Hechos 22 - Porciones en Zapoteco de las Delicias

¹ «Guluzenaag le gie'a lbi'ili bë'cha'a len lbi'ili bënni naguul.»

² Kati gulayëën'de ki rue'e diidza hebreo gulabë'r'ke dxiiz. Ati Pablo gudxe leke:

³ «Neda naka bënni Judea, guulja yëdz Tarso ki yu Cilicia, san guluskuule neda Jerusalén ni, ati Gamaliel nake bënni pseed'de neda, ka'teez rna xhba kieke xuuz'xhtau'ru guul. Len chi be'laadxi'tekza guuna le ryaazlaadxe'e Dios, ka run'li na'a yugute'li.

⁴ Zia'a gdxia'laadxa'a gdëëdi'kda'ne yugu bënni'a zjak'leene Nëëz Kub ni, len gxhën'ka'ne len glu'u'ka'ne liidx'gia, ley bënni ley nguul.

⁵ Le' pxuuz blou len yugu bënni guul tuzeajni'i'de gunn lujxaka'lau'ke le ni. Leke glun'ke gich bi'a kieke bënni bë'chi'ru ki Judea ni len nakua'ke Damasco, ati gyiija ni' yajdiilj'ka'ne bënni nayajle'ke naar yuche'ka'ne Jerusalén ni len ksaka'zi'ka'ne.

⁶ »San tzal ziija yu'a nëëz, len chi zuakz gdxiina Damasco lau'i dza'a, kati ka zua ka' tu gi' le za' lu xhba gyep'yës'lni' gdu ga zea'a,

⁷ na' gbixa lyu, len byëën'da tu chi'i le re' neda: “Saulo, Saulo, ¿bixhkia' rlaag'yuudxu neda?”

⁸ Na' bnaaba: “¿Nuxh li', Xan?” Ati chi'i ni re' neda: “Neda naka Jesús ki Nazaret, larakz bënni'a li' rlaag'yuudxu'ne.”

⁹ Gulale'i'de gi'a bënni'a zak'leene neda san ti gulayëën'de chi'i ni rliidz neda.

¹⁰ Neda bnaaba: “¿Bixh rala guuna, Xan?” Ati Xan'ru gudxe neda: “Gyas ati psiuudx gyaj Damasco. Ni' le'ke li' le rala guunu.”

¹¹ Ati bënni lza'a gulazëën'de na'a guluche'ke neda Damasco, koma yeni ki gi'a ben ga kchul lau'a.

¹² »Ni' zue' tue' bënni le' Ananías, bënni riijilaadxe'e Dios len rzenaage le rna xhba kie' Moisés, len yugute'ke bënni Judea nakua'ke Damasco tui'tzka'ke kie' diidza dxia'a.

¹³ Ananías biide duyue' neda, len kati bdxiine gne': “Saulo bë'cha'a, bule'i.” Len na'teez bule'i'da, len benn ble'i'da'ne.

¹⁴ Len chi nak ka' gne': “Dios kieke xuuz'xhtau'ru guul grëe' li' naar gnëëz'du le Le' ryaazlaadxe'e, naar gle'i'du'ne bënni dxia'a len gyëën'du le gie'e li' kuin'kze.

¹⁵ Koma li' tzajxaka'lau'u kie' lau'ke yugute'ke bunach, len kixhjë'u le chi byëën'du len chi ble'i'du.

¹⁶ Ati na'a tirbi këëzu. Gyas, bdiil nis len bliidze Xan'ru ki uxhie' xhtu'lu'u.”

¹⁷ »Kati budxiina Jerusalén, gyiija gdou' len yaje'leena'ne diidza Dios, ati Dios blui'de neda.

¹⁸ Ble'i'da'ne Xan'ru, len gudxe neda: “Ben ziuub, buroj'te Jerusalén ni, koma ti luzenaagi'de li' le rnou' kia'.”

¹⁹ Neda gudxa'ne: “Xan, leke nëëzi'kde ki neda gyiija gdu gap nakua' yu'u useed len gdin'ka'ne ati glu'u'ka'ne liidx'gia bënni tayajle'ke li',

²⁰ ati kati guludëëd'de le' Esteban bënni'a dujxaka'lau'e kiu', kuin'kza zea' ni' run'ka'ne tuuz, len ben'chi'a xha'ke bënni'a guludëëd'de le'.”

²¹ San le' Xan'ru gudxe neda: “Gyaj, ki neda ksë'la'a li' len bënni yëdz yubl.”»

Bënni'a rnabe'i'de bënni'a rajake gdil guk'lu'ne'e Pablo

²² Tzka'z guluzenaag'ke le'; na' gulazulau'ke tuskua'ke: «¡Bënni'a ti nake bach zue' yëdz'lyu! ¡Bdëëd'de!»

²³ Ati tzka'ti'ga tuskua'ke len tabiib'ke xha'ke len tuzal'ke bexhtë lu bë',

²⁴ bënni'a rnabe'i'de bënni'a rajake gdil'a gnabe'e lagu'u'ke Pablo ga taga'ane bënni'a rajake gdil, na' lagiine le' naar kixhjë'e bixhkia' bunach'a dxia'laadxi'ke le' diidza.

²⁵ San kati chi nuuga'ke le' ki lagiine le', Pablo bnaab'de bënni'a rnabe'i'de bënni'a rajake gdil: —¿Naru nap'li lbi'ili yëla rnabe' kin'li'ne tue' bënni nabaabe lu yëdz Roma, xhki ti nabeki'xhbei'ni'li kie'?

²⁶ Kati byëën'de le ni, bënni ni yajyue bënni xaane len gudxe le': —¿Bixh guunu na'a? Bënni ni nabaabe yëdz Roma.

²⁷ Na' bënni'a rnabe'i'de bënni'a rajake gdil gbiige'e ga ze' Pablo, len bnaab'de le': —¿Naru leel naku bënni nabaabe yëdz Roma? Pablo bubi'e diidza: —Ja'.

²⁸ Bënni ni gudxe le': —Neda zxhëni dumi gyui'i'da naar gbaaba Roma. Ati Pablo bubi'e kie' diidza: —Neda ka guulj'za nabaaba ni'.

²⁹ Ka guk ni, bënni'a rala lagiine le' Pablo gulubiiga'ke len lekz'ka' bënni rnabe'i'de leke kati guk'be'i'de ki Pablo nabaabe Roma, guudxi'de koma beege'e le'.

Pablo rdxiine ra dxin'lau'i blou kieke bënni Judea

³⁰ Bueikj dza'a, bënni'a rnabe'i'de bënni'a rajake gdil gu'un'de gnëëz'de dxia'a'tit bixh xhgia' tudxia'ke le' Pablo, na' pseedxe le' du gia'a len butzaage bënni tunabe'i'de pxuuz len yugute'ke bënni dxin'lau'i blou'a. Len chi nak ka' gliije Pablo len bze' le' lau'ke.