Hechos 4 - Porciones en Zapoteco de las Delicias

Pedro len Juan tadxiine lau'ke bënni tunabe'ke

¹ Pedro len Juan ni nakua'ke tui'leene diidza bunach'a, kati guladxiine pxuuz len bënni xan'ke bënni'a nak lu naa'ke gdou' len bënni saduceo.

² Tadza'a'ke koma Pedro len Juan tuseed'de bunach'a len tanáke ki bënni nat gunn lubaane lu yëla gut ka Jesús bubaane lu yëla gut.

³ Gulazëëne leke ati le chi rdzë' gulagu'u'ke leke liidx'gia tzal tzeni dza yubl.

⁴ San zian'ke bënni'a gulayëën'de xhtiidza'ke'a gulayajle'ke, ati tzka'ke bënni'a gulayajle'ke glak'ke ka ga'yu' mil'ke bënni'teez.

⁵ Bueikj dza'a guludzaage bënni xan'ke bënni Judea, bënni guul tuzeajni'i'de len bënni useed xhba kie' Dios.

⁶ Ni' nakua'ke lekz'ka' pxuuz blou Anás, Caifás, Juan, Alejandro len yugute'ke bënni nak'ke dia'dza kieke pxuuz blou.

⁷ Gulunabe'ke tzajua'ke Pedro len Juan gatzj'lau'i ga nakua'ke'a len gulunaab'de leke: —¿Len bixh yëla rnabe' rnei'li, nuxh ulaaz ki run'li le ni?

⁸ Pedro nadze'iz'de Bë' La'ay kie' Dios bubi'e diidza: —Lbi'ili bënni xaani yëdz len lbi'ili bënni guul tuzeajni'i'de:

⁹ lbi'ili rë'tzka'li bagi'i le guk'leen'tu'ne tue' bënni we', naar gnëëzi'li nakxh guk bueake.

¹⁰ Lena'a rgixhji'i'tu lbi'ili len gdu yëdz Israel ki bënni'a ze' lau'li ni bueake lu le' Jesucristo ki Nazaret, bënni'a lbi'ili bda'li'ne lu yaag kruuz len Dios chi buspaane le' lu yëla gut.

¹¹ Jesús ni nake giaj'a ti gyaazlaadxi'li lbi'ili bënni run'li yu'u, san na'a chi nak giaj blou.

¹² Tuuze Le' nape yëla wak usle' ro'u, koma gdu yëdz'lyu ni Dios nunn'ze lsenz ki tuuz le' Le' gunn uslá ro'u.

¹³ Kati bënni'a tunabe'ke gulale'i'de ka si'na tui'ke diidza Pedro len Juan, len gulak'be'i'de ki ti nuseed'ke gich, gulubaan'de len gulumbe'e ki nak'ke bënni useed kie' Jesús.

¹⁴ Ati bënni'a bueake'a ze'leene leke na', lena'a ti benn'kz bi ludabaaga'ke.

¹⁵ Len gulunabe'ke larooje rayu'ul ati leke gulaga'ane tun'ke diidza dzaag.

¹⁶ Tanáke: —¿Nakxh gun'ru kieke bënni ni? Yugute'ke bënni yëdz Jerusalén nëëzi'kde ki leke glun'ke le runn'be' yëla wak xhën len ti gunn udabaaga'ru.

¹⁷ San ki kur tziaj'leen gas'laz diidza ni, gzeik'ru'ne banaadx, naar nuturnu lui'leene diidza lu Le' Jesús.

¹⁸ Na' gululiidze leke len gulunabe'i'de leke tir lui'ke diidza len nuturnu luseed'de lu Le' Jesús.

¹⁹ Ati Pedro len Juan gulubi'i'ke diidza: —Guluchuug'be'tzka lbi'ili xhki nak dxia'a lau'e Dios gzenaagi'tu lbi'ili ulaaz ki gzenaagi'tu'ne Le'.

