Hechos 6 - Porciones en Zapoteco de las Delicias

Tuzua'ke gaadx'ke bënni lak'leene bënni'a tayajle'ke

¹ Dza ni, le zjak'tekze tayaane bënni'a tayajle'ke, bënni tui'ke diidza griego gulazulau'ke tanéke kieke bënni'a tui'ke diidza hebreo, koma ti tui'laadxi'ke dxia'a ga lazi'nu le laag'nu nguul uzeeb'a tui'nu diidza griego.

² Bënni chin'nu'ke gbaaz kie' Xan'ru gulutzaage bënni'a tayajle'ke, len gle'ke leke: —Ti nak dxia'a netu ksan'tu kixhjë'tu xhtiidze'e Dios naar gui'laadxi'tu ka'a'tu la'wa'gu.

³ Lena'a, bë'cha'a gulkiilj ladj'li ni gaadx'ke bënni gunn gxhënilaadxi'li'ne, bënni nayajni'i len nadze'iz'kde Bë' La'ay kie' Dios, naar gzua'ru lu naa'ke dxin ni.

⁴ Netu na'a uyaj'leen'tu gui'leen'tu'ne diidza Dios len kixhjë'tu xhtiidze'e.

⁵ Yugute'ke gulayazlaadxi'ke diidza ni, len gulabëe' Esteban bënni rajle'e gdu laadxe'e len nadze'iz'de Bë' La'ay kie' Dios, len Felipe, Prócoro, Nicanor, Timón, Parmenas len Nicolás bënni Antioquía, le' zia'a yajte'e bënni Judea.

⁶ Chi nak ka guluche'ke leke ga nakua'ke bënni gbaaz kie' Xan'ru, len leke guluxua'naa'ke leke len glui'leene diidza Dios.

⁷ Xhtiidze'e Dios ziaj'tekz rxhua, len tayan'tekze bënni tayajle'ke Xan'ru lu yëdz Jerusalén. Lekz'ka' ziaane pxuuz Judea gulayajle'ke.

Tazëëne Esteban

⁸ Le zian le tunn'be' yëla wak xhën ruune Esteban lu yëdz koma nadze'iz'de yëla wak kie' Dios len yëla rak'len kie' Le'.

⁹ La'ke bënni nu'tza'ke lu yu'u useed kieke bënni Judea le nazi' lei' Bënni Nadzan'ke, len dzaag'ke bënni yëdz Cirene, Alejandría, Cilicia len bënni Asia gulazulau'ke tadil'e diidza len Esteban;

¹⁰ san ti guladxin'ga'le'e le' koma le' rue'e diidza len yëla nayajni'i kie' le' Bë' La'ay kie' Dios.

¹¹ Na' gulagiixhj'ke bënni lanáke ki gulayëën'de le' rne' diidza le rudabaaga le' Moisés len Dios.

¹² Ki gluune na' gulayas'ke bënni yëdz, len bënni guul tuzeajni'i'de len bënni useed xhba kie' Dios len gulabialaadxi'ke Esteban, len gulazëëne le' ati guluche'ke le' lau'i dxin'lau'i blou.

¹³ Lekz'ka' gulagiilje bënni gxhi'ye' tzajxaka'lau'ke, len lanáke: —Bënni ni ti rsan'kze rudabaage'e gdou' la'ay ni len xhba kie' Dios.

¹⁴ Chi byëëni'tu rne' ki Jesús bënni Nazaret ukin'je gdou' ni len utze'e le chi naleebi'ru run'ru le pka'ane kieeru Moisés.

¹⁵ Bënni'a tunabe'ke len yugute'ke bënni'a rë'ke ni' kati guluyue' Esteban gulale'i'de lau'rue'e ka bënni gbaaz la'ay kie' Dios.