro, Tomás, bënni te'ke le' Bënni Kuach, Natanael, bënni Caná ki Galilea, bënni xi'ine Zebedeo len ye la'ke bënni useed kie' Jesús.

³ Simón Pedro gudxe leke: —Bël tzajxëëna'ba. Leke gulubi'ke diidza: Lekz'ka' netu uza'leen'tu li'. Yajake len gulabeene tu barku; san chi'dzë'ël'a nutunu bua' gulazëëne'ba.

⁴ Kati za reni, Jesús blui'lau'e ra nis'a, san bënni useed kie' ti nëëzi'kde ki le'a.

⁵ Jesús bnaab'de leke: —Bënni, ¿Ku de kieeli le gaag'ru? Leke gulubi'ke diidza: —Ti de.

⁶ Jesús gudxe leke: Guluzal yëxhj'a tzala'a yubeel ki barku'a len ka' sën'li'ba bël. Ka' gluune, ati chi nak ka tir taxikj'ke lubiije yëxhj'a koma bël zian gxhën lek'ba.

⁷ Na' bënni useed kie' Jesús bënni'a nadxi'i'tzki'de, gudxe Pedro. —¡Xan'ru'a! Kati byëën'de Simón Pedro ki Xan'ru'a, buakue xhe' len bzale kuine lu nis.

⁸ Ye la'ke bënni useed kie' Jesús guladxiine ra nis'a len barku, zuna'ij'ke yëxhj'a dzë'ë'tzka'ba bël, koma ga'la'z ra nis'a nakua'ke.

⁹ Kati glëtje, gulale'i'de rë' gi' len tuuba bël xhuaaba lau'i, len yët'xhtiil.

¹⁰ Jesús gudxe leke: —Guldujua'ba lati'ba bël'a gxhën'li'ba'a.

¹¹ Simón Pedro bubeene lu barku len bueije ra nis'a yëxhj'a dzë'ë'tzka'ba bël, tu'gayua' chi'i'nu'uma; zala bua' zian nak'kba yëxhj'a ti grëëza.

¹² Jesús gudxe leke: —Guldá gaag'li xhsiil. Keg tue' bënni useed kie' ruwaaxhj'de gnaab'de Le' nuxh bënni'a, koma nëëzi'kde ki Xan'ru'a.

¹³ Chi nak ka Jesús gbiige'e, gde'le'e yët'xhtiil'a len bnëëdzje kieke len lekz'ka' bnëëdzje'ba kieke bël'a.

¹⁴ Ni guk tson lzu Jesús rlui'lau'e len bënni useed kie' buudx bubaane lu yëla gut.

Diidza be'leene Jesús, Simón Pedro

¹⁵ Gdëëd xhsiil, Jesús bnaab'de Simón Pedro: —Simón, bënni xi'ine Juan, ¿Ba nadxi'ir'du neda ka bënni ni? Pedro bubi'e kie' diidza: —Xan, Li' nëëz'du ki nadxi'i'da Li'. Jesús gudxe le' —Ben'chi'kba bëku'xhiila kia'.

¹⁶ Yubl bnaab'de le': Simón, bënni xi'ine Juan, ¿Ba nadxi'i'du neda? Pedro bubi'e kie' diidza: —Ja', Xan, Li' nëëz'du ki nadxi'i'da Li'. Jesús gudxe le' —Ben'chi'kba bëku'xhiila kia'.

¹⁷ Bunn lzu bnaab'de Le': Simón, bënni xi'ine Juan, ¿Ba nadxi'i'du neda? Pedro, gzua'yeche'e koma chi guk tson lzu rnaab'de le' xhki nadxi'i'de Le', bubi'e kie' diidza: —Xan, Li' nëëz'du yugute': Li' nëëz'du ki nadxi'i'da Li'. Jesús gudxe le' —Ben'chi'kba bëku'xhiila kia'.

¹⁸ Le nak'te rea' li' ki kati guku kuidi raku xhou' naar gyiiju ga gna kiu'; san nakati chi guku bënni guul, gliu' no'u len bënni yubl jgakue' li' xhou' len kche'e li' ga ti re'en'du tziiju.

¹⁹ Len le ni gne' ni, Jesús gdixhjë'e nakxh gatie' Pedro len guune xhën Dios len yëla gut kie'. Buudx'a gudxe le': —¡Dia'leen neda!

Bënni useed kie' Jesús bënni'a nadxi'tzki'de

²⁰ Kati bueikje Pedro ble'i'de ki kuudzu'lke ze'e bënni useed kie' Jesús, bënni'a nadxi'tzki'de, larakz bënni'a grë'e kuiti le'e kati gla'we xhtzë' len bnaab'de Le'; «Xan ¿Nuxh bënni'a rala gdëëde Li' lu naa'ke bunach?»

²¹ Kati Pedro ble'i'de Le', bnaab'de Jesús: —Xan, ati bënni ni ¿nakxh gak kie'?

²² Jesús bubi'e kie' diidza: —Xhki neda gna kia' za zuaaze ka' nakati gdxin'r dza wëëda, ¿Bixh rki'i Li'? Dia'leen neda Li'.

²³ Lena'a gze diidza ki bënni useed ni ti gat'kze. Len Jesús ti gne' ki ti gat'kze. Le gne' guk le ni: «Xhki neda gna kia' za zuaaze ka' nakati gdxin'r dza wëëda, ¿Bixh rki'i Li'?»

²⁴ Larakz bënni useed ni rdujxaka'lau'e le ni len le' bzooje ley. Len nëëzi'ru ki bliide.

²⁵ Le zian'r le beene Jesús; le zian'te nak ki ka nak'tza gzoj'tza'ru ley tu ueaj, rsaka'a ki ti la'ki gich ki gdu yëdz'lyu layoj'k.