Hechos 17 - Porciones en Zapoteco de las Delicias

Ruzbë' le guk yëdz Tesalónica

¹ Ga zjake'a, Pablo len Silas guladëëde zga yëdz Anfipolis len Apolonia, len chi nak ka' guladxiine yëdz Tesalónica ga bënni Judea nuzua'ke yu'u useed kieke.

² Pablo, ka chi naleeb'de, gyaj'tekze yu'u useed ni, len ka galj gbiidz tza tza tu'ueak'laadxi'ke bënni Judea, gyiije len be'leene leke diidza ki Diidza La'ay kie' Dios.

³ Len ruseedx'la'a'ne kieke ki le' Cristo ben bayuudx gutie', len lekz'ka' bubaane lu yëla gut. Ki' rne': —Larakz Jesús bënni'a rui'leena lbi'ili diidza ni, le' nake le' Cristo.

⁴ La'ke bënni Judea gulayajle'ke, len guladzaage Pablo len Silas. Lekz'ka' gulayajle'ke zian'ke bënni griego bënni tayiijilaadxi'ke Dios, len lekz'ka' ziank'nu nguul blou.

⁵ San le ni ben ga bënni Judea, bënni'a ti tayajle'ke guladza'a ikj'ke len gulutzaage yugu bënni xhe'e, bënni tadáke la nëëz tua'tuyuuze bi rak naar lutzatze bënni yëdz ni len labekie gdil. Len guladxiine liidxe Jasón tugiilje Pablo len Silas naar labiaj'ke leke yu'u len lunëëdzje leke lu naa'ke bunach;

⁶ ati kati ti guludzëël'de leke na', gulagie'le'e Jasón na'ij'ke le' len ye la'ke bënni bë'chi'ru len guluche'ke leke lau'ke bënni tunabe'ke yëdz'a, len guluskua'ke: —¡Bënni ni, nak'ke bënni'a tadáke ruzbë' gdu yëdz'lyu, ati na'a chi guladxiine ni,

⁷ len Jasón nuleebe leke liidxe! ¡Yugute'ke bënni ni tudabaaga'ke xhba kie' César, koma tanáke ki tuuze Jesús nake bënni rnabe'e yëdz'lyu len tir yu'e ye tue'!

⁸ Kati gulayëën'de le ni, bunach'a len bënni'a tunabe'ke'a gulabë'ke bagi'i.

⁹ Ati Jasón len bënni'a ye la'ke'a guludxia'ke dumi, len gulusaane leke.

Tagixhjë'ke Diidza La'ay lu yëdz Berea

¹⁰ Chi'dzë'ël'a, bënni bë'chi'ru'a gluune lu bayuudx ga Pablo len Silas tzjak'te'ke yëdz Berea. Guladxin'ze ni', yajak'te'ke lu yu'u useed kieke bënni Judea.

¹¹ Bënni Judea ni nakr'ke bënni tzawi ka bënni Tesalónica, len gdu laadxi'ke gulazi'ke xhtiidze'e Xan'ru, len yugu dza tuseede diidza la'ay kie' Dios naar lak'be'i'de xhki ba nak lea te'ke leke.

¹² Ka' guk gulayajle'ke bënni zian, len lekz'ka' gulayajle'ke zian'ke bënni griego, ley bënni ley nguul blou.

¹³ San kati bënni Judea nakua'ke Tesalónica gulanëëz'de ki Pablo rgixhjë'e diidza la'ay kie' Dios lekz'ka' lu yëdz Berea, yajake ni' len gulazulau'ke tutzatze len tun'gan'de bunach.

¹⁴ San bënni bë'chi'ru'a gluune ga Pablo ziuub'ze grooje zga ra nis xhën, tzal'za Silas len Timoteo gulaga'ane Berea.

¹⁵ Bënni'a zjak'leene le' Pablo yajua'te'ke le' yëdz't Atenas. Chi nak ka' ye'wake len gulagixhji'de Silas len Timoteo ki tzjak'te'ke ga zue' Pablo.

Pablo lu yëdz Atenas

¹⁶ Tzal Pablo rbëëze Silas len Timoteo lu yëdz Atenas, bui'i'ni'tzki'de kati ble'i'de ki yëdz ni nadze'iz budou'.

