SAN JUAN 16 - Porciones en Zapoteco de las Delicias

¹ »Le ni rea' lbi'ili naar ti nit'li yëla rajle' kieeli len neda.

² Ulabiaj'ke lbi'ili ki yu'u useed len udxin dza kati nu'ti'teez nu gdëëdi lbi'ili guuni leke ki ka' tuune xhchiine Dios.

³ Le ni luune koma ti numbe'i'kde neda len ti numbe'i'kde Xuuz'ru.

⁴ Rgixhji'da lbi'ili le ni naar kati gdxin dza'a, tzajnei'li ki chik'z nagixhji'da lbi'ili le ni. »Ti guudxa lbi'ili le ni zia'at koma ni zua' len lbi'ili.

Le run Bë' La'ay kie' Dios

⁵ »San na'a wëëja naar sua' len nu psë'la neda len gat'ga zuaali rnaabi'li neda gaxh tziija;

⁶ San rbë'l'li rzua'yechi'tzka'li koma guudxa lbi'ili le ni.

⁷ San ti rzi'ye'a: Wak'r kieeli dxia'a wëëja. Koma xhki ti wëëja, nu Ruwi'xhëën ti giide dusue' len lbi'ili; san xhki wëëja, neda usë'la'ne kieeli.

⁸ Kati Le' giide guune ga bunach yëdz'lyu ni lak'be'i nuxh nap dula, nuxh ryaazlaadxe'e Dios, ati nuxh si' yëla rchuug'be'e kie' Dios.

⁹ Nuxh nap dula: bënni ti tayajle'ke neda;

¹⁰ nuxh ryaazlaadxe'e Dios: neda, koma wëëja len Xuuz'ru ati lbi'ili tir gle'i'li neda;

¹¹ Nuxh si' yëla rchuug'be' kie' Dios: Bënni rnabe'e yëdz'lyu ni, koma Dios chi nuchuug'be'e kie'.

¹² »Le zian ni rala kixhji'da lbi'ili san na'a ti gunn tzajni'i'li ley.

¹³ Kati gdxiine Le' Bë' ki Yëla Li, Le' glui'de lbi'ili gdu yëla li; koma ti gui'e diidza le gnaaz kie', gnaaze le ryëën'de ati ugixhji'de lbi'ili yugute' le rala lak.

¹⁴ Le' glui'e yëla xhën kia' koma uzi'e le naki kia' len glui'de ley lbi'ili.

¹⁵ Yugute' le naki kie' Xuuz'ru lekz'ka' naki kia'; lena'a gnia' ki Le' Bë' La'ay uzi'e le naki kia' len glui'de ley lbi'ili.

¹⁶ »Ye tuchi'iz ati tir gle'i'li neda, san ye tuchi'iz ka' tzei ule'i'li neda.

Yëla ruwi'i'ni ueaki yëla rudziiji

¹⁷ Na' la'ke bënni useed kie' gulunaabi lza'a'ke: —¿Bixh re'en'de gne' len diidza ni? Rne' ki ye tuchi'iz ati tir gle'i'ru'ne, san ye tuchi'i ka' tzei na' ule'i'ru'ne, ati nak koma Le' wëëje ga zue' Xuuz'ru.

¹⁸ ¿Bixh re'en'de gne' len diidza ni “ye tuchi'iz”? Ti rajni'i'ru bixh diidza rui'e.

¹⁹ Jesús guk'be'i'de ki te'en'de bi lunaab'de Le', na' gudxe leke: —Neda guudxa lbi'ili ki ye tuchi'iz ati tir gle'i'li neda, san ye tuchi'iz ka' tzei ule'i'li neda. ¿Naru le ni rnaabi lza'a'li?

²⁰ Le nak'te rea' lbi'ili ki ubëëdx'li len wi'i'ni'li tzal bunach yëdz'lyu ludziiji. San, zala ruwi'ni'li, yëla ruwi'i'ni kieeli ueaki yëla rudziiji.

²¹ Kati nguul rala suabi bi'i kieenu, rtzaag'nu koma chi rala suabi; san kati chi gzua'bi ral'laadxi'nu yëla rtzaag kieenu'a tzka rudziiji'nu ki chi gzua'bi tuubi bi'i bënni'du lu yëdz'lyu.

²² Lekz'ka' rtzaag'li lbi'ili na'a; san ule'i'da lbi'ili ati laadxi'dau'li gdze'iz yëla rudziiji, tu yëla rudziiji le nutunu gunn kua.

²³ »Kati gdxin dza'a tirbi gnaabi'li neda. Le nak'te rea' lbi'ili ki Xuuz'ru gunne kieeli yugute' le gnaabi'li'ne lu La'.

²⁴ Na'a tibi rnaabi'li lu La'; gulunaab len uzi'li, naar gza'a yëla rudziiji kieeli.

Cristo, bde'li'de lu yëdz'lyu ni

²⁵ »Le ni guudxa lbi'ili len diidza run lsaki'i; san zia'a za' dza kati tir gui'leena lbi'ili diidza run lsaki'i, diidza yaalj gui'leena lbi'ili kie' Xuuz'ru.

²⁶ Na' gdxin dza'a, lbi'ili gnaabi'li'ne Xuuz'ru lu la'; ati ti rnia' ki neda gatayui'da'ne Xuuz'ru nia'a kieeli,

²⁷ koma kuin'kze Xuuz'ru nadxi'i'de lbi'ili. Nadxi'i'de lbi'ili koma lbi'ili nadxi'i'li neda ati koma gyajle'li ki za'a kie' Dios.

²⁸ Ga zue' Xuuz'ru brooja naar biida yëdz'lyu ni, na'a rka'ana yëdz'lyu ni naar wëëja len Xuuz'ru.»

²⁹ Na' bënni useed kie' gulanake: —Na'ar ru'u diidza yaalj tir rguunu dxin diidza run lsaki'i.

³⁰ Na'a rak'be'i'tu ki yugute' nëëz'du len ti nayaadzji'du nu bi gnaabi Li'. Lena'a rajle'tu ki zo'u kie' Dios.

³¹ Jesús bubi'e diidza: —¿Ati chi rajle'li na'a?

³² Koma za' dza, len na'a nak dza'a, kati lbi'ili gas'laz'z'li ka', len uka'an'li neda tuuza. San ti zua' tuuza, koma Xuuz'ru zue' len neda.

³³ Yugute' le ni rea' lbi'ili naar suáli lu yëla rë'dxi na'a zuaali len neda. Lu yëdz'lyu ni, utzaag'li; san gulutip'laadxi'li: neda chi bde'li'da lu yëdz'lyu ni.