Hechos 5 - Porciones en Zapoteco de las Delicias

Dula kie' Ananías len Safira

¹ San gzue' tue' bënni le' Ananías len dzaage'nu Safira nguul kie', beti'e tu xhyue'.

² Bënni ni beene diidza dzaag len nguul kie', ati bga'an'leene lati dumi'a ati ye lati bzue' lu naa'ke bënni gbaaz kie' Xan'ru.

³ Pedro gudxe le': —Ananías, ¿Bixhkia' bnëëdzju latj gnabe'i'de li' bënni xëwi len guune ga siye'i'du'ne Bë' La'ay kie' Dios ati bga'an'leenu lati dumi'a tzka le gulagiixhj'ke xhyu'a?

⁴ ¿Naru keg kiu' naki yu ni? Ati buudx beti'u, ¿Naru keg kiu' naki dumi'a? ¿Bixhkia'kza gdiilj'laadxu'u guunu ki? Dios'a gxhiye'i'du'ne, keg bunach'a.

⁵ Buudx byëën'de diidza ni Ananías gbixe ati gutie'. Len yugute'ke bënni gulanëëz'de glaadxi'tzki'de.

⁶ Na' gliid'bi bi'i kuidi, len gulutuli'bi'ne laari len yajka'chik'bi'ne.

⁷ Ka tson ur gdëëd kati gyaaz'nu nguul kie' Ananías, len keg nëëzi'nu bixh guk.

⁸ Pedro bnaab'de'nu: —Gdixhji'i neda, ¿Ba gxhi'li tzka'z'a rnaali'a yu ni? Lenu bubi'i'nu diidza: —Ja' tzka gxhi'tu.

⁹ Pedro gudxe'nu: —¿Bixhkia'kza ben'li diidza dzaag si'be'li'ne Bë' La'ay kie' Xan'ru? Na' zuwak'bi bi yajka'chik'bi'ne bënni kiu' ati na'a lekz'ka' utzajka'chik'bi li'.

¹⁰ Na'teez Safira gbixh'nu len gut'nu xhni'e Pedro. Kati gulayaaz'bi bi kuidi ni, gulale'i'bi'nu chi nat'nu len glua'bi'nu zajka'chik'bi'nu kuiti le'e bënni kieenu.

¹¹ Len yugute'ke bënni gdou'a, len bënni gulanëëz'de lea guk'a, glaadxi'tzki'de.

Le zian yëla wak xhën len le tunn'be tak

¹² Le zian yëla wak xhën len le tunn'be tak lau'ke bunach lu naa'ke bënni gbaaz kie' Xan'ru; len yugute'ke tudzaage lu Nchiil kie' Salomón.

¹³ Ati bënni'a ye la'ke'a ti tuwaaxhj'de ladzaage leke, san yugute'ke bunach nuzua'ke leke ga xhën.

¹⁴ Ley bënni ley nguul gulayaane tzka'ke bënni gulayajle'ke Xan'ru,

¹⁵ Len tabiaj'ke bënni we'a la nëëz, tuxuáke leke lu blaag len lu da'a, naar kati Pedro tëëde zala xhuul kieeze tzajxua leke.

¹⁶ Lekz'ka' bënni yëdz ga'la tadxiine Jerusalén nua'ke bënni we', len bënni rsaka'zi' leke bë' xëwi; len yugute'ke tu'ueake.

Tulaag'ke bënni gbaaz kie' Xan'ru

¹⁷ San le' pxuuz blou len bënni'a nak'ke saduceos nakua'leene le', glake xhayeel,

¹⁸ ati gulazëëne bënni gbaaz kie' Xan'ru len gulagu'e leke liidx'gia.

¹⁹ San chi'dzë'ël'a tue' gbaaz la'ay kie' Xan'ru psaalje liidx'gia'a len bubiije leke, ati gudxe leke:

²⁰ «Gultziaj, gultzajsé lu gdou' len gulkixhji'de bunach diidza ki yëla naban»

²¹ Ka nak diidza gulayëën'de'a, bayën bueikj dza'a gulayaazie lu gdou' len gulazulau'e tuseed'de. Na' le' pxuuz blou'a len bënni'a nakua'ke len le' gululiidze bënni guul tuzeajni'i'de naar lakua'ke dxin'lau'i blou, len gulunabe'ke ki tzajxi'ke lu liidx'gia'a bënni gbaaz kie' Xan'ru.

