SAN JUAN 20 - Porciones en Zapoteco de las Delicias

Nutunu yu'u lu ba

¹ Bayën ziil kati rugie'la' seman kati ni na'chul, María Magdalena gyaj'nu lu ba, len ble'i'nu na'dua giaj'a nusiaj baa.

² Na' rxiti'znu zuwaj'nu ga zue' Simón Pedro len ye tue' bënni useed kie' Jesús, bënni'a nadxi'i'tzki'de, len guudx'nu'ne: —¡Nua'ke Xan'ru, len ti nëëzi'tu gaxh nagu'u'ke Le'!

³ Pedro len ye tue' bënni useed kie' Jesús gularooje len yajake lu baa.

⁴ Tuuz zjake; san bënni'a ye tue' pxiti're ka Pedro len zia'a le' bdxiine lu baa.

⁵ Gyechue' bdun'lau'e len ble'i'de laari'a bdul'de, san ti gyaazie.

⁶ Kuudze'e bdxiine Simón Pedro ati gyaazie lu baa, lekz'ka' le' ble'i'de laari'a;

⁷ Ati lekz'ka' ble'i'de ki laari'a guluchël'de ikje ti de kuiti laari'a, nuduub len xhua ga yubl.

⁸ Na' gyaazie ye tue' bënni useed'a, bënni'a bdxiine zia'al lu baa, len ble'i'de lea guk ati gyajle'e.

⁹ Koma ti rajni'ni'kde le rna' Diidza La'ay, ki Le' rala ubaane lu yëla gut.

¹⁰ Chi nak ka' bënni useed kie' Jesús zawake liidx'ke.

Jesús rlui'lau'e len María

¹¹ María bga'an'nu rayu'ul rbëëdx'nu, kuiti baa. Ka rbëëdx'nu ka' gyechu'nu bdun'lau'nu le'il,

¹² ati ble'i'nu'ne chope' gbaaz la'ay naku'ke laari xhkich, tue' rë'e ikji'l len ye tue' rë'e xhni'il ga gute'e Jesús.

¹³ Gbaaz la'ay ni gulunaab'de'nu: —Nguul, ¿Bixhkia' rbëëdxu? Leenu guudx'nu'ne: —Koma nua'ke Le' Xaana, len ti nëëz'da gaxh nagu'u'ke Le'.

¹⁴ Buudx'z gnaanu ka', bueikj'nu len ble'i'nu'ne Jesús san ti nëëzi'nu ki le'a.

¹⁵ Jesús bnaab'de'nu: —Nguul, ¿Bixhkia' rbëëdxu? ¿Nuxh rugiilju? Leenu guki'nu ki bënni'a run'chi'e layeel'a, len guudx'nu'ne: —Bënni, xhki li' nu'u'ne, guudx neda gaxh nagu'u'ne, naar tzajdiilja'ne.

¹⁶ Na' Jesús gudxe'nu: —¡María! Leenu bueikj'nu len lu diidza hebreo guudx'nu'ne: —¡Rabuni! (Le ni re'e'ni gna': «Bënni Useed»).

¹⁷ Jesús gudxe'nu: —Ti sëënu neda, koma ti rajdzaag'da'ne Xuuza. San gyaj len guudx'ke bënni bë'cha'a ki ziija zajdzaaga'ne nu nak Xuuza len lekz'ka' nake Xuuz'li, Dios kia' len lekz'ka' Dios kieeli.

¹⁸ Na' María Magdalena yajlaab'nu kieke bënni useed kie' Jesús ki ble'i'nu'ne len gdixhjik'nu'ne le gudxe'nu.

Jesús blui'lau'e len bënni useed kie'

¹⁹ Chi'dzë'ël'a ki dza'a kati rugie'la' seman, bënni useed kie' Jesús nudzaag'ke len nusiaj'ke puert koma taadx'de bënni tunabe'ke Judea. Jesús gyaazie len gze' gatzj'lau'i kieke bënni useed kie', bliidz'tzawi'e leke, gne': —¡Yëla rë'dxi sua len lbi'ili!

²⁰ Buudx gne' ki, blui'de leke ne'e len kuiti le'e. Ati leke guludziij'de gulale'i'de Xan'ru.

²¹ Chi nak ka Jesús yubl gudxe leke: ¡Yëla rë'dxi sua len lbi'ili! Ka psë'le'e neda Xuuz'ru, ka' neda rsë'la'a lbi'ili.

²² Bluube leke, len gudxe leke: Gulsi'e Bë' La'ay kie' Dios.

²³ Bënni si'xhëën'li xhtu'la'ke, ulazi'ke yëla rzi'xhën; len Bënni ti si'xhëën'li xhtu'la'ke, ti lazi'ke yëla rzi'xhën.

Tomás rle'i'de Jesús nubaane lu yëla gut

²⁴ Tomás, tue' bënni useed kie' Jesús, bënni'a te'ke le' Bënni Kuach, ti zue' len leke kati bdxiine Jesús.

²⁵ Gdëëd'a Bënni useed kie' Jesús gle'ke le'. —Ble'i'tu'ne Xan'ru. Ati Tomás bubi'e kieke diidza: —Xhki ti gle'i'da ne'e dxia we' ki bdiidj len ti gne'a xhbënni'na'a le'i len xhki ti gne'a na'a kuiti le'e, ti tzajle'a.

²⁶ Gdëëd xuunu dza, yubl nudzaag'ke bënni useed kie' Jesús lu tu yu'u ati na' zue' lekz'ka' Tomás. Zala nusiaj'ke puert'a Jesús gyaazie, gze' gatzj'lau'i len bliidz'tzawi'e leke, gne': —¡Yëla rë'dxi sua len lbi'ili!

²⁷ Chi nak ka gudxe Tomás: —Bne' ni xhbënni'no'u len byu' na'a; benn no'u len bne' ley kuiti le'a. ¡Gyajle'! tir guuni'z li'.

²⁸ Na' Tomás gne': —¡Xaana len Dios kia'!

²⁹ Jesús gudxe le': —¿Gyajle'u koma ble'i'du neda? ¡Bixhgaba'ke bënni tayajle'ke zala ti gulale'i'de!

Bixhkia' byoj Gich La'ay ni

³⁰ Le zian le runn'be' yëla wak beene Jesús lau'ke bënni useed kie', le ni ti nayoj'k lu Gich ni.

³¹ San le ni nayoj'k naar lbi'ili tzajle'li ki Jesús nake Le' Cristo, Xi'ine Dios, len na' tzajle'li gap'li yëla naban lu ne'e Le'.