SAN JUAN 13 - Porciones en Zapoteco de las Delicias

Jesús rgiibe ni'a'ke bënni useed kie'

¹ Zia'a gdxin lni ki Pascua len Jesús guk'be'i'de ki chi bdxin dza rala jka'ane yëdz'lyu ni naar tzajdzaage Xuuze. Len Le' bdxi'i'tikz'de bënni'a da'ke Le' lu yëdz'lyu ni, ni guti'de bdxi'i'de leke.

^2-4 Bënni xëwi chik'z glu'e ikj'laadxi'dau'e Judas bënni xi'ine Simón Iscariote gdëëde Jesús lu naa'ke bunach. Nëëz'de Jesús ki Dios nusë'le'e Le', ati rala wëëje len Dios, len Xuuz'ru nunëëdzje kie' gdu yëla rnabe'; lena'a tzal ta'we xhtzë', gyase, gdue' laari'a nuxue' kuudze'e ati beege'e lsiine'e tu laari tzala'a.

⁵ Chi nak ka gde'e nis lu xhiiga na' gdiibe ni'a'ke bënni useed kie' len buspiidx'de len laari tzala'a nuuge'e lsiine'e.

⁶ Kati gula kiibe ni'e Simón Pedro, bënni ni gne' —Xan ¿Naru Li' kiibu nia'a?

⁷ Jesús bubi'e kie' diidza. —Na'a ti rajni'i'du bixha ruuna, utzajni'i'du na' chi gdëëd.

⁸ Pedro gudxe Le': —¡Ti gi'en'kzda kiibu nia'a! Jesús bubi'e diidza: —Xhki ti kiiba ni'u, ti gunn gaki'du kia'.

⁹ Simón Pedro gudxe Le': —¡Xan, xhki ka nak, keg ni'a'za kiibu, gdiib lekz'ka' na'a len ikja!

¹⁰ Ati Jesús bubi'e kie' diidza: —Bënni zia'a buudx guuzje tuuz ni'e nayaadzji kiibe; koma chi nu'ueake dxia'a, ati lbi'ili chi nak'li dxia'a, san la'li' ti nak'li dxia'a.

¹¹ Gne': «Keg yugute'li nak'li dxia'a», koma nëëz'de nuxha' rala gdëëd Le' lu naa'ke bunach.

¹² Buudx gdiibe ni'a'ke, Jesús buxue' laari kuudze'e len bubë'e ga ta'we ati gudxe leke: —¿Ba rajni'i'li bixha beena kieeli?

¹³ Lbi'ili re'li neda Bënni useed len Xan, len bliili ka' nak, koma leel naka lea rnaali'a.

¹⁴ Len xhki neda Bënni useed len Xan chi gdiiba ni'a'li lekz'ka' lbi'ili rala kiib'li ni'a' lza'a'li.

¹⁵ Neda chi blui'da lbi'ili ka rala gun'li naar lekz'ka' lbi'ili gun'li larakz lea chi beena kieeli.

¹⁶ Le nak'te rea' lbi'ili ki gat'ga zue' bënni useed nak're xhën ka bënni pseed'de le', len nutunu gbaaz nak're xhën ka bënni nusë'le'e le'.

¹⁷ Bixhgaba'li xhki rajni'i'li le ni len run'li ka rna.

¹⁸ »Keg ki yugute'li rui'a diidza; nëëz'da nuxha' grëa'. San rala gak ka nayoj lu Diidza La'ay: “Bënni'a raagu'leene neda, rudabaage'e neda”

¹⁹ Rgixhji'ti'da lbi'ili na'a le ni naar kati lakgak, lbi'ili tzajle'li ki Neda naka Le' Cristo.

²⁰ Le nak'te rea' lbi'ili ki bënni rzi'e bënni'a nusë'la'ne, neda rzi'e; len bënni rzi'e neda rzi'e nu nusë'la neda.»

Jesús rgixhjë'e ki Judas udëëde Le' lu naa'ke bunach

²¹ Gdëëd gne' le ni, Jesús bui'i'ni'tzki'de, ati gne': —Le nak'te rea' lbi'ili ki tuuli lbi'ili udëëd'li neda lu naa'ke bunach.

²² Bënni useed kie' gulazulau'e tuyu lza'a'ke, ati ti nëëzi'kde nuxh ki'a rui'e diidza.

²³ Tue' kieke bënni useed kie', bënni'a Jesús nadxi'i'tzki'de, rë'e kuiti'le'e tzal ta'we xhtzë'

²⁴ ati Simón Pedro ben ni'a'ne'e naar gnaab'de Le' nuxh ki'a rui'e diidza.

²⁵ Le' gbiige'e ye lati ga rë'e Jesús na' bnaab'de Le': —Xan, ¿Nuxha'a?

²⁶ Jesús bubi'e diidza: —Bënni'a gnëëdzja kie' tzarua'a yët'xhtiil le guspisa, bënni na'a. Buspis'tie' tzarua'a yët'xhtiil len bnëëdzje kie' Judas bënni xi'ine Simón Iscariote.

²⁷ Ka buudx gxhi'e yët'xhtiil'a Judas, bënni xëwi gne'e lu laadxi'dau'e. Ati Jesús gudxe le': Ben'te le rala guunu.

²⁸ San keg tue' kieke bënni'a ta'we xhtzë'a gulayajni'i'de bixhkia' gudxe ka' le'.

²⁹ Ati koma Judas nak lu ne'e yëxhj dumi, la'ke glaki'de ki Jesús gudxe le' bi ga'awe ki lni'a u gnëëdzje lati kieke bënni yechi.

³⁰ Ka buudx gda'we yët'xhtiil'a Judas brooje. Len chi na'chul.

Xhba kub kie' Dios

³¹ Buudx brooje Judas, Jesús gne': —Na'a glui' lau'i yëla xhën kie' Xi'ine Bënni, len yëla xhën kie' Dios glui' lau'i len Le'.

³² Len xhki Xi'ine Bënni glui'e yëla xhën kie' Dios, lekz'ka' Dios ului'e yëla xhën kie' Xi'ine; len chi zua'te glui'e ley.

³³ Xi'ina'du, neda tir zua' xhtzei len lbi'ili. Ugiilj'li neda san ka guudx'ka'ne bënni Judea rea' lbi'ili na'a: Ti gunn sa'li ga neda ziija.

³⁴ Xhba kub kie' Dios runna kieeli: Gdxi'i lza'a'li. Ka nadxi'i'da lbi'ili neda, ka' rala gdxi'i lza'a'li.

³⁵ Xhki gdxi'i lza'a'li, yugute' bunach yëdz'lyu ulak'be'i'de ki nak'li bënni useed kia'.

Jesús rgixhjë'e ki Pedro ti si'lu'ne'e ki numbe'e Jesús

³⁶ Simón Pedro bnaab'de Jesús: —Xan, ¿Gaxh tziiju? —Jesús bubi'e diidza —Ga neda tziija ti gunn sa'leenu neda na'a; san na' tëëd ni gunn sa'leenu neda.

³⁷ Pedro gudxe Le': —Xan, ¿Bixhkia' ti gunn sa'leena Li' na'a? ¡Zua' si'na gdëëda yëla naban kia' nia'a kiu'!

³⁸ Jesús bubi'e diidza: —¿Blikz'du zu' si'na gdëëdu yëla naban kiu' nia'a kia'? Le nak'te rea' li' ki kati zia'a këëdx'ba xi'in'druuz, tson lzu ti si'luno'u ki numbe'u neda.