Hechos 27 - Porciones en Zapoteco de las Delicias

Pablo Tusë'le'e le' Roma

¹ Kati chi gluune kieke lusë'la'ke netu Italia, guludëëde Pablo len ye la'ke bënni nadzun'ke lu ne'e Julio, tue' bënni nak'lu'ne'e bënni rajake gdil le nazi' lei' kie' bënni Roma rnabe'e yëdz'lyu.

² Gyaaz'tu lu barku le chik'z ziaj rza' ra nis ki Adrimitio naar gdxin ra nis ki Asia, za'leene netu lekz'ka' Aristarco bënni yëdz Tesalónica ki yu Macedonia.

³ Bueikj dza'a bdxin'tu ra nis ki Sidón, ni' Julio guke bënni tzawi len Pablo koma bnëëdzje ladj tzajyue' bënni rdzaage dxia'a len lak'leene le'.

⁴ Kati broj'tu Sidón buben'tu lu barku ati gdëëd'tu zga Chipre yu de gatzj'lau'i lu nis xhën, koma reikj'tzka bë' ga ziaj'tu'a.

⁵ Gdëëd'tu zga ra nis xhën ki Cilicia len Panfilia, ati bdxin'tu Mira tu yëdz ki gia'a yeego Licia.

⁶ Bënni'a rnabe'i'de bënni'a rajake gdil yajxa'ke'e tu barku ki Alejandría le ziaj Italia, ati beene ga gren'tu naar ugie'la'tu nëëz.

⁷ Zian dza gza'tu tzaulaadxi lu nis'a, len kan'ga bdxin'tu ga ble'i'tu yu Cnido, ati tzka'ti'ga ni reikj bë'a ga ziaj'tu'a gdëëd'tu zga Salmona len gyeikj'tu zga Creta yu de gatzj'lau'i lu nis xhën;

⁸ ati baniig ben'tzka tëëd'tu gdu ra nis xhën'a naar bdxin'tu tu latj nazi' lei' Buenos Puertos, ga'la yëdz Lasea.

⁹ Zian dza chi bnit'tzka'tu, len chi naadxi'tzki tzu'u'tu nëëz lu nis xhën'a koma chi za' ga'la beu' bë'gi', lena'a Pablo gudxe leke:

¹⁰ —Bënni, rak'be'i'da ki chi naadxi'tzki tziaj'leen'ru tzu'u'ru nëëz, len ze banaadx gnit'ru barku ni, lekz'ka' sui'i len lekz'ka' yëla naban kieeru.

¹¹ San bënni'a rnabe'i'de bënni'a rajake gdil, ti bzenaag'de Pablo ati ben'le lau le gne' bënni xaani barku'a bënni'a nuche'e ley.

¹² Ati latj ga zua'tu'a ti nak'tek dxia'a ki gunn jga'an'tu tzal rdëëd beu' bë'gi', ati yugute'tu bdzaag xhtiidza'tu gun'tu lu bayuudx ga gdxin'tu Fenice, ra nis xhën ki Creta le de tzala'a ga rbia gbiidz, len ni' jga'an'tu tzal tëëd beu' bë'gi'.

Giaj'siu' lu nis xhën

¹³ Glaki'de ki gunn layu'u'ke nëëz koma tu bë' gul'du'z reikj le za' dxi'il, ati gularooje len gulaza'ke lu nis'a tza ra nis xhën ki Creta.

¹⁴ San guk tuchi'i gyas tu bë' bduunu lu nis'a le za' zga ra'al tzala'a ga rbia gbiidz len gda'pa barku'a,

¹⁵ len gzulau ra'ij ley, ati le ti gxha'ki'tu kche'tu barku'a zga ga reikj bë'a, de ki be'tu latj pche' netu bë' ni.

¹⁶ Gdëëd'tu zga kuudzi'il Cauda tu yu le de gatzj'lau'i lu nis xhën, ga ti reikj zi' bë', len beeni'tzki netu dxin buren'tu barku we'en'du lea na'ij barku xhën ni.

¹⁷ Buudx buren'tu'a, gulazi'ke du riaj len gluuge'e barku xhën'a, chi nak ka' guluzëtje laari'a lea rtuub bë'a naar rza' barku ni, koma glaadxi'de tzajtzu'u'ke latj ga rë'tzka yuuxh le nazi' lei' Sirte len glui'ke latj bë'a pche' leke.

¹⁸ Dza yubl'a, ni reikj'tzka bë'a, lena'a de ki gularu'u'ne lu nis xhën'a sui'i barku ni.

¹⁹ Bunn dza'a, kuin'kz'tu de ki gru'un'tu yugu le tun dxin ki barku ni.

²⁰ Zian dza tibi gbiidz ble'i'tu lekz'ka' bëëlj, len tzka'ti'ga rak bë'a rga'pa netu tir nun'kz'tu lëëz ulátu.

²¹ Chi guk zian dza tibi ra'wi'tu lena'a Pablo gze' ladj'ke yugute'ke len gne': —Bënni, yugute' le ni ti ktzaag'ru len ti nit'ru, nar'la bzenaagi'li neda ati ti groj'ru Creta.

