SAN JUAN 19 - Porciones en Zapoteco de las Delicias

¹ Pilato gde'le'e Jesús len gnabe'i'de lagiine Le'.

² Bënni rajake gdil gluune tu breegi yëtzi, guludxie' ikje Jesús len guluxua'ke kuudze'e tu laari gach le zaki'i'tzki.

³ Chi nak ka gulabiige'e ga zue' Jesús, gulanake: —¡Xhën'te nake Bënni Rnabe' kieke bënni Judea! Len taga'pa'ke xage'e.

⁴ Pilato yubl brooje, len gudxe leke: —Guluyu'tzka, ni nuche'a'ne, naar gak'be'i'li ki tibi xhgia' budzëël'da nuune.

⁵ Jesús brooje dxia ikje breegi yëtzi'a len nakue' laari gach'da. Pilato gne': —¡Ni zue' bënni ni!

⁶ Kati bënni tunabe'i'de pxuuz len bënni tun'chi'ke gdou' gulale'i'de Le', gulazulau'ke tuskua'ke: ¡Bde'e lu yaag kruuz! ¡Bde'e lu yaag kruuz! Pilato gudxe leke: Guluche'e lbi'ili len gulude'e lu yaag kruuz, koma neda tibi xhgia' budzëël'da nuune.

⁷ Bënni tunabe'i'de bënni Judea, gulubi'ke kie' diidza: —Netu de xhba kietu, len lu xhba kietu rna ki rala gatie', koma bdëëde kuine ka Xi'ine Dios.

⁸ Kati Pilato byëën'de le ni guudxi'rde.

⁹ Yubl buaazie yulau'i len bnaab'de Jesús: —¿Gaxh bënni Li'? Ati Jesús tibi diidza bubi'e kie'.

¹⁰ Pilato gudxe Le': —¿Naru ti ubi'u kia' diidza? ¿Naru ti nëëz'du ki napa yëla rnabe' gda'a Li' lu yaag kruuz, len lekz'ka' napa yëla rnabe' ksaana Li'?

¹¹ Na' Jesús bubi'e diidza: —Tibi yëla rnabe' napu kia', nar'la Dios ti nunne lsenz; lena'a bënni'a bdëëde neda lu no'u dxia're xhgia' ka li'.

¹² Na'teez, Pilato rgiilje nakxh gunn ksaane Jesús; san bënni Judea guluskua'ke: —¡Xhki li' ksaanu'ne ti rdzaagu'ne dxia'a bënni rnabe'e yëdz'lyu ni! ¡Nu'ti'teez bënni, bënni ruune kuine bënni rnabe', ti rle'i'de dxia'a bënni rnabe'e yëdz'lyu ni!

¹³ Kati Pilato byëën'de le ni gliije Jesús len chi nak ka grë'e yulau'i, latj ga gxhi' lei' Gabatá lu diidza Hebreo, le ni re'e'ni gna Empedrado.

¹⁴ Nak dza'a tupa'a'ke kieke ki kie'la lni ki Pascua, gdu lau'i dza'a Pilato gudxe bënni Judea: —¡Na' zue' bënni rnabe' kieeli!

¹⁵ San leke guluskua'ke: ¡Gyaaj'leene ki'il! ¡Gyaaj'leene ki'il! ¡Bde'e lu yaag kruuz! Pilato bnaab'de leke: —¿Naru uda'ane lu yaag kruuz bënni rnabe'i'de lbi'ili? Len bënni tunabe'i'de pxuuz gulubi'ke diidza: —¡Tuuze bënni rnabe'i'de netu zue', bënni rnabe'e yëdz'lyu!

¹⁶ Na' Pilato bdëëde Jesús lu naa'ke naar luda'ke Le' lu yaag kruuz len leke guluche'e Le'.

Tude'e Jesús lu yaag kruuz

¹⁷ Jesús brooje nue'e yaag kruuz kie' naar tziije latj nazi' lei' «Dxit Ikji bunach» (lu diidza Hebreo nazi' lei' Gólgota).

¹⁸ Na' gulude'e Le' lu yaag kruuz, len kuiti le'e gulude'e ye chope' bënni, Le' bga'ane gatzj'lau'i.

¹⁹ Pilato bzooje lu blaag diidza le rna ki: «Jesús bënni Nazaret, Bënni Rnabe' kieke bënni Judea», len gnabe'e luga'la'ke ikji kruuz'a.

²⁰ Bënni zian bënni Judea glul'e lea nayoj'a koma latj ga guluda'ke Jesús lu yaag kruuz ga'la'z ra yëdz de, len lea nayoj'a, nayoj lu diidza hebreo, latín len griego.