²⁰ Netu ti gunn ksan'tu gui'tu diidza ki le ble'i'tu len byëëni'tu.

²¹ Bënni'a tunabe'ke guluzei'de leke banaadx, ati gulusan'ke leke. Ti guladzëël'de bixh lusaka'ke leke, koma yugute' bunach tagu'u'ke ba Dios ka nak lea guk'a.

²² Koma bënni'a bueake len yëla wak xhën ni chi nadëëd chua' iz yu'e.

Bënni'a tayajle'ke Xan'ru tunaabe xën yëla rxënilaadxi'i kieke

²³ Kati chi gulusan'ke leke, Pedro len Juan ye'wake ga nakua'ke bënni lza'a'ke len gulagixhji'de leke dera le gle'ke leke bënni'a tunabe'i'de pxuuz len bënni guul tuzeajni'i'de.

²⁴ Buudx guluzenaage yugute'ke glui'leene diidza Dios te' le': «Xan li' beenu xhba, yëdz'lyu, nis xhën len yugute' le nakua' tu tu latj,

²⁵ len Bë' La'ay kiu' be'u diidza rua'a'luudxe'e xuuz'xhtau'tu guul David bënni wendxin kiu' ati gne': “¿Bixhkia' tanëëzi xhën kuini yugu yëdz? ¿Bixhkia' tabë'ke bagi'i luune le ku nak?

²⁶ Bënni tunabe'ke yëdz'lyu nadzaag'ke ka tanéke kiu' Xan len tudabaaga'ke Cristo, bënni'a Li' bdzag'laadxu'ne.”

²⁷ »Ati Kaaz guk Herodes len Poncio Pilato guludzaag'ke lu yëdz ni, dzaag'ke bënni yëdz Israel len bënni yëdz yubl, len guludabaaga'ke Jesús bënni wendxin la'ay kiu' bënni'a bdzag'laadxu'u gake Cristo.

²⁸ Ati ka' glun'ke yugute' le Li' nukëëzu len chi nuunu ki rala gak.

²⁹ Na'a, Xan, leke tuzei'de netu banaadx, san guk'leen netu bënni wendxin kiu' ti gaadxi'tu kixhjë'tu xhtiidzu'u.

³⁰ Len blui' yëla wak kiu' le un leke bënni we', len le gunn'be' yëla wak xhën, lu le' Jesús bënni wendxin la'ay kiu'.»

³¹ Kati buudx glui'leene diidza Dios, ga nakua'ke'a ptit; len yugute'ke bdze'iz leke Bë' La'ay kie' Dios, len si'na tui'tzka'ke xhtiidze'e Dios.

Tuuz nun'ke yugute' le de kieke

³² Bunach zian bënni'a tayajle'ke Xan'ru, ati yugute'ke tuuz le rza' ikj'laadxi'dau'ke. Gat'ga zue' bënni ruun'de kie' tuuze le de kie', tuuz nun'ke yugute' le de kieke.

³³ Bënni gbaaz kie' Xan'ru len yëla wak xhën tujxaka'lau'tekze ki Xan'ru Jesús bubaane lu yëla gut len Dios run'la'aye yugute'ke.

³⁴ Gat'ga gzue' bënni bi ryaadzj'de ladj'ke'a, koma bënni de xhyu'ke u zua liidx'ke tuti'i'ke ley ati dumi'a

³⁵ tuzua'ke lu naa'ke bënni gbaaz kie' Xan'ru, naar tagis'ke tzka nayaadzji'kde tu tu'ke.

³⁶ Ka' beene lekz'ka' tue' bënni xi'in'xhzue' Leví bënni le' José bënni guulje Chipre yu le de gatzj'lau'i nis xhën, len bënni gbaaz kie' Xan'ru guluzua'ke kie' Bernabé le re'e'ni gna: «Bënni ruwi'xhëëne»

³⁷ Bënni ni de tu xhyue', ati beti'e, len dumi'a bzue' lu naa'ke bënni gbaaz kie' Xan'ru.