²² San na'a ti waani'li koma gat'ga zue' bënni gatie', zala barku ni wak'ditji.

²³ Koma ndzë'i tue' gbaaz la'ay kie' Dios dujlui'lau'e ga zua', Dios psë'le'e le' koma naki'da kie' Dios len ruuna xhchiine,

²⁴ len gudxe neda: “Ti gaadx'du Pablo, koma run bayuudx gdxiinu lau'e bënni rnabe'e yëdz'lyu, len nia'a kiu' Dios usle' lu yëla gut yugute'ke bënni'a zak'leene li' lu barku.”

²⁵ Lena'a gulutip'laadxi'li bënni, koma rxhënilaadxa'ne Dios len nëëz'da dxia'a ki yugute' gak ka gudxe neda gbaaz la'ay kie'.

²⁶ San gun bayuudx tzajga'an'ru lu yu le de gatzj'lau'i lu nis xhën ni.

²⁷ Kati chi gdëëd chop seman yu'u'tu nëëz len rdátu lu nis xhën Adriático ati gaaz rche' ka netu bë'a, laadxi'yeel'a bënni'a tusa'ke barku'a gulak'be'i'de ki chi zua gdxin'tu ga nak yu.

²⁸ Gulurixe' ye tzka nis'a rë' ga rdxin lyu ati guk galj bës; guluza'ke ye lati ati gulurixe' le yubl ati guk ye chiinu bës.

²⁹ San glaadxi'de tzajtzu'u'ke lu giaj xhën ati guluzal'ke zga kuudzi'il barku tap gia zi'i le tun ga rzua dxiiz, len tun'tzke lëëz tzeni.

³⁰ San bënni'a tusa'ke barku ni gle'en'de laxhunj'ke lu barku'a, na' gulazulau'ke tuzëtje barku we'en'du tzal tuune lua' tuzal'ke gia zi'i le run ga rzua dxiiz barku zga lau'il.

³¹ Ati Pablo gudxe bënni'a rnabe'i'de bënni'a rajake gdil, len bënni'a rajake gdil: —Xhki bënni ni ti laga'ane lu barku ni, lbi'ili ti gunn ulaali.

³² Na' bënni'a rajake gdil guluchuuge xhtui barku we'en ni len gulusan'ke ley lu nis'a.

³³ Ziil'bal'a Pablo gutayui'de leke la'we lati. Len gudxe leke: —Chi guk'te chi'da' gbiidz na'a ti ra'wi'li tzal rbëëz'li bixh gak.

³⁴ Len ratayui'da lbi'ili gaag'li lati, koma run bayuudx xhki ba re'eni'li udela'li, koma nutunu bënni gnitie' zala tuuz gitza ikje.

³⁵ Buudx gne' ki, Pablo gde'le'e yët'xhtiil'a lu ne'e len be'e yëla dexhken Dios lau'ke yugute'ke, bxhuuxhje ley len gzulau'e ra'we.

³⁶ Chi nak ka' yugute'ke gulutip'laadxi'ke len lekz'ka' gla'we.

³⁷ Chop'gayua' tson'lalj yu chi'xhop'tu tzka'tu yu'u'tu lu barku ni.

³⁸ Buudx gla'we tzka gna kieke guluzal'ke xhua'xhtiil'a lu nis xhën'a ki wë'ta lati sui'i barku ni.

Rak'ditji barku lu nis xhën

³⁹ Kati gyeni, bënni'a tusa'ke barku ti gulumbe'ke yu ni, san gulale'i'de ra zeebi nis ni ga de yu la'chi gatzj'lau'i lu nis xhën; len gle'en'de luschiine ni' barku ni.

⁴⁰ Guluchuuge du lea zën gia zi'i ki barku'a len gulusan'ke lu nis xhën'a. Chi nak ka' guluchis'ke xhtza' laari'a rtuub bë' ati barku ni gzulau gbiiga ra yu la'chi lea de gatzj'lau'i lu nis xhën.

⁴¹ San barku ni yajdin ga rë'tzka yuuxh len ni' yajëëga. Lau'i barku ni yajgi lu yuuxh'a, len tirbi gdakz ati kuudzi'il barku'a gzulau rgin'j tzka'ti'ga rajtzu'u ley nis'a rbixh'rtul.

⁴² Bënni'a rajake gdil gle'en'de ludëëd'de bënni'a nadzun'ke, naar ku laxhunj'ke lu nis'a.

⁴³ San bënni'a rnabe'i'de bënni'a rajake gdil ti be'e leke latj le gu'un'de usle' Pablo, na' gnabe'i'de leke ki zia'a bënni tak taazje lu nis luzal'ke kuin'ke naar ladxiine lu yu,

⁴⁴ ati bënni'a ye la'ke'a laxhue' lu blaag u lu yaag ki barku'a. Ka' guk bulátu len bdxin'tu yugute'tu lu yu.