SAN JUAN 11 - Porciones en Zapoteco de las Delicias

Yëla gut kie' Lázaro

¹ Zue' tue' bënni re'i'de le' Lázaro, nake bënni Betania yëdz kieenu María len nguul xhiil'nu Marta.

² María ni nak'nu nguul zaane Lázaro, leenu'a guk'nu nguul'a blaalj'nu le rla' xhixh lu ni'e Jesús len buspiidx'nu ley len gitza ikj'nu.

³ Ka guk, na' groptek'nu nguul ni gulunabe'nu tzajëëdx'ke Jesús: —Xan, bënni'a rdzaag'tzku'ne dxia'a re'i'de.

⁴ Kati byëën'de le ni Jesús gne': —Baya' ni ti nak le glui'lau'i yëla gut, nak naar glui'lau'i yëla xhën kie' Dios lekz'ka' yëla xhën kie' Xi'ine Dios.

⁵ Zala Jesús nadxi'i'tzki'de Lázaro, Marta len nguul xhiil'nu'a,

⁶ kati gulagixhji'de Le' ki Lázaro re'i'de bga'an're ye chop dza ga zue'a.

⁷ Gdëëd'a gudxe bënni useed kie': —Gultza' le yubl Judea.

⁸ Bënni useed kie' gle'ke Le': —Bënni Useed, kati dza'a na'z bënni Judea gle'en'de ludëëd'de Li' tzka luchiije li' giaj, ¿ati na'a yubl re'en'du tziiju ni'?

⁹ Jesús gudxe leke: —¿Naru keg chin'nu ur nap tu dza? Xhki nu bënni rde' te'dza, ti rtupe, koma rle'i'de yëla yeni ki yëdz'lyu ni;

¹⁰ san xhki nu bënni rde' reel, rtupe, koma yëla yeni ti zua'leen le'.

¹¹ Lekz'ka' gne': —Lázaro bënni'a rdzaag'ru'ne dxia'a rasie', san utzajspaana'ne.

¹² Bënni useed kie' gle'ke Le': —Xan, xhki rasie', re'e'ni gna ki ueake.

¹³ San le gudxe leke Jesús nak ki Lázaro chi gutie', ati bënni useed kie' glaki'de ki ras'ze.

¹⁴ Na' Jesús gdixhji'de leke dxia'a'tit: —Lázaro chi natie'.

¹⁵ Len rudziij'da le ti gzua' ni', koma le ni nak'r dxia'a kieeli, naar tzajle'li. San gultza' tzajyu'ru'ne.

¹⁶ Na' Tomás, bënni'a te'ke le' Bënni Kuach, gudxe ye la'ke bënni useed'a: —Gultza' tziaj'ru lekz'ka' ro'u, naar gat'leen'ru'ne.

Jesús nake yëla naban len ruune ga bënni nat lubaane lu yëla gut

¹⁷ Kati bdxiine, Jesús gnëëz'de ki chi guk tap dza bga'che'e Lázaro.

¹⁸ Betania zua' ga'la ki Jerusalén, ka gatzj ur nëëz;

¹⁹ bënni zian bënni Judea yajake yajyu'ke'nu Marta len María, naar luwi'xhën'ke'nu le gutie' bënni zank'nu.

²⁰ Kati Marta gnëëzi'nu ki Jesús chi ze'e, broj'nu zajxi'nu'ne; ati María nu'yu'uz bga'an'nu.

²¹ Marta guudx'nu'ne Jesús: —Nar'la zu' ni Xan, ti gatie' bënni zaana'a.

²² San nëëz'da ki le Li' gnaab'du'ne Dios Le' gunne.

²³ Jesús gudxe'nu: —Bënni zaanu ubaane lu yëla gut.

²⁴ Marta guudx'nu'ne: —Nëëz'da ki le' ubaane lu yëla gut kati gdxin dza uudx ki yëdz'lyu, kati bënni nat lubaane lu yëla gut.

²⁵ Na' Jesús gudxe'nu: —Neda naka yëla ruban lu yëla gut len Yëla Naban. Bënni rajle'e neda, zala gat'tze, uyu'u yëla naban kie';

²⁶ ati nu'ti'teez bënni, bënni yu'u yëla naban kie' len tzajle'e neda, ti gat'kze. ¿Rajle'u le ni?

²⁷ Leenu guudx'nu'ne: —Xan, neda rajle'a ki Li' naku Le' Cristo, Le' Xi'ine Dios, bënni'a rala'kz giide yëdz'lyu.

Jesús rbëëdxe kuiti ba kie' Lázaro

²⁸ Buudx gnaanu ki, Marta yajliidz'nu María nguul xhiil'nu, len baga'chi'z guudx'nu leenu: —Ni chi ble'e Bënni Useed len rliidze li'.

²⁹ María buudx'z byëëni'nu le ni, gyas'nu len yajyu'nu'ne Jesús.

³⁰ Jesús ti ryaazi'de lu yëdz'a; ni ze' ga budzaage'nu Marta.

