SAN JUAN 1 - Porciones en Zapoteco de las Delicias

Diidza bzooje Juan

¹ Kati zia'a sulau yugute' chik'z de Diidza'a; len bënni'a nake Diidza'a gzue' len Dios len Le' nake Dios.

² Le' gzue' len Dios kati zia'a sulau yugute'.

³ Lu ne'e Le', Dios beene yugute'; gat'ga de le ku beene Le'.

⁴ Len le' gzua yëla naban, len yëla naban'a guk yëla yeni ki yugute' bunach.

⁵ Yëla yeni ni rze'ni ga nak'tzka chul len yëla chul ni ti rzaki'i kzuul ley.

⁶ Gzue' tue' bënni gxhi' le' Juan, bënni Dios psë'le'e

⁷ ki dujxaka'lau'e ki yëla yeni naar yugute'ke layajle'ke lea rne'a.

⁸ Juan ti nake yëla yeni'a, nak'ze tue' bënni zdujxaka'lau'e ki yëla yeni'a.

⁹ Ley'kz yëla yeni le rze'ni yugute' bunach za' yëdz'lyu ni.

¹⁰ Bënni'a nake Diidza'a gzue' lu yëdz'lyu; len zala Dios beene yëdz'lyu lu ne'e Le', bënni'a nak'ke ki yëdz'lyu ti gulumbe'e Le'.

¹¹ Lu yëdz'lyu kie' biide, san bënni'a nakik'de kie' ti gulazi'ke Le'.

¹² San bënni'a gulazi'ke Le' len gulayajle'ke Le', bnëëdzje kieke yëla rnabe' lake xi'ine Dios.

¹³ Len nak'ke xi'ine Dios, keg ka naleebi'ru rak, keg ka tazelaadxi'i'ke bunach, nak'ke xi'ine Dios koma Le' bzaalje leke.

¹⁴ Bënni'a nake Diidza'a beene kuine bënni bunach len gzue' len ro'u. Len ble'i'ru yëla Xhën kie', yëla Xhën le bnëëdzje kie' Xuuz'ru Dios, le' nake Xi'ine lazdui, nadze'iz'de yëla nadxi'i len yëla li.

¹⁵ Juan dujxaka'lau'e kie' Jesús, gne': «Bënni ni nake bënni'a be'a kie' diidza kati gnia' ki ze'e kuudza'a bënni nak're blou ka neda, koma chik'z zue' zia'at ka neda.»

¹⁶ Ki yëla tzawi kie' Dios ruzalaadxi'tekze kieeru yëla rak'len kie';

¹⁷ koma xhba kie' Dios lu ne'e Moisés benne, san yëla rak'len kie' len yëla li lu ne'e Jesús benne.

¹⁸ Nutunu bënni nale'i'de Dios; Le' Xi'ine lazdui, Le' nake Dios len nake tuuz len Xuuze, Le' beene ga umbe'ru'ne Dios.

Juan bënni Rkiile nis Bunach dujxaka'lau'e kie' Cristo

¹⁹ Kati bënni tunabe'ke bënni Judea gulusë'le'e ki Jerusalén pxuuz len bënni tuune dxin lu gdou' tzajnaab'kde Juan nuxh nake le', le ni nak le le' dujxaka'lau'e kie'.

²⁰ Len le' gdixhjë'e dxia'a'tit: —Ti naka neda Le' Cristo.

²¹ Gulunaab'de le' yubl ka: —¿Nuxh naku, xhki? ¿Naku Elias bënni be'e diidza ulaaz kie' Dios? Juan gne': —Ti naka Elias. Leke gulunaabe yubl ka': —¿Naku bënni rue'e diidza ulaaz kie' Dios bënni'a rala giide? Bubi'e diidza: —Keg needa'a.

²² Gle'ke le': —¿Nuxh naku, xhki? De ki yubi'i'tu kieke diidza bënni'a gulusë'le'e netu. ¿Bixh gunn gnou' larakz kiu'?

²³ Juan bubi'e diidza: —Neda naka chi'i tu le ruskua' zidzj lu yu biidx: “Gulusaalj tu nëëz li kie' Xan'ru”, ka'teez gne' Isaías bënni be'e diidza ulaaz kie' Dios.

²⁴ Bënni'a gulusë'le'e bënni fariseo tzaje'leen'ke diidza Juan,

²⁵ gulunaab'de le': —Xhki ti naku Le' Cristo, ti naku Elias, len ti naku bënni rue'e diidza ulaaz kie' Dios, ¿Bixhkia' rkiilu nis bunach?

²⁶ Juan bubi'e diidza: —Neda rkiila bunach len nis; san ladj'li zue' tue' bënni ti numbe'li'ne

²⁷ len ze'e kuudza'a. Len ti nak'kza bach kseedxa xhtui lëële'.

