SAN JUAN 2 - Porciones en Zapoteco de las Delicias

Tu utzag'na' lu yëdz Caná ki Galilea

¹ Kati guk tson dza gyu'u tu utzag'na' Caná tu yëdz ki Galilea. Na' zuaanu xhne'e Jesús,

² ati Jesús len bënni useed kie' lekz'ka' gululiidz'ke leke naar tzjake utzag'na' ni.

³ Bubiidx nup uva len xhne'e Jesús guudx'nu'ne: —Tir de kieke nup uva.

⁴ Jesús bubi'e kieenu diidza: —Nguul, ¿Bixhkia' reu' neda le ni? Ti rdxiini dza glui'a nuxh naka.

⁵ Leenu re'nu'ne bënni'a taga'a'ke la'wa'gu: —Gulgun yugute' le Jesús gie' lbi'ili.

⁶ Nakua' na' xop yu'su giaj ga tage'e nis le tuguu'ne dxin bënni Judea ka chi naleeb'kde tuune kati tupa'a kuin'ke. Tu tu yu'su ni raki ka tu gayua' yë'ën nis.

⁷ Jesús gudxe bënni'a taga'a'ke la'wa'gu: —Guludza' nis yu'su giaj ni. Guludza'ra'ke ley,

⁸ ati Jesús gudxe leke: —Na'a gulkuiaj lati ati gultzajua' len bënni'a nak lu ne'e lni ni. Ati ka gluune.

⁹ Bënni nak lu ne'e lni ni byue' nis'a chi nu'ueak nup uva zala ti nëëz'de gaxh broj, leez'ke bënni'a taga'a'ke la'wa'gu nëëzi'kde koma leke gulabiaj'ke nis'a, lena'a bënni'a nak lu ne'e lni ni bliidze bënni'a rtzag'ne'e.

¹⁰ Len gudxe le': —Yugute' bunach tage'e zia'a nup uva le rdui'r zxhi' len kati chi tazuudxi'de rge'e nup uva le ti nak'tek. San li' na'ar zia'a gliiju nup uva zxhi'a.

¹¹ Le ni beene Jesús lu yëdz Caná ki Galilea guk le zia'al ki yugute' le glunn'be' yëla wak xhën le blui' yëla xhën kie' Jesús; len bënni useed kie' gulayajle'ke Le'.

¹² Gdëëd le ni zuwëëje Cafarnaúm, zudzaage'nu xhne'e, bënni bë'che'e len bënni useed kie'; len ni' gulakua'ke chop tson dza.

Jesús rpe'e yu'u gdou'

¹³ Jesús gyiije Jerusalén koma chi za' ga'la lni ki Pascua kieke bënni Judea.

¹⁴ Ati lu gdou'a budzëël'de bënni tuti'i'ke'ba beedx, bëku'xhiila, palom len lekz'ka' bënni tutza'ke dumi kieke bënni.

¹⁵ Kati ble'i'de le ni, Jesús gde'le'e baada' ati bulaage yugute'ke ki gdou'a gdu'leen bëku'xhiila len beedx kieke'a. Bes'lasie dumi laz kieke bënni'a tutza'ke dumi len brixe ga nudxia'ke xhdumi'ke'a.

¹⁶ Ati bënni'a tuti'i'ke'ba palom'a gudxe leke: —¡Gulubiaj le ni! ¡Ti gun'li ye'i liidxe Xuuza!

¹⁷ Na' bënni useed kie' gyajnei'kde Diidza La'ay le rna: «Reegi'rlátzka laadxi'dau'a nia'a ki le tuune liidxu.»

¹⁸ Bënni Judea gulunaab'de le': —¿Nakxh gunn gak'be'i'tu ki napu yëla rnabe' guunu le ni?

¹⁹ Jesús bubi'e diidza: —Gulukin'j gdou' ni, len na' gak tson dza ulisa ley.

²⁰ Bënni Judea gle'ke le': —Xop'un iz gulayui'i'de dxin gluune gdou' ni, ¿Ati rna tson dza'z ulisu ley li'?

²¹ San gdou'a lea rue'e ki diidza Jesús nak larakz kuine.

²² Lena'a kati Jesús bubaane lu yëla gut, bënni useed kie' gyajnei'kde diidza'a be'e zia'a len gulayajle'ke Diidza La'ay len diidza be'e Jesús.

Jesús numbe'e yugute' bunach

²³ Tzal Jesús ni zue' Jerusalén lu lni ki Pascua bënni zian gulayajle'ke le' kati gulale'i'de yëla wak xhën le le' ruune.

²⁴ San Jesús ti rxhënilaadxe'e leke koma numbe'e yugute'ke.

²⁵ Ti nayaadzji'de nu kixhji'i le' ka tabëëz bunach, koma le' numbe'e ikj'laadxi'dau'e bënni.