SAN JUAN 15 - Porciones en Zapoteco de las Delicias

Lba ki uva dxia'a

¹ »Neda naka lba ki uva dxia'a, ati Xuuza run'chi'e ley.

² Xhki tu xhuuza'na'a ti rbia uva, rchuuge ley; san xhki rbia uva, rchuuge le ku nak len rpe'e ki naar kuia'r zxhëni.

³ Lbi'ili chi nak'li dxia'a nia'a ki diidza le gdixhji'da lbi'ili.

⁴ Gulsuátekz len neda ka zua' neda len lbi'ili, tu xhuuza'ne'i ti runn kuia uva tuiizi xhki ti nagie'la lu lba ki; lekz'ka' lbi'ili xhki ti zuaali len neda.

⁵ »Neda naka lba ki uva len lbi'ili nak'li xhuuza'ne'i. Bënni zue' len neda, len neda zua len le', nake ka xhuuza'ne'i le rbia'tzka xhlu'li'i, koma lbi'ili ti gunn bi gun'li xhki ti zuaali len neda.

⁶ Bënni ti zue' len neda, uluzal'e le' ga yubl len gbiidxe ka rak ki xhuuzi'i lbaa le tutuube len tuzeegie.

⁷ »Xhki lbi'ili zuaali len neda len xhtiidza'a zua' len lbi'ili, le re'eni'z'li gulunaab len uzi'li ley.

⁸ Kati kuia'tzka xhlu'li'li ului'lau'i yëla xhën kie' Xuuza, len gak'li gdulei'ti bënni useed kia'.

⁹ Neda nadxi'i'da lbi'ili ka nadxi'i'de neda Xuuza; gulsua lu yëla nadxi'i kia'.

¹⁰ Uzuaali lu yëla nadxi'i kia' xhki rzenaagi'li xhba kia', ka neda rzenaaga xhba kie' Xuuza len zua' lu yëla nadxi'i kie'.

¹¹ »Ki rui'leena lbi'ili diidza naar udziiji'li len neda len yëla rudziiji kieeli gza'a.

¹² Le ni nak xhba kia': Ki gdxi'i lza'a'li ka neda chi bdxi'i'da lbi'ili.

¹³ Nutunu nap yëla nadxi'i xhën ka'ti, ka bënni run'gu'un'de yëla naban kie' nia'a kieke bënni rdzaage dxia'a.

¹⁴ Xhki gun'li le neda rea' lbi'ili, nak'li bënni rdzaag'ka'ne dxia'a.

¹⁵ Neda ti raki'da lbi'ili ka bënni wendxin kia', koma bënni wendxin ti nëëz'de bi ruune bënni xaane, raki'da lbi'ili ka bënni rdzaag'ka'ne dxia'a, koma chi pseed'da lbi'ili yugute' le gudxe neda Xuuza.

¹⁶ Keg lbi'ili grëëli neda, neda grëa' lbi'ili len bzua' lu naa'li kuia'tzka xhlu'li'li len xhlu'li'li ni ti nit'lau, naar yugute' le gnaabi'li'ne Xuuz'ru lu La', Le' gunne.

¹⁷ Le ni rnabe'i'da lbi'ili: Ki gdxi'i lza'a'li.

Bunach yëdz'lyu talei'de Jesús len bënni tayajle'ke Le'

¹⁸ »Xhki bënni yëdz'lyu ni talei'de lbi'ili, nëëzi'li ki zia'a neda gulalei'de.

¹⁹ Nar'la naki'li ki yëdz'lyu ni, bunach uladxi'i'de lbi'ili ka nadxi'ik'de bënni nakik'de kieke. San neda grëa' lbi'ili ladj'ke bënni nakik'de ki yëdz'lyu ni, lena'a bunach yëdz'lyu ni talei'de lbi'ili, koma tir naki'li ki yëdz'lyu ni.

²⁰ Gultzajnei le ni guudxa lbi'ili: “Gat'ga zue' bënni useed nak're xhën ka bënni pseed'de le'” Xhki neda chi gululaage lekz'ka' ululaage lbi'ili: len xhki chi guluzenaage xhtiidza'a lekz'ka' uluzenaage xhtiidza'li.

²¹ Yugute' le ni lusaka'ke lbi'ili nia'a kia', koma ti numbe'ke nu nusë'la neda.

²² »Bënni ni tibi xhgia' labia'ke nar'la neda ti duje'leen'ka'ne diidza. San na'a ti runn ti lazi'lu'naa'ke ki xhtu'la'ke;

²³ koma bënni talei'de neda, lekz'ka' talei'de Xuuza.

²⁴ Tibi xhgia' labia'ke nar'la ti beena yëla wak lau'ke le nutunu ruuni'kz; len zala chi gulale'i'de ley ni talei'de neda len Xuuza lekz'ka' ni talei'de.

²⁵ San le ni rak koma rala gak ka rna diidza le nayoj lu xhba kieke: “Gulalei'de neda len keg bi nuuna kieke.”

²⁶ »San kati giid nu Ruwi'xhëën, nu ksë'la'a ulaaz kie' Xuuz'ru, Le' Bë' ki Yëla Li le za' kie' Xuuz'ru, Le' dujxaka'lau'e kia'.

²⁷ Ati lekz'ka' lbi'ili dujxaka'lau'li kia', koma zia'at zuaali len neda.