Hechos 3 - Porciones en Zapoteco de las Delicias

Pedro ru'uune tue' bënni nat'zie'

¹ Tu dza Pedro len Juan yajake gdou' gdëëd xhwë yaje'leen'ke diidza Dios ka chi naleeb'kde.

² Lu gdou' ni zue' tue' bënni ka guulj'ze nat'zi ni'e, len yugu dza tuche'ke le' len tabekie le' ra puert'a le nazi' lei' Lach, naar gnaabe lunëëdzje kie' dumi bënni tayaazie.

³ Bënni ni kati ble'i'de Pedro len Juan zjake layaazie gdou', bnaabe dumi.

⁴ Leke guluyu'ke le', ati Pedro gudxe le': —Byu' netu.

⁵ Bënni ni bzenaage koma beeni le' bi lunëëdzje kie'.

⁶ Ati Pedro gudxe le': —Keg oro len keg plata de kia', san le de kia' gunna kiu': lu le' Jesucristo ki Nazaret, gyas len gze'i.

⁷ Buudx gne' ki, Pedro gde'le'e ne'e yubeel len pchise le', len na'teez bugitj beikj bnë ni'e.

⁸ Bënni'a ti rak se'e tu pxiti'ze gzui'de len gzulau'e rze'e, len rze'i'de ni'e gyaaz'leene leke lu gdou', rxiti'e len rgu'e ba Dios.

⁹ Yugute'ke bënni gulale'i'de le' rde' len rgu'e ba Dios,

¹⁰ gulubaan'de len glaadxi'de len lea guk'a, koma nëëzi'kde ki larakz le'a rbë'e ra puert ki gdou' le nazi' lei' Lach, rnaabe lak'leene le'.

Diidza be'e Pedro lu gdou' ra Nchiil kie' Salomón

¹¹ Ga ziaj'ze Pedro len Juan ziije bënni'a bueake'a tibi rsan'kze leke, len bunach zian guludzaage latj ki gdou' le nazi' lei' Nchiil kie' Salomón ga leke nakua'ke.

¹² Kati Pedro ble'i'de bunach ni gudxe leke: «Bënni yëdz Israel ¿Bixhkia' rubaani'li? ¿Bixhkia' ryu'tzka'li netu raki'kz'li ki netu'a bun'tu'ne bënni ni len ben'tu ga rze'e len yëla wak kietu u yëla rbëëz dxia'a kietu?

¹³ Dios kieke xuuz'xhtau'ru guul Abraham, Isaac, len Jacob, beene xhën'te Jesús bënni wendxin kie', bënni'a lbi'ili bdëëd'li'ne lu naa'ke bënni tunabe'ke, len ti gyaazlaadxi'li'ne kati Pilato gu'un'de ksaane le'.

¹⁴ Bënni'a nake La'ay len Li ti busláali'ne, ziuubl bënni'a rdëëd'de bunach bnaab'li lusane le'.

¹⁵ Ki guk ati bdëëdi'li'ne Bënni'a runne kieeru yëla naban, san Dios buspaane le' lu yëla gut, ati le ni netu rdujxaka'lau'tu.

¹⁶ Le ben ga bude'li'de bënni'a rle'i'li'ne ni len numbe'li'ne nak yëla rajle' len Jesús. Yëla rajle' len Jesús nak le bun le' dxia'a'tit ka yugute'li runn gle'i'li.

¹⁷ »Nëëz'da bë'cha'a ki kati lbi'ili len bënni xan'li bdëëdi'li'ne Jesús, ben'li ley san ti nëëzi'li bixh'tek'a run'li.

¹⁸ Ati ki beene Dios le chik'z gne' lu naa'ke bënni glui'ke diidza ulaaz kie': ki Cristo kie' rala gatie'.

¹⁹ Lena'a gulubi'i'laadxi'li len Dios len gulutza' yëla naban kieeli, naar le' uxhie' xhtu'la'li

²⁰ len Xan'ru guune ga uzi'laadxi'li, len ksë'le'e kieeli Jesús bënni le' bdzag'laadxe'e gake Cristo kieeli.

²¹ Le rak na'a Jesucristo run bayuudx zue' yewayuba nakati gdxin'r dza Dios ukua'be'e yugute', ka chi gne' lu naa'ke bënni glui'ke diidza ulaaz kie' zia'at.

²² Moisés gdixhji'de xuuz'xhtau'ru guul: “Xan'li Dios kchise lu yëdz kieeli tue' bënni gui'e diidza ulaaz kie' ka neda gzua'. Guluzenaag'de yugute' le gie' lbi'ili,

²³ koma nu'ti'teez nu ku gzenaagi le' bënni'a gui'e diidza ulaaz kie' Dios, uluznit'lau'e le' lu yëdz.”

²⁴ »Ati le gde'la' len Samuel yugute'ke bënni glui'ke diidza ulaaz kie' Dios gulagixhjë'ke lea gak dza zuaaru na'a.

²⁵ Lbi'ili naki kieeli le pxënelaadxi'li Dios lu naa'ke bënni glui'ke diidza ulaaz kie' len le pxënelaadxi'ke Dios xuuz'xhtau'li guul. Koma Dios gudxe Abraham: “Yugute' yëdz ki gdu gabi'i yëdz'lyu lak la'ay nia'a ki xi'in'xhzu'.”

²⁶ Kati Dios buspaane lu yëla gut Xi'ine, zia'a kieeli psë'le'e Le' naar gun'la'aye lbi'ili len guune ga ubi'i'laadxi'li ki le ku nak.»