Hechos 23 - Porciones en Zapoteco de las Delicias

¹ Pablo byue' bënni'a rë'ke lu dxin'lau'i blou'a len gudxe leke: —Bë'cha'a, neda gdu yëla naban kia' chi gzua' lau'e Dios len nëëz'da ki tibi nuuna.

² Na' Ananías bënni'a nake pxuuz blou, gnabe'i'de bënni'a nakua'ke ga'la ga ze' Pablo laga'pa'ke rue'e.

³ Ati Pablo bubi'e diidza: —¡Dios ka'pe'e li', le naku ka bënni nuda' blo'u! Xhki li' rë'u ki kueki'xhbei'du kia' ka rna xhba kie' Dios, ¿bixhkia' rudabaagu xhba ni ati rnabe'u laga'pe'e neda?

⁴ Bënni nakua'ke ni' gle'ke Pablo: —¿Naru ka rala ktzag'yuudxu'ne diidza pxuuz blou kie' Dios?

⁵ Pablo gne': —Bë'cha'a, ti nëëz'da ki le' nake pxuuz blou; koma lu Diidza La'ay rna: “Ti gneu' le ku nak kie' bënni rnabe'e yëdz kiu'”

⁶ Chi nak ka', kati guk'be'i'de ki la'ke bënni'a rë'ke lu dxin'lau'i'a nak'ke bënni saduceo ati ye la'ke nak'ke bënni fariseo, Pablo pchis chi'e len gne': —Bë'cha'a, neda naka bënni fariseo, len bënni dia'dza kia' nak'ke fariseos, ati na'a rë'li rchuug'be'li kia' koma ruuna lëëz ki bënni nat lubaane lu yëla gut.

⁷ Kati Pablo buudx gne' ki, bënni fariseo len bënni saduceo gularooje chop'l len gulazulau'ke tadil'e diidza.

⁸ Koma bënni saduceo tanáke ki ti dzë'ë'ke gbaaz la'ay, ki ti dzë'ë bë', len ki bënni nat ti tubaane lu yëla gut; san bënni fariseo tayajle'ke yugute' le ni.

⁹ Yugute'ke tuskua'ke; ati la'ke bënni useed xhba kie' Dios len nu'tza'ke len bënni fariseo, gulazui'de len gulanake: —Bënni ni tibi nuune; naxhka xhki be'leen le' diidza tu bë' u tue' gbaaz la'ay.

¹⁰ Ati byali'i ruzbë' ni, lena'a bënni'a rnabe'i'de bënni'a rajake gdil guudxi'de luxhuuxhj'lukin'je Pablo, na' gnabe'e luliidze bënni'a rajake gdil naar lubiije le' ni' len luche'ke le' yubl ga taga'ane bënni rajake gdil.

¹¹ Bueikj dzë' yubl'a, Xan'ru yajlui'lau'e len Pablo len gudxe le': «Ptip'laadxu'u, Pablo, koma ka beenu na'a dujxaka'lau'u kia' Jerusalén ni, lekz'ka' tzajxaka'lau'u kia' Roma.»

Tuune diidza ludëëd'de Pablo

¹² Bueikj dza'a, la'ke bënni Judea gluune diidza ludëëd'de Pablo, len gulazi'lunaa'ke lua'ke dë' len tibi lia'aj'la'we nakati lazakir'de ludëëd'de le'.

¹³ Nadëëd'ke chua'ke bënni gulazi'lunaa'ke le ni.

¹⁴ Na' yajake lau'ke bënni tunabe'i'de pxuuz len bënni guul tuzeajni'i'de, len gle'ke leke: —Netu chi nazi'lu'naa'tu gua'tu dë' len tibi gia'aj'gaag'tu nakati gdëëdir'tu'ne Pablo.

¹⁵ Na'a lbi'ili len ye la'ke bënni nutza'ke lu dxin'lau'i blou'a gulgun lua' ki uchia'a'li dxia'a'tit le rak kie' bënni ni ati gie'li'ne bënni'a rnabe'i'de bënni'a rajake gdil dujue'e le' kxhë lau'li; len netu sua'kuas'tu ki gdëëdi'tu'ne kati zia'a gdxiine ni.

¹⁶ San bi'i kieenu nguul zaane Pablo byëëni'bi le ni, len gyaj'bi ga taga'ane bënni'a rajake gdil yajtixhji'bi'ne.

