SAN JUAN 10 - Porciones en Zapoteco de las Delicias

Bënni'a run'chi'e'ba bëku'xhiila

¹ Na' Jesús gudxe leke: «Le nak'te rea' lbi'ili ki bënni ti ryaazie ra puert ki li'aj kiek'ba bëku'xhiila, bënni gban len bënni tulatje yu'u nak'ke.

² San bënni ryaazie ra puert nake bënni'a run'chi'e'ba bëku'xhiila.

³ Bënni ze' ra puert rsaalje len bënni'a run'chi'e'ba bëku'xhiila tu tuuba rliidze'ba laaba, lek'ba tumbe'ba chi'e; na' rbiije'ba lu li'aj'a,

⁴ len kati chi guladach'ba gularoj'ba rnëëre lauk'ba len lek'ba rajak'leema le' koma tumbe'ba chi'e.

⁵ San, bënni'a ti numbek'ba ti rajak'leema le', taxhunjil'ba le', koma ti tumbe'ba chi'e.»

⁶ Jesús bnëëdzje kieke diidza run lsaki'i ni, san leke ti gulayajni'i'de lea gu'un'de gie' leke.

Jesús, bënni run'chi'e'ba dxia'a bëku'xhiila

⁷ Jesús yubl gudxe leke: «Le nak'te rea' lbi'ili: Neda naka puert'a ga tayaaz'ba bëku'xhiila.

⁸ Yugute'ke bënni'a gliide zia'al ka neda, glake bënni gban len bënni tulatje yu'u; san bëku'xhiila ti guluzenaagik'ba leke.

⁹ Neda naka puert'a: bënni ryaazie neda, ule'. Ryaazie len r'rooje ati rdzëël'de daka.

¹⁰ »Bënni gban riid'ze rdulaane, rdudëëd'de len rdujenditj'de; san neda za'a ki ga'ta kieeli yëla naban, tu yëla naban ras'rdxia.

¹¹ Neda naka bënni'a run'chi'e'ba dxia'a bëku'xhiila. Bënni'a run'chi'e'ba dxia'a bëku'xhiila rnëëdzje yëla naban kie' nia'a kiek'ba;

¹² san bënni'a run'ze dxin ki laaxhje, kati za'ba bëku'zuuga rka'ane'ba na' bëku'xhiila'a len rxhunje koma ti nake bënni run'chi'e'ba bëku'xhiila ati keg nak'kba bëku'xhiila kie'. Ati bëku'zuuga'a rlaag'ba bëku'xhiila'a len rus'laz'z'ba ka lek'ba.

¹³ Bënni ni rxhunje koma rki'iz le' laaxhje ti rki'i le' kiek'ba bëku'xhiila'a.

^14-15 »Neda naka bënni'a run'chi'e'ba dxia'a bëku'xhiila. Ka numbe'e neda Xuuza len neda numbe'a'ne, lekz'ka' numbe'ka'ba bëku'xhiila kia' len lek'ba numbek'ba neda. Neda rdëëda yëla naban kia' nia'a kiek'ba bëku'xhiila.

¹⁶ Nakuak'ba ye la'kba bëku'xhiila kia' ti dzë'ë'ba lu li'aj ni; lekz'ka' lek'ba rala tzajxhi'ka'ba. Lek'ba uluzenaagik'ba neda len tuuz li'aj layu'u'ba, len tuuza neda gaka bënni gun'chi'e'ba.

¹⁷ »Xuuz'ru nadxi'i'de neda koma neda rdëëda yëla naban kia' naar yuzi'a ley yubl.

¹⁸ Nutunu rgua yëla naban kia' kuin'kza rdëëda ley. Napa yëla rnabe' gdëëda ley len yuzi'a ley. Le ni gnabe'i'de neda Xuuza.»

¹⁹ Kati bënni Judea gulayëën'de diidza, yubl ka gularooje chop'l

²⁰ Bënni zian tanáke: —¿Bixhkia' rzeenagi'li'ne, la bë' xëwi yu'u Le' len chi rchixh ikje?

²¹ San ye la'ke tanáke: —Bënni yu'u le' bë' xëwi ti gunn gui'e ka diidza. ¿Naru wak bë' xëwi un le'ke bënni lau'chul?

Bënni Judea ti tazi'e Jesús

²² Nak beu' bë'gi', ati Jerusalén tuune lni ki kati gulagu'u'ke lu ne'e Dios gdou'.

²³ Jesús zue' lu gdou', len rde' ga nazi' lei' Nchiil kie' Salomón.

²⁴ Na' bënni Judea gulabia'niidi'de le' len gulunaab'de le': —¿Batxh'kz ksaanu gzu' netu bagi'i? Xhki li' naku Le' Cristo, gdixhji'i'ti netu.

²⁵ Jesús bubi'e diidza: —Chi gdixhjë'a san lbi'ili ti gyajle'li neda. Yugu le ruuna len yëla rnabe' kie' Xuuza, ley tunn'be dxia'a'tit;

²⁶ san lbi'ili ti rajle'li, koma ti nak'li bëku'xhiila kia'.

²⁷ Bëku'xhiila kia' numbek'ba chi'a len neda numbe'ka'ba ati rdujak'leema neda.

²⁸ Neda rnëëdzja kiek'ba yëla naban tzalzu len ti lat'kz'ba ati nutunu kua lek'ba lu na'a.

²⁹ Xuuza nunn'ke'ba kia', le nake xhën'te ka yugute', len nutunu gunn kua lek'ba lu ne'e.

³⁰ Neda len Xuuz'ru tuuz nak'tu.

³¹ Bënni Judea gulagie'le'e le yubl giaj ki lulaadxi'ke Jesús.

³² Ati Jesús gudxe leke: —Lu yëla wak kie' Xuuza le zian le dxia'a chi beena lau'li; ¿Nia'a ki bil'le glaadxi'li neda giaj?

³³ Bënni Judea gulubi'e diidza —Ti glaadxi'tu li giaj nia'a ki le beenu dxia'a, san nia'a ki diidza le rui'u koma nak diidza ku nak lau'e Dios, koma Li' naku bënni bunach ati rdëëdu kuinu ka Dios.

³⁴ Jesús gudxe leke: —Lu xhba kieeli nayoj: “Neda gnia' ki lbi'ili nak'li dios.”

³⁵ Nëëzi'ru ki le rna Diidza La'ay nutunu gunn udabaaga; len Dios psi'e lake dios bënni'a psë'le'e kieke xhtiidze'e.

³⁶ Ati xhki Dios gliije neda kiizi ati psë'le'e neda yëdz'lyu, ¿Bixhkia' rnaali ki neda rui'a diidza ku nak lau'e Dios, le gnaaza ki naka Xi'ine Dios?

³⁷ Xhki ti ruuna le ruune Xuuza ti tzajle'li neda.

³⁸ San xhki ruuna ley zala ti tzajle'li neda, gultzajle' lea ruuna'a, naar gnëëzi'ti'li ki Xuuza zue' len neda ati neda zua' len Xuuza.

³⁹ Yubl gle'en'de lazëëne Le', san Jesús bxhunji'de leke.

⁴⁰ Jesús zuwëëje tzala'a yeego Jordán, ati ni' bga'ane, latj'a ga Juan pkiile nis.

⁴¹ Bënni zian dujyu'ke Le' len tanáke: Leel, zala Juan ti beene tu le gunn'be' yëla wak, yugute' le gne' kie' bënni ni ti gxhi'ye'e.

⁴² Ati bënni zian gulayajle'ke Jesús.