¹⁷ Lena'a rui'leene diidza bënni Judea lu yu'u useed kieke, len ye la'ke bënni tayiijilaadxi'ke Dios, len yugu dza raje'leene diidza yugu bënni tudzaage lu ye'i.

¹⁸ Lekz'ka' la'ke bënni tadaani'tzki'de luseede len nak'ke bënni epicúreos len estoicos gulazulau'ke tui'leene le' diidza. La'ke tanáke: —¿Bixhkz diidza rue'e bënni'a rde' ruzbë' ni? Ati ye la'ke tanáke: —Naadx bënni rde' ruune lban kieke dios yubl. Le ni tanáke koma Pablo leke diidza kub dxia'a kie' Jesús len ki yëla ruban lu yëla gut.

¹⁹ Na' guluche'ke le' lu Areópago ga tudzaag bunach, len gulunaab'de le': —¿Gunn kixhji'du netu bixhkz diidza kub'a nu'u kietu?

²⁰ Koma rui'leenu netu diidza le ti nëëzi'tu, ati re'eni'tu gnëëzi'tu bixh re'e'ni gna.

²¹ Koma bënni yëdz Atenas ni, len ye la'ke bënni yëdz yubl nakua'ke na', tadaani'tzki'de layëën'de nu bi rna len lui'ke diidza ki yugu le kub le takgak.

²² Pablo gzui'de ladj'ke'a lu Areópago, len gudxe leke: «Bënni yëdz Atenas, ka neda rle'i'da, nak'tzka'li bënni riijilaadxi'tzka'li dios.

²³ Koma tzka chi ble'i'da gap riijilaadxi'li, budzëël'da tu pkuugu le nayoj diidza ni: “Kie' tue' Dios nutunu numbe' Le'”. Na'a, le lbi'ili riijilaadxi'li zala ti numbe'li, ley za'a rgixhji'da lbi'ili neda.

²⁴ »Le' Dios ni beene yëdz'lyu, len yugute' le nakua', nake Xaani yewayuba len yëdz'lyu. Len ti zue' lu gdou' le nun'ke bënni bunach,

²⁵ len ti nakiini'de nu bi gun kie', koma Le' runne ki yugute'ru yëla naban, bë' le rzi'ru len yugu le nayaadzji'ru.

²⁶ »Kie' tuuze bënni beene ga zakgak yugute' yëdz, naar lakua'ke gdu yëdz'lyu; len beene gaxh'tek lakua'ke ati gakaxh lakua'ke yëdz'lyu,

²⁷ naar lugiilje Dios, naxhka, xhki gunn ludzëël'de Le' tzka lagan'lazëën'ze ka', zala le nak'te, Dios ti zue' zitu kieeru tu tu'ru.

²⁸ Koma nia'a kie' Dios naban'ru, rdaaru len nak'ru nu nak'ru; ka chi gulanake lekz'ka' bënni guluzooje kieeli ni: “Nak'ru dia'dza kie' Dios.”

²⁹ Na'a xhki nak'ru ka nake Dios, ti rala guuni ro'u ki Dios nake ka nak budou' le oro, le plata u le giaj le tagiilj'laadxi'ke bënni bunach tun'ke.

³⁰ Dios chi bdëëd'ze ka' le chi glun bunach kati ku nëëzi'kde, san na'a Le' rnabe'i'de yugute'ke, gdu'te yëdz'lyu, ki lubi'i'laadxi'ke len Le'.

³¹ Koma Dios chi nuune tu dza kati kchuug'be'e ki yëdz'lyu len yëla rbë'xhbei dxia'a, lu ne'e tue' bënni Le' grëe'; len le ni chi benn'be'e kati buspaane le' lu yëla gut.»

³² Kati gulayëën'de diidza ki yëla ruban lu yëla gut, la'ke gulaxhiidxe len ye la'ke gulanake: —Na' gunn ni gui'ru diidza'a.

³³ Na' Pablo pka'ane leke.

³⁴ San la'ke yajak'leene le' len gulayajle'ke. Ladjke'a nutze'e Dionisio, tue' bënni nabaabe lu Areópago, len lekz'ka' tuunu nguul leenu Dámaris, len ye la'ke.