Hechos 19 - Porciones en Zapoteco de las Delicias

Pablo rdxiine lu yëdz Éfeso

¹ Tzal Apolo zue' lu yëdz Corinto, Pablo gdëëde gdu gia'a yeego'a len bdxiine Éfeso, ni' yajxaka'ke la'ke bënni tayajle'ke.

² Len bnaab'de leke: —¿Ba gxhi'li'ne Bë' La'ay kie' Dios kati gyajle'li? Leke gulubi'i'ke diidza: Tibi diidza nayëëni'tu kie' le' Bë' La'ay kie' Dios.

³ Pablo bnaab'de leke: —Ati ¿Nakxh bdiil'li nis lbi'ili? Leke gulubi'i'ke diidza —Ka pkiile nis Juan

⁴ Pablo gudxe leke: —Juan pkiile nis bënni'a tubi'i'laadxi'ke len Dios, san gudxe leke ki layajle'ke bënni'a zia'a ze'e kuudze'e, bënni'a nake Jesús.

⁵ Kati gulayëën'de le ni guludiile nis lu le' Xan'ru Jesús;

⁶ ati kati Pablo pxua'ne'e leke, lekz'ka' gulazi'ke Bë' La'ay kie' Dios, len tui'ke diidza yubl, len glui'ke diidza ulaaz kie' Dios

⁷ Ka chin'nu'ke bënni ni nak'ke.

⁸ Tson beu' Pablo gyiije lu yu'u useed, len yaalj rgixhji'de leke xhtiidze'e Xan'ru, ati rui'leene leke diidza naar lumbe'ke le nak yëla rnabe' kie' Dios.

⁹ San la'ke bziid ikj'laadxi'dau'ke, len ti gulayajle'ke, ati lau'ke bunach'a gulane'zi'ke ki Nëëz Kub'a. Na' Pablo tir bdzaage leke, ati pche'e bënni'a tayajle'ke'a lu yu'u useed kie' bënni le' Tirano, len yugu dza rui'leene leke diidza ni',

¹⁰ Chop iz beene ki, lena'a yugute'ke bënni'a nakua'ke lu yëdz ki Asia, ley bënni Judea ley bënni ti nak'ke, gulayëën'de xhtiidze'e Xan'ru.

¹¹ Ati Dios rlui'e yëla wak xhën lu ne'e Pablo,

¹² ki guk, ati yugu laari tzala'a u ye la'k laari le Pablo rgaane tuwaake ga nakua'ke bënni we', ati bënni we'a tu'ueake, len bë' xëwi le dzë'ë leke turoj.

¹³ San la'ke bënni Judea bënni tadáke la nëëz tubiije bë' xëwi bunach, gle'en'de luguune dxin le' Xan'ru Jesús; len te'ke bë' xëwi'a: «¡Lu le' Jesús, bënni'a Pablo rgixhjë'e, rnabe'i'da lbi'ili uroj'li!»

¹⁴ Ka' gluune gaadx'ke bënni xi'ine Esceva, tue' bënni rnabe'i'de pxuuz, len nake bënni Judea.

¹⁵ San tu lyas tu bë' xëwi'a guudx leke: «Numbe'a'ne Jesús, len lekz'ka' Pablo; san lbi'ili, ¿Nuxh nak'li?»

¹⁶ Na'teez, bënni'a yu'u le' bë' xëwi'a bzale kuine, len tzaxhunj'z glekie leke, psaka'dë'tzke leke ka gnaaz kie', na' guluxhunj'ke nu'yu'a nakik'de zi' len xhgiidz'ke.

¹⁷ Yugute'ke bënni Judea len bënni ti nak'ke bënni Judea len nakua'ke Éfeso gulanëëz'de le ni ati glaadxi'tzki'de. Ki guk ati guk xhën le' Xan'ru Jesús.

¹⁸ Lekz'ka' zian'ke bënni'a gulayajle'ke tuxua'le'pe lau'i lau ka' yugute' le ku nak le chi gluune,

¹⁹ len zian'ke bënni gluune dxin udza' glua'ke lich'ke'a len guluzeegie lau'ke yugute'ke. Kati gulabiaj'be'ke gakaxh'ti yui'ik gich ni, benn'be' ki yui'ik ka chi'un mil dumi plata.

²⁰ Ka' guk xhtiidze'e Xan'ru ziaj rxhën len rlui' yëla wak ki.

²¹ Gdëëd le ni, Pablo pchuug'laadxe'e tziije Macedonia len Acaya, naar gdxin'tie' Jerusalén. Len gne' ki na' tëëd tziije Jerusalén rala tziije lekz'ka' Roma.

