Hechos 24 - Porciones en Zapoteco de las Delicias

Pablo rue'e xhtiidze'e lau'e Félix

¹ Gdëëd ga'yu' dza, Ananías bënni pxuuz blou bdxiine Cesarea dzaage la'ke bënni guul tuzeajni'i'de len nuche'ke Tértulo tue' bënni rdëëde diidza. Bënni ni guladxiine lau'e bënni rnabe' naar ludxia'ke xhgia' Pablo.

² Kati bdxiine Pablo, Tértulo gzulau'e rue'e xhtiidze'e, len gudxe Félix: —Xhkeenu li', bënni rnabe' nap'ru yëla rë'dxi, len tzka rubiaj'ni'i'du dxia'a yëdz kieeru ni ziaj'tekz dxia'a.

³ Yugute' le ni ruzi'tu xhbei ga'ti'teez, lena'a run'tzka'tu li' yëla dexhken, Félix li' nak'tzku bënni blou.

⁴ San ki ku gtzei'tu li' zi'te, ratayui'tu li' gzenaagu netu tuchi'i.

⁵ Bënni ni tibi nak'kz le ruune, len gdu yëdz'lyu rde' rbekie gdil ladj'ke bënni Judea, ati le' zue' lau'i kieke bënni Nazaret bënni'a tayiijilaadxi'ke le ti nak dxia'a.

⁶ Lekz'ka' gu'un'de guune bëzj gdou' kietu, lena'a gxhën'tu'ne.

⁷ [San Lisias bënni'a rnabe'i'de bënni'a rajake gdil bzi'lau'e yëla le'e len bubiije le' lu naa'tu.]

⁸ Kuin'kzu gunn gnaab'du'ne naar gnëëz'du dxia'a'tit yugute' le ni rdxia'tu'ne xhgia' ni.

⁹ Lekz'ka' gulukieebe diidza bënni Judea nakua'ke lau'e'a.

¹⁰ Bënni rnabe' ni ben ni'a'ne'e naar Pablo gui'e diidza, ati Pablo gne': —Nëëz'da ki zian iz chi guk naku li' bënni rchuug'be'e ki yëdz xhën ni, lena'a gdu laadxa'a gunn gui'a diidza ulaaz kia'.

¹¹ Ka nak ubë'ugiilju kuin'kzu gak'be'i'du ki zia'a guk'z chin'nu dza budxiina Jerusalén ki tziijilaadxa'ne Dios.

¹² Kati dujxaka'ke neda ti rdil'tu diidza len bënni yubl, len keg ruuna ruzbë' lu gdou' u lu yu'u useed u gaal ga yubl ki yëdz ni.

¹³ Bënni ni ti nap'ke le gunn'be' ki blik'de ki lea tudxia'ke neda xhgia'.

¹⁴ San rzi'luna'a ki ruuna xhchiine Dios kieke xuuz'xhna'a ka rna Nëëz Kub ni le leke tusi'ke lei' yëla riijilaadxi'i le ti nak dxia'a, koma rajle'a yugute' le nayoj lu xhba kie' Dios, len le guluzooje bënni glui'ke diidza ulaaz kie'.

¹⁵ Len nap'tu tuuz lëëz dzaag'ka'ne ki bënni nat lubaane lu yëla gut, ley bënni dxia'a ley bënni ti nak'ke bënni dxia'a.

¹⁶ Lena'a rui'laadxi'tekza gnëëz'da ki tibi nuuna lau'e Dios len lau bunach.

¹⁷ »Na' chi gdëëd tson tap iz gda' yëdz yubl, budxiina laadza naar gak'leena bunach yechi len gnëëdzja gun kia' lau'e Dios.

^18-19 Ati le ni nugi'i'da ruuna gdëëd bupa'a kuina ka naleebi'tu rala gak, tibi ruzbë' ruuna len keg rë' bunach zian, kati la'ke bënni Judea ki yu Asia dujxaka'ke neda lu gdou', bënni'a rala liide lakua'ke ni ki ludxia'ke neda xhgia' xhki bixh nap'ke len neda.

²⁰ Xhki na'a, bënni'a nakua'ke ni lanáke xhki ba guludzëël'de bixh dula nuuna kati gzua' lau'i dxin'lau'i blou kieke bënni Judea

²¹ Le gnaaza kati gzua' ladj'ke'a nak le ni: “Na'dza rchuug'be'li kia' koma rajle'a ki bënni nat ulubaane lu yëla gut.”»

²² Kati byëën'de le ni, Félix pkëëze yëla rë'xhbei ni, koma nanëëz'de dxia'a le rak ki Nëëz Kub ni ati gne': —Kati giide Lisias bënni'a rnabe'i'de bënni'a rajake gdil, gunn gnëëzr'da dxia'a le ni rak kieeli ni.

²³ Ati Félix gnabe'i'de bënni'a nak'lu'ne'e bënni rajake gdil ki za nadzun'ze ka' Pablo, ati gape lati lsenz len gnëëdzje latj ki bënni'a tadzaage le' dxia'a dujyu'ke le'.

²⁴ Gdëëd chop tson dza bdxiine le yubl Félix dzaage'nu Drusila nguul kie' leenu nak'nu nguul Judea. Ati Félix gnabe'e tzajxi'ke Pablo, len bzenaage le gudxe le' le rak ki yëla rajle' len Jesucristo.

²⁵ San kati Pablo be'leene le' diidza ki rala kche'ru tu yëla naban dxia'a, ki rala gnabe'i'ru kuin'ru, len ki Dios kchuug'be'e dza zia'a za', Félix guudxi'de len gudxe le': —Buaj na'a, nakati gapa latj uliidza li' yubl.

²⁶ Ati lez Félix ruune lëëz ki Pablo gnëëdzje kie' dumi lena'a laya'ladxiini rliidze le' ki gui'leene le' Diidza

²⁷ Gdëëd chop iz Félix pka'ane yëla rnabe'a ati xhlatje'a gzue' Porcio Festo. Ati koma Félix gu'un'de jga'ane dxia'a lau'ke bënni Judea lena'a pka'ane Pablo liidx'gia.