²⁸ Yugute' le ni glak latj nazi' lei' Betania, tzala'a yeego Jordán, ga Juan rkiile nis bunach.

Jesús, nake Bëku'xhiila kie' Dios

²⁹ Bueikj dza'a Juan ble'i'de Jesús gbiige'e ga'la ga ze' le', len gne': «¡Guluyu'tzka, bënni'a nake Bëku'xhiila kie' Dios, bënni rgue' dula ki yëdz'lyu!

³⁰ Bënni ni nake bënni'a be'a kie' diidza kati gnia': “ki ze'e kuudza'a bënni nak're blou ka neda, koma chik'z zue' zia'at ka neda.”

³¹ Lez neda ti numbe'a'ne; san za'a rkiila nis bunach naar Israel umbe' le'.»

³² Juan lekz'ka' gne': «ble'i'da'ne Bë' la'ay kie' Dios bëtje ki xhba ka tuuba palom len dusue' len le'.

³³ Ti numbe'a'ne nuxh bënni'a; san bënni'a psë'le'e neda jkiila nis bunach, gudxe neda: “Bënni'a gle'i'du'ne tzajsuáleene le' Bë' la'ay kie' Dios, le' jkiile bunach len Bë' la'ay kie' Dios.”

³⁴ Neda chi ble'i'da'ne len rdujxaka'lau'a ki le' nake Le' Xi'ine Dios.»

Bënni glake zia'al bënni useed kie' Jesús

³⁵ Bueikj dza'a, Juan zue' ni' yubl ka dzaage chope' bënni useed kie'.

³⁶ Kati ble'i'de gdëëde Jesús, Juan gne': —¡Guluyu'tzka, bënni'a nake Bëku'xhiila kie' Dios!

³⁷ Grop'te'ke bënni useed kie' Juan gulayëën'de le ni, len yajak'leene Jesús.

³⁸ Jesús bueikje len kati ble'i'de zjak'leene le' bnaab'de leke: —¿Bixh rugiilj'li? Leke gulanake: —Bënni Useed, ¿Gaxh zu'?

³⁹ Jesús bubi'e kieke diidza: —Gulduyu'tzka. Yajake na' guluyue' gaxh zue' ati gulakua'leene le' ye tzka ni nak te'dza, koma chik'z za ral dza.

⁴⁰ Tue' kieke bënni'a gulayëën'de le gne' Juan len yajak'leene Jesús guke Andrés bënni bë'che'e Simón Pedro.

⁴¹ Bënni budzaage zia'al Andrés guke bënni bë'che'e le' Simón len gudxe le': —Chi budzëëli'tu'ne Le' Mesías, Le' Cristo.

⁴² Chi nak ka Andrés pche'e Simón ga zue' Jesús; len kati Jesús ble'i'de le', gudxe le': —Li naku Simón bënni xi'ine Juan, san na'a si' lou' Cefas, (le re'e'ni gna': Pedro).

Jesús rliidze Felipe len Natanael

⁴³ Bueikj dza'a, Jesús pchuug'laadxe'e tziije yu ki Galilea. Budzaage Felipe len gudxe le': —Dia' len neda.

⁴⁴ Felipe nake bënni yëdz Betsaida, lekz'ka' Andrés len Pedro nak'ke bënni yëdz'a.

⁴⁵ Felipe yajdiilje Natanael len gudxe le': —Chi budzëëli'tu'ne bënni'a, Moisés bzooje kie' lu gich ki xhba kie' Dios len lekz'ka' bënni glui'ke diidza ulaaz kie' Dios guluzooje kie'. Nake Jesús bënni xi'ine José, bënni yëdz Nazaret.

⁴⁶ Natanael gne': —¿Naru gunn groj le dxia'a ki yëdz Nazaret? Felipe bubi'e kie' diidza: —Da len byu'tzka.

⁴⁷ Kati Jesús ble'i'de ze'e ga'la Natanael, gne': —Ni ze'e tue' bënni nake gdulei'ti bënni Israel, ti rzi'ye'e.

⁴⁸ Natanael bnaab'de le': —¿Nakxh ruunu li' numbe'u neda? Jesús bubi'e kie' diidza: —Ble'i'da li' rë'u xhani yaag higuera, kati ti rliidze li' Felipe.

⁴⁹ Natanael gudxe le': —Bënni Useed, ¡li' naku Le' Xi'ine Dios, li' naku Bënni Rnabe' ki Israel!

⁵⁰ Jesús bubi'e kie' diidza: —¿Naru le re'za li' ki ble'i'da rë'u xhani yaag higuera rajle'u? Le xhën'r ka le ni zia'a gle'i'du.

⁵¹ Lekz'ka' gne' Jesús: —Le nak'te rnia', lbi'ili ule'i'li tzaalj xhba, len Gbaaz La'ay kie' Dios tëtje len tubeene ga zue' Le' Xi'ine Bënni.