Hechos 21 - Porciones en Zapoteco de las Delicias

Pablo riije Jerusalén

¹ Kati pka'ank'tu'ne bënni bë'chi'ru'a, gyu'u'tu barku len gyaj'tu yëdz Cos, len dza yubl'a gyaj'tu yëdz Rodas, len ni' gza'tu gyaj'tu yëdz Pátara.

² Lu yëdz Pátara yajdzaag'tu tu barku le ziaj yëdz Fenicia, ati gren'tu le'i.

³ Kati ziaj'tu'a ble'i'tu yëdz Chipre buga'an zga kuiti'le'el'tu yëëgl len gyaj'tu zga Siria. Ati gyaaz'tu ra nis xhën ki Tiro koma ni' rala jka'an yua' barku ni.

⁴ Yajxakak'tu'ne bënni tayajle'ke Xan'ru, len bga'an'leenk'tu'ne gaadx dza. Ati leke gle'ke Pablo ki ti rala tziije Jerusalén, koma ka' chi gdixhji'de leke Bë' La'ay kie' Dios.

⁵ San kati guk gaadx dza, broj'tu. Yugute'ke dzaag'ke'nu nguul kieke len bi'i kieke gulaza'leene netu bdxin'te'tu ra yëdz, ati ni' ra nis'a bzechu xhiib'tu len be'leen'tu'ne diidza Dios.

⁶ Chi nak ka' bzei diidza lza'a'tu len gren'tu lu barku, ati leke ye'wake liidx'ke.

⁷ Ati psiuudx'tu gyu'u'tu nëëz lu barku gza'tu Tiro len bdxin'tu Tolemaida, ni' yajyuk'tu'ne bënni bë'chi'ru len bga'an'leenk'tu'ne tu dza.

⁸ Dza yubl'a broj'tu len gyaj'tu yëdz Cesarea. Gyaj'tu liidxe Felipe bënni'a rgixhjë'e diidza kub dxia'a, len nake tue' kieke gaadx'ke bënni'a tak'leene bënni gbaaz kie' Xan'ru, ati bga'an'leen'tu'ne.

⁹ Felipe ni nakua'bi tap'bi bi'i nguul raban kie', bi'i tui'bi diidza ulaaz kie' Dios.

¹⁰ Chi guk zian dza zua'tu ni', kati bdxiine Agabo tu bënni rue'e diidza ulaaz kie' Dios ze'e Judea.

¹¹ Kati bdxiine lau'tu gde'le'e xhpaane Pablo, ati len ley beege ni'a'ne'e, len gne': —Le' Bë' La'ay kie' Dios rne' ki ka' luuge'e le' bënni Judea bënni'a naki kie' pan ni, len ludëëde le' lu naa'ke bënni yëdz zitu.

¹² Kati byëëni'tu le ni, netu len bënni Cesarea gutayui'tu'ne Pablo ti tziije Jerusalén.

¹³ Ati Pablo bubi'e diidza: —¿Bixhkia' rbëëdx'li ati rzuaali neda bayechi? Neda nia'a kie' Xan'ru Jesús zua' si'na keg tziaj'za liidx'gia lekz'ka' zala ludëëdi'tzi'de neda Jerusalén.

¹⁴ Ati le ti gxha'ki'tu gun'tu ga ti tziije Jerusalén, guudx'tu'ne: —Gak ka ryaazlaadxe'e Xan'ru

¹⁵ Gdëëd le ni, bupa'a'tu kietu ati gyaj'tu Jerusalén.

¹⁶ Gulaza'leene netu la'ke bënni tayajle'ke Xan'ru ki yëdz Cesarea, leke guluche'ke netu liidxe Mnasón tue' bënni Chipre, bënni ni zia'at nayajle'e ati le' rala gunne ga gas'tu.

Pablo rajyue Santiago

¹⁷ Kati bdxin'tu Jerusalén, bënni bë'chi'ru tudziiji'tzki'de gulale'i'de netu.

¹⁸ Dza yubl'a, Pablo gza'leene netu yajyu'tu'ne Santiago, ati ni' nakua'ke lekz'ka' bënni guul tuzeajni'i'de.

¹⁹ Pablo bliidz'tzawi'e leke, len chi nak ka' gdixhji'de leke dxia'a'tit le Dios chi beene lu ne'e ladj'ke bënni ti nak'ke bënni Judea.

²⁰ Kati gulayëën'de le', gulagu'u'ke ba Dios, ati gle'ke Pablo: —Na'a bë'cha'a, rle'i'kz'du li' ki zian mil'ke bënni Judea chi gulayajle'ke, san yugute'ke tanáke ki ni run bayuudx gun'ru le rna xhba kie' Moisés.

²¹ Ati chi gulagixhji'de leke ki li' rseedik'du'ne yugute'ke bënni Judea bënni nakua'ke yëdz yubl ki rala ludabaaga'ke xhba kie' Moisés, len re'ku'ne ki ti rala luchuuge rui'i ga'ldia' kiek'bi bi'i kieke, len tir luune le chi naleebi'ru run'ru.