²¹ Lena'a bënni tunabe'i'de pxuuz ki Judea gle'ke Pilato. —Ti gzooju: “Bënni Rnabe' kieke bënni Judea”, bzoj: “Bënni rne' ki nake Bënni Rnabe' kieke bënni Judea”.

²² Ati Pilato bubi'e kieke diidza: —Ka chi nuzooja'a, ka jka'ana ley.

²³ Bënni rajake gdil buudx gulude'e Jesús lu yaag kruuz, guluzi'e xhe' gulabiije ley tap'l len gulagis'ke tu ueaj kieke. Lekz'ka' gulazi'e laari'a rakue' lau'il xhe' san tibi diá ki sua, tuuz laari nak,

²⁴ bënni rajake gdil gle' lza'a'ke: —Ti kchëëza'ru ley, jkitj'ru le gunn'be' nuul'ru gala'ru laari'a. Naar yajtzaag ka nayoj lu Diidza La'ay: «Gulula'a'ke xha' len gulukitj'ke le gunn'be' nuxh'lke la'la'ke laari'a rakua' lau'il xha'.» Ki gluune bënni rajake gdil.

²⁵ Kuiti yaag Kruuz'a zeenu xhne'e Jesús len nguul xhiil'nu, María nguul kie' Cleofás len María Magdalena.

²⁶ Kati Jesús ble'i'de'nu xhne'e, len kuiti le'e'nu ze' bënni useed kie' bënni'a nadxi'i'tzki'de, gudxe'nu xhne'e: —Nguul, na' zue' bënni xi'inu.

²⁷ Chi nak ka gudxe bënni useed kie': —Na' zuaanu xhno'u. Na'teez bënni useed ni gxhi'e'nu liidxe.

Jesús ratie'

²⁸ Gdëëd le ni, Jesús nëëz'de ki yugute' chi glak, len naar gza'a le rna' Diidza La'ay: gne': —Rbiidxa.

²⁹ Na' zua tu yu'su yuudz nup uva zi. Guluspise tu laari lu nup uva, gluuge'e ley lu tu xhuuza'ne'i hisopo len guluze'ke ley rue'e.

³⁰ Jesús gui'e nup uva zi len gne': —Yugute' chi bza'a. Chi nak ka bzechu ikje len gutie'.

Tune'e gia'tuchi kuiti le'e Jesús

³¹ Nak dza'a tupa'a'ke kieke ki kie'la lni ki Pascua, ati bënni Judea ti te'en'de ki bënni nat'a laga'ane lu yaag kruuz dza tu'ueak'laadxi'ke bënni Judea koma le'te dza'a ni nak'tzka blou. Lena'a gulunaab'de Pilato ki gnabe'e lagitzje ni'a'ke bënni'a gulada'ke lu yaag kruuz len luzëtje leke.

³² Bënni rajake gdil yajake len gulagitzje ni'a'ke bënni'a guluda'ke lu yaag kruuz kuiti le'e Jesús.

³³ San kati gulabiige'e kuiti le'e Jesús, gulak'be'i'de ki chi natie'. Lena'a tir gulagitzje ni'e.

³⁴ San tue' kieke bënni'a rajake gdil bne'e kuiti le'e Jesús tu gia'tuchi len na'teez broj rën len nis.

³⁵ Bënni rlaabe le ni ble'i'de ley len ti rzi'ye'e; le' nëëz'de ki ti rzi'ye'e naar lekz'ka' lbi'ili tzajle'li.

³⁶ Koma le ni glakgak naar yajtzaag le rna' Diidza La'ay: «Gat'ga zua dxit kie' lagitzje.»

³⁷ Len ga yubl Diidza La'ay rna': «Ulale'i'de bënni'a gulune'e gia'tuchi kuiti le'e.»

Tuka'che'e Jesús

³⁸ Gdëëd le ni, José bënni Arimatea, bnaab'de lsenz Pilato naar ue'e Jesús. José nake bënni useed kie' Jesús baga'chi'z, koma raadxi'de bënni tunabe'ke Judea. Pilato bnëëdzje lsenz kie' José, ati le' bue'e Jesús.

³⁹ Lekz'ka' Nicodemo, bënni'a yaje'leene diidza Jesús chi'dzë'ël, bdxiine nue'e ka tu'gayua' gia le rla' xhixh, nuchixhi'de mirra len áloe.

⁴⁰ Na' José len Nicodemo guluzi'e Jesús len guluchël'de Le' laari le rla' xhixh, ka naleeb'kde tuune bënni Judea kati tuka'che'e bënni nat kieke.

⁴¹ Latj ga gulude'e Jesús lu yaag kruuz zua' tu layeel len lu layeel ni zua tu ba kub ga nutunu tagui'i'de.

⁴² Na' gulagu'e Jesús, koma baa zua ga'la ati chi zua sulau dza tu'ueak'laadxi'ke bënni Judea.