²² Na' psë'le'e Macedonia Timoteo len Erasto, chop'ke bënni tak'leene le', tzal le' bga'ane ye chop tson dza Asia.

Ruzbë' le guk yëdz Éfeso

²³ Dza ni' bunach zian gulayatz lu yëdz Éfeso nia'a ki Nëëz Kub'a,

²⁴ len bënni ptzatze ley nake Demetrio tue' bënni ruune dxin len plata. Bënni ni ruune yu'u gdou' we'en'du len plata ni, le nak lsaki'i gdou' kieenu budou' leenu Artemisa, len rka'an'tzka dumi kieke bënni tun'leene le' dxin.

²⁵ Lena'a butzaage bënni ni len ye la'ke bënni tuune larakz dxin ni, len gudxe leke: «Bënni, lbi'ili nëëzi'li ki le run ga ra'ta'tzka kieeru dumi nak dxin ni.

²⁶ San ka lbi'ili rle'i'kz'li len ryëëni'li, bënni'a le' Pablo rde' rne' ki dios'a lea nun'ke bunach ti nak'ke dios; ati ka' chi ben'gan'de bunach zian, len keg Éfeso niiz lekz'ka' yugute' yëdz ki Asia.

²⁷ Naadxi'tzki le ni, koma gunn nit'ru xhchin'ru, len gdou' kieenu Artemisa nguul nak'nu dios xhën gunn nit bala'an ki, len tir layaazlaadxi'ke'nu yugute' yëdz ki Asia len gdu gabi'i yëdz'lyu ga tayiijilaadxi'ke'nu.»

²⁸ Kati gulayëën'de le ni, guladza'a'tzka ikj'ke len guluskua'ke: «¡Xhën'te nak'nu Artemisa kieke bënni Éfeso!»

²⁹ Bachixh xhën gyu'u gdu yëdz, na' gulabialaadxi'ke Gayo len Aristarco chop'ke bënni Macedonia bënni tadzaage Pablo len gla'ij'ke leke len guladxin'tie' latj ga ryu'u xhwitj'ke.

³⁰ Pablo gu'un'de tzaazie ni' naar gui'leene diidza bunach'a, san bënni'a tayajle'ke Xan'ru ti gle'en'de.

³¹ Lekz'ka' ladj'ke bënni'a tunabe'ke Asia dzë'ë'ke la'ke bënni tadzaage dxia'a Pablo, len gulusë'le'e xhson ki ti tzaazie ni'.

³² Tzal'za, lu dxin'lau'i'a, ki kieke le tanáke, len ruzbë' rë'ke bunach'a len bënni zian ti nëëzi'kde bixh wen nudzaag'ke.

³³ Ati la'ke bënni'a gulagixhji'de Alejandro lea rak'a, na' bënni Judea'a guludxiige'e le' lau'ke yugute'ke, Alejandro ni pchise ne'e ki labë'ke dxiiz len naar gunn gui'e diidza ulaaz kieke bënni Judea'a lau'ke bënni yëdz.

³⁴ San kati gulak'be'i'de ki lekz'ka' le' nake bënni Judea, yugute'ke guluskua'ke ka chop tson ur: «¡Xhën'te nak'nu Artemisa kieke bënni Éfeso!»

³⁵ Bënni rzooje gich lu yulau'i'a beene ga gulabë'ke dxiiz, len gne': «Bënni yëdz Éfeso, gdu yëdz'lyu nanëëzi ki yëdz ni nak'lu'ne'i gun'chi'i gdou' kieenu dios Artemisa len lekz'ka' giaj kieenu le bëxhj lu xhba.

³⁶ Ati le ni nutunu gunn udabaaga, lena'a guluzuadxi len ti gun'li le ku nak.

³⁷ Koma bënni'a nuchek'li'ne ni tibi tabiaj'laane le dzë'ë lu gdou' len ti tanéke le ku nak kieenu dios kieeru.

³⁸ Xhki Demetrio len bënni tun'leene le' dxin zua bi zua kieke len leke, nakua' yulau'i len nakua'ke bënni tuchuug'be'ke; ni' tzjake len kë'xhbei kieke.

³⁹ Ati xhki lbi'ili biil rnaab'li, nakiini kë'xhbei kati tzu'u dxin'lau'i.

⁴⁰ Len le ni guk ni na'dza ze banaadx ludxia'ke ro'u xhgia' ki rgiilj'ru gdil, koma tibi dekz gnaaru xhki lunaab'de ro'u ki le gyatz ni.»

⁴¹ [Buudx gne' ki, buse'e bunach'a.]