²² San kati bënni'a tun'chi'ke gdou'a guladxiine liidx'gia'a ti guludzëël'de leke. Lena'a guluweikje dudixhjë'ke,

²³ tanáke: —Liidx'gia'a dxia'a'tit nayeyj, ati bënni'a rajake gdil nakua'ke tui'laadxi'ke ley ra puert'a; san kati psaalj'tu, nutunu budzëëli'tu le'i.

²⁴ Kati gulayëën'de le ni, bënni xan'ke bënni'a tun'chi'ke gdou' len bënni pxuuz blou'a tunaabi lza'a'ke gaxh'te gdxin lea rak'a.

²⁵ Na'teez bdxiine tue' bënni gudxe leke: —Bënni'a lbi'ili glu'uk'li'ne liidx'gia, lu gdou' nakua'ke tuseed'de bënni yëdz.

²⁶ Bënni xan'ke bënni'a tun'chi'ke gdou'a dzaage bënni lze'e yajdiilj'ke leke; san tibi gulusaka'ke leke koma glaadxi'de bunach'a ka gna lulaadxi'ke leke giaj.

²⁷ Kati guludxiine'a guluche'ke leke lu dxin'lau'i blou'a, ati pxuuz blou'a gudxe leke:

²⁸ —Netu bzaaga'tu lbi'ili naar nuturnu kseedi'li le rak kie' bënni'a. ¿Ati bixh ben'li lbi'ili? Chi nudu nuzeeli diidza ni Jerusalén len ka' ni re'eni'li gdxia'li netu xhgia' ki yëla gut kie' bënni'a.

²⁹ Pedro len bënni'a ye la'ke gbaaz kie' Xan'ru gulubi'e diidza: —Run'r bayuudx gzenaagi'tu'ne Dios ka bunach.

³⁰ Le' Dios kieke xuuz'xhtau'ru guul buspaane lu yëla gut Jesús, larakz bënni'a lbi'ili bdëëdi'li'ne bda'li'ne lu yaag kruuz.

³¹ Dios bzue' Le' ga xhën kuiti le'e yubeel, len beene le' Bënni Blou len Bënni Rusle', naar bënni Israel lubi'i'laadxi'ke len Dios len lazi'ke yëla rzi'xhën ki xhtu'la'ke.

³² Len le ni netu rdujxaka'lau'tu len lekz'ka' le' Bë' La'ay kie' Dios, le Dios rsë'le'e kieke bënni tuzenaagi'de Le'.

³³ Kati gulayëën'de le ni, guladze'itzki'de len gle'en'de ludëëd'de leke.

³⁴ San ladj'ke bënni'a tunabe'ke'a yu'e tue' bënni fariseo le' Gamaliel len nake bënni useed xhba kie' Dios len gdu yëdz tui'ke le' bala'an. Bënni ni gzui'de len gnabe'e labiaj'ke tuchi'i rayu'u bënni gbaaz kie' Xan'ru.

³⁵ Len chi nak ka' gudxe bënni'a tunabe'ke: —Bënni Israel, re'e'ni gyuuli dxia'a bixh gun'li kieke bënni ni.

³⁶ Gultzajnei le guk zia'a kati gyase Teudas len bnëëzi kuine xhën len ka tap'gayua'ke bënni yajta'ke le'. San bënni ni guludëëd'de le' len bënni'a yajta'ke le' glas'laz'ze ka' ati na' buudx.

³⁷ Gdëëd ni, dza kati gulayaazie lu gich bunach, gyase Judas bënni Galilea len beene ga yajta'ke le' la'ke; san lekz'ka' guludëëd'de le' len yugute'ke bënni yajta'ke le' glas'laz'ze ka'.

³⁸ Le rak na'a, neda rzeajni'i'da lbi'ili ki ksank'li'ne bënni ni len tibi guunik'li'ne. Koma xhki le ni, nak le tun'ke bënni bunach unit'lau ka'az;

³⁹ san xhki nak le ruune Dios, nutunu gunn uznit'lau. Re'e'ni gyuuli ka gna chi rdil'li len Dios. Leke guluzenaag'de le'.

⁴⁰ Ati gululiidze bënni gbaaz kie' Xan'ru len gulagiine leke ati guluzage'e ki tir lui'ke diidza lu Le' Jesús, chi nak ka' gulusan'ke leke.

⁴¹ Bënni gbaaz kie' Xan'ru tudziiji'tzki'de gulurooje ga nakua'ke bënni'a tunabe'ke, koma Dios be'e leke latj lutzaage nia'a ki le' Jesús.

⁴² Yugu dza tuseed'de bunach len tagixhjë'ke diidza kub dxia'a kie' Jesús le' Cristo lu gdou' len yu'u yu'u.