²² ¿Bixh gun'ru na'a? Koma bunach ulak'be'i'de ki nadxiinu ni.

²³ Le ni gunn guunu: Ladj'tu ni nakua'ke tap'ke bënni rala lun'ke le chi nuxën'ke'laadxe'e Dios rala lun'ke.

²⁴ Pche'ke gultzajpa'a kuin'li dzaag'ku'ne ka chi naleebi'ru, gdiixhj tzka rala lutë'ke ki gunn luchuuge gitza ikj'ke, naar lale'i'de yugute'ke ki lekz'ka' li' ruunu le rna xhba kie' Dios, len ti nak lea tanáke kiu'a.

²⁵ Ka nak kieke bënni'a ti nak'ke bënni Judea ati chi gulayajle'ke, chi bzoj'tu kieke le chi gleki'xhbei'tu: ki ti rala la'we xhpeela'ba bua' gixi chi nunëëdzj'ke'ba ki budou', ti la'we xhpeelak'ba bua' gixi bua' ti nabiaj'ke'ba rën, ti la'we rën, len ti tzajtzu'u'leen'ke nu ku nakua'leen'ke.

Tazëëne le' Pablo lu gdou'

²⁶ Na' Pablo pche'e tap'ke bënni'a, len bueikj dza'a gulupa'a'ke kuin'ke; chi nak ka' gyaazie gdou' naar kixhjë'e batxh gza'a dza lun'ke lea guluxënelaadxe'e Dios, kati tu tu'ke rala tzajua'ke gun kieke.

²⁷ Kati chi zua gza'a le gaadx dza'a, la'ke bënni Judea ki gia'a yeego ki Asia gulale'i'de Pablo lu gdou' ati gulutzatze bunach'a, len gulabia'niidi'de Pablo,

²⁸ ati guluskua'ke: «¡Bënni Israel, gulgak'leen netu! Bënni ni nake bënni'a rudu'kz rde' rseed'de bunach ludabaaga'ke yëdz kieeru, ludabaaga'ke xhba kie' Dios len ludabaaga'ke gdou' ni. Ati na'a lekz'ka' chi glu'e bënni Grecia lu gdou' len beene bëzj Latj la'ay.»

²⁹ Tanáke ki koma zia'a gulale'i'de le' dzaage Trófimo bënni Éfeso tadáke lu yëdz'a, ati taki'de ki Pablo pche'e le' gdou'.

³⁰ Gdu yëdz gyatz, ati taxiti'ze bunach'a guladxin'ke. Gulazëëne Pablo len gla'ij'ke le' rayu'u gdou', len gulusiaj'te'ke puert'a.

³¹ Chi zuakz ludëëd'de le', kati bdxin xhson kie' bënni'a rnabe'i'de tu'gayua'ke bënni rajake gdil, ki gdu yëdz Jerusalén nayatz.

³² Bënni ni butzaage yugu bënni rajake gdil len bënni nakua'ke lau'i kieke len rxiti'ze gyiije ga rë'ke bunach'a. Kati gulale'i'de le' len yugu bënni rajake gdil gulusan'ke tut'ke Pablo.

³³ Na' bënni'a rnabe'i'de bënni'a rajake gdil ni gbiige'e len gxhëëne Pablo len gnabe'e luuge'e le' len chop du gia. Chi nak ka' bnaab'de bunach'a nuxh nake len bixh nuune.

³⁴ San dedeel le tanáke bunach'a, ati ti benn gak'be'i'de bixh'tek'a rak, lena'a gnabe'e luche'ke le' ga taga'ane bënni'a rajake gdil.

³⁵ Kati guladxiine niyepi ki latj ni de ki glua'ke le' Pablo koma bunach'a taz'ta'ta'ke,

³⁶ len yugute'ke zjake kuudzu'ke tuskua'ke: «¡Guludëëd'de!»

Diidza be'e Pablo lau'ke bënni yëdz

³⁷ Kati zjake lagu'u'ke le' liidx'gia'a, Pablo bnaab'de bënni'a rnabe'i'de bënni'a rajake gdil: —¿Gunn gui'leena li' diidza tuchi'i? Bënni ni bubi'e diidza: —¿Naru raku rui'u diidza ki Grecia?

³⁸ ¿Naru keg li'a bënni'a gyase Egipto kati dza ni' len rudabaage'e yëdz len pche'e lu yu biidx ka tap mil'ke bënni tudëëd'de bunach?

³⁹ Pablo gudxe le': —Neda naka bënni Judea, guulja lu yëdz Tarso ki yu Cilicia, lu tu yëdz blou nabaaba; san ben klen, benn lsenz gui'leen'ka'ne diidza bunach ni.

⁴⁰ Bënni'a rnabe'i'de bënni'a rajake gdil ni bnëëdzje kie' lsenz, ati Pablo gzui'de lu niyepi'a len pchise ne'e naar luzenaagi le' bunach'a. Kati chi guta'dxi, be'leene leke diidza hebreo, len gne':