³¹ Bënni Judea bënni'a nakua'ke tuwi'xhëëne'nu kati gulale'i'de ki María gzui'nu len ziubz'nu broj'nu, yajak'leene'nu koma glaki'de ki ziaj'nu zajchëëdx'nu ra baa.

³² Kati María bdxin'nu ga ze' Jesús, bzechu xhiib'nu xhni'e, len guudx'nu'ne: —Nar'la zu' ni Xan, ti gatie' bënni zaana'a.

³³ Kati Jesús ble'i'de ki María rbëëdx'nu len lekz'ka' bënni Judea bënni'a guladxin'leene'nu, ben'yechi Le' len bui'i'ni'de,

³⁴ ati bnaab'de leke: —¿Gaxh pka'chi'li'ne? Gle'ke le': —Xan, da duyue'.

³⁵ Jesús grëëdxe.

³⁶ Na' bënni Judea gulanake: —¡Guluyu'tzka bdxi'i'tzki'de le'!

³⁷ San ye la'ke gulanake: —Bënni ni buune bënni lau'chul, ati ¿Naru ti benn bi guune naar ti gatie' Lázaro?

Lázaro rubaane lu yëla gut

³⁸ Yubl bui'i'ni'de Jesús len gbiige'e ra baa. Nak tu bloj giaj ati tu giaj nusiaj ley ga ta'a'ke.

³⁹ Jesús gne': —Gulkua giaj'a. Marta, nguul zaane Lázaro guudx'nu'ne: —Xan, chi rle'e zgut, koma chi guk tap dza gutie'.

⁴⁰ Jesús gudxe'nu: —Baxht guudxa li' ki xhki tzajle'u, ule'i'du yëla xhën kie' Dios.

⁴¹ Gulaguáke giaj'a, ati Jesús ryue' lu xhba na' gne': —Xuuza, runna li' yëla dexhken koma chi byëën'du neda.

⁴² Nëëz'da ki Li' ryëëni'tikz'du neda, san le ni rnia', naar bunach nakua' ni layajle'ke ki Li' psë'lu'u neda.

⁴³ Buudx gne' le ni, bisku'e: —¡Lázaro, buroj na'!

⁴⁴ Ati bënni'a gutie', brooje, naaga' ni'a ne'e len laari len lau'rue'e nadu'li tu laari naab'kde. Jesús gudxe leke: —Guluseedxe len gulusaane wëëje.

Tuune diidza lazëëne Jesús

⁴⁵ Lena'a bënni zian bënni Judea bënni'a yajak'leene'nu María len gulale'i'de le beene Jesús, gulayajle'ke.

⁴⁶ Ati la'ke yajyu'ke bënni fariseo len gululaabe kieke yugute' le beene Jesús.

⁴⁷ Na' bënni fariseo len bënni tunabe'i'de pxuuz gulutzaage yugute'ke bënni tabeki'xhbei'de lu gdou', len gulanake: —¿Bixh gun'ru? Bënni ni run'tzke yëla wak.

⁴⁸ Xhki gui'ru'ne latj, yugute' bunach ulayajle'e Le', ati bënni tunabe'ke Roma udujak'ke len udujenditj'kde gdou' len yëdz xhën kieeru.

⁴⁹ San tue' bënni le' Caifás, bënni nake pxuuz blou iz'a, gudxe leke: —Lbi'ili tibi nëëzi'li,

⁵⁰ len ti rak'be'i'li ki nak'r dxia'a kieeli ki tuuze bënni gatie' nia'a ki gdu yëdz, ka gdu yëdz xhën jgin'j.

⁵¹ Ati Caifás ti gne' le gnaaz kie', san, le nake pxuuz blou iz'a gne' diidza'a ulaaz kie' Dios, ki Jesús gatie' nia'a kieke bënni Judea;

⁵² len keg nia'az kieke bënni ni gatie', san lekz'ka' gatie' nia'a kieke yugute'ke bënni xi'ine Dios gap nakua'ke.

⁵³ Ati na'teez bënni tunabe'ke bënni Judea gluune diidza ludëëd'de Jesús.

⁵⁴ Lena'a Jesús tir gde' ladj'ke bënni Judea, san brooje ki Judea ati gyiije tu yu ga'la latj yu biidx, tu yëdz nazi' lei' Efraín. Na' bga'ane len bënni useed kie'.

⁵⁵ Lati'iz ryaadzji gdxin lni ki Pascua kieke bënni Judea, lena'a bunach zian ki yugute' yëdz zjake Jerusalén zia'al ki lni' ni, naar luune le chi naleeb'kde tuune kati tupa'a kuin'ke.

⁵⁶ Tadáke tugiilje Jesús, len lu gdou' tunaabi lza'a'ke: —¿Bixh ruuni lbi'ili? ¿Wiide lni u ti giide?

⁵⁷ Bënni fariseo len bënni tunabe'i'de pxuuz gulunabe'ke ki xhki nu nëëzi gaxh zue' Jesús, kixhjë'e, naar gunn lazëëne Le'.