¹⁷ Pablo bliidze tue' bënni rnabe'i'de tu'gayua'ke bënni rajake gdil len gudxe le': —Yajua'bi bi'i ni len bënni rnabe'i'de lbi'ili, koma nap'bi tu diidza rala gui'leemi'ne.

¹⁸ Bënni ni yajue'bi len bënni rnabe'i'de leke, len gudxe le': —Pablo bënni'a nadzuune bnaab'de neda kche'a'bi ni bi'i kuidi ni, koma zua diidza rala gui'leemi li'.

¹⁹ Bënni'a rnabe'i'de bënni'a rajake gdil gde'le'bi bi'i kuidi ni len pche'e'bi ga yubl len bnaab'de'bi: —¿Bixha re'en'du gie'u neda?

²⁰ Bi'i kuidi ni bubi'i'bi diidza: —Bënni Judea chi gluune diidza dzaag lun'ke lua' ki uluchia'a'ke dxia'a'tit le rak kie' Pablo ati lunaab'de li' tzaju'u'ne kxhë lau'ke bënni dxin'lau'i blou.

²¹ San ti tzajle'ku'ne, koma nadëëd chua'ke bënni rë'nis'ke lbi'ili, len gulazi'lunaa'ke lua'ke dë' len tibi lia'aj'la'we nakati lazakir'de ludëëd'de Pablo; ati na'a chi nakua'kuase len tabëëz'ze guunu lea le'ke li'.

²² Na' bënni'a rnabe'i'de bënni'a rajake gdil busë'le'bi bi'i kuidi ni len gnabe'i'de'bi ki nutunu kixhji'i'bi lea guudx'bi'ne'a.

Tusë'le'e Pablo lau'e Félix

²³ Bënni'a rnabe'i'de bënni'a rajake gdil bliidze chop'ke bënni nak'lu'naa'ke bënni rajake gdil, len gnabe'i'de leke lupa'a'ke kieke chop'gayua'ke bënni rajake gdil bënni laze'i ni'a'ke, tson'lalj yu chi'ke bënni labiáke'ba bua', len chop'gayua'ke bënni lua'ke gia'tuchi naar tzjake Cesarea kati chi gdëëd xhtzë'.

²⁴ Lekz'ka' gnabe'e lukëëze'ba bua' naar kuie'ba Pablo, len luche'ke le' dxia'a tzawi lau'e Félix bënni rnabe'e.

²⁵ Len leke psë'le'e tu gich ga rna ki:

²⁶ «Neda Claudio Lisias rliidz'tzawi'a li' Félix bënni rnabe' len bënni blou.

²⁷ Bënni Judea gulazëëne bënni ni len zjake ludëëd'de le', san kati neda guk'be'i'da ki nake tue' bënni nabaabe Roma gyiija len bënni rajake gdil len yajsla'ne.

²⁸ Ati gu'un'da gnëëz'da bixhkia' tudxia'ke le' xhgia' lena'a yajua'ane lau'i dxin'lau'i blou kieke bënni Judea,

²⁹ ni' gnëëz'da ki tudxia'ke le' xhgia' le rak ki xhba le leke nap'ke; san tibi budzëël kie' le nak bach si'e yëla gut u tzajtzu'e liidx'gia.

³⁰ San na' guk'be'i'da ki bënni Judea tuune diidza ludëëd'de le' psë'la'ne lau'u; ati lekz'ka' chi gnabe'ik'da'ne bënni'a tudxia'ke le' xhgia'a liide lau'u xhki bixh nap'ke len le'.»

³¹ Bënni'a rajake gdil ni gluune lea gle'ke leke ati reel guluche'ke Pablo Antípatris latj ga takua'ke bënni rajake gdil.

³² Bueikj dza'a bënni'a rajake gdil len zjake len ni'a'ke ye'wake ga taga'ane Jerusalén, ati bënni'a dxiaaz'ke'ba bua' gulugie'le'e nëëz len Pablo.

³³ Kati guladxiine Cesarea, gulunëëdzje gich'a lu ne'e bënni'a rnabe'e, ati guludëëde Pablo lu ne'e.

³⁴ Kati buudx bil'e gich'a, bënni rnabe'a bnaab'de Pablo gaxh bënni le'; ati kati gnëëz'de ki nake bënni Cilicia,

³⁵ gudxe le': —Kati liid're bënni'a tudxia'ke li' xhgia' gzenaaga le rala gnou'. Chi nak ka gnabe'e lakua'ke bënni lun'chi'ke le' lu yulau'i kie' Herodes.