Hechos 25 - Porciones en Zapoteco de las Delicias

Pablo rdxiine lau'e Festo

¹ Festo bdxiine si'lu'ne'e xhlatje ka bënni rnabe', ati gdëëd tson dza gze'e Cesarea len bdxiine Jerusalén.

² Ni' bënni tunabe'i'de pxuuz len la'ke bënni blou ki Judea yajzua'ke yulau'i Pablo.

³ Len gulunaab'de le' Festo, gun'kze kieke klen, gnabe'e ki luche'ke Pablo Jerusalén. Koma leke chi nun'ke diidza ludëëd'de Pablo la nëëz;

⁴ ati Festo gudxe leke ki za nadzun'ze ka' Pablo lu yëdz Cesarea, ki tir nadzei zi' kuin'kze nuune tziije ni'.

⁵ Len gudxe leke: —Lena'a bënni'a tunabe'ke lbi'ili rala laza'leen'ke neda Cesarea, ati xhki bënni ni rudzëël bi nuune, ni' gunn gdxia'li'ne xhgia'.

⁶ Festo gzue' Jerusalén ka xuunu chi dza ka', len chi nak ka' budxiine Cesarea. Bueikj dza'a grë'e xhlatje ga rchuug'be'e len gnabe'e tzajxi'ke Pablo.

⁷ Kati Pablo gyaazie, bënni Judea za'ke Jerusalén gulabiiga'ke len tibi nak'kz le tudxia'ke le' xhgia', zala ti runn lului'ke ki nak lea tanáke'a.

⁸ Pablo be'e diidza ulaaz kie' len gne': —Neda tibi dula nuuna le rak len xhba kieke bënni Judea lekz'ka' le rak len gdou', len lekz'ka' lau'e bënni rnabe'e gdu yëdz'lyu Roma.

⁹ Ati Festo gu'un'de jga'ane dxia'a lau'ke bënni Judea na' bnaab'de Pablo: —¿Ba re'en'du so'u Jerusalén ki kueki'xhbei'da kiu' ni'?

¹⁰ Pablo bubi'e diidza: —Lau'e bënni rnabe'e Roma zua', ni nak ga rala kë'xhbei kia', koma ka li' nëëz'du dxia'a tibi nuuna kieke bënni Judea.

¹¹ Xhki bixh xhgia' rudzëël nuuna le nak bach si'a yëla gut, ti rudabaaga gatia'; san xhki tazi'ye'zke ki yugu lea tudxia'ke neda xhgia', nutunu nap lsenz gdëëd neda lu naa'ke. Rnaaba ki kuin'kze bënni'a rnabe'e yëdz'lyu kueki'xhbei'de kia'.

¹² Na' Festo be'leene diidza bënni'a tuzeajni'i'de le', len chi nak ka' gne': —Xhki re'en'du ki kuin'kze bënni rnabe'e yëdz'lyu kueki'xhbei'de kiu', ni' tziiju.

Pablo rdxiine lau'e Agripa

¹³ Gdëëd chop tson dza, Agripa bënni rnabe'e dzaage'nu Berenice yajake Cesarea yajyu'ke Festo.

¹⁴ Ati zian dza gulakua'ke ni', na' Festo gdixhji'de bënni rnabe' ni le rak kie' Pablo, len gudxe le': —Zue' ni tue' bënni pka'ane liidx'gia Félix.

¹⁵ Kati gyiija Jerusalén, bënni'a tunabe'i'de pxuuz dzaag'ke bënni guul tuzeajni'i'de bënni Judea dujzua'ke le' yulau'i, len gulunaab'de neda ki kchuug'be'a kie'.

¹⁶ Ati neda gdixhji'kda'ne ki bënni tunabe'ke Roma ti naleeb'kde luchuug'be'ke ki gatie' tue' bënni xhki ti zue' lau'i lau ka' lau'ke bënni'a tudxia'ke le' xhgia' naar gunn uzi'e kuine ki lea tudxia'ke le' xhgia'.

¹⁷ Lena'a kati gliid'ke ni, tikz'bi gdzei'da, dza yubl'a grë'a xhlatja lu yulau'i'a len gnabe'a tzajxi'ke bënni'a.

¹⁸ San kati guladxiine bënni'a tudxia'ke le' xhgia' ti gna bil gulanake kie' le guk'da neda lanáke.

¹⁹ Lazdui le tanéke kie' nak ki le leke tayiijilaadxi'ke, len kie' tue' Jesús bënni gutie' ati Pablo rne' ki nabaane.

²⁰ Ati neda ti bdzëël'da nakxh guuna, lena'a bnaab'da'ne Pablo xhki ba re'en'de tziije Jerusalén ki kë'xhbei kie' ni'.

²¹ San le' bnaabe ki kuin'kze bënni rnabe' blou ki gdu yëdz'lyu ni kchuug'be'e kie', lena'a gnabe'a ki za nadzun'ze ka' tzal gunn ksë'la'ne lau'e.

²² Na' Agripa gudxe Festo: —Lez neda re'en'da gyëën'da'ne bënni'a. Ati Festo bubi'e diidza: —Kxhë gyëën'du'ne.

²³ Bueikj dza'a Agripa dzaage'nu Berenice baxhën guladxin'tzka'ke len gulayaaz'ke yulau'i'a dzaag'ke bënni tunabe'i'de bënni rajake gdil len yugu bënni blou ki yëdz'a. Festo gnabe'e tzajxi'ke Pablo,

²⁴ len gne': —Agripa bënni rnabe' len tzka'li zua'leen'li ro'u na'dza: ni zue' bënni ni. Yugute'ke bënni Judea chi gliide tudxia'ke le' xhgia', ley lu yëdz Jerusalén lekz'ka' Cesarea ni, len tunaabi'tikz'de neda ki si'e yëla gut;

²⁵ ati ruuni neda ki tibi nuune le nak bach si'e yëla gut. San kuin'kze bnaabe ki bënni rnabe'e blou ki gdu yëdz'lyu ni kchuug'be'e kie', lena'a chi nuuna ki ksë'la'ne lau'e.

²⁶ San ti rdzëël'da bixh gzooja kie' bënni rnabe'a le rak kie' bënni ni, lena'a nuche'a'ne lau'li, len le rak'te na'a lau'u li' Agripa bënni rnabe' naar nakati uudx bi gnaabi'li'ne gdzëël'da bixh gzooja.

²⁷ Koma ti rle'i'da tzawi ksë'la'ne tue' bënni nadzuune len ti gzooja bixh xhgia' tudxia'ke le'.