SAN JUAN 17 - Porciones en Zapoteco de las Delicias

Jesús rnaabe kieke bënni useed kie' lau'e Dios

¹ Buudx be'e diidza ni, Jesús byue' xhba len gne': «Xuuza, chi bdxin ur: beene xhën Bënni Xi'inu, naar Le' guune Li' xhën.

² Koma li' nunëëdzju yëla rnabe' kie' Bënni Xi'inu ki gnabe'i'de yugute' bunach, naar gnëëdzje yëla naban tzalzu kieke bënni'a bnëëdzju'ne kie'.

³ Ati yëla naban tzalzu nak ki lumbe'ke Li', lazdui'de Dios li, len Cristo bënni'a psë'lu'ne.

⁴ »Neda chi beena Li' xhën lu yëdz'lyu ni, koma chi psiuudxa dxin le bzu' lu na'a.

⁵ Na'a, Xuuza, ben neda xhën lau'u ka nak'kza xhën zia'at kati zia'a ga'ta yëdz'lyu ni.

⁶ »Bënni'a grë'ku'ne lu yëdz'lyu ni naar gunn'ku'ne kia', chi gdixhji'kda'ne nuxh naku. Kiu' nakik'de len Li' benn'ku'ne kia', ati chi guluzenaage xhtiidzu'u.

⁷ Na'a chi nëëzi'kde ki yugute' le Li' bennu kia', Li' nunnu ley;

⁸ koma chi gdixhji'kda'ne xhtiidzu'u le bennu kia' len leke gulazi'ke ley. Gulak'be'i'de ki leel za'a kiu', len tayajle'ke ki Li' psë'lu'u neda.

⁹ »Ratayui'da Li' kieke; ti ratayui'da Li' kieke bënni'a nakik'de ki yëdz'lyu ni, kie'z'ke bënni'a nunn'ku'ne kia', koma nakik'de kiu'.

¹⁰ Yugute' le naki kia', kiu' naki, len yugute' le naki kiu', kia' naki; len yëla xhën kia' rlui'lau'i len leke.

¹¹ »Neda tir sua' yëdz'lyu ni san leke ulakua're yëdz'lyu ni, tzal'za neda wëëda naar sua' len Li'. Xuuza La'ay, ben'chi'ke len yëla rnabe' le nap lou', le bennu kia', naar lak'ke tuuz ka nak'ru ro'u nak'ru tuuz.

¹² Kati gzua' len leke lu yëdz'lyu ni ben'chi'ka'ne len yëla rnabe' le nap lou', le bennu kia'. Len nutunu bënni gnitie', gnitie' bënni'a chik'z nanitie' naar guk ka rna' Diidza La'ay.

¹³ »Na'a zuza'a ga zu' Li'; san rui'a diidza ni tzal zua' lu yëdz'lyu ni, naar leke ludziij'de ka rudziij'da neda.

¹⁴ Chi gdixhji'kda'ne xhtiidzu'u, san bunach yëdz'lyu ni talei'de leke koma leke ti nakik'de ki yëdz'lyu ni, ka lekz'ka' neda ti naki'da ki yëdz'lyu ni.

¹⁵ Ti rnaab'da Li' kua'ku'ne ki yëdz'lyu ni rnaaba gun'chi'i'ku'ne kie' bënni xëwi.

¹⁶ Ka neda ti naki'da ki yëdz'lyu ni lekz'ka' leke ti nakik'de ki yëdz'lyu ni.

¹⁷ Bubiaj'ke kiu' kiizi lu yëla li: xhtiidzu'u nak yëla li.

¹⁸ Ka psë'lu'u neda ladj'ke bënni nakik'de ki yëdz'lyu ni, lekz'ka' neda rsë'la'ka'ne ladj'ke bënni nakik'de ki yëdz'lyu ni.

¹⁹ Lena'a neda kie'teezu chi bdëëda kuina nia'a kieke leke, naar lekz'ka' leke larooje kiizi lu yëla li.

²⁰ »Ti rnaaba kie'z'ke bënni ni, lekz'ka' rnaaba kieke bënni zia'a layajle'ke neda kati layëën'de diidza'a le lui'ke leke.

²¹ Rnaab'da Li' ki yugute'ke lake tuuz; ka Li' zu' len neda len neda zua' len Li', lekz'ka' leke lakua'leene ro'u, naar bunach yëdz'lyu ni layajle'ke ki Li' psë'lu'u neda.

²² Larakz yëla xhën le bennu kia', be'ka'ne, naar lake tuuz, ka nak'ru ro'u tuuz:

²³ neda sua' len leke len Li' su' len neda, naar gdu ka nak'ke lak'ke tuuz, naar bunach yëdz'lyu ni lak'be'i'de ki Li' psë'lu'u neda, len nadxi'ik'du'ne ka nadxi'i'du neda.

²⁴ »Xuuza, Li' benn'ku'ne kia' len re'en'da lakua'ke len neda ga neda sua', naar lale'i'de yëla xhën kia', yëla xhën le bennu kia'; koma bdxi'i'du neda zia'at kati zia'a ga'ta yëdz'lyu ni.

²⁵ Xuuza dxia'a, bunach nakik'de ki yëdz'lyu ni ti numbe'ke Li'; san neda numbe'a Li', ati bënni ni nëëzi'kde ki Li' psë'lu'u neda.

²⁶ Chi blui'kda'ne nuxh naku, len uluir'kda'ne, naar yëla nadxi'i kiu' neda sua len leke, ati naar kuin'kza